NƐHƖMAAYA 6 - WƖA TENIŊ

Nɩaa ha bɩra pɔ dɩ ba sɩ́ jebii-la wasa saa

¹ Sambalat, Tobia, Arab tɩŋŋaa Gesem arɩ la dʋndɔmɔ-la kala nɩa dɩ mɩ wasa saa Jerusalɛm jebii-la kala wuol bɩ ka. Ama mɩ fa ha bɩ borusuŋ hɛ boi-baal-la lɛ.

² Ŋɩɩ nɛ Sambalat arɩ Gesem tɩŋ tɩndaarɩŋ deeŋ pɩmɛ: “Kɔ dɩ la cheŋ dɔŋɔ tabiisi-la dɔŋɔ sɩ hɛ Ono tintee-taala-la lɛ.” Ama ba faa chɛ wombiiŋ nɛ dɩ ba ŋaamɛ wʋbɔŋ.

³ Ŋɩɩ nɛ mɩ tɩŋ nɩaa ba mɩɩra kɛŋ duoso deeŋ mʋ pɩba: Mɩɩ tɩŋ tɩntɩŋ-fɩaŋ nɛ mɩ bɩ jaŋ wuo kɔ. Mɩ bɩ jaŋ wuo vɩa tɩntɩmɩɩ-la ta aŋ kɔ ma teeŋ

⁴ Naansɩɩŋ bʋnɛsɛ nɛ ba tɩŋ tɩndaarɩ-la tɩtɩa a pɩmɛ. Bʋa na-kala mɩ ma yie bʋl ŋɩɩ tɩtɩa a pɩba.

⁵ Nɔŋ lɛ nɛ, Sambalat tɩŋ nɩɩ-la sɩ tɩma pʋpʋ ʋ kɔ mɩ teeŋ arɩ tɩndaarɩ-la tɩtɩa, aŋ kori teniŋ ba sɩ ŋmʋnsa a bɩ magɩlɩŋ hɛ.

⁶ Teŋ-la tʋɔŋ ŋ-la nɛ ba ŋmʋnsa hɛ: “Tinteyee tʋɔŋ nɩaa ka bʋl, arɩ ŋ dɩ Juu tɩŋŋaa ka vʋʋrɛ nɛ dɩ ma hɛ yuosuŋ, ŋɩɩ nɛ tɩɩ ma wasaa saa jee-la ŋɩɩ. Ba bɩra bʋla arɩ ŋŋ chɛ ŋ ŋaa ba kuoro nɛ, Gesem ma bʋl arɩ wʋtɩtɩɩ nɛ.

⁷ Ŋ paala lɩɩsɛ Wɩa wʋlaabʋllaa nɛ ba heele bʋl Jerusalɛm lɛ, arɩ ŋ nɛ ŋaa Juda tinteeŋ kuoro. Wɩɩŋ deeŋ saa jaŋ jʋʋ Pɛsɩa tinteeŋ kuoro dɩgɩlɩŋ, ŋɩɩ wɩaa kɔ dɩ la bʋl wɩɩ-la a hɛ dɔŋɔ.”

⁸ Mɩ mɩɩra bʋl ŋ-la a pʋ: “Wɩalɩŋ ŋ sɩɩ bʋl kala ŋaa wʋnyɩɛrɩŋ nɛ. Ŋ tɩtɩa tʋɔbɩɩnaa nɛ ŋ bʋbʋl ŋɩɩ.”

⁹ Ba kala faa nɛrɩgɛ dɩ ba fugisila nɛ, dɩ la nandaasɩŋ yʋɔrɛ tɩntɩmɩɩ-la lɛ, dɩ la sɩ́ wuo dɛrɛ. Ama mɩ sʋl Wɩa a bʋl, “Wɩa, pɩmɛ doluŋ.”

¹⁰ Tapʋlɩɩ kʋbala mɩ mʋ Sɛmaaya dɩa. Sɛmaaya fa ŋaa Delaaya nanʋala nɛ, aŋ ŋaa Mɛhɛtabɛl ma nihiŋ, ʋ fa hɛ dɩa lɛ nɛ ʋ bɩ lɩɩ. Ʋ bʋl, “Leŋ mɩ dɩŋ mʋ faa Wɩa dɩɩ-balɩŋ tʋɔŋ a kɛŋ ʋ boyee tɔ, bɛɛ wɩaa nɩaa nɩɩ kɔ dɩ ba kpʋŋ. Tɩtaŋɩŋ baa kɔ dɩ ba kpʋŋ nɛ.”

¹¹ Ama mɩ bʋla pʋ, “Bɛɛ nɛ tɩɩ mɩ-na baala sɩ magɛ ŋ-la jaŋ fá fɩfaa? Bɛɛ nɛ tɩɩ mɩ jaŋ jʋʋ faa Wɩa dɩɩ-balɩŋ lɛ dɩ mɩ laa mɩ mɩɩsɩŋ? Mɩ bɩ mʋ.”

¹² Mɩ jɩma arɩ Wɩa dee bɩ ʋ tɩma, ama Sambalat arɩ Tobia nɛ kpalʋ ka dɩ ʋ nyɩsɛmɛ arɩ wɩaa deemba.

¹³ Ba kpalʋ nɛ ka dɩ ʋ bʋl wɩaa a yʋɔrɛ mɩ nandaasɩŋ dɩ ŋɩɩ leŋ dɩ mɩ ŋaa wʋbɔŋ, dɩ ba to ŋɩɩ lɛ a chei mɩ yɩrɩŋ a hɩɩsɩ mɩ.

¹⁴ Ŋɩɩ nɛ mɩ chʋɔlɛ Wɩa a bʋl, “Mɩ Wɩa, liisi wɩalɩŋ Tobia arɩ Sambalat sɩ ŋaa, liisi haal-la sɩ ŋaa Wɩa wʋlaabʋllʋ baa yɩrɛ Nʋadɩa arɩ Wɩa wʋlaabʋlla-la dɔnsʋŋ kala sɩɩ chɛ dɩ ba fugusimi wɩaa.”

Ba saa kɛrɛ-la dɛrɛ

¹⁵ Jee-la saanɩŋ dɛrɛ chɛnɛ-la ba sɩɩ yɩrɛ Ɛlʋl tʋɔŋ nɛ, ʋ tapʋlaa mara arɩ banɔŋ chɛɛŋ. Tapʋlaa mahɩŋ balɩa arɩ fii arɩ balɩa nɛ ba joŋo saa jee-la.

¹⁶ La dʋndɔŋŋɔɔ sɩ hɛ tinteye-la kala sɩ gollila lɛ a nɩɩ wɩɩŋ deeŋ, fawʋllʋŋ kɛmba ba yɩɛlaa kala lɛl, bɛɛ wɩaa ba jɩma arɩ la Wɩa nɛ pɛ la lɛ la tɩŋ tɩntɩmɩŋ deeŋ.

¹⁷ Bʋa-la kala lɛ, Juda tinteeŋ nɩbalaa fa ŋmʋnsɛ tenniŋ yʋgɛ nɛ a pɩpɩ Tobia. Tobia ma laa aŋ ŋmʋnsa pɩpɩba.

¹⁸ Nɩaa fa yʋga Juda tinteeŋ lɛ sɩ hɛ niiŋ ʋ teeŋ, a tɩŋ ʋ sɩ ŋaa Ara nanʋala Sɛkanɩa hɩɩlɩ-baala wɩaa. Ʋ nanʋala Jehohanaŋ ma fa jaa Bɛrɛkɩa nanʋala Mesulam tolo nɛ.

¹⁹ Ba yie bʋl wʋzɔmɔ-la Tobia sɩ ŋaa a pɩpɩmɛ aŋ bʋl wɩalɩŋ mɩ ma sɩ bʋla a pʋpʋ. Ŋɩɩ nɛ Tobia ŋmʋnsɛ tenniŋ aa fugusimi.