NƐHƖMAAYA 4 - WƖA TENIŊ

Nɩalɩŋ sɩ pɔ dɩ ba sɩ́ jebii-la wasa saa

¹ Baal kʋbala ba sɩɩ yɩrɛ Sambalat sɩ nɩa dɩ la wasa paa jebii-la a sɩsaa nɛ, ʋ baanɩŋ chaasa sii woruŋ, ʋ sisieri la-na Juu tɩŋŋaa lɛ

² a bʋl ʋ dɩ nɩalɩŋ sɩɩ tɩŋ arɩ Samarɩa laalɩyuori hɩasɩŋ sɩpaaŋ, “Bɛɛ kɩaa wɩaa nɛ Juu tɩŋŋaa nɩpʋgʋnʋŋ deemba ŋɩŋaa ŋɩɩ? Ba jaŋ wuo wasa saa ba jebii-la a kpʋ pʋsʋŋ a ŋaa Wɩɩ-sʋlaa? Ba bɩɩna ba jaŋ wuo saaʋ dɛrɛ tapʋl bala koo? Ba bɩɩna ba jaŋ wuo kuusi tabɩa-la arɩ nyiniŋ sɩ diiba ma kala koo?”

³ Bʋa-la lɛ dɩ Tobia sɩ ŋaa Amɔŋ tɩɩna ma fa chɩŋ Sambalat sɛmɛ, a bʋl, “Kʋ-la ba sɩɩ saa, dɩ jolo ma nɛ paala jɩlʋ, ʋʋ bori ʋ tel nɛ.”

⁴ Ŋɩɩ nɛ mɩ sʋl Wɩa a bʋl, “La Wɩa, nɩɩ, ba bee muurila nɛ, leŋ dɩ jomo-la ba sɩ tʋʋsɛla gʋra dɛrɛ ba nyuŋ lɛ. Leŋ dɩ nɩaa kʋ laa ba kɩaa aŋ kɛsɛba mʋ tintee-wogo dɩ ba ŋaa yosi.

⁵ Sɩ́ ba wʋcheelee joŋo chɛba koo a yʋ ba wʋbɔŋŋɔɔ wɩaa, bɛɛ wɩaa ba tʋʋsɛ la nɩalɩŋ sɩɩ saa jebii-la nɛ.”

⁶ Ŋɩɩ nɛ la wasa saa jebii-la ŋɩɩ a mʋ yi ʋ leŋiŋ kpaa-magɛ dɔŋɔ, bɛɛ wɩaa nɩalɩŋ chaasa tɩŋ nɛ arɩ ba tʋɔŋ kala.

⁷ Ama Sambalat, Tobia, Arab tɩŋŋaa, Amɔŋ tɩŋŋaa arɩ Asɩdɔd tɩŋŋaa sɩ nɩa arɩ Jerusalɛm jebii-la saanɩŋ ka mʋ sɩpaaŋ, wuolo-la kala sɩ hɛ jebii-la lɛ tʋtɔ, ba baanɩŋ sii woruŋ.

⁸ Ba kala vʋʋrɛ dɩ ba kʋ hɛ yuosuŋ Jerusalɛm lɛ a kɛŋ wɩaa vʋgʋmɛ.

⁹ Ŋɩɩ nɛ la ma sʋl la Wɩa, aŋ lɩɩsɛ nɩaa ba pʋpɔ leriŋ tɩtaŋɩŋ arɩ wɩɩhɛyɛ kala a mʋ tɩgɛ wɩɩ-la ba sɩ vʋʋra lɛ.

¹⁰ Ama Juda nɩaa sɩ, “Tɩntɩnnaa doluŋ kala dɛrɛ nɛ, ka tabɩaa arɩ tɩɛrɩŋ ma daŋ dɔŋɔ lɛ yʋgɛ. Ŋɩɩ leŋ la bɩ jaŋ wuo wasa paa jebii-la saa.”

¹¹ La dʋndɔŋŋɔɔ ma bʋl, “Juu tɩmma-la jaŋ kʋ jɩjɩŋ koo a nɩnala dɩ la hɛ ba tʋɔŋ a kpʋba, ka dɩ tɩntɩmɩɩ-la birigi.”

¹² Ŋɩɩ nɛ la Juu tɩmma-la dɔnsʋŋ sɩ jʋʋ kpɩkpagɛba kʋ lɔgɔ pɩla bʋlɩa bʋlɩa wɩalɩŋ ba sɩ vʋʋra tɩgɛ la lɛ.

¹³ Ŋɩɩ nɛ mɩ leŋ nɩalɩŋ nyɩgɩlɛ a kori tokobiee, tiŋŋee arɩ tosuŋ a chɩŋ dɩa dɩa, jebii-la lere-la ha sɩ bɩ dɛrɛ lɛ.

¹⁴ Ŋɩɩ nɛ mɩ beŋ wɩaa jim, aŋ bʋla pɩ tinteeŋ nɩbalaa, tɩntɩnnɩ-hɩasɩŋ arɩ nɩkaana-la, “Má sɩ́ leŋe dɩ fawʋllʋŋ kɛmma a tɩŋ la dʋndɔŋŋɔɔ wɩaa. Má liisi ŋɩɩ La TƖƖNA sɩ kɛŋ doluŋ, nɩaa fɩfáʋ, aŋ yuo laa ma naambiiriŋ, ma hambolibiisiŋ, ma toloo, ma haalaa arɩ ma dɩɩsɩŋ.”

¹⁵ La dʋndɔŋŋɔɔ sɩ nɩa arɩ la nɩɩ wɩalɩŋ kala ba sɩ vʋʋra a tɩgɛ la lɛ nɛ, Wɩa ma kɛŋ wɩalɩŋ kala ba sɩ vʋʋra vʋgʋmɛ, Ŋɩɩ nɛ la kala bɩra mʋ wasa sɩsaa jebii-la.

¹⁶ A chɩŋ tapʋlɩɩ-la a kaa mʋ, mɩ nɩalɩŋ kpaa magɛ dɔŋɔ nɛ yie tɩtɩŋ, ka kpaa magɛ dɔŋɔ ma nyɩgɩlɛ a kori tiŋŋee, hɔɔtaalɩ-la ba sɩ kaa kɛrɛɛ laa bayuori hɛŋŋɛɛ arɩ tosuŋ. La tɩntɩnnɩ-hɩasɩŋ kala fa chɩna pɔ la Juu tɩŋŋaa nɛ,

¹⁷ a chɩŋ nɩalɩŋ sɩɩ saa jebii-la harɩŋ. Nɩalɩŋ sɩɩ chʋŋ kɩalɩŋ ba sɩ kaa sɩsaa jebii-la fa yie kɛŋ nɩsɩŋ dɔŋɔ nɛ tɩtɩŋ aŋ kori bayuori kʋa ma nɩsɩŋ dɔŋɔ lɛ.

¹⁸ Tɩntɩnna-la kʋŋkala fa yie gɩrɩgɛ ʋ tokobiiŋ nɛ aŋ tɩtɩŋ. Ama nɩɩ-la sɩɩ ŋmʋʋ banyile-na fa hɛ mɩ teeŋ nɛ.

¹⁹ Ŋɩɩ nɛ mɩ bʋla pɩ tintee-la nɩbalaa, tɩntɩnnɩ-hɩasɩŋ arɩ nɩalɩŋ kala, “La tɩntɩmɩɩ-la jalla nɛ, ka la pɩsa golli jebii-la a bol arɩ dɔŋɔ.

²⁰ Dɩ ma nɛ nɩa ba ŋmʋʋ banyile, má fá kʋ hɛ dɔŋɔ lee-la ba sɩ ŋmʋa. La Wɩa jaŋ yuo pɩla.”

²¹ Ŋɩɩ nɛ la ha tɩtɩŋ tɩntɩmɩɩ-la, a chɩŋ chʋchʋɔ-fɩɛla a kaa mʋ yi bʋa-la lɛ chɛnwʋlaa sɩ pɔsɔ, baala-la kpaa magɛ dɔŋɔ yie chɩna pɔ nɛ a kori tiŋŋee.

²² Bʋa-la lɛ mɩ bʋla pɩ nɩalɩŋ, “Nʋʋkala arɩ nɩɩ-la sɩɩ pɛ ʋ lɛ ba tɩtɩŋ maga dɩ ma hɛ Jerusalɛm tʋɔŋ nɛ tɩtaŋɩŋ, aa pɔ leriŋ tɩtaŋɩŋ aŋ tɩtɩŋ wɩɩhɛyɛ ma.”

²³ Mɩ-na arɩ mɩ naambiiriŋ arɩ mɩ tɩntɩnna-la sɩɩ to mɩ harɩŋ a pɛ nɩalɩŋ sɩɩ pɔmɛ lɛ, la kʋŋkala bɩ la gɛnnɩŋ wuro tɩtaŋɩŋ ma. La kori la bayuori kɩaa nɛ bʋa na-kala lɛ.