NƐHƖMAAYA 12 - WƖA TENIŊ

Wɩɩsʋllɩ sɩpaalaaraa arɩ Levi doho nɩaa yɩraa

¹ Wɩɩsʋllɩ sɩpaalaaraa arɩ Levi doho nɩalɩŋ sɩ mɩɩra to Sɩɛlɩtɩɛl nanʋala Zerubabɛl arɩ Jesua harɩŋ a lɩɩ yoŋ-baga kɔ yɩraa nɛ ŋ-la: Sɛraaya, Jɛrɩmaaya, Ɛzɩra,

² Amarɩa, Maluk, Hatus,

³ Sɛkanɩa, Rehum, Mɛrɛmɔf,

⁴ Ido, Ginetoŋ, Abija,

⁵ Mɩjamɩŋ, Mʋadɩa, Bɩlɩga

⁶ Sɛmaaya, Joyarib, Jedaaya,

⁷ Salu, Amɔk, Hɩlɩkaaya, Jedaaya. Nɩaa deemba nɛ fa ŋaa Wɩɩsʋllɩ sɩpaalaaraa arɩ ba tɩntɩnnɩ dɔnsʋŋ Jesua mɩɩsɩŋ bʋa lɛ.

⁸ Levi doho nɩaa nɛ ŋ-la: Jesua, Binui, Kadɩmɩɛl, Sɛrɛbɩa, Juda arɩ Matanɩa, a pɛ ʋ dɩ nɩalɩŋ sɩɩ tɩŋ lɛ nɛ faa beŋ nɩalɩŋ sɩ yɩɩ yɩɩlaa a lʋlɔllɛ Wɩa.

⁹ Bakɩbʋkɩa arɩ Uni nɛ ŋaa nɩalɩŋ ba dɩ ba sɩɩ tɩŋ. Ba yie chɩna chaasɛ ba nɛ yɩɩlaa dɩ-yɩɩlɩŋ a laa hɩhɛ.

¹⁰ Joyakim nyɩmma nɛ fa Jesua, Ɛlɩasɩb ma nyɩmma nɛ Joyakim, Joyada ma nyɩmma nɛ Ɛlɩasɩb,

¹¹ Jonataŋ ma nyɩmma nɛ Joyada, Jadʋa ma nyɩmma nɛ Jonataŋ.

¹² Bʋa-la Joyakim fa sɩ ŋaa Wɩɩsʋllɩ sɩpaalaaraa nɩhɩaŋ, nɩaa deemba nɛ fa ŋaa Wɩɩsʋllɩ sɩpaalaaraa dɩa dɩa nɩhɩasɩŋ: Sɛraaya dɩa nɩaa tʋɔŋ, Mɛraya nɛ fa ŋaa ba nɩhɩaŋ. Jɛrɩmaaya ma dɩa nɩaa tʋɔŋ, Hananaaya nɛ fa ŋaa ba nɩhɩaŋ.

¹³ Ɛzɩra dɩa nɩaa tʋɔŋ, Mesulam nɛ fa ŋaa ba nɩhɩaŋ. Amarɩa dɩa nɩaa tʋɔŋ, Jehohanaŋ nɛ fa ŋaa ba nɩhɩaŋ.

¹⁴ Maluk dɩa nɩaa tʋɔŋ, Jonataŋ nɛ fa ŋaa ba nɩhɩaŋ. Sɛkanɩa ma dɩa nɩaa tʋɔŋ, Josɛf nɛ fa ŋaa ba nɩhɩaŋ.

¹⁵ Harɩm dɩa nɩaa tʋɔŋ, Adɩna nɛ fa ŋaa ba nɩhɩaŋ. Mɛrɛmɔf dɩa nɩaa ma tʋɔŋ, Hɛlɩkaɩ nɛ fa ŋaa ba nɩhɩaŋ.

¹⁶ Ido dɩa ma nɩaa tʋɔŋ, Zɛkarɩya nɛ fa ŋaa ba nɩhɩaŋ. Ginetoŋ dɩa nɩaa tʋɔŋ, Mesulam nɛ fa ŋaa ba nɩhɩaŋ.

¹⁷ Abija ma dɩa nɩaa tʋɔŋ, Zikiri nɛ fa ŋaa ba nɩhɩaŋ. Mɩnɩamɩŋ arɩ Mʋadɩa dɩa nɩaa tʋɔŋ, Pɩlɩtaɩ nɛ fa ŋaa ba nɩhɩaŋ.

¹⁸ Bɩlɩga ma dɩa nɩaa tʋɔŋ, Samʋa nɛ fa ŋaa ba nɩhɩaŋ. Sɛmaaya dɩa nɩaa tʋɔŋ, Jehonataŋ nɛ fa ŋaa ba nɩhɩaŋ.

¹⁹ Joyarib dɩa nɩaa tʋɔŋ, Matanaɩ nɛ ŋaa ba nɩhɩaŋ. Jedaaya dɩa nɩaa tʋɔŋ, Uzi nɛ fa ŋaa ba nɩhɩaŋ.

²⁰ Salu dɩa nɩaa tʋɔŋ, Kalaɩ nɛ fa ŋaa ba nɩhɩaŋ. Amɔk dɩa nɩaa tʋɔŋ, Ɛba nɛ fa ŋaa ba nɩhɩaŋ.

²¹ Hɩlɩkaaya ma dɩa nɩaa tʋɔŋ, Hasabɩa nɛ fa ŋaa ba nɩhɩaŋ. Jedaaya dɩa nɩaa tʋɔŋ, Nɛtanɛl nɛ fa ŋaa ba nɩhɩaŋ.

²² Daarus sɩ dii Pɛsɩa tinteeŋ kuoruŋ, bʋa-la lɛ nɛ ba ŋmʋnsɛ Levi doho nɩaa dɩa dɩa nɩhɩasɩŋ yɩraa a bil. Nɩaa deemba nɛ fa ŋaa ba nɩhɩasɩŋ: Ɛlɩasɩb, Joyada, Johanaŋ arɩ Jadʋa, a saa pɛ Wɩɩsʋllɩ sɩpaalaaraa dɩa dɩa yɩraa lɛ.

²³ Levi doho nɩaa dɩa dɩa nɩhɩasɩŋ, a chɩŋ Ɛlɩasɩb nanʋala Johanaŋ lɛ, ba kala nɛ ba ŋmʋnsa hɛ kuoroo wʋŋaalaa teniŋ tʋɔŋ.

²⁴ Levi doho nɩaa sɩpaalaaraa nɛ fa ŋ-la: Hasabɩa, Sɛrɛbɩa, Kadɩmɩɛl nanʋala Jesua, arɩ ba tɩntɩnnɩ dɔsʋŋ ba sɩ kaa kpaa bugoo, balɩa yie chɩna chaasɛ dɔŋɔ a yɩɩ yɩɩlaa dɩdɛnnɛ Wɩa a lʋlɔllʋ, buguŋ dɔŋɔ yɩɩ dɔŋɔ laa hɩhɛ arɩ Wɩa tɩntɩnna Devit sɩ dagɛ ŋɩɩ.

²⁵ Nɩalɩŋ ma sɩ ŋaa boi-pɔɔrɔɔ a pʋpɔ chʋgʋsʋŋ dɩɩsɩ-la sɩ hɛ Wɩa dɩɩ-bal-la boi-baalaa niiŋ nɛ ŋ-la: Matanɩa, Bakɩbʋkɩa, Obadaaya, Mesulam, Talɩmɔŋ arɩ Akub.

²⁶ Nɩaa deemba kala fa hɛ nɩmɛ nɛ a tɩtɩŋ ba tɩntɩŋŋaa, bʋa-la lɛ Jesua nanʋala Joyakim fa sɩ ŋaa Wɩɩsʋllɩ sɩpaalaaraa nɩhɩaŋ. Ʋ fa ŋaa Jozadak ma nihiŋ nɛ. Bʋa-la tɩtɩa lɛ nɛ Nɛhɩmaaya fa ŋaa ba tinteeŋ nɩhɩaŋ, ka Ɛzɩra ma fa ŋaa Wɩɩsʋllɩ sɩpaalaara aŋ pɛ ŋaa Wɩa teniŋ kerichi.

Ba joŋ Jerusalɛm kɛrɛ-la hɛ Wɩa nɩsɩŋ lɛ

²⁷ Bʋa-la ba sɩɩ chɛ dɩ ba joŋ Jerusalɛm jebii-la a hɛ La TƖƖNA nɩsɩŋ lɛ, ba yɩrɛ Levi doho nɩaa ba lɩɩ Juda sɛmɛ na-kala nɛ dɩ ba kʋ gbieli arɩ tʋɔtɔrʋŋ a yɩɩ yɩɩlaa a chɩgɩsɛ buguloo, a du chenniŋ arɩ kɔnɛba a dɛnnɛ La TƖƖNA.

²⁸ Ba kɛsɛ nɩalɩŋ sɩɩ yɩɩ yɩɩlaa a lɩɩ tasɩ-la sɩ golli Jerusalɛm nɛ: taŋ-la ba sɩɩ yɩrɛ Netofa arɩ tabiisi-la sɩ gollu.

²⁹ Dɔnsʋŋ lɩɩ Bɛf Gɩlɩgal, Geba arɩ Azɩmavɛf. Yɩɩlɩ yɩra-la fa saa ba tasɩŋ a golli Jerusalɛm nɛ.

³⁰ Wɩɩsʋllɩ sɩpaalaaraa arɩ Levi doho nɩaa sɩ pɩɩsɛ ba tɩtɩa disiniŋ ta dɛrɛ arɩ ba Wɩɩchʋɔlɛ wombiiŋ sɩ dagɛ ŋɩɩ, ba pɩɩsɛ nɩalɩŋ, boi-baala-la arɩ jebii-la ma disiniŋ ta.

³¹ Ŋɩɩ nɛ mɩ leŋ Juda nɩaa sɩpaalaaraa jɩl jebii-la nyuŋ. Ŋɩɩ nɛ mɩ lɩɩsɛ yɩɩlɩ yɩraa sɩ yʋga bugoo balɩa dɩ ba lʋlɔllɛ Wɩa. Bugo-la dɔŋɔ jɩl jebii-la nyuŋ a mʋmʋ nadiiŋ dɩɩrɩŋ, a chaasɛ Nɛ-bɩnɩŋ Boi-baalɩŋ.

³² Hosaaya arɩ Juda sɩpaalaara-la kpaa magɛ dɔŋɔ nɛ fa to ba harɩŋ,

³³ arɩ Azarɩa, Ɛzɩra, Mesulam,

³⁴ Juda, Bɛnjamɩŋ, Sɛmaaya, Jɛrɩmaaya,

³⁵ a pɛ Wɩɩsʋllɩ sɩpaalaaraa sɩ kori nyilliŋ lɛ, arɩ Jonataŋ nanʋala Zɛkarɩya sɩ ŋaa Sɛmaaya nihiŋ. Ba doho nɩaa dɔnsʋŋ ma nɛ ŋ-la: Matanɩa, Mɩkaaya, Zaku arɩ Asaf,

³⁶ a pɛ ba yɩɩl yɩɩrɩ dɔnsʋŋ deemba lɛ: Sɛmaaya, Azarɛl, Mɩlalaɩ, Gɩlalaɩ, Maayɩ, Nɛtanɛl, Juda arɩ Hanani, ba kala fa kori Wɩa tɩntɩnna Devit yɩɩlɩ yɩɩrɩ kɩaa nɛ. Ɛzɩra sɩ ŋaa Wɩa teniŋ kerichi nɛ fa laa ba nɩalɩŋ sɩ kɩɛla sɩpaaŋ.

³⁷ Ba sɩ mʋ yi Lɩɩ-bulo Boi-baalɩŋ, ba ha mʋmʋ, a mʋ jɩl lusuŋ-chol-sɩa-la ba sɩ to jʋjʋʋ Devit taŋ-la, a joŋ jebii-la ŋɩɩ a mʋ kieli Devit dɩa a mʋ Lɩɩŋ Boi-baal-la sɩ hɛ wɩɩpɔsʋŋ dɩɩrɩŋ.

³⁸ Yɩɩlɩ yɩɩra-la buguŋ dɔŋɔ ma to jebii-la nagʋa dɩɩrɩŋ a mʋmʋ. Mɩ ma jɩl jebii-la ba harɩŋ, mɩ dɩ sɩpaalaara-la kpaa magɛ dɔŋɔ. La mʋ kieli tabʋʋ-pumoo dɩɩ-leŋii-la a mʋ Je-bii Jalɩɩ-la.

³⁹ La lɩɩ nɩmɛ a mʋ Efirem Boi-baalɩŋ, a mʋ Jesana Boi-baalɩŋ, a mʋ Chenfilee Boi-baalɩŋ, a mʋ Hananɛl Dɩɩ-duduoŋ arɩ dɩɩ-leŋii-la ba sɩɩ yɩrɛ Zɔlɔ, a kɛŋ ŋɩɩ mʋ yi Piesee boi-baalɩŋ. La sɩ mʋ yi nɩalɩŋ sɩɩ pɔ leriŋ boi-baalɩŋ, la chɩŋ.

⁴⁰ Ŋɩɩ nɛ yɩɩlɩ yɩɩrɩ bugo-la balɩa sɩɩ lɔllɛ Wɩa chɩŋ ba dɩchɩnaa Wɩa dɩa lɛ. Mɩ ma chɩŋ, mɩ dɩ sɩpaalaara-la kpaa magɛ dɔŋɔ,

⁴¹ a pɛ nɩaa deemba sɩ ŋaa Wɩɩsʋllɩ sɩpaalaaraa lɛ: Ɛlɩakɩm, Maasɛya, Mɩnɩamɩŋ, Mɩkaaya, Elionai, Zɛkarɩya arɩ Hananaaya, ba kala kori nyilliŋ.

⁴² Nɩaa deemba ma nɛ pɛ: Maasɛya, Sɛmaaya, Elieza, Uzi, Jehohanaŋ, Malɩkɩja, Ɛlam arɩ Ɛza. Jɛzɩrahɩa nɛ laa yɩɩlɩ yɩɩra-la sɩpaaŋ baa yɩɩ.

⁴³ Tapʋlɩɩ-la ba kpʋ kɩaa yʋgɛ nɛ woruŋ a ŋaa Wɩɩsʋlʋŋ, aŋ jʋjʋɔsɛ, bɛɛ wɩaa Wɩa leŋe ba tʋɔŋ faasa tɔrɛ nɛ. Haalaa arɩ hambiisiŋ kala nɛ faa jʋɔsʋ. Dɩ ŋ nɛ paala hɛ dɩ-bolii ma, ŋ jaŋ wuo nɩɩ nɩaa sɩ jʋɔsa a ŋɩŋaa goŋ Jerusalɛm lɛ.

⁴⁴ Bʋa-la lɛ nɛ ba lɩɩsɛ nɩaa ba bibeŋ chʋgʋsʋŋ dɩɩsɩŋ, lee-la nɩaa sɩ yie kɩɛsɛ kɩaa arɩ ba kʋdii falaa kaa kʋʋ bil, a pɛ kpaalɩŋ fii tʋɔŋ kʋbala-la ba sɩ yie joŋo pɩ Wɩa lɛ. Bagɩsɩ-la sɩ golli Jerusalɛm lɛ, ba fa yie kɩɛsɛ kɩaa nɛ a kaa kʋ bil chʋgʋsʋŋ dɩɩsɩ-la lɛ a pɩ Wɩɩsʋllɩ sɩpaalaaraa arɩ Levi doho nɩaa a nagɛ Wɩa wombiiŋ ʋ sɩ bile dɩ ba tuto sɩ dagɛ ŋɩɩ, bɛɛ wɩaa Juda nɩaa tʋɔŋ fa tɔrɛ Wɩɩsʋllɩ sɩpaalaaraa arɩ Levi doho nɩalɩŋ sɩɩ tɩŋ Wɩa tɩntɩŋŋaa lɛ nɛ.

⁴⁵ Nɩalɩŋ kala sɩ ŋaa wɩalɩŋ sɩ maga dɩ ba ŋaa pɩ Wɩa, ŋɩɩ nɛ yɩɩlɩ yɩraa-la arɩ nɩalɩŋ ma sɩɩ pɔ leriŋ tɩŋ ba tɩntɩŋŋaa arɩ kuoro Devit arɩ ʋ nanʋala Solomoŋ sɩ dagɛ ŋɩɩ.

⁴⁶ Kuoro Devit arɩ Asaf mɩɩsɩŋ bʋa lɛ, ba fa kɛŋ nɩaa nɛ sɩ yie laa ba sɩpaaŋ ba yɩɩ yɩɩlaa a dɩdɛnnɛ Wɩa, aŋ lʋlɔllʋ.

⁴⁷ Zerubabɛl arɩ Nɛhɩmaaya ma mɩɩsɩŋ bʋa lɛ, Iziral tɩŋŋaa kala yie kɩɛsɛ kɩaa nɛ tapʋlɩɩ kala aa pɩ nɩalɩŋ sɩɩ yɩɩ yɩɩlaa arɩ nɩalɩŋ sɩɩ pɔ boi-baalaa. Nɩalɩŋ yie joŋ kɩalɩŋ dɔnsʋŋ a pɩ Levi doho nɩaa dɔnsʋŋ, ba ma laa a lɩɩsɛ Arɔŋ doho nɩaa kɩaa pɩba.