NƐHƖMAAYA 10 - WƖA TENIŊ

¹ Nɩalɩŋ sɩ joŋ ba neniee daŋ teŋ-la lɛ nɛ ŋ-la: Hakalɩa nanʋala Nɛhɩmaaya sɩ ŋaa ba tinteeŋ nɩhɩaŋ, Zedikaaya,

² Sɛraaya, Azarɩa, Jɛrɩmaaya,

³ Pasɩhɔ, Amarɩa, Malɩkɩja,

⁴ Hatus, Sɛbanɩa, Maluk,

⁵ Harɩm, Mɛrɛmɔf, Obadaaya,

⁶ Danɩɛl, Ginetoŋ, Baruk,

⁷ Mesulam, Abija, Mɩjamɩŋ,

⁸ Maazɩa, Bɩlɩgaɩ arɩ Sɛmaaya. Wɩɩsʋllɩ sɩpaalaaraa sɩ joŋ ba neniee nɛ ŋɩɩ.

⁹ Levi doho nɩaa ma sɩ joŋ ba neniee nɛ ŋ-la: Azanɩa nanʋala Jesua, Bunui sɩ ŋaa Henadad nyɩŋ-nʋʋ arɩ Kadɩmɩɛl.

¹⁰ Nɩalɩŋ ma sɩɩ tɩgɛ ba lɛ nɛ ŋ-la: Sɛbanɩa, Hodia, Kɛlɩta, Pɛlaaya, Hanaŋ,

¹¹ Mɩka, Rehob, Hasabɩa,

¹² Zaku, Sɛrɛbɩa, Sɛbanɩa,

¹³ Hodia, Banɩ arɩ Beninu.

¹⁴ Nɩalɩŋ sɩpaalaaraa ma nɛ ŋ-la: Parɔs, Pahaf-Mʋab, Ɛlam, Zatu, Banɩ,

¹⁵ Buni, Azigad, Bɛbaɩ,

¹⁶ Adonija, Bɩgɩvaɩ, Adɩŋ

¹⁷ Ata, Hezikaaya, Azu,

¹⁸ Hodia, Hasum, Bɛzaɩ,

¹⁹ Harɩf, Anatɔf, Nɛbaɩ,

²⁰ Magɩpɩas, Mesulam, Hezi,

²¹ Mɛsɛzabɛl, Zadɔk, Jadʋa,

²² Pɛlatɩa, Hanaŋ, Anaaya,

²³ Hosia, Hananaaya, Hasub,

²⁴ Halɔhɛs, Pɩlɩha, Sɔbɛk,

²⁵ Rehum, Hasabɩna, Maasɛya,

²⁶ Ahɩa, Hanaŋ, Anaŋ,

²⁷ Maluk, Harɩm arɩ Baana.

²⁸ Nɩkaana-la kala, Wɩɩsʋllɩ sɩpaalaaraa, Levi doho nɩaa, boi-pɔɔrɔɔ, yɩɩlɩ yɩɩraa, Wɩa dɩɩ-bal-la tɩntɩnnaa arɩ nɩalɩŋ kala sɩ pɔrɛ ba tɩtɩa a lɩɩ tintee wogusu-la nɩaa sɩ guoli la tʋɔŋ tintee-la lɛ, a tɩŋ ba sɩɩ chɛ dɩ ba to Wɩa wombiiŋ ʋ sɩ bile dɩ la tuto wɩaa, ba dɩ ba haalaa arɩ ba biiriŋ kala sɩ waa a jaŋ wuo jɩŋ wɩaa sɩaa.

²⁹ Ba kala pɛ ba sɩpaalaaraa lɛ a ŋmɩɛsɛ, dɩ ba nɛ vɩa nii-la dɩ ŋmɩaŋ-la diiba. Ba ŋmɩɛsa arɩ ba jaŋ fɩɛlɛ ba sɩaa a to wombie-la Wɩa sɩ to ʋ tɩntɩnna Mosis lɛ a joŋo pɩba, a pɛ wɩalɩŋ kala La TƖƖNA sɩ daga arɩ ʋ niiriŋ lɛ. Ba sɩ tɔ boŋ-la bʋl wɩɩ-la nɛ ŋ-la,

³⁰ “La bɩ jaŋ joŋ la toloo pɩ tintee-wogusu-la sɩ golli la nɩaa dɩ ba jaa, koo a leŋ dɩ la hambolibiisiŋ jaa ba toloo.

³¹ Dɩ tintee-wogusu-la nɩaa nɛ kɛŋ mɩaa koo kɩaa dɔnsʋŋ kɔ dɩ ba yallɛ chɛ-wiesii-la chɛɛŋ koo tapʋl-zɔŋ kala chɛɛŋ, la bɩ jaŋ yɔɔ. Jɩsɩŋ balɩpɛ na-kala, la jaŋ leŋ dɩ la tinteeŋ pɩna wiesi, aŋ joŋ nɩaa chɩŋŋaa kala ma chɛba.

³² Jɩna na-kala, la kʋŋkala jaŋ kɩɛsɛ moribiee mʋa mʋa dɩ ba kaa tɩtɩŋ Wɩa dɩɩ-bal-la tɩntɩŋŋaa.

³³ Ba jaŋ kaa yɔɔ boroboro-la sɩɩ daŋ teebʋl nyuŋ, tapʋlɩɩ kala mɩaa Wɩɩsʋlʋŋ kɩaa arɩ kʋnyɩgaa Wɩɩsʋlʋŋ kɩaa, a pɛ chɛ-wiesii-la Wɩɩsʋlʋŋ kɩaa lɛ. Chɛŋ-falɩŋ gbielee kɩaa arɩ gbielisi-la dɔnsʋŋ kɩaa, arɩ Wɩɩsʋlʋŋ kʋzɔmɔ-la, arɩ Wɩɩsʋlʋŋ ba sɩ jaŋ ŋaa a pɩɩsɛ Iziral tɩŋŋaa kala wʋbɔŋŋɔɔ ta, a pɛ wɩalɩŋ dɔnsʋŋ kala sɩ maga dɩ la ŋaa la Wɩa dɩɩ-bal-la lɛ.

³⁴ La-na Wɩɩsʋllɩ sɩpaalaaraa, Levi doho naa, arɩ la nɩkaanaa kala tɔnsɔ nɛ dɩ la na jɩna na-kala tʋɔŋ bʋa-la lɛ dɩa na-kala nɩaa sɩ maga ba kɛŋ daasɩŋ kɔ dɩ la kaa nyɩgɛ Wɩɩsʋlʋŋ kɩaa La TƖƖNA Wɩa koru-la nyuŋ, arɩ ba sɩ ŋmʋnsɛ ŋɩɩ hɛ Wɩa wombiiŋ teniŋ tʋɔŋ.

³⁵ La bɩra sɛyɛ arɩ jɩna kala la jaŋ kɛŋ la baga kʋdii-bumbumba arɩ tɩɩ-nɛŋ bumbuŋ na-kala kɔ La TƖƖNA dɩɩ-balɩŋ.

³⁶ La jaŋ kɛŋ la hambolibii bumbumba a kɔ Wɩa dɩɩ-balɩŋ Wɩɩsʋllɩ sɩpaalaaraa sɩɩ tɩŋ nɩmɛ teeŋ a joŋo hɛ Wɩa nɩsɩŋ lɛ, la jaŋ kɛŋ la nɛsɩŋ, piesee arɩ bʋʋnaa ma bii-bumbumba kɔ nɩmɛ a joŋo pɩ Wɩa, arɩ ba sɩ ŋmʋnsɛ ŋɩɩ hɛ Wɩa wombiee tʋɔŋ.

³⁷ La ha bɩra jaŋ kɛŋ la mɩɩ-falaa, la tɩɩ-nɛŋ bumbumba, girep nɛnɛɛ sɩ-falɩŋ arɩ la olif nʋʋ-bumbuŋ kaa kɔ Wɩa dɩɩ-balɩŋ a joŋo pɩ Wɩɩsʋllɩ sɩpaalaaraa. La jaŋ kɛŋ la kʋdiilee kpaa leree fii a joŋ kʋbala kaa kʋ pɩ Levi doho nɩaa, bɛɛ wɩaa ba nɩɩ laa kpaalɩŋ fii tʋɔŋ kʋbala deeŋ tasɩ-la kala lɛ la sɩɩ tɩŋ.

³⁸ Wɩɩsʋllɩ sɩpaalaara Arɔŋ doho nɩaa tʋɔŋ nɛ maga dɩ ʋ pɛ Levi doho nɩaa lɛ dɩ ba laa kpaalɩŋ fii tʋɔŋ kʋbala deeŋ. Levi doho nɩalɩŋ ma jaŋ laa kɩalɩŋ ba sɩ kaa kpaa leree fii a joŋ kʋbala-la a pɩ Wɩa, a ma kaa kpaa leree fii a joŋ kʋbala bil Wɩa dɩa chʋgʋsʋŋ dɩ-biliŋ.

³⁹ Levi doho nɩaa arɩ Iziral tɩŋŋaa kala, maga ba kɩɛsɛ mɩaa, girep nɛnɛɛ sɩnɩŋ arɩ olif nʋʋŋ nɛ, a kaa mʋ chʋgʋsʋŋ dɩa-la lɛ ba sɩɩ bil Wɩa dɩɩ-bal-la tɩntɩnnɩ kɩaa, arɩ lee-la Wɩɩsʋllɩ sɩpaalaaraa, boi-pɔɔrɔɔ arɩ yɩɩlɩ yɩɩraa sɩɩ jʋʋ. La bɩ jaŋ vɩa la Wɩa dɩɩ-balɩŋ ta.”