NƐHƖMAAYA 2 - WƖA TENIŊ

Kuoro Atazɛzɛs leŋe Nɛhɩmaaya mʋ Jerusalɛm

¹ Atazɛzɛs sɩ dii kuoruŋ ʋ jɩsɩŋ mara tʋɔŋ, chɛnɛ-la ba sɩɩ yɩrɛ Nisaŋ lɛ nɛ tapʋlɩɩ kʋbala, ba kɛŋ girep nɛnɛɛ sɩnɩŋ kɔ dɩ ba pʋ. Mɩ laa sɩŋ-la kaa mʋ pɩ kuoro. Mɩ tʋɔŋ ha bɩ cheye ʋ sɩpaaŋ aŋ ka.

² Ŋɩɩ nɛ kuoro pɩɛsɛmɛ, “Bɛɛ nɛ tɩɩ ŋ kɛŋ sɩaa chei aŋ bɩ wɩɩlɛ ma? Wɩɩŋ deeŋ naga tʋɔ-chei wɩɩ nɛ jʋʋŋ.” Fawʋllʋŋ fa kɛmmɛ woruŋ.

³ Ama mɩ bʋla pɩ kuoro, “Kuoro, a leŋ dɩ ŋ mɩɩsɩŋ duomi. Mɩ tʋɔŋ cheye bɛɛ wɩaa, tabal-la lɛ ba sɩ hugi mɩ naabalɩmaba pɩŋ jikpeeŋ nɛ, ʋ boi-baalaa ma kala nɛ nyiniŋ dii chei.”

⁴ Ŋɩɩ nɛ kuoro pɩɛsɛmɛ, “Bɛɛ kʋŋ nɛ saa ŋ chɩchɛ?” Ŋɩɩ nɛ mɩ sʋl Wɩa sɩ hɛ ʋ jaŋ lɛ dɩ ʋ pɛ mɩ lɛ,

⁵ aŋ bʋla pɩ kuoro, “Dɩ ŋ tʋɔŋ nɛ tɔrɛ mɩ-na ŋ tɩntɩnna nyuŋ, dɩ ŋ cho dɩ ŋ ŋaa wɩɩ-la mɩ sɩɩ chɛ a pɩmɛ, leŋ dɩ mɩ mʋ Juda tinteeŋ tabal-la lɛ ba sɩ hugi mɩ naabalɩmaba a paa tabal-la wasa saa.”

⁶ Dɩ kuoro haala fa hɔŋ ʋ sɛmɛ, ka ʋ pɩɛsɛmɛ, “Ŋ nɛ mʋa, ɛɛ nɛ ŋ jaŋ diene magɛ aŋ mɩɩra kɔ?” Kuoro tʋɔŋ fa tɔrɔ nɛ ʋ cho dɩ mɩ mʋa, ŋɩɩ nɛ mɩ dagɛ bʋa-la lɛ mɩ sɩ jaŋ mɩɩra kɔ a pʋ.

⁷ Ŋɩɩ nɛ mɩ bɩra bʋla pʋ, “Kuoro dɩ ŋ tʋɔŋ nɛ tɔrɛ ŋɩɩ lɛ, ŋɩɩ-na ŋmʋnsɛ tenniŋ pɩ mɩ dɩ mɩ kaa mʋ a pɩ Yufireti fuo-la wɩɩjʋʋlʋŋ dɩɩrɩŋ tinteeŋ nɩhɩasɩŋ dɩ ba pɩmɛ wombiiŋ dɩ mɩ mʋ Juda tinteeŋ.

⁸ Bɩra ŋmʋnsɛ teniŋ dɔŋɔ ma dɩ mɩ joŋo pɩ Asaf, nɩɩ-la sɩɩ beŋ ŋ duuŋ dɩ ʋ pɩmɛ doloo dɩ mɩ kaa ŋaa dɩ-duo-la sɩ hɛ Wɩa dɩɩ-bal-la boi-baalaa, a pɛ tabal-la kɛrɛ arɩ lee-la mɩ sɩ jaŋ jʋjʋʋ lɛ. A tɩŋ mɩ Wɩa naduo-la sɩ daŋ mɩ lɛ wɩaa, kuoro sɛɩ wɩalɩŋ kala mɩ sɩ pɩɛsa chɩchɛ.”

⁹ Ŋɩɩ nɛ mɩ mʋ Yufireti fuo-la wɩɩjʋʋlʋŋ dɩɩrɩŋ tinteeŋ nɩhɩasɩŋ teeŋ, a joŋ kuoro tenni-la a pɩba. Kuoro fa leŋe laalɩyuori-hɩasɩŋ arɩ ja-jɩllaa to mɩ harɩŋ mʋ nɛ.

¹⁰ Sanbalat sɩ ŋaa Horo tɩɩna, arɩ Tobia ma sɩ ŋaa Amɔŋ tɩŋŋaa tɩntɩnnɩ-hɩaŋ sɩ nɩɩ wɩɩ-la, ba faasa na baanɩŋ a tɩŋ nʋʋ sɩ kɔ dɩ ʋ ŋaa wʋzɔmʋŋ a pɩ Iziral tɩŋŋaa wɩaa.

Nɛhɩmaaya gɔllɔ beŋ Jerusalɛm kɛrɩsɩŋ

¹¹ Ŋɩɩ nɛ mɩ mʋ Jerusalɛm a hɛ nɩmɛ tapʋlaa batori,

¹² tɩtaŋ kʋbala, mɩ dɩ baalaa baŋmɛnɛ lɩɩ gɔllɛ. Mɩ fa bɩ wɩɩ-la Wɩa sɩ joŋo hɛ mɩ tʋɔŋ lɛ dɩ mɩ ŋaa Jerusalɛm lɛ bʋla pɩ nʋʋkala. Mɩ fa bɩ pʋna kala kaa to mɩ harɩŋ lɩɩ, see kakumo-la mɩ sɩ jɩla dʋndʋŋa.

¹³ Tɩtaŋ-la mɩ to boi-baal-la ba sɩɩ yɩrɛ Fuonaaŋ Boi-baalɩŋ nɛ lɩɩ a chaasɛ vil-la ba sɩɩ yɩrɛ Jolluŋ Viliŋ a mʋ yi boi-baal-la ma ba sɩɩ yɩrɛ Nɛ-bɩnɩŋ Boi-baalɩŋ a gɔllɔɔ beŋ Jerusalɛm jebie-la ba sɩ ŋmoo lo, arɩ ʋ boi-baala-la nyiniŋ sɩ dii chei.

¹⁴ Ŋɩɩ nɛ mɩ mʋ boi-baal-la ba sɩɩ yɩrɛ Lɩɩ-bulo Boi-baalɩŋ a to ŋɩɩ mʋ fuo-la ba sɩɩ yɩrɛ Kuoroo Pɩlɩŋ leriŋ. Ama leriŋ fa bɩ yʋgɛ dɩ mɩ kakumo wuo to bal.

¹⁵ Ŋɩɩ nɛ mɩ tuu fuonaa-la tɩtaŋ-la a gɔllɔɔ beŋ jebii-la, a bɩra mɩɩrɛ harɩŋ a to Fuonaaŋ Boi-baal-la mɩ sɩ to kʋ lɩɩ a jʋʋ.

¹⁶ Taŋ-la tɩntɩnnɩ-hɩasɩŋ fa bɩ jɩŋ lee-la mɩ sɩ mʋa koo wɩɩ-la mɩ sɩɩ ŋaa. Mɩ fa ha bɩ wɩɩkala bʋla pɩ mɩ Juu tɩŋŋaa dɔnsʋŋ, Wɩɩsʋllɩ sɩpaalaaraa, tintee-la nɩbalaa, ba tɩntɩnnɩ-hɩasɩŋ koo nɩalɩŋ dɔnsʋŋ sɩ jaŋ tɩŋ tɩntɩmɩɩ-la.

¹⁷ Ŋɩɩ nɛ mɩ bʋla pɩba, “Ma tɩtɩa na wʋwalɩmɩa-la tʋɔŋ la sɩ hɛ nɛ. Jerusalɛm kala pɩŋ jikpeeŋ nɛ, ba nyɩgɛ ʋ boi-baalaa ma. Má kɔ dɩ la paa Jerusalɛm jebii-la wasa saa, a tɔ la hɩɩsɩŋ.”

¹⁸ Ŋɩɩ nɛ mɩ bʋla pɩba ŋɩɩ Wɩa naduo-la sɩ daŋ mɩ lɛ arɩ wɩɩ-la kuoro sɩ bʋla pɩmɛ. Nɩalɩŋ bʋl, “Leŋ la suomo paa jebii-la wasa sɩsaa.” Ŋɩɩ nɛ ba suomi tɩntɩŋ-zɔmʋŋ deeŋ.

¹⁹ Ama Sambalat arɩ Tobia a pɛ Arab tɩɩna ma ba sɩɩ yɩrɛ Gesem sɩ nɩɩ wɩɩ-la, ba mɔŋ-la a sisierila a bʋl, “Bɛɛ kʋŋ nɛ maa ŋaa ŋ-la? Maa vɩa kuoro niiŋ nɛ koo?”

²⁰ Mɩ bʋla pɩba, “Wɩa sɩ hɛ ʋ jaŋ lɛ jaŋ pɛ la lɛ dɩ la tɩŋ tɩntɩmɩɩ-la dɛrɛ. La ŋaa ʋ tɩntɩnnaa nɛ, la jaŋ suomo sɩsaa jebii-la. Ama ma-na bɩ kpaal kala kɛnɛ Jerusalɛm lɛ, a bɩ ʋ naaba wɩaa tʋɔŋ ma lɛ pɛ.”