NAMBABA 8 - WƖA TENIŊ

Ŋɩɩ ba sɩ jaŋ joŋ chaana-la sagɛ

¹ La TƖƖNA bʋla pɩ Mosis,

² “Bʋla pɩ Arɔŋ dɩ ʋ nɩɩ chɛ ʋ joŋ chaana-la balɩpɛ a sagɛ chaaŋ-daa nyuŋ, ʋ maga dɩ ʋ sagɛba dɩ ba pʋlʋmʋŋ chaana hɛ chaaŋ-daa-la sɩpaaŋ.”

³ Ŋɩɩ nɛ Arɔŋ joŋ chaana-la sagɛ ba chaasɛ kʋ-la nyuŋ ba sɩ chɩna sɩpaaŋ arɩ La TƖƖNA sɩ dagɛ Mosis ŋɩɩ.

⁴ Ŋ-la nɛ ba ŋaa chaaŋ-daala: Sɛlɩmɛ nɛ ba kaa libi, a chɩŋ ʋ bʋbʋɔ-chɛlɛ a kaa jɩl ʋ dɩdɛrɩŋ kɩalɩŋ sɩ nagɛ tɩɩfɩɩlaa. Ba ŋaaʋ ʋ nagɛ ŋɩɩ tɩtɩa La TƖƖNA sɩ dagɛ Mosis nɛ.

Ŋɩɩ ba sɩ jaŋ to a lɩɩsɛ Levi doho nɩaa

⁵ Ŋɩɩ nɛ La TƖƖNA bɩra bʋla pɩ Mosis,

⁶ “Lɩɩsɛ Levi doho nɩaa Iziral tɩŋŋaa tʋɔŋ a pɩɩsɛ ba disiniŋ ta.

⁷ Dɩ ŋ nɩɩ chɛ ŋ pɩɩsɛ ba disiniŋ ta, to wombiiŋ deeŋ: Joŋ lɩɩ-la ŋ sɩɩ chɛ ŋ kaa pɩɩsɛ ba wʋbɔŋŋɔɔ ta a mɩsa hɛ ba lɛ, aŋ leŋ dɩ ba fʋŋ ba yaraa pʋnaa kala aŋ chɛsɛ ba gɛnnɩŋ. Dɩ ba nɛ ŋaa ŋɩɩ, ba pɩɩsɛ ba disiniŋ ta nɛ.

⁸ Leŋ dɩ ba kɛŋ nɛ-bel-pɔrʋŋ arɩ ʋ mɩaa Wɩɩsʋlʋŋ, munuŋ sɩ bɩɩ nʋgʋgʋ ba sɩ hɛ nʋʋŋ a kɔ, a pɛ nɛ-bel-pɔrʋŋ dɔŋɔ ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ lɛ.

⁹ Kɛŋ Levi doho nɩaa kɔ lɛbɩ-la lɛ mɩ sɩ yie kɔ Iziral tɩŋŋaa teeŋ sɩpaaŋ, aŋ yɩrɛ Iziral tɩŋŋaa kala kʋ hilimi.

¹⁰ Leŋ Levi doho nɩalɩŋ kʋ chɩŋ mɩ-na ma TƖƖNA sɩpaaŋ, dɩ Iziral tɩŋŋaa joŋ ba nɩsaa a daŋ ba lɛ.

¹¹ Arɔŋ jaŋ joŋ Levi doho nɩalɩŋ a pɩmɛ, a nagɛ Iziral tɩŋŋaa Wɩɩsʋllɩ kɩaa ba sɩ kaa je, dɩ ba nɛ tɩtɩŋ mɩ-na ma TƖƖNA tɩntɩŋŋaa.

¹² Leŋ dɩ Levi doho nɩaa joŋ ba nɩsaa a daŋ nɛ-bel-pɔrɔ-la balɩa nyusuŋ lɛ, dɩ ŋ kpʋ dɔŋɔ a ŋaa wʋbɔŋŋɔɔ joŋo chɛnɩŋ Wɩɩsʋlʋŋ a pɩ mɩ-na ma TƖƖNA, aŋ kpʋ dɔŋɔ ma a ŋaa kʋnyɩgaa Wɩɩsʋlʋŋ a pɩɩsɛ ba disiniŋ ta.

¹³ Leŋ dɩ Levi doho nɩalɩŋ chɩŋ Arɔŋ arɩ ʋ hambolibiisiŋ sɩpaaŋ, ka dɩ ŋ jomba a pɩmɛ, a nagɛ ba sɩ yie kɛŋ kɩaa je a ŋaa Wɩɩsʋlʋŋ pɩmɛ ŋɩɩ.

¹⁴ Ŋ-la nɛ ŋ jaŋ to a lɩɩsɛ Levi doho nɩaa Iziral tɩŋŋaa tʋɔŋ, dɩ ba ŋaa mɩ nɩaa.

¹⁵ Dɩ ŋ nɛ pɩɩsɛ Levi doho nɩalɩŋ disiniŋ ta dɛrɛ, a jomba pɩmɛ, a nagɛ ba sɩ yie kɛŋ kɩaa je a ŋaa Wɩɩsʋlʋŋ a pɩmɛ ŋɩɩ, leŋ dɩ ba kɔ lɛbɩ-la lɛ mɩ sɩ yie kɔ Iziral tɩŋŋaa teeŋ a tɩŋ ba tɩntɩŋŋaa.

¹⁶ Levi doho nɩaa nɛ ŋaa Iziral tɩmma-la ŋ sɩ maga ŋ jomba arɩ ba wɩɩkala a pɩmɛ. Mɩ lɩɩsɛba nɛ dɩ ba ŋaa mɩ nɩaa a chɩŋ Iziral tɩŋŋaa haalaa kala hambolibii bumbumba nyusuŋ lɛ.

¹⁷ Iziral tɩŋŋaa hambolibii bumbumba arɩ ba pʋsʋŋ bii-bumbumba sɩ ŋaa belliŋ kala ŋaa mɩ kɩaa nɛ. Bʋa-la lɛ mɩ sɩ kpʋ Ijipiti tɩŋŋaa hambolibii bumbumba, mɩ leŋ ba-na nɛ dɩ ba ŋaa mɩ kɩaa.

¹⁸ Mɩ saa joŋ Levi doho nɩaa a hɛ Iziral tɩŋŋaa kala hambolibii bumbumba nyuŋ lɛ nɛ.

¹⁹ Iziral tɩŋŋaa kala tʋɔŋ, mɩ lɩɩsɛ Levi doho nɩaa nɛ a ŋaa zile pɩ Arɔŋ arɩ ʋ hambolibiisiŋ, dɩ ba laa Iziral tɩŋŋaa nyuŋ a tɩtɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ tɩntɩŋŋaa, aŋ pɛ pɩɩsɛ ba disiniŋ tɩta. Ŋɩɩ jaŋ leŋ dɩ Iziral tɩŋŋaa nɛ mʋ kpagɛ Wɩa dɩ-zɔŋ-la, dɩ wʋlɔrʋ sɩ́ ba jʋʋ.”

²⁰ Ŋɩɩ nɛ Mosis, Arɔŋ arɩ Iziral tɩŋŋaa kala kɛŋ Levi doho nɩalɩŋ a ŋaa wɩalɩŋ kala La TƖƖNA sɩ dagɛ Mosis.

²¹ Ŋɩɩ nɛ Levi doho nɩaa pɩɩsɛ ba disiniŋ ta aŋ chɛsɛ ba gɛnnɩŋ. Arɔŋ jomba hɛ La TƖƖNA nɩsɩŋ lɛ a nagɛ ba sɩ yie kɛŋ kɩaa kaa je a ŋaa Wɩɩsʋlʋŋ pɩ La TƖƖNA ŋɩɩ, aŋ ŋaa wɩalɩŋ sɩ maga dɩ ʋ ŋaa a pɩɩsɛ ba wʋbɔŋŋɔɔ ta.

²² Ŋɩɩ harɩŋ Levi doho nɩaa mʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ aa tɩŋ ba tɩntɩŋŋaa. Arɔŋ arɩ ʋ hambolibiisiŋ nɛ faa bemba. Wɩalɩŋ kala La TƖƖNA sɩ dagɛ Mosis nɛ ba ŋaa Levi doho nɩalɩŋ lɛ.

²³ Ŋɩɩ nɛ La TƖƖNA bɩra bʋla pɩ Mosis,

²⁴ “Levi doho nɩaa tʋɔŋ, baal na-kala sɩ yi jɩsɩŋ mara arɩ banɔŋ koo a kɩɩ ŋɩɩ, maga dɩ ʋ kɔ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ aa tɩŋ tɩntɩŋŋaa.

²⁵ Ama dɩ baal na-kala nɛ yi jɩsɩŋ mahɩŋ balɩa arɩ fii, ʋ maga dɩ ʋ leŋ tɩntɩmɩa-la nɛ.

²⁶ Nɩalɩŋ sɩ yi jɩsɩŋ mahɩŋ balɩa arɩ fii jaŋ wuo pɛ ba naambiiriŋ lɛ dɩ ba tɩŋ ba tɩntɩŋŋaa, ama ba-na tɩtɩa bɩ maga dɩ ba kɛŋ tɩntɩŋ nyuŋ. Ŋɩɩ ŋ sɩ jaŋ to a dagɛ Levi doho nɩalɩŋ ba tɩntɩŋŋaa nɛ ŋɩɩ.”