NƐHƖMAAYA 13 - WƖA TENIŊ

Wɩalɩŋ Nɛhɩmaaya sɩ wasa kaa bɩrɩmɛ

¹ Tapʋlɩɩ-la ba faasa karɩmɛ teŋ-la Mosis sɩ ŋmʋnsa ʋ lɩɩ nɛ nʋʋkala nɩɩ. Teŋ-la tʋɔŋ nɛ ba na arɩ ʋ bɩ maga dɩ ba leŋ dɩ Amɔrɩ tɩɩna koo Mʋab tɩɩna kala guoli Wɩa nɩaa tʋɔŋ,

² bɛɛ wɩaa ba fa bɩ kʋdiilee arɩ lɩɩŋ kaa kʋ cheme pɩ Iziral tɩŋŋaa, aŋ mɩɩra joŋ kɩaa kpal Balam ka dɩ ʋ kʋ ŋmɩɛsa hɛ ba lɛ. (Ama la Wɩa mɩɩra kɛŋ ŋmɩaŋ-la bɩrɩmɛ nɛ, ʋ ŋaa wʋzɔŋ a pɩ la.)

³ Iziral tɩmma-la sɩ nɩɩ Wɩa wombii-la ʋ sɩ bile dɩ ba tuto, ba chaarɛ nɩwogusu-la kala sɩ guoli ba tʋɔŋ.

⁴ Ka dɩ ba na ŋaa wɩɩŋ deeŋ, ba fa joŋ Ɛlɩasɩb sɩ ŋaa Wɩɩsʋllɩ sɩpaalaara nɛ hɛ ʋ bibeŋ chʋgʋsʋŋ dɩɩsɩ-la sɩ hɛ Wɩa dɩɩ-bal-la lɛ. Ʋ dɩ Tobia wɩaa faa jʋʋ nɛ woruŋ.

⁵ Ʋ joŋ dɩɩ-bal kʋbala a pɩ Tobia lee-la ba sɩɩ bil kɩaa deemba: mɩaa Wɩɩsʋlʋŋ kɩaa, kʋsʋɔrʋsʋŋ arɩ Wɩa dɩɩ-bal-la tɩntɩnnɩ kɩaa, a pɛ mɩaa kpaalɩŋ fii tʋɔŋ kʋbala ba sɩ yie joŋo pɩ Wɩa lɛ, arɩ girep nɛnɛɛ sɩ-falɩŋ, nʋʋ-la ba sɩ yie joŋo pɩ Levi doho nɩaa, yɩɩlɩ yɩɩraa arɩ boi-pɔɔrɔɔ, a saa pɛ kɩalɩŋ ba sɩ yie kɩɛsa pɩ Wɩɩsʋllɩ sɩpaalaaraa lɛ.

⁶ Ama bʋa-la lɛ wɩaa deemba kala sɩɩ ŋaa, mɩ fa tuo Jerusalɛm lɛ. Atazɛzɛs sɩ dii Babɩlɔŋ tinteeŋ kuoruŋ ʋ jɩsɩŋ mara arɩ fii arɩ balɩa lɛ nɛ ŋɩɩ, dɩ mɩ mɩɩra mʋ ʋ teeŋ. Ʋ ŋɩɩ harɩŋ bʋa kʋbala lɛ, mɩ sʋl wombiiŋ ʋ teeŋ

⁷ a mɩɩra kɔ Jerusalɛm. Mɩ sɩ kɔ nɛ mɩ nɩɩ wʋbɔŋ-la Ɛlɩasɩb fa sɩ ŋaa, ʋ sɩ joŋ dɩa sɩ hɛ Wɩa dɩɩ-bal-la kaalɩsɩŋ lɛ a pɩ Tobɩa.

⁸ Mɩ tʋɔŋ fa chaasa chei nɛ woruŋ, mɩ paa Tobia kɩaa kala sɩ hɛ dɩa-la tʋɔŋ yuo ta.

⁹ Ŋɩɩ nɛ mɩ pa wombiiŋ ba pɩɩsɛ dɩɩsɩ-la kala disiniŋ ta, aŋ mɩɩra paa Wɩa dɩa tɩntɩnnɩ kɩalɩŋ kʋ jʋʋ, a pɛ mɩaa Wɩɩsʋlʋŋ kɩalɩŋ arɩ kʋsʋɔrʋsʋ-la lɛ.

¹⁰ Mɩ bɩra nɩa arɩ kpaal-la sɩ maga dɩ ba joŋo pɩ Levi doho nɩaa, ba bɩ baa pa. Ŋɩɩ nɛ Levi doho nɩalɩŋ arɩ yɩɩlɩ yɩɩra-la kala sɩ maga dɩ ba tɩtɩŋ Wɩa tɩntɩŋŋaa mɩɩra mʋ tɩtɩŋ ba tɩtɩa bagɩsɩŋ lɛ.

¹¹ Ŋɩɩ nɛ mɩ bʋl tɩntɩnnɩ-hɩasɩ-la woruŋ a pɩɛsɛba, “Bɛɛ nɛ tɩɩ ma vɩa Wɩa dɩɩ-bal-la ta?” Ŋɩɩ nɛ mɩ yɩrɛ Levi doho nɩalɩŋ arɩ yɩɩlɩ yɩɩra-la ba mɩɩra kʋ tɩtɩŋ ba tɩntɩŋŋaa.

¹² Ŋɩɩ lɛ nɛ Juda nɩaa kala kɛŋ ba mɩaa, girep nɛnɛɛ sɩ-falɩŋ arɩ nʋʋŋ kpaalɩŋ fii tʋɔŋ kʋbala-la ba sɩ yie joŋo pɩ Wɩa kaa kʋ bil ba chʋgʋsʋŋ dɩɩsɩ-la lɛ.

¹³ Ŋɩɩ nɛ mɩ lɩɩsɛ Sɛlɛmaaya sɩ ŋaa Wɩɩsʋllɩ sɩpaalaara, Zadɔk sɩ ŋaa Wɩa teniŋ kerichi arɩ Levi tɩɩna kʋbala baa yɩrɛ Pedaaya, a leŋ ba nɛ bibeŋ chʋgʋsʋŋ dɩɩsɩ-la. Ŋɩɩ nɛ mɩ bɩra lɩɩsɛ Hanaŋ sɩ ŋaa Zaku nanʋala, a ŋaa Matanɩa ma nihiŋ ʋ tɩtɩgɛ ba lɛ, bɛɛ wɩaa baalaa deemba fa ŋaa nɩa ba sɩ bene dɩ ba ŋaa nɩtɩtɩɩba nɛ. Ba nɛ fa maga dɩ ba kpɩkpaa kɩalɩŋ nɩaa sɩ kaa kɔ a pɩpɩ ba naambiiriŋ.

¹⁴ Mɩ Wɩa, liisi mɩ wɩaa sɩ́ wʋzɔmɔ-la kala mɩ sɩ ŋaa a tɩgɛ ŋ dɩa lɛ arɩ wɩalɩŋ mɩ sɩ leŋe ba bɩra ŋɩŋaa nɩmɛ wɩaa yʋ.

¹⁵ Bʋa-la lɛ, mɩ na Juda nɩaa dɩ baa chagɛ girep nɛnɛɛ sɩnɩŋ chɛ-wiesii-la chɛɛŋ, a kɛŋ ba kakusuŋ chʋchʋŋ mɩaa, girep nɛnɛɛ sɩnɩŋ, girep, tutogi-nambɩlaa arɩ chʋgʋsʋŋ dɔnsʋŋ. Ba chʋŋ kɩaa deemba kala chɛ-wiesii-la chɛɛŋ nɛ a kʋʋ jʋʋ Jerusalɛm. Ŋɩɩ nɛ mɩ bʋla pɩba dɩ ba sɩ kɩaa yallʋ chɛ-wiesii-la chɛɛŋ.

¹⁶ Chɛ-wiesii-la chɛɛŋ Taaya tɩmma-la sɩ hɛ Jerusalɛm lɛ fa yie kɛŋ chenfilee arɩ kɩaa dɔnsʋŋ kʋʋ yallɛ nɛ Jerusalɛm lɛ a pɩpɩ Juda nɩaa.

¹⁷ Ŋɩɩ nɛ mɩ ŋaa goŋ Juda sɩpaalaaraa nyuŋ a bʋl, “Bɛɛ kʋŋ wʋbɔŋ nɛ ma ŋɩŋaa ŋ-la a chichei chɛ-wiesii-la kɩsɩŋ lɛ?

¹⁸ Wʋdosunuŋ deemba dee ma naabalɩmaba ŋaa, la Wɩa joŋ wʋlɔrʋnʋŋ ŋaa la dɩ la tabalɩŋ deeŋ lɛɛ? Lɛɛlɛ ma wasa leŋ Wɩa baanɩŋ sisii Iziral tɩŋŋaa nyuŋ nɛ, a tɩŋ ma sɩɩ chei chɛ-wiesii-la kɩsɩŋ lɛ wɩaa.”

¹⁹ Ŋɩɩ nɛ mɩ pa wombiiŋ dɩ ba kɛŋ Jerusalɛm boi-baalaa tɔ dɩdaaŋ-la, ka dɩ taŋ pʋl chɛ-wiesii-la chɛɛŋ, a mʋ yi bʋa-la lɛ ʋ sɩ bala. Mɩ leŋe mɩ nɩaa dɔnsʋŋ chɩŋ boi-baalaa niiŋ nɛ dɩ ba sɩ́ chʋga kala kaa kʋ jʋʋ chɛ-wiesii-la chɛɛŋ.

²⁰ Bala koo bʋlɩa nɛ nɩalɩŋ sɩɩ yallɛ kʋdosunuŋ chʋa Jerusalɛm jeeŋ harɩŋ.

²¹ Ŋɩɩ nɛ mɩ kpʋrɩsɛ ba dɩgɩlaa aŋ pɩɛsɛba, “Bɛɛ nɛ tɩɩ ma chʋa jeeŋ harɩŋ? Dɩ ma nɛ bɩra ŋaa wɩɩŋ deeŋ, mɩ jaŋ kɛsɛma.” A chɩŋ bʋa-la lɛ a kaa kɔ ba bɩra bɩ chɛ-wiesii-la chɛɛŋ kɔ.

²² Ŋɩɩ nɛ mɩ bʋla pɩ Levi doho nɩaa dɩ ba pɩɩsɛ ba disiniŋ ta aŋ mʋ pʋpɔ boi-baalaa dɩ chɛ-wiesii-la ŋaa chɛ-zɔŋ. Mɩ Wɩa ŋ chonuŋ sɩ yʋga wɩaa, tɩŋ wɩɩŋ deeŋ ma wɩaa a fá mɩ nenige.

²³ Bʋa-la lɛ nɛ bɩra, mɩ na Juda tɩŋŋaa sɩ jaa Asɩdɔd, Amɔŋ arɩ Mʋab tɩŋŋaa toloo.

²⁴ Ba hambiisiŋ kpaa magɛ dɔŋɔ faa bʋl Asɩdɔd tɩŋŋaa yikoro nɛ, koo nɩalɩŋ dɔnsʋŋ yikoro, aŋ bɩ Juda tɩŋŋaa yikoro wuo bʋl.

²⁵ Mɩ ŋaa goŋ ba nyuŋ a ŋmɩɛsa hɛ ba lɛ. Mɩ ŋmoo nɩalɩŋ dɔnsʋŋ a lɛrɛ ba nyu-pʋnaa churi. Mɩ leŋ ba ŋmɩɛsɛ Wɩa yɩrɩŋ lɛ a bʋl, “La bɩ jaŋ joŋ la toloo a pɩ ba hambolibiisiŋ dɩ ba jaa, koo a jaa ba toloo a pɩ la hambolibiisiŋ koo la tɩtɩa.

²⁶ Ha-jaa doho deeŋ dee bɩ leŋe Iziral tinteeŋ kuoro Solomoŋ ŋaa wʋbɔŋŋɔɔ? Tinteyee kala tʋɔŋ, kuoru kala fa tuo a magʋ. Wɩa fa chou nɛ woruŋ, a leŋ ʋ ŋaa Iziral tɩŋŋaa kala kuoro. Ama tintee-wogusuŋ toloo nɛ lɛrʋ mʋ hɛ wʋbɔŋŋɔɔ lɛ.

²⁷ Ʋ sɛnɛ magɛ dɩ la bɩra nɩɩ arɩ ma maa ŋaa wʋbɔŋŋɔɔ deemba, a bɩ wʋtɩtɩɩ kɛnɛ arɩ la Wɩa aŋ jɩjaa tintee-wogusuŋ toloo?”

²⁸ Ɛlɩasɩb sɩ ŋaa Wɩɩsʋllɩ sɩpaalaaraa nɩhɩaŋ nanʋala dɔŋɔ nɛ fa Joyada. Ama Joyada hɩɩlɩ-baala nɛ fa Sambalat, Horo tɩɩna-la. Ŋɩɩ nɛ mɩ kiri Joyada ta mɩ teeŋ.

²⁹ Mɩ Wɩa, liisi ŋɩɩ ba sɩ ŋaa wɩaa a chei wombii-la ba sɩ maga dɩ ba to a ŋaa Wɩɩsʋlʋŋ pɩpɩŋ arɩ nii-la sɩ mʋ tɩgɛ ŋ Wɩɩsʋllɩ sɩpaalaaraa arɩ Levi doho nɩaa lɛ.

³⁰ Ŋɩɩ nɛ mɩ pɩɩsɛ nɩalɩŋ disiniŋ ta a mʋ tɩgɛ kʋŋkala sɩ ŋaa kʋwogo lɛ, aŋ dagɛ Wɩɩsʋllɩ sɩpaalaaraa arɩ Levi doho nɩaa ba tɩntɩmɩŋ.

³¹ Mɩ bɩra dagɛ nɩalɩŋ bʋa-la lɛ sɩ maga dɩ ba kɛŋ daasɩŋ arɩ ba kʋdii falaa kɔ Wɩa dɩɩ-balɩŋ. Mɩ Wɩa, liisi wɩaa deemba kala mɩ sɩ ŋaa aŋ pɛ mɩ lɛ.