NƐHƖMAAYA 3 - WƖA TENIŊ

Nɩalɩŋ sɩɩ saa kɛrɛ

¹ Ŋɩɩ nɛ Ɛlɩasɩb sɩ ŋaa Wɩɩsʋllɩ sɩpaalaaraa nɩhɩaŋ arɩ ʋ tɩntɩnnɩ dɔnsʋ-la ma sɩ ŋaa Wɩɩsʋllɩ sɩpaalaara suomi ba tɩntɩŋŋaa, a wasa paa boi-baal-la ba sɩɩ yɩrɛ Piesee boi-baalɩŋ saa. Ba joŋo pɩ Wɩa, aŋ hɛ ʋ borusuŋ a saaʋ ŋɩɩ a mʋ yi dɩɩ-leŋii-la ba sɩɩ yɩrɛ Zɔlɔ arɩ Hananɛl Dɩɩ-duduoŋ-la a joŋ ba ma pɩ Wɩa.

² Jeriko nɩaa ma nɛ saa tɩgɛ ba lɛ. Imiri nanʋala Zaku ma saa tɩgɛ Jeriko nɩaa lɛ.

³ Hasɛna hambolibiisiŋ ma nɛ wasa paa Chenfilee Boi-baalɩŋ saa. Ba hɛ ʋ daa-doloo arɩ ʋ borusuŋ a pɛ ʋ hɔɔnʋŋ lɛ arɩ daasɩ-la ba sɩ jaŋ kaa gɩgɩrɩgɛ borusu-la lɛ.

⁴ Mɛrɛmɔf sɩ ŋaa Yuria nanʋala, a ŋaa Hakɔs ma nihiŋ ma nɛ wasa saa lee-la sɩ tɩgɛ ba lɛ. Mesulam sɩ ŋaa Bɛrɛkɩa nanʋala a ŋaa Mɛsɛzabɛl ma nihiŋ ma nɛ wasa lee-la sɩ tɩga. Baana nanʋala Zadɔk ma nɛ wasa lee-la sɩ tɩgɛ Mesulam lɛ.

⁵ Tɛkʋa tɩŋŋaa ma nɛ wasa saa lee-la sɩ tɩga. Ama ba nɩbalaa vɩa dɩ ba tɩŋ tɩntɩmɩɩ-la nɩalɩŋ sɩ bemba ba tɩtɩŋ sɩ dagɛba nɛ.

⁶ Pasɩa nanʋala Joyada arɩ Besodeya nanʋala Mesulam nɛ wasa saa boi-baal-la ba sɩɩ yɩrɛ Jesana Boi-baalɩŋ. Ba hɛ ʋ daa-doloo arɩ ʋ borusuŋ a pɛ ʋ hɔɔnʋŋ lɛ arɩ daasɩ-la ba sɩ jaŋ kaa gɩgɩrɩgɛ borusu-la.

⁷ Mɛlatɩa sɩ lɩɩ Gibioŋ, Jadɔŋ sɩ lɩɩ Mɛrɔnɔf arɩ nɩalɩŋ dɔnsʋŋ sɩ lɩɩ Gibioŋ arɩ Mizipa ma nɛ wasa saa lee-la sɩ tɩga. Ba saa ŋɩɩ nɛ a mʋ yi Yufireti fuo-la wɩɩjʋʋlʋŋ dɩɩrɩŋ tinteeŋ nɩhɩaŋ dɩa.

⁸ Hahaaya nanʋala Ʋzɩɛl sɩ ŋaa sɛlɩmɛ gɔgɔ ma nɛ wasa saa lee-la sɩ tɩga. Hananaaya ma sɩ ŋaa tʋlaalɩ-ŋaarʋ ma nɛ wasa saa lee-la sɩ tɩga. Ba wasa saa Jerusalɛm ŋɩɩ nɛ a mʋ yi Je-bii Jalɩɩ-la.

⁹ Huu nanʋala Refaaya sɩɩ beŋ Jerusalɛm tinteeŋ sɛmɛ dɔŋɔ kpaa magɛ dɔŋɔ ma nɛ wasa saa lee-la sɩ tɩgɛ Hananaaya lɛ.

¹⁰ Harumaf nanʋala Jedaaya ma nɛ wasa saa lee-la sɩ tɩga. Lee-la fa kpagɛ ʋ tɩtɩa dɩa nɛ. Hasabineya nanʋala Hatus ma nɛ bɩra saa tɩgɛ Jedaaya lɛ.

¹¹ Harɩm nanʋala Malɩkɩja arɩ Pahaf-Mʋab nanʋala Hasub ma nɛ wasa saa lee-la sɩ tɩga arɩ tabʋʋ-pumoo dɩɩ-leŋii-la.

¹² Halɔhɛs nanʋala Salum sɩɩ beŋ Jerusalɛm tinteeŋ sɛmɛ dɔŋɔ kpaa magɛ dɔŋɔ ma nɛ wasa saa lee-la sɩ tɩga. Ʋ toloo ma fa pɛ ʋ lɛ ba tɩŋ tɩntɩmɩɩ-la nɛ.

¹³ Hanuŋ arɩ nɩalɩŋ sɩ hɔŋ Zanʋa lɛ ma nɛ wasa saa Fuonaaŋ Boi-baal-la. Ba saaʋ nɛ, a hɛ ʋ borusuŋ a pɛ ʋ hɔɔnʋŋ lɛ arɩ daasɩ-la ba sɩ jaŋ kaa gɩgɩrɩgɛ borusu-la. Ba fa bɩra wasa saa jebii-la naakieliŋ zɔɔ-banɛsɛ arɩ mahɩŋ balɩa nɛ, a kɛŋ ŋɩɩ mʋ yi Nɛ-bɩnɩŋ Boi-baal-la.

¹⁴ Rekab nanʋala Malɩkɩja sɩɩ beŋ Jerusalɛm sɛmɛ-la ba sɩɩ yɩrɛ Bɛf Hakerem ma nɛ wasa saa Nɛ-bɩnɩŋ Boi-baal-la. Ʋ saaʋ nɛ a hɛ ʋ borusuŋ arɩ ʋ hɔɔnʋŋ arɩ daasɩ-la ba sɩ jaŋ kaa gɩgɩrɩgɛ borusu-la.

¹⁵ Koli-Hoze nanʋala Salum sɩɩ beŋ Jerusalɛm sɛmɛ-la ba sɩɩ yɩrɛ Mizipa ma nɛ wasa saa Lɩɩ-bul-sɩɩŋ Boi-baal-la. Ʋ saaʋ nɛ a pilimi, a hɛ ʋ borusuŋ arɩ ʋ hɔɔnʋŋ arɩ daasɩ-la ba sɩ jaŋ kaa gɩgɩrɩgɛ borusu-la. Ʋ bɩra wasa saa jebii-la sɩ hɛ Sɛla fuo-la leriŋ a tɩgɛ Kuoro Gaarɩŋ lɛ, a kɛŋ ŋɩɩ mʋ yi lusuŋ-chol-sɩa-la sɩɩ lɩɩ Devit tabal-la lɛ.

¹⁶ Azibuk nanʋala Nɛhɩmaaya sɩɩ beŋ Jerusalɛm sɛmɛ-la ba sɩɩ yɩrɛ Bɛf-zuu kpaa magɛ dɔŋɔ ma nɛ wasa saa lee-la sɩ tɩga, a kɛŋ ŋɩɩ mʋ yi kuoroo dɩ-huguŋ sɩ hɛ Devit tabalɩŋ lɛ arɩ pɩl-la ba sɩ luo a pɛ bawajɩaba dɩa-la lɛ.

¹⁷ Nɩalɩŋ ma bɩra sɩ wasa saa jebii-la sɩ tɩgɛ Azibuk lɛ nɛ ŋaa Levi doho nɩaa. Banɩ nanʋala Rehum nɛ bemba ba saa. Hasabɩa sɩɩ beŋ Jerusalɛm sɛmɛ-la ba sɩɩ yɩrɛ Kɛɛla kpaa magɛ dɔŋɔ, ma nɛ laa lee-la nɩaa ʋ sɩɩ beŋ nyuŋ a saa tɩgɛ.

¹⁸ Hɛnadad nanʋala Bavaɩ sɩɩ beŋ Jerusalɛm sɛmɛ-la ba sɩɩ yɩrɛ Kɛɛla kpaa magɛ dɔŋɔ-la dɔŋɔ ma, ʋ ma nɛ wasa saa tɩgɛ.

¹⁹ Jesua nanʋala Ɛza sɩɩ beŋ ba tinteeŋ sɛmɛ-la ba sɩɩ yɩrɛ Mizipa ma nɛ wasa saa lee-la sɩ tɩga, a kpagɛ ba laalɩyuori kɩaa dɩ-biliŋ a kɛŋ ŋɩɩ mʋ yi lee-la jee-la sɩ gʋra.

²⁰ Nɩɩ-la ma bɩra sɩ wasa saa tɩgɛ ʋ lɛ nɛ ŋaa Zabaɩ nanʋala Baruk. Ʋ wasa saa lee-la nɛ arɩ sɩɩfɩɛsɩŋ a chɩŋ lee-la jee-la sɩ gʋra a kɛŋ ŋɩɩ mʋ yi Wɩɩsʋllɩ sɩpaalaaraa nɩhɩaŋ Ɛlɩasɩb dɩa boiŋ niiŋ.

²¹ Nɩɩ-la ma sɩ wasa saa tɩgɛ nɛ ŋaa Mɛrɛmɔf sɩ ŋaa Yuria nanʋala, a ŋaa Hakɔs ma nihiŋ. Ʋ ma chɩŋ Ɛlɩasɩb dɩa boiŋ niiŋ nɛ aŋ wasa saa mʋ yagɛ ʋ dɩa dɩdɛrɩŋ.

²² Wɩɩsʋllɩ sɩpaalaaraa sɩ hɛ lee-la ma nɛ wasa paa lee-la sɩ tɩgɛ ʋ lɛ saa.

²³ Bɛnjamɩŋ arɩ Hasub ma nɛ wasa saa lee-la sɩ tɩgɛ ba dɩa sɩpaaŋ. Azarɩa sɩ ŋaa Maasɛya nanʋala, aŋ ŋaa Ananɩa ma nihiŋ nɛ wasa saa lee-la sɩ tɩgɛ ʋ ma dɩa sɩpaaŋ.

²⁴ Henadad nanʋala Binui ma nɛ wasa saa lee-la sɩ tɩga, a chɩŋ Azarɩa dɩa sɩpaaŋ a kaa mʋ yagɛ jee-la sɩ gʋra ʋ gʋnʋŋ lɛ.

²⁵ Uzai nanʋala Palal ma nɛ wasa saa lee-la sɩ tɩga, a chɩŋ je-gʋŋ-la lɛ a kaa mʋ dɩɩ-leŋii-la sɩ hɛ kuoru dɩa-la ba sɩ saa sugili nyuŋ, a kpagɛ nɩɩ-la sɩɩ pɔ leriŋ kaala. Nɩalɩŋ ma bɩra sɩ wasa saa lee-la sɩ tɩga nɛ ŋaa Parus nanʋala Pedaaya

²⁶ arɩ Wɩa dɩɩ-bal-la tɩntɩnnaa sɩ hɛ Ɔfɛl dundolo-la nyuŋ. Ba wasa saa ŋɩɩ nɛ a mʋ challɛ Lɩɩŋ Boi-baal-la sɩ hɛ wɩɩpɔsʋŋ dɩɩrɩŋ arɩ dɩɩ-leŋii-la sɩ chɔŋɔ lɩɩ.

²⁷ Tɛkʋa nɩaa ma nɛ wasa saa lee-la sɩ tɩgɛ ba lɛ, a chɩŋ dɩɩ-leŋii-la sɩ chɔŋɔ lɩɩ lɛ a kaa mʋ yi Ɔfɛl jeeŋ.

²⁸ A chɩŋ Janɩŋ Boi-baalɩŋ lɛ a kaa mʋ, Wɩɩsʋllɩ sɩpaalaaraa ma nɛ wasa saa lee-la sɩ tɩga. Ba kʋŋkala paa lee-la sɩ hɛ ʋ dɩa sɩpaaŋ nɛ a wasa saa.

²⁹ Ima nanʋala Zadɔk ma nɛ wasa saa lee-la sɩ tɩgɛ ba lɛ a challɛ ʋ dɩa. Sɛkanɩa nanʋala Sɛmaaya sɩɩ pɔ Wɩɩpɔsʋŋ dɩɩrɩŋ Boi-baalɩŋ ma wasa saa lee-la sɩ tɩgɛ Zadɔk lɛ.

³⁰ Sɛlɛmaaya nanʋala Hananaaya arɩ Hanuŋ sɩ ŋaa Zalaf hambolibii-dʋ ma nɛ wasa saa lee-la sɩ tɩga. Bɛrɛkɩa nanʋala Mɛsʋlam ma nɛ wasa saa tɩgɛ ba lɛ a challɛ ʋ dɩa.

³¹ Malɩkɩja sɩ ŋaa sɛlɩmɛ tɩntɩnnʋ ma nɛ wasa saa lee-la tɩgɛ Mɛsʋlam lɛ. Ʋ fa saa jee-la ŋɩɩ nɛ a mʋ yi Wɩa dɩɩ-bal-la tɩntɩnnaa dɩa arɩ bayalaa dɩa, a chaasɛ boi-baal-la ba sɩɩ gbilli nɩaa a kɛŋ ŋɩɩ mʋ yi dɩa-la sɩ hɛ jee-la wɩɩpɔsʋŋ arɩ wɩɩpɔsʋŋ nagʋa gʋnʋŋ nyuŋ lɛ.

³² Sɛlɩmɛ tɩntɩnna-la arɩ bayalɩa-la ma nɛ wasa saa dɩ-kaaŋ-la, a chɩŋ dɩa-la sɩ hɛ je-gʋŋ-la nyuŋ a kaa mʋ yi Piesee boi-baalɩŋ.