NƐHƖMAAYA 5 - WƖA TENIŊ

Nɛhɩmaaya pɛ summoo lɛ

¹ Bʋa kʋbala lɛ baalaa arɩ ba haalaa sii ŋmoo niiŋ a mʋ tɩgɛ ba naambiiriŋ Juu tɩŋŋaa dɔnsʋŋ lɛ.

² Ba dɔnsʋŋ sɩ, “La dɩ la biiriŋ yʋga, laa chɛ mɩaa nɛ dɩ la dii a kɛŋ mɩɩsɩŋ.”

³ Dɔnsʋŋ ma bʋl, “La joŋ la bagɩsɩŋ, girep tɩɩsɩŋ bagɩsɩŋ arɩ la dɩɩsɩŋ nɛ aa bil bʋbʋɔŋ ka dɩ la wuo na kʋdiilee dɩ losuŋ sɩ́ la kpʋ.”

⁴ Dɔnsʋŋ ma ha bʋl, “La yie chɩŋ moribiee nɛ a tiŋ la bagɩsɩŋ arɩ la girep tɩɩsɩŋ bagɩsɩŋ lampooba a pɩ kuoro.

⁵ La ma ŋaa Juu tɩmma nɛ arɩ la naambiiri-la dɔnsʋŋ sɩ ŋaa ŋɩɩ. La biiriŋ zɔmɔ nɛ arɩ ba biiriŋ sɩ zɔmɔ ŋɩɩ, ama wɩaa jʋʋla a magɛ dɩ la leŋ dɩ la biiriŋ ŋaa yosi nɛ. La toloo dɔnsʋŋ paala ŋaa yosi nɛ, ama la bɩ dol kala kɛnɛ, bɛɛ wɩaa nɩaa dɔnsʋŋ nɛ tɩɩ bagɩsɩŋ arɩ la girep tɩɩsɩŋ bagɩsɩŋ.”

⁶ Mɩ sɩ nɩɩ ba nii-ŋmobo arɩ ŋɩɩ ba sɩ ŋmɛnɛ, mɩ baanɩŋ chaasa sii woruŋ.

⁷ Mɩ kɛŋ wɩalɩŋ bɩɩnɛ mɩ tʋɔŋ lɛ, aŋ bʋl tinteeŋ nɩbala-la arɩ tɩntɩnnɩ-hɩasɩ-la teeŋ. Mɩ bʋla pɩba, “Maa laa nyʋʋrʋŋ nɛ ma naambiiriŋ tɩtɩa teeŋ.” Ŋɩɩ nɛ mɩ yɩrɛ hilim-bal dɩ mɩ chaasa bʋl ba teeŋ.

⁸ Mɩ sɩ, “Lɛɛlɛ, la hɛ doluŋ nɛ aŋ mɩɩra time lɩlaa la Juu tɩmma-la dɔnsʋŋ sɩ joŋ ba tɩtɩa yalla pɩ tintee-wogusuŋ nɩaa. Lɛɛlɛ ma tɩtɩa mɩɩra fʋgɛ ma naambiiriŋ nɛ dɩ ba joŋ ba tɩtɩa yalla pɩma.” Sɩpaa-laara-la kala tɔrɛ ba niiŋ bɛɛ wɩaa ba bɩ wɩɩ kɛnɛ dɩ ba bʋl.

⁹ Ŋɩɩ nɛ mɩ bɩra bʋl, “Wɩɩ-la ma sɩɩ ŋaa, ʋ bʋa lɛ dee ŋɩɩ. Ma maga má fá Wɩa nɛ aŋ ŋaa wɩaa ba bʋa lɛ, dɩ tinteye-la sɩ bɩ Wɩa ka to aŋ ŋaa la dʋndɔmɔ sɩ́ wuo na wombiiŋ a sieri la lɛ.

¹⁰ Mɩ dɩ mɩ naambiiriŋ arɩ mɩ tɩntɩnnaa ma joŋ moribiee arɩ mɩaa chɩchɩŋ nɩalɩŋ nɛ. Lɛɛlɛ, má leŋ dɩ ma nyʋʋrɩɩ-la laanɩŋ dɛrɛ.

¹¹ Má ŋaa lɩma a joŋ ba bagɩsɩŋ, ba girep tɩɩsɩŋ bagɩsɩŋ, ba olif tɩɩsɩŋ arɩ ba dɩɩsɩŋ pɩba, a pɛ nyʋʋrɩ-la kala ma sɩ laa ba teeŋ, moribiee, mɩaa, girep nɛnɛɛ sɩnɩŋ arɩ nʋʋŋ.”

¹² Nɩalɩŋ ma bʋl, “La jaŋ mɩɩra joŋ kɩalɩŋ pɩba. La bɩra bɩ jaŋ laa kʋŋkala ba teeŋ.” La jaŋ ŋaa ŋɩɩ ŋ sɩ bʋla. Ŋɩɩ nɛ mɩ yɩrɛ Wɩɩsʋllɩ sɩpaalaaraa, a leŋ nɩbala-la arɩ tɩntɩnnɩ-hɩasɩ-la ŋmɩɛsɛ arɩ ba jaŋ ŋaa wɩɩ-la ba sɩ bʋla.

¹³ Ŋɩɩ nɛ mɩ kɛŋ mɩ gɛrɩpɛ jalɩɩ-la sɩ vɔɔ mɩ tɩŋa puri a kaa kpesi aŋ bʋl, “Ŋ-la nɛ Wɩa jaŋ kɛŋ ma kʋŋkala sɩ jaŋ vɩa dɩ ŋ to niiŋ deeŋ a kpese ta. Wɩa jaŋ laa ŋ dɩa arɩ ŋ dʋa kala ka dɩ ŋ kɛŋ na-hɩllɩŋ.” Nɩalɩŋ kala sɩ hilimi lee-la bʋl, “Amɩɩ,” aŋ dɛnnɛ La TƖƖNA. Ŋɩɩ nɛ sɩpaalaara-la kɛŋ wɩɩ-la ba sɩ bʋla tɩŋ.

¹⁴ Bʋa-la lɛ ba sɩ lɩɩsɛmɛ mɩ ŋaa Juda tinteeŋ nɩhɩaŋ, dɩ kuoro Atazɛzɛs ma sɩ dii kuoruŋ ʋ jɩsɩŋ mara lɛ nɛ ŋɩɩ. Ʋ sɩ mʋ yi jɩsɩŋ mara arɩ fii arɩ balɩa lɛ, dɩ mɩ ma sɩ ŋaa Juda tinteeŋ nɩhɩaŋ ʋ jɩsɩŋ fii arɩ balɩa lɛ nɛ ŋɩɩ. Bʋa-la lɛ mɩ dɩ mɩ naambiiriŋ kʋŋkala bɩ leŋe ba kɛŋ kɩalɩŋ ba sɩ yie joŋo pɩ tinteeŋ nɩhɩaŋ kʋ pɩla.

¹⁵ Ama nɩalɩŋ sɩ laa sɩpaaŋ ŋaa tintee-la nɩhɩasɩŋ aŋ ka pɩmɛ joŋ wʋdaŋ nɛ a nyagɛ nɩalɩŋ nyuŋ. Tapʋlɩɩ kala ba yie laa warɩpʋla mahɩŋ balɩa nɛ, a pɛ ba kʋdiilee arɩ ba girep nɛnɛɛ sɩnɩŋ lɛ. Nɩalɩŋ sɩɩ tɩgɛ ba lɛ ma joŋ wɩaa nyagɛ nɩalɩŋ nɛ. Ama a tɩŋ mɩ sɩɩ fá Wɩa, mɩ bɩ ŋɩɩ ŋaa.

¹⁶ Mɩ joŋ mɩ tɩtɩa kala hɛ jebii-la saanɩŋ lɛ nɛ, mɩ bɩ tintee kala yɔbɔ. Mɩ nɩalɩŋ kala sɩ tɩmaa pɩmɛ kʋ hɛ dɔŋɔ nɛ a ma tɩŋ jebii-la tɩntɩŋŋaa.

¹⁷ Juu tɩŋŋaa zɔlɔ arɩ mahɩŋ balɩa arɩ fii a pɛ tɩntɩnnɩ-hɩasɩŋ lɛ paala didii kɩaa mɩ dɩa lɛ nɛ, a saa pɛ nɩalɩŋ sɩ lɩɩ tinteye-la sɩ golli-la a kɔ lɛ.

¹⁸ Tapʋlɩɩ kala mɩ yie lɩɩsɛ nɛ-fere, pie-zɔŋŋɔɔ balɩdʋ, a pɛ jiŋŋee lɛ ba ŋaa kʋdiilee pɩla. Tapʋlaa fii na-kala pɛgɛ, mɩ yie chɛ girep nɛnɛɛ sɩ-falɩŋ nɛ a yʋgɛ woruŋ. Arɩ mɩ sɩɩ ŋaa wɩaa deemba ma kala, mɩ ha bɩ pɩɛsa bʋl nɩalɩŋ pɩmɛ kʋdiile-la sɩ maga dɩ tinteeŋ nɩhɩaŋ laa, bɛɛ wɩaa mɩ jɩŋ ŋɩɩ wɩaa sɩ nyagɛ nɩalɩŋ nɛ.

¹⁹ Mɩ Wɩa, liisi mɩ wɩaa aŋ pɛ mɩ lɛ a tɩŋ wɩalɩŋ kala mɩ sɩ ŋaa pɩ nɩaa deemba.