NƐHƖMAAYA 11 - WƖA TENIŊ

Nɩfalɩa-la sɩ hɔŋ Jerusalɛm lɛ

¹ Tintee-la nɩhɩasɩŋ fa hɔŋ Jerusalɛm lɛ nɛ, ka nɩkaanaa tɔnsɛ dɩ ba lɩɩsɛ nɩbala nɩaa fii kala tʋɔŋ dɩ ba mʋ hɔŋ Jerusalɛm, tabal-la sɩ bɩ disiniŋ kɛnɛ lɛ, ka dɩ nɩaa nibi-la kʋkaanaa ma hɔŋ ba tasɩŋ lɛ.

² Ŋɩɩ nɛ nɩaa bɛsɛ nɩalɩŋ sɩ kɛŋ ba tɩtɩa lɩɩ a sɛɩ arɩ ba jaŋ hɔŋ Jerusalɛm lɛ.

³ Iziral tinteeŋ ba sɩ kaa kpaa leree sɩpaalaaraa fa hɔŋ Jerusalɛm lɛ nɛ. Iziral tɩŋŋaa dɔnsʋŋ, a pɛ Wɩɩsʋllɩ sɩpaalaaraa, Levi doho nɩaa, nɩalɩŋ sɩɩ tɩŋ Wɩa dɩɩ-bal-la lɛ, arɩ Solomoŋ tɩntɩnnaa doho nɩaa fa hɔŋ ba tɩtɩa tinteyee lɛ nɛ Juda tasɩŋ lɛ.

⁴ Ka Juda arɩ Bɛnjamɩŋ doho nɩaa dɔnsʋŋ ma fa hɔŋ Jerusalɛm lɛ. Juda doho nɩaa nɛ ŋ-la: Ataaya sɩ ŋaa Uzia nanʋala aŋ ŋaa Zɛkarɩya ma nihiŋ. Ʋ naabalɩmaba dɔnsʋŋ ma nɛ Amarɩa, Sɛfatɩa arɩ Mahalalɛl. Ba kala ŋaa Juda nanʋala Pɛrɛs doho nɩaa nɛ,

⁵ arɩ Maasɛya sɩ ŋaa Baruk nanʋala, aŋ ŋaa Koli-Hoze ma nihiŋ. Ʋ naabalɩmaba dɔnsʋŋ ma nɛ, Hazaaya, Adaaya, Joyarib arɩ Zɛkarɩya, ba kala ŋaa Juda nanʋala Sɛla doho nɩaa nɛ.

⁶ Pɛrɛs doho nɩalɩŋ fa sɩ hɔŋ Jerusalɛm lɛ ŋaa ba-duoruŋ zɔɔ-banɛsɛ arɩ mahɩŋ batori arɩ chori nɛ.

⁷ Bɛnjamɩŋ doho nɩaa ma nɛ ŋaa: Salu sɩ ŋaa Mesulam nanʋala, aŋ ŋaa Joid ma nihiŋ. Ʋ naabalɩmaba dɔnsʋŋ ma nɛ: Pedaaya, Kolaaya, Maasɛya, Ɩtɩɛl arɩ Jesaaya,

⁸ a pɛ ʋ naambiiriŋ Gabaɩ arɩ Salaɩ lɛ. Bɛnjamɩŋ ma doho nɩaa fa ŋaa zɔlɔ nibi arɩ mara arɩ chori nɛ a hɔŋ Jerusalɛm lɛ.

⁹ Zikiri nanʋala Jowɛl nɛ fa ŋaa ba tɩntɩnnɩ-hɩasɩŋ tʋɔŋ nɩhɩaŋ, Hasɛnʋa nanʋala Juda ma nɛ fa ŋaa nɩɩ-la sɩ tɩgɛ ʋ lɛ a bibeŋ tabal-la.

¹⁰ Wɩɩsʋllɩ sɩpaalaaraa ma nɛ ŋ-la: Joyarib nanʋala Jedaaya arɩ Jakɩŋ.

¹¹ Sɛraaya sɩ ŋaa Hɩlɩkaaya nanʋala, aŋ ŋaa Mesulam ma nihiŋ. Ʋ naabalɩmaba dɔnsʋŋ nɛ fa, Zadɔk, Mɛrayɔf arɩ Ahitub fa sɩ ŋaa Wɩɩsʋllɩ sɩpaalaaraa nɩhɩaŋ.

¹² Ba doho nɩalɩŋ kala fa sɩɩ tɩŋ Wɩa dɩɩ-bal-la tʋɔŋ ŋaa zɔlɔ chori arɩ mara arɩ balɩa nɛ. Adaaya sɩ ŋaa Jeroham nanʋala, aŋ ŋaa Pɛlalɩa ma nihiŋ, ʋ doho nɩaa dɔnsʋŋ nɛ: Amizi, Zɛkarɩya, Pasɩhɔ arɩ Malɩkɩja.

¹³ Nɩalɩŋ sɩɩ tɩgɛ ʋ lɛ a ŋaa dɩa dɩa nɩhɩasɩŋ kala ŋaa zɔɔ-balɩa arɩ mahɩŋ balɩa arɩ balɩa nɛ. Amasɩsaɩ sɩ ŋaa Azarɛl nanʋala, aŋ ŋaa Ahɩzaɩ ma nihiŋ,

¹⁴ ʋ ma doho nɩaa fa ŋaa zɔlɔ arɩ mara arɩ chori nɛ a kala ŋaa laalɩyuori-duori. Ba sɩpaalaara nɛ fa Hagɛdɔlɩm nanʋala Zabɩdɩɛl.

¹⁵ Levi doho nɩaa ma nɛ ŋ-la: Sɛmaaya sɩ ŋaa Hasub nanʋala, aŋ ŋaa Azirikam ma nihiŋ. Ʋ doho nɩaa dɔnsʋŋ ma nɛ Hasabɩa, arɩ Buni.

¹⁶ Sabɩtaɩ arɩ Jozabad ma nɛ fa ŋaa Levi doho nɩalɩŋ sɩɩ tɩŋ tɩntɩmɩa-la sɩ hɛ Wɩa dɩɩ-bal-la jeeŋ harɩŋ sɩpaalaaraa.

¹⁷ Mɩka nanʋala Matanɩa sɩ ŋaa Zabidi nihiŋ, aŋ ŋaa Asaf doho nʋʋ, ʋ nɛ yie laa nɩalɩŋ sɩpaaŋ ba lʋlɔllɛ Wɩa aŋ pɛ chʋhchʋɔlʋ. Bakɩbʋkɩa ma nɛ faa tɩgɛ Matanɩa lɛ. Samʋa nanʋala Abɩda sɩ ŋaa Gala nihiŋ, aŋ ŋaa Jedutuŋ doho nʋʋ ma nɛ faa tɩgʋ lɛ.

¹⁸ Levi doho nɩaa kala fa ŋaa nɩaa zɔɔ-balɩa mahɩŋ banɛsɛ arɩ banɛsɛ nɛ a hɛ Jerusalɛm, tabal-la sɩ bɩ disiniŋ kɛnɛ lɛ.

¹⁹ Baala-la fa sɩɩ pɔ boi-baalaa ma nɛ ŋ-la: Akub, Talɩmɔŋ arɩ ʋ tɩntɩnnɩ dɔnsʋŋ, ba kala fa ŋaa nɩaa zɔlɔ mahɩŋ batori arɩ fii arɩ balɩa nɛ.

²⁰ Iziral tɩŋŋaa nɩkaana-la, a pɛ Wɩɩsʋllɩ sɩpaalaaraa arɩ Levi doho nɩaa fa hɔŋ ba tɩtɩa ba tinteyee lɛ nɛ Juda tasɩŋ lɛ.

²¹ Nɩalɩŋ sɩɩ tɩŋ Wɩa dɩɩ-bal-la lɛ fa hɛ Jerusalɛm dundolo kʋbala lɛ nɛ baa yɩrɛ Ɔfɛl. Zɩha arɩ Gɛsɩpa nɛ faa bemba.

²² Banɩ nanʋala Uzi sɩ ŋaa Hasabaɩ ma nihiŋ nɛ fa ŋaa Levi doho nɩhɩaŋ. Ʋ doho nɩaa nɛ Matanɩa, Mɩka arɩ Asaf. Ba nɛ nyɩŋ-nɩalɩŋ sɩɩ beŋ nɩalɩŋ sɩɩ yɩɩ yɩɩlaa Wɩa dɩɩ-bal-la lɛ.

²³ Yɩɩl yɩɩra-la fa to ŋɩɩ Kuoro Devit sɩ daga nɛ, a yɩyɩɩ yɩɩlaa tapʋlɩɩ kala.

²⁴ Mɛsɛzabɛl nanʋala Pɛtahɩa sɩ ŋaa Juda nanʋala Zɛra doho nɩaa dɔŋɔ, nɛ faa chagɩlɛ kuoro wɩɩ na-kala sɩ mʋ tɩgɛ Iziral tɩŋŋaa lɛ.

²⁵ Nɩalɩŋ jesiŋ kala hɛ tasɩŋ sɩ kpagɛ ba bagɩsɩŋ lɛ nɛ. Juda nɩaa dɔnsʋŋ nɛ fa hɛ tasɩŋ deemba lɛ, Kɩrɩaf Aba arɩ tabiisi-la sɩ gollu, Dɩbɔŋ arɩ tabiisi-la sɩ gollu, Jɛkabɩzɛɛl arɩ tabiisi-la sɩ gollu.

²⁶ Ba dɔnsʋŋ ma hɛ Jesua, Molada, Bɛf Pɛlɛt,

²⁷ Haza Sʋal, Bɛɛsɩba arɩ tabiisi-la sɩ golliba.

²⁸ Dɔnsʋŋ ma hɛ Zɩkɩlag, Mɛkɔna arɩ tasɩ-la sɩ golliba,

²⁹ Ɛŋ Rimoŋ, Zora, Jamʋf,

³⁰ Zanʋa, Adulam, arɩ ba tabiisi-la dɔnsʋŋ sɩ hɛ Lakɩs arɩ ʋ ŋmaŋkaanɩŋ lɛ, dɔnsʋŋ ma hɛ Azɛka arɩ ʋ tabiisiŋ lɛ. Ba fa hɔŋ Bɛɛsɩba lɛ ŋɩɩ nɛ a mʋ yi Hɩnɔm fuonaaŋ.

³¹ Tasɩŋ deemba lɛ nɛ Bɛnjamɩŋ doho nɩalɩŋ fa sɩ lɩɩ Geba hɛ: Mɩkɩmas, Aɩja, Bɛtɛl arɩ ʋ tabiisiŋ,

³² Anatɔf, Nɔb, Ananɩa,

³³ Hazɔ, Rama, Gitem,

³⁴ Hadid, Zeboim, Nɛbalat,

³⁵ Lod, Ono, arɩ kʋŋaarɩ-gɔgɔɔ fuonaaŋ.

³⁶ Levi doho nɩalɩŋ sɩ lɩɩ Juda tinteeŋ ba sɩ kaa kpaa kpaa leree, ba dɔnsʋŋ fa hɔŋ Bɛnjamɩŋ tinteeŋ lɛ nɛ.