NAMBABA 9 - WƖA TENIŊ

La TƖƖNA dɩɩsɩŋ kiele bal gbiele

¹ La TƖƖNA bʋl wɩaa pɩ Mosis Sɩnaɩ tintee-hɩlɩɩ-la lɛ, Iziral tɩŋŋaa sɩ lɩɩ Ijipiti tinteeŋ lɛ jɩ-lɩa tʋɔŋ chɛŋ-bumbuŋ. Ʋ sɩ,

² “Bʋla pɩ Iziral tɩŋŋaa dɩ ba gbieli mɩ dɩɩsɩŋ kiele bal gbiele-la bʋa-la lɛ mɩ sɩ daga.

³ Má gbieli gbiele-la chɛŋ-bumbuŋ deeŋ tʋɔŋ tapʋlaa fii arɩ banɛsɛ chɛɛŋ wɩɩ-mul-jʋʋlʋŋ, a to wɩalɩŋ kala sɩ maga.”

⁴ Ŋɩɩ nɛ Mosis bʋla pɩ Iziral tɩŋŋaa arɩ ba gbieli La TƖƖNA dɩɩsɩŋ kiele bal gbiele-la.

⁵ Ŋɩɩ nɛ ba gbieli gbiele-la Sɩnaɩ tintee-hɩlɩɩ-la lɛ chɛŋ-bumbuŋ tʋɔŋ tapʋl fii arɩ banɛsɛ chɛɛŋ wɩɩ-mul-jʋʋlʋŋ, a ŋaa wɩalɩŋ kala arɩ ŋɩɩ La TƖƖNA sɩ dagɛ Mosis.

⁶ Ama Iziral tɩmma-la dɔnsʋŋ bɩ wuo gbieli gbiele-la, bɛɛ wɩaa ba fa kɛŋ disiniŋ nɛ, a tɩŋ ba sɩ digi sʋʋŋ. Ŋɩɩ nɛ ba sii kɔ Mosis arɩ Arɔŋ teeŋ tapʋlɩɩ-la tɩtɩa,

⁷ a pɩɛsɛ Mosis, “La kɛŋ disiniŋ nɛ a tɩŋ la sɩ digi sʋʋŋ, ama ɛɛ nɛ la ma jaŋ ŋaa a wuo kɛŋ la Wɩɩsʋlʋŋ kɩaa kʋ pɩ La TƖƖNA bʋa-la lɛ sɩ maga arɩ Iziral tɩŋŋaa dɔnsʋŋ sɩ kɛŋ ba Wɩɩsʋlʋŋ kɩaa kɔ ŋɩɩ?”

⁸ Ŋɩɩ nɛ Mosis bʋla pɩba, “Má gbɛrɛ, ka mɩ pɩɛsɛ La TƖƖNA a na wɩɩ-la ʋ sɩɩ chɛ dɩ ma ŋaa.”

⁹ Ŋɩɩ nɛ La TƖƖNA bʋla pɩ Mosis,

¹⁰ “Bʋla pɩ Iziral tɩŋŋaa, dɩ ba dɔŋɔ koo ba doho nɩalɩŋ sɩ jaŋ to ba harɩŋ kɔ dɔŋɔ nɛ kɛŋ disiniŋ a tɩŋ ʋ sɩ digi sʋʋŋ, koo dɩ ʋ paala vɛŋ wombiiŋ ma aŋ ha chɩchɛ dɩ ʋ gbieli mɩ dɩɩsɩŋ kiele bal gbiele-la, ʋ jaŋ wuo gbieli.

¹¹ Ba maga ba gbieli gbiele-la chɛŋ-lɩa tʋɔŋ tapʋl-fii arɩ banɛsɛ chɛɛŋ wɩɩ-mul-jʋʋlʋŋ. Ba jaŋ chaŋ gbiele-la pie-bie nammɩa aŋ dii boroboro sɩ bɩ sɩbʋrʋŋ kɛnɛ arɩ pɩpaa-haarɩŋ.

¹² Ba bɩ maga dɩ ba chaŋ nammɩa-la aŋ ka dɩ ʋ chɩna chʋa, nammɩa-la haŋgbel ma bɩ maga dɩ ʋ yɛrɛ. Dɩ ba nɩɩ gbieli gbiele deeŋ, ʋ maga dɩ ba to wɩalɩŋ kala sɩ maga nɛ.

¹³ Ama dɩ nʋʋ nɛ bɩ disiniŋ kɛnɛ, a bɩ wombiiŋ ma vɛnɛ aŋ vɩa dɩ ʋ gbieli gbiele-la, ʋ maga dɩ ma keri tɩɩna ta nɛ ʋ nɩaa tʋɔŋ, bɛɛ wɩaa ʋ vɩa dɩ ʋ kɛŋ gbiele-la Wɩɩsʋlʋŋ kɩaa kʋ pɩmɛ nɛ bʋa-la sɩ maga lɛ. Tɩɩna maga dɩ ʋ na hɛɛŋ nɛ a tɩŋ wʋbɔŋ-la ʋ sɩ ŋaa wɩaa.

¹⁴ Dɩ nɩwogo nɛ hɛ ma tʋɔŋ a chɩchɛ dɩ ʋ pɛ gbieli mɩ-na ma TƖƖNA dɩɩsɩŋ kiele bal gbiele-la, ʋ maga dɩ ʋ to wɩalɩŋ kala sɩ maga nɛ. Wɩalɩŋ Iziral tɩŋŋaa sɩ jaŋ to tɩtɩa nɛ nɩwogusuŋ ma maga dɩ ba to.”

Duoŋ-bɩlɩmbaanɩŋ kʋ chɩŋ Wɩa dɩ-zɔŋ-la nyuŋ

¹⁵ Tapʋlɩɩ-la ba sɩ pɛ Wɩa dɩ-zɔŋ-la, lɛbɩ-la lɛ Wɩa niiriŋ daga-la sɩ hɛ a dɛrɛ, duoŋ-bɩlɩmbaanɩŋ kʋ tuu tɔ lɛbɩ-la, a chɩŋ dɩdaanɩŋ a kaa mʋ chʋchʋɔŋ.

¹⁶ Duoŋ-bɩlɩmbaaŋ-la tɔ ŋɩɩ nɛ bʋa-la kala lɛ, tɩtaŋɩŋ ʋ nagɛ nyiniŋ.

¹⁷ Dɩ duoŋ-bɩlɩmbaaŋ-la nɛ sii Wɩa dɩ-zɔŋ-la nyuŋ, Iziral tɩŋŋaa ma yie sii nɛ a vɩvɛŋ. Dɩ ʋ nɛ mʋ chɩŋ lee-kala, ba ma ŋmoo ba buguŋ nɩmɛ.

¹⁸ Dɩ La TƖƖNA nɛ sɩ Iziral tɩŋŋaa sii, ba yie sii nɛ a vɩvɛŋ, dɩ ʋ nɛ bɩra sɩ ba hɔŋ, ba hɔŋ. Dɩ duoŋ-bɩlɩmbaaŋ-la nɛ chɩŋ Wɩa dɩ-zɔŋ-la nyuŋ, ba ma yie hɔŋ nɛ.

¹⁹ Dɩ duoŋ-bɩlɩmbaaŋ-la nɛ diene Wɩa dɩ-zɔŋ-la nyuŋ, Iziral tɩmma-la ha yie to La TƖƖNA niiŋ nɛ a bɩ lee-la ka sii.

²⁰ Bʋa dɔŋɔ lɛ duoŋ-bɩlɩmbaaŋ-la yie hɛ Wɩa dɩ-zɔŋ-la nyuŋ tapʋlaa baŋmɛnɛ aŋ sii. Dɩ La TƖƖNA nɛ sɩ ba hɔŋ, ba yie hɔŋ nɛ, dɩ ʋ nɛ bɩra sɩ ba sii, ba sii.

²¹ Bʋa dɔŋɔ lɛ duoŋ-bɩlɩmbaaŋ-la yie tɔ Wɩa dɩ-zɔŋ-la a lɩɩ dɩdaanɩŋ a kaa mʋ chʋchʋɔŋ, ʋ sii, ba ma sii. Dɩ duoŋ-bɩlɩmbaaŋ-la nɛ sii Wɩa dɩ-zɔŋ-la nyuŋ tɩtaŋɩŋ koo wɩɩhɛyɛ ma, ba yie sii nɛ.

²² Dɩ duoŋ-bɩlɩmbaaŋ-la nɛ chɩŋ Wɩa dɩ-zɔŋ-la nyuŋ tapʋlaa balɩa koo chɛnɛ koo jɩna, Iziral tɩmma-la ma yie hɔŋ ba buguŋ lɛ nɛ, ba bɩ sii. Ama dɩ ʋ nɛ sie, ba ma yie sii nɛ.

²³ Dɩ La TƖƖNA nɛ sɩ ba sii, ba yie sii nɛ, dɩ ʋ nɛ bɩra sɩ ba hɔŋ, ba hɔŋ. Ba to La TƖƖNA niiŋ nɛ a ŋaa wɩalɩŋ kala ʋ sɩ to Mosis lɛ a dagɛba.