NƐHƖMAAYA 8 - WƖA TENIŊ

¹ Nɩalɩŋ kala kʋ hilimi ba jaŋ dɩ-hilimiŋ arɩ nii-bala, Lɩɩŋ Boi-baal-la leriŋ. Ŋɩɩ nɛ ba bʋla pɩ Ɛzɩra sɩ ŋaa Wɩa tenniŋ kerichi, dɩ ʋ kɛŋ Wɩa wombiiŋ teŋ-la La TƖƖNA sɩ to Mosis lɛ a joŋo pɩ ba Iziral tɩŋŋaa kaa kʋ lɩɩ.

² Ŋɩɩ nɛ chɛŋ-pɛɩ tapʋl-bumbuŋ, Ɛzɩra sɩ ŋaa Wɩɩsʋllɩ sɩpaalaara kɛŋ teŋ-la kɔ nɩalɩŋ sɩ hilime sɩpaaŋ. Nɩalɩŋ fa ŋaa baalaa arɩ haalaa nɛ, a pɛ hambiisi-la sɩ waa a jaŋ wuo jɩŋ wɩaa sɩaa lɛ.

³ Ʋ chɩŋ ba jaŋ dɩ-hilimii-la lɛ, Lɩɩŋ Boi-baal-la leriŋ nɩalɩŋ sɩpaaŋ a faasa karɩmɛ teŋ-la ʋ lɩɩ, a chɩŋ chʋchʋɔŋ a kaa mʋ wɩɩhɛyɛ, ka nɩalɩŋ kala kpil dɩgɩlaa a jijegili.

⁴ Ba fa kɛŋ daasɩŋ nɛ a ŋaa kʋŋ ʋ sii je wɩɩ-la wɩaa, Ɛzɩra Wɩa teniŋ kerichi-la jɩla chɩŋ ʋ nyuŋ. Matɩtɩa, Sɛma, Anaaya, Yuria, Hɩlɩkaaya arɩ Maasɛya nɛ fa chɩŋ ʋ nadiiŋ sɛmɛ, ka Pedaaya, Mɩsɩɛl, Malɩkɩja, Hasum, Hasɩbadana, Zɛkarɩya arɩ Mesulam ma chɩŋ ʋ nagʋa sɛmɛ.

⁵ Ɛzɩra fa sɩ chɩŋ kʋ-la nyuŋ a je kɩɩ nɩalɩŋ kala ŋɩɩ, ba kala sɩaa fa pɛ ʋ lɛ nɛ. Ʋ sɩ kɛŋ teŋ-la suri, nɩalɩŋ kala sii chɩŋ.

⁶ Ɛzɩra dɛnnɛ La TƖƖNA sɩ ŋaa Wɩɩ-balɩŋ, nɩalɩŋ kala kɛŋ ba nɩsaa je aŋ laa bʋl, “Amɩɩ, Amɩɩ.” Ŋɩɩ nɛ ba tuu kpirimi a kɛŋ nyusuŋ chugili tinteeŋ a chʋɔlɛ La TƖƖNA.

⁷ Ŋɩɩ nɛ aŋ sii chɩŋ Levi doho nɩaa deemba dagɛ Wɩa wombie-la bʋbʋɔŋ a pɩba: Jesua, Banɩ, Sɛrɛbɩa, Jamɩŋ, Akub, Sabɛtaɩ, Hodia, Maasɛya, Kɛlɩta, Azarɩa, Jozabad, Hanaŋ arɩ Pɛlaaya.

⁸ Ba fa karɩmɛ Wɩa wombiiŋ teŋ-la ʋ tʋʋlɛ nɛ woruŋ aŋ dagɛ wɩalɩŋ bʋbʋɔŋ dɩ nɩalɩŋ wuo jɩŋ.

⁹ Nɩalɩŋ sɩ nɩɩ Wɩa wombii-la, ba yaraa vɛŋ ba suomo yiyel. Ŋɩɩ nɛ Nɛhɩmaaya sɩ ŋaa ba tinteeŋ nɩhɩaŋ, Ɛzɩra, Wɩɩsʋllɩ sɩpaalaara, aŋ pɛ ŋaa Wɩa teniŋ kerichi arɩ Levi doho nɩalɩŋ sɩ dagɛ wɩalɩŋ bʋbʋɔŋ pɩpɩ nɩalɩŋ bʋla pɩba, “Jɩnɩŋ ŋaa tapʋl-zɔŋ nɛ a pɩ ma TƖƖNA Wɩa, ŋɩɩ wɩaa ma bɩ maga dɩ ma yel koo dɩ ma tʋɔŋ chei.”

¹⁰ Nɛhɩmaaya bɩra bʋla pɩba, “Má mʋ dii kʋdii-sɩŋŋaa, a nyʋa sɩ-zɔmʋŋ aŋ ŋaa dɔnsʋŋ mʋ pɩ nɩalɩŋ sɩ bɩ kʋŋ kɛnɛ. Jɩnɩŋ ŋaa tapʋl-zɔŋ nɛ a pɩ La TƖƖNA. Má sɩ́ leŋe dɩ ma tʋɔŋ chei, bɛɛ wɩaa tʋɔtɔrʋ-la ma sɩ kɛnɛ La TƖƖNA lɛ ʋ nɛ ŋaa ma doluŋ.”

¹¹ Levi doho nɩaa nyagɛ nɩalɩŋ bɔyɛ a bʋl, “Má leŋ dɩ ma yaraa pɛ dɔŋɔ lɛ, jɩnɩŋ ŋaa tapʋl-zɔŋ nɛ. Má sɩ́ leŋe ma tʋɔŋ chei.”

¹² Ŋɩɩ nɛ nɩalɩŋ kala mʋ dɩ ba dii kɩaa aŋ nyʋa kɩaa a gbieli arɩ tʋɔtɔrʋŋ, aŋ pɛ ŋaa kʋdiile-la pɩ ba dɔnsʋŋ tɩŋŋaa, bɛɛ wɩaa ba nɩɩ wɩalɩŋ kala ba sɩ karɩma pɩba sɩaa nɛ.

¹³ Tapʋl-lɩa chɛɛŋ, dɩa dɩa nɩhɩasɩŋ kala a pɛ Wɩɩsʋllɩ sɩpaalaaraa arɩ Levi doho nɩaa lɛ, kʋ hilimi Ɛzɩra sɩ ŋaa Wɩa teniŋ kerichi teeŋ dɩ ba gʋnnɛ Wɩa wombii-la ʋ sɩ bile dɩ la tuto.

¹⁴ Ba na Wɩa wombii-la La TƖƖNA sɩ to Mosis lɛ a joŋo pɩba tʋɔŋ, dɩ Wɩa daga arɩ Iziral tɩŋŋaa maga dɩ ba jʋʋ lɛŋŋɛɛ nɛ, gbiele-la ba sɩ jaŋ gbieli chɛŋ-pɛɩ-la tʋɔŋ.

¹⁵ Ba bɩra na arɩ ʋ maga ba heele bʋl Jerusalɛm arɩ ba tasɩŋ kala lɛ a bʋl, “Má jɩl dundolluŋ nyuŋ a bori olif pɩpaarɩŋ, chɛɛŋ pɩpaarɩŋ, abɛ pɩpaarɩŋ arɩ tɩɩsɩŋ dɔnsʋŋ pɩpaarɩŋ sɩ yʋga a kaa kʋ hɛ lɛŋŋɛɛ, arɩ ba sɩ ŋmʋnsɛ ŋɩɩ Wɩa wombiiŋ teniŋ tʋɔŋ.”

¹⁶ Ŋɩɩ nɛ nɩalɩŋ mʋ chɛ pɩpaarɩ-la kaa kɔ hɛ lɛŋŋɛɛ pɩ ba tɩtɩa ba lusunuŋ nyuŋ, ba kaalɩsɩŋ lɛ, Wɩa dɩa kaalɩsɩŋ lɛ, ba jaŋ dɩ-hilimiŋ Lɩɩŋ Boi-baal-la leriŋ, arɩ dɩ-hilimii-la dɔŋɔ ma sɩ hɛ Efirem Boi-baalɩŋ lɛ.

¹⁷ Nɩalɩŋ kala fa sɩ mɩɩra lɩɩ yoŋ-baga kɔ hɛ lɛŋŋɛɛ a jʋjʋʋ. A lɩɩ bʋa-la lɛ Nuŋ nanʋala Josua fa sɩ hɛ nɩmɛ a kaa kɔ tapʋlɩɩ-la, Iziral tɩŋŋaa fa bɩ gbiele-la ŋɩɩ gbiele. Ba tʋɔŋ fa chaasa tɔrɛ nɛ woruŋ.

¹⁸ Tapʋlɩa-la kala, a chɩŋ tapʋl bumbuŋ kaa mʋ yi tapʋlɩa-la dɩdɛrɩŋ, Ɛzɩra karɩmɛ Wɩa wombiee teŋ-la nɛ. Ba fa gbieli gbiele-la tapʋlaa balɩpɛ nɛ, tapʋl-chori chɛɛŋ, ba hilimi arɩ Wɩa wombiiŋ teniŋ sɩ dagɛ ŋɩɩ.