NAMBABA 6 - WƖA TENIŊ

Dɩ nʋʋ nɛ ta niiŋ a joŋ ʋ tɩtɩa pɩ Wɩa, a ŋaa Nazarɩ tɩɩna, wɩalɩŋ sɩ maga dɩ ʋ ŋaa

¹ La TƖƖNA bʋla pɩ Mosis,

² “Bʋla pɩ Iziral tɩŋŋaa, dɩ baal koo haal nɩɩ chɛ dɩ ʋ chaasa chɩŋ a ta niiŋ, a joŋ ʋ tɩtɩa a pɩmɛ, a tɔ nyukiiŋ,

³ wɩaa deemba nɛ maga dɩ ʋ ŋɩŋaa: Ʋ maga dɩ ʋ lɩɩsɛ ʋ tɩtɩa sɩ-duoruŋ nyʋanʋŋ lɛ: tɩɩnɛnɛɛ sɩnɩŋ koo sɩ-yele-na kala, girep nɛnɛɛ lɩɩŋ, a sɩ́ ʋ nɛnɩŋ ma dii, kʋlaaŋ koo kʋhɩlɩŋ.

⁴ Bʋa-la kala lɛ ʋ sɩ tɔ nyu-kɩɩ-la, ʋ bɩ maga dɩ ʋ dii girep nɛnɩŋ, ʋ biee koo ʋ horuŋ.

⁵ Bʋa-la kala lɛ ʋ sɩ ta nii-la a joŋ ʋ tɩtɩa a pɩmɛ, nyufʋna bɩ jaŋ lɔgɛ ʋ nyuŋ lɛ. Ʋ maga dɩ ʋ ŋaa tʋɔpʋl tɩɩna nɛ mɩ-na ma TƖƖNA teeŋ, dɩ bʋa-la mʋ dɛrɛ. Ʋ maga dɩ ʋ leŋ ʋ nyu-pʋnaa dɩ ba waa a duomi.

⁶ Bʋa-la-kala lɛ ʋ sɩ ta nii-la a joŋ ʋ tɩtɩa a pɩ mɩ-na ma TƖƖNA, ʋ bɩ maga dɩ ʋ kpagɛ sʋʋŋ.

⁷ Dɩ ʋ nyɩmma koo ʋ naaŋ koo ʋ naambii koo ʋ dɩhaala nɛ sʋba, ʋ bɩ maga dɩ ʋ digiba a kɛŋ disiniŋ mɩ teeŋ, bɛɛ wɩaa ʋ sɩ ta nii-la a joŋ ʋ tɩtɩa pɩmɛ, ʋ magɩlɩŋ hɛ ʋ nyuŋ lɛ nɛ.

⁸ Bʋa-la kala lɛ ʋ sɩ ta nii-la, ʋ hɛ mɩ-na ma TƖƖNA nɩsɩŋ lɛ nɛ.

⁹ Dɩ nʋʋ nɛ guu sʋʋ a kpagɛ nɩɩ-la sɩ ta niiŋ a joŋ ʋ tɩtɩa pɩmɛ, ŋɩɩ leŋe nyu-kɩɩ-la ʋ sɩ tɔ kɛŋ disiniŋ nɛ mɩ teeŋ. Ʋ maga dɩ ʋ fʋŋ ʋ nyuŋ-la tapʋl-pɛɩ ba sɩ jaŋ pɩɩsɛ ʋ disiniŋ ta.

¹⁰ Tapʋl-chori chɛɛŋ, ʋ jaŋ kɛŋ kokosuŋ balɩa a mʋ Wɩɩsʋllɩ sɩpaalaara teeŋ, lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ.

¹¹ Wɩɩsʋllɩ sɩpaalaara jaŋ joŋ dɔŋɔ a sʋl wʋbɔŋŋɔɔ joŋo chɛnɩŋ Wɩɩsʋlʋŋ, aŋ joŋ dɔŋɔ ma a sʋl kʋnyɩgaa Wɩɩsʋlʋŋ a pɩɩsɛ nɩɩ-la wʋbɔŋŋɔɔ ta, bɛɛ wɩaa sʋʋ-la leŋe ʋ kɛŋ disiniŋ nɛ. Tapʋlɩɩ-la tɩtɩa nɛ ʋ jaŋ bɩra joŋ ʋ nyuŋ-la a hɛ mɩ nɩsɩŋ lɛ.

¹² Ʋ jaŋ bɩra wasa chɩŋ bʋa-la lɛ a ta niiŋ a joŋ ʋ tɩtɩa pɩ mɩ-na ma TƖƖNA. Ʋ jaŋ kɛŋ pie-bel-pɔrʋŋ sɩ yi jɩna a sʋl cheeriŋ Wɩɩsʋlʋŋ. Tapʋlɩa-la-na sɩ bala bɩra bɩ pɛ, bɛɛ wɩaa ʋ sɩ ta nii-la a joŋ ʋ tɩtɩa pɩmɛ bʋa-la lɛ, ʋ cheye nɛ.

¹³ Dɩ nʋʋ nɛ ta niiŋ a joŋ ʋ tɩtɩa a pɩmɛ, a tɔ nyukiiŋ, dɩ nii-la ʋ sɩ ta nɛ dɛrɛ, wɩalɩŋ ʋ sɩ jaŋ ŋaa nɛ ŋ-la: Ba jaŋ kɛnʋ mʋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ.

¹⁴ Nɩmɛ ʋ jaŋ kʋ ŋaa ʋ Wɩɩsʋlʋŋ a pɩ mɩ-na ma TƖƖNA: Ʋ jaŋ kɛŋ pie-bel-pɔrʋŋ sɩ yi jɩna a bɩ nyɔɔ kala kɛnɛ a sʋl kʋnyɩgaa Wɩɩsʋlʋŋ, a kɛŋ pie-keeŋ sɩ yi jɩna a bɩ nyɔɔ kala kɛnɛ a sʋl wʋbɔŋŋɔɔ joŋo chɛnɩŋ Wɩɩsʋlʋŋ, a kɛŋ pie-bele ma sɩ bɩ nyɔɔ kala kɛnɛ a sʋl nii-magɛ dɔŋɔ Wɩɩsʋlʋŋ,

¹⁵ a pɛ ba mɩaa Wɩɩsʋlʋŋ arɩ ba kʋnyʋalaa Wɩɩsʋlʋŋ lɛ, a pɛ kʋdiilee sɩ bɩ sɩbʋrʋŋ kɛnɛ sime sɩɩŋ, munuŋ sɩ bɩɩ nʋgʋgʋ ba sɩ kɛŋ nʋʋŋ buu a wasɛ boroboro arɩ munuŋ sɩ bɩɩ nʋgʋgʋ ba sɩ kaa wasɛ boroboro pɛrɛ pɛrɛ biisiŋ a ŋaa nʋʋŋ taa.

¹⁶ Wɩɩsʋllɩ sɩpaalaara jaŋ kɛŋ kɩaa deemba kɔ mɩ-na ma TƖƖNA sɩpaaŋ a sʋl nɩɩ-la wʋbɔŋŋɔɔ joŋo chɛnɩŋ Wɩɩsʋlʋŋ arɩ ʋ kʋnyɩgaa Wɩɩsʋlʋŋ.

¹⁷ Ʋ jaŋ kɛŋ pie-bele-la a sʋl nii-magɛ dɔŋɔ Wɩɩsʋlʋŋ a pɩmɛ arɩ kʋdiile-la sɩ bɩ sɩbʋrʋŋ kɛnɛ sime sɩɩŋ, a pɛ mɩaa Wɩɩsʋlʋŋ arɩ kʋnyʋalaa Wɩɩsʋlʋŋ lɛ.

¹⁸ Lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ nɛ, nɩɩ-la sɩ joŋ ʋ tɩtɩa pɩmɛ jaŋ fʋŋ ʋ nyu-kɩɩ-la ʋ sɩ tɔ. Ʋ jaŋ paa nyu-pʋna-la a hɛ nyiŋ-la lɛ ba sɩ nyɩgɛ nii-magɛ dɔŋɔ Wɩɩsʋlʋŋ kɩaa.

¹⁹ Dɩ nyu-kɩɩ-la tɩɩna nɛ fʋŋ ʋ nyuŋ-la ʋ sɩ tɔ, Wɩɩsʋllɩ sɩpaalaara jaŋ chɔ pie-bele-la vaaŋ, a lɩɩsɛ boroboro-la sɩ bɩ sɩbʋrʋŋ kɛnɛ kʋbala arɩ boroboro pɛrɛ pɛrɛ biisi-la ma sɩ bɩ sɩbʋrʋŋ kɛnɛ kʋbala sɩ hɛ sime-la tʋɔŋ a joŋo hɛ nyu-kɩɩ-la tɩɩna nɩsɩŋ lɛ.

²⁰ Wɩɩsʋllɩ sɩpaalaara jaŋ laa kɩalɩŋ a kaa zaarɛ mɩ-na ma TƖƖNA sɩpaaŋ, ŋɩɩ ŋaa Wɩɩsʋlɩɩ nɛ, ba ŋaa mɩ kʋzɔmɔ nɛ. Wɩɩsʋllɩ sɩpaalaara nɛ tɩɩba, ʋ nɛ tɩɩ vaa-la arɩ hui-la ma ʋ sɩ yie kaa zaarɛ a ŋaa Wɩɩsʋlʋŋ. Ʋ ŋɩɩ harɩŋ, nɩɩ-la sɩ ta niiŋ a tɔ nyukii-la tɩɩna jaŋ wuo nyʋa tɩɩnɛnɛɛ sɩnɩŋ.

²¹ Wombii-la nʋʋ sɩ tɔ nyukiiŋ sɩ jaŋ to a joŋ ʋ Wɩɩsʋlʋŋ kɩaa pɩ mɩ-na ma TƖƖNA nɛ ŋɩɩ, a pɛ kʋŋ dɔŋ kala ʋ sɩ cho dɩ ʋ joŋo pɛ lɛ. Ʋ maga dɩ ʋ lɩɩsɛ nii-la ʋ sɩ ta nɛ arɩ nɩalɩŋ sɩ tɔ nyukiiŋ wombiiŋ sɩ dagɛ ŋɩɩ.”

Ŋɩɩ Wɩɩsʋllɩ sɩpaalaaraa sɩ jaŋ sʋl Wɩa pɩpɩ nɩaa

²² La TƖƖNA bɩra bʋla pɩ Mosis,

²³ “Bʋla pɩ Arɔŋ arɩ ʋ hambolibiisiŋ, wombii-la ba sɩ jaŋ to a sʋlmɛ dɩ mɩ pɛ Iziral tɩŋŋaa lɛ nɛ ŋ-la: Ba jaŋ bʋl:

²⁴ ‘La TƖƖNA jaŋ pɛ ma lɛ a kɛmma woruŋ.

²⁵ Ʋ jaŋ suri ʋ sɩaa pɩma, ʋ jaŋ fá ma nenige.

²⁶ La TƖƖNA jaŋ beŋ ma nyuŋ arɩ ʋ chonuŋ, a leŋ dɩ ma hɔŋ arɩ fɩɛlɩŋ.’

²⁷ Dɩ ba nɛ yɩrɛ mɩ yɩrɩŋ Iziral tɩŋŋaa tʋɔŋ a bʋl wɩaa deemba, mɩ jaŋ pɛ ba lɛ.”