NAMBABA 4 - WƖA TENIŊ

Kohaf tɩŋŋaa

¹ La TƖƖNA bʋla pɩ Mosis arɩ Arɔŋ,

² “Má dɩɩsɛ Kohaf tɩŋŋaa Levi doho nɩaa tʋɔŋ, doho doho arɩ dɩa dɩa.

³ Má dɩɩsɛ baala-la kala sɩ yi jɩsɩŋ mara arɩ fii a kaa mʋ mahɩŋ balɩa arɩ fii, nɩalɩŋ kala sɩ maga dɩ ba kʋʋ tɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ.

⁴ Tɩntɩmɩɩ-la sɩ maga dɩ Kohaf tɩŋŋaa tɩtɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ nɛ, dɩ ba bibeŋ kɩalɩŋ sɩ ŋaa mɩ kʋzɔmɔ woruŋ.

⁵ Dɩ Iziral tɩŋŋaa nɩɩ sii ba dɩhɔnʋŋ, Arɔŋ arɩ ʋ hambolibiisiŋ nɛ jaŋ jʋʋ puri patɩɩsaŋ-la sɩ kɛrɛ Wɩa dɩ-zɔŋ-la lee-la zɔmʋŋ sɩ bɩ magɩa kɛnɛ a kaa tɔ Wɩa niiriŋ daga-la.

⁶ Ba jaŋ joŋ lɩɩ-nɛsɩŋ tenniŋ a tɔ, a joŋ gɛrɩpɛ-diibelimbine a tɔ daŋ, a joŋ daaterigeba-la ba sɩ kaa jujoŋ daga-la a tʋʋ ba dɩ-tʋʋlaa.

⁷ Ba jaŋ joŋ gɛrɩpɛ-diibelimbine a tɔ teebʋl-la nyuŋ boroboro sɩ yie daŋ a chɩŋ mɩ sɩpaaŋ, a paa pɩrataba, dasɔsʋŋ, gbansɩŋ arɩ tagɩsɩŋ ba sɩ kaa ŋɩŋaa kʋnyʋalaa Wɩɩsʋlʋŋ a daŋ. Boroboro-la sɩ daŋ teebʋl-la nyuŋ maga dɩ ʋ daŋ nɩmɛ nɛ bʋa na-kala.

⁸ Ba jaŋ joŋ gɛrɩpɛ-fɩaŋ a tɔ kɩalɩŋ, a joŋ lɩɩ-nɛsɩŋ tenniŋ a tɔ daŋ, a joŋ daaterigeba-la ba sɩ kaa jujoŋ teebʋl-la a tʋʋ ba dɩ-tʋʋlaa.

⁹ Ba jaŋ joŋ gɛrɩpɛ-diibelimbine a tɔ chaaŋ daaŋ arɩ ʋ chaanaa, a pɛ kʋ-la ba sɩ kaa mɩlɩmɛ chaana-la ta ba jɩjɩl aŋ tutuu, tʋɔrʋŋ gbaŋa, arɩ chaana-la nʋʋŋ tagɩsɩŋ.

¹⁰ Ba jaŋ bɩra kɛŋ lɩɩ-nɛsɩŋ tenniŋ a bɛ tɔ chaaŋ daaŋ arɩ ʋ nyuŋ tɩntɩnnɩ kɩaa kala, a joŋo daŋ daasɩ-la nyuŋ ba sɩ kaa chʋchʋŋ ba lɛ.

¹¹ Ba jaŋ joŋ gɛrɩpɛ-diibelimbine arɩ lɩɩ-nɛsɩŋ tenniŋ a tɔ ba sɩ kɛŋ sɛlɩmɛ ŋaa Wɩɩsʋllɩ koru-la, a joŋ daaterigeba-la ba sɩ kaa jujoŋ koru-la a tʋʋ ba dɩ-tʋʋlaa.

¹² Ba jaŋ paa tɩntɩnnɩ kɩalɩŋ kala ba sɩ kaa tɩtɩŋ Wɩa dɩa lɛ, a joŋ gɛrɩpɛ-diibelimbine a bɛ tɔ, a joŋ lɩɩ-nɛsɩŋ tenniŋ a tɔ daŋ, a joŋo daŋ daasɩ-la ba sɩ kaa chʋchʋmba lɛ.

¹³ Ba jaŋ chaarɛ tʋɔrʋ-la kala sɩ hɛ kɔlɩɩŋ koru-la tʋɔŋ, aŋ joŋ gɛrɩpɛ-vachalɩŋ tɔ.

¹⁴ Ba jaŋ paa tɩntɩnnɩ kɩalɩŋ kala ba sɩ kaa tɩtɩŋ koru-la nyuŋ: nʋʋ-hallɩŋ, nammɩa lɛsɩŋ, safʋlba arɩ kʋmɩsɩrɩ gbansɩŋ a daŋ. Ba jaŋ joŋ lɩɩ-nɛsɩŋ tenniŋ a tɔ daŋ, aŋ joŋ daaterigeba-la ba sɩ kaa chʋchʋŋ koru-la a tʋʋ ba dɩ-tʋʋlaa.

¹⁵ Dɩ Arɔŋ arɩ ʋ hambolibiisiŋ nɛ tɔ Wɩa dɩ-zɔŋ-la kpɩɛrɩ-zɔmɔ-la arɩ ʋ tɩntɩnnɩ kɩalɩŋ kala dɛrɛ, dɩ Iziral tɩŋŋaa kɛŋ ba tɩtɩa hɛ dɔŋɔ dɩ ba vɛŋ, Kohaf doho nɩaa nɛ jaŋ kʋ chʋmba. Ama ba bɩ maga dɩ ba digi Wɩa kʋzɔmɔ-la. Dɩ ba nɛ dige, ba jaŋ sʋʋ. Ba nɛ jaŋ chʋŋ lɛbɩ-la lɛ mɩ sɩ yie kɔ Iziral tɩŋŋaa teeŋ tʋɔŋ kɩaa kala.

¹⁶ Wɩɩsʋllɩ sɩpaalaara Arɔŋ nanʋala Elieza nɛ maga dɩ ʋ bibeŋ kɩaa deemba kala nyuŋ: chaana-la nʋʋŋ, kʋsʋɔrɩ-sɩŋŋa-la, tapʋlɩɩ kala mɩaa Wɩɩsʋlɩɩ-la arɩ Wɩɩsʋllɩ nʋʋŋ. Ʋ nɛ maga dɩ ʋ bibeŋ Wɩa dɩ-zɔŋ-la arɩ ʋ tʋɔŋ tɩntɩnnɩ kɩaa a pɛ ʋ kpɩɛrɩ-zɔmɔ-la kala lɛ.”

¹⁷ Ŋɩɩ nɛ La TƖƖNA bɩra bʋla pɩ Mosis arɩ Arɔŋ,

¹⁸ “Má sɩ́ leŋe dɩ Kohaf tɩŋŋaa sɩ lɩɩ Levi doho nɩaa tʋɔŋ kʋ kpagɛ mɩ kʋzɔmɔ a sʋʋ.

¹⁹ Ŋaa ŋ-la pɩba: Arɔŋ arɩ ʋ hambolibiisiŋ nɛ jaŋ jʋʋ Wɩa dɩa-la tʋɔŋ a dagɛba tɩntɩmɩɩ-la ba kʋŋkala sɩ maga dɩ ʋ tɩŋ arɩ kʋ-la nʋʋkala sɩ maga dɩ ʋ chʋŋ.

²⁰ Ama Kahof tɩmma-la bɩ maga dɩ ba jʋʋ Wɩa dɩa-la a nyilime na mɩ kʋzɔmɔ-la, dɩ ba nɛ ŋaa ŋɩɩ, ba jaŋ sʋʋ.”

Gɛsɔŋ tɩŋŋaa

²¹ La TƖƖNA bɩra bʋla pɩ Mosis,

²² “Dɩɩsɛ Gɛsɔŋ tɩŋŋaa, doho doho arɩ dɩa dɩa.

²³ Dɩɩsɛ baala-la kala sɩ yi jɩsɩŋ mara arɩ fii a kaa mʋ mahɩŋ balɩa arɩ fii, nɩalɩŋ sɩ maga dɩ ba kʋʋ tɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ.

²⁴ Tɩntɩmɩa-la Gɛsɔŋ tɩŋŋaa sɩ jaŋ tɩtɩŋ arɩ kɩalɩŋ ba sɩ jaŋ chʋchʋŋ nɛ ŋ-la:

²⁵ Ba nɛ jaŋ chʋŋ Wɩa dɩ-zɔŋ-la patɩɩsamba, lɛbɩ-la lɛ mɩ sɩ yie kɔ Iziral tɩŋŋaa teeŋ, gɛrɩpɛ-la sɩ tɔʋ arɩ lɩɩ-nɛsɩŋ tenni-la sɩ tɔ daŋ, a pɛ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ patɩɩsamba lɛ,

²⁶ lɩga-la sɩ golli Wɩa dɩ-zɔŋ-la arɩ koru-la patɩɩsamba arɩ ʋ boiŋ niiŋ patɩɩsamba, ŋmɛsɩ-la arɩ kɩalɩŋ kala ba sɩ kaa tɩŋ ba tɩntɩŋŋaa. Gɛsɔŋ doho nɩaa tɩntɩŋŋaa nɛ ŋɩɩ.

²⁷ Tɩntɩŋŋaa deemba kala, dɩ kɩaa chʋŋʋŋ nɛ koo dɩ tɩntɩmɩɩ dɔŋ nɛ, Arɔŋ arɩ ʋ hambolibiisiŋ nɛ jaŋ dagɛba ba tɩntɩŋŋaa. Ba nɛ maga dɩ ba dagɛba kɩalɩŋ kala ba sɩ jaŋ chʋŋ.

²⁸ Gɛsɔŋ doho nɩaa sɩ maga dɩ ba tɩtɩŋ tɩntɩmɩɩ-la lɛbɩ-la lɛ mɩ sɩ yie kɔ Iziral tɩŋŋaa teeŋ nɛ ŋɩɩ. Wɩɩsʋllɩ sɩpaalaara Arɔŋ nanʋala Ɩtama nɛ maga dɩ ʋ bemba dɩ ba tɩtɩŋ.

Mɛrarɩ tɩŋŋaa

²⁹ Dɩɩsɛ Mɛrarɩ tɩŋŋaa, doho doho arɩ dɩa dɩa.

³⁰ Dɩɩsɛ baala-la kala sɩ yi jɩsɩŋ mara arɩ fii a kaa mʋ mahɩŋ balɩa arɩ fii, nɩalɩŋ sɩ maga dɩ ba kʋʋ tɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ.

³¹ Ba tɩntɩŋŋaa ba sɩ jaŋ tɩtɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ nɛ ŋ-la: Ba nɛ jaŋ chʋchʋŋ Wɩa dɩ-zɔŋ-la daapɛsɩŋ, daa-gɛsɛɛ, daaterigeba, arɩ hɔ-taalɩsɩŋ,

³² Lɩga-la sɩ golli Wɩa dɩ-zɔŋ-la daapɛsɩŋ, hɔ-taalɩŋ, lɛbɩ-la daapɛ-biisiŋ, ŋmɛsɩŋ, arɩ kɩalɩŋ kala ba sɩ kaa tɩŋ ba tɩntɩŋŋaa. Dagɛ baal na-kala kʋ-la ʋ sɩ jaŋ chʋŋ.

³³ Mɛrarɩ tɩŋŋaa sɩ maga dɩ ba tɩtɩŋ tɩntɩmɩɩ-la lɛbɩ-la lɛ mɩ sɩ yie kɔ Iziral tɩŋŋaa teeŋ nɛ ŋɩɩ. Wɩɩsʋllɩ sɩpaalaara Arɔŋ nanʋala Ɩtama nɛ maga dɩ ʋ dagɛba tɩntɩmɩa-la.”

Ba dɩɩsɛ Levi doho nɩaa

³⁴ Ŋɩɩ nɛ Mosis arɩ Arɔŋ arɩ Iziral tɩŋŋaa sɩpaalaara-la dɩɩsɛ Kohaf tɩŋŋaa, doho doho arɩ dɩa dɩa.

³⁵ Ba dɩɩsɛ baala-la kala sɩ yi jɩsɩŋ mara arɩ fii a kaa mʋ mahɩŋ balɩa arɩ fii, nɩalɩŋ sɩ maga dɩ ba kʋʋ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ.

³⁶ Nɩalɩŋ kala ba sɩ dɩɩsa doho doho, ŋaa nɩaa bʋɩ balɩa arɩ zɔɔ-balɩpɛ arɩ mahɩŋ balɩa arɩ fii nɛ.

³⁷ Kohaf tɩŋŋaa doho nɩalɩŋ kala sɩɩ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ niiŋ nɛ ŋɩɩ, La TƖƖNA sɩ leŋe Mosis arɩ Arɔŋ dɩɩsɛ.

³⁸ Ba dɩɩsɛ Gɛsɔŋ tɩŋŋaa ma doho doho arɩ dɩa dɩa nɛ.

³⁹ Ba sɩ dɩɩsɛ baala-la kala sɩ yi jɩsɩŋ mara arɩ fii a kaa mʋ mahɩŋ balɩa arɩ fii, nɩalɩŋ sɩ kʋʋ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ,

⁴⁰ ba ŋaa nɩaa bʋɩ balɩa arɩ zɔɔ-balɩdʋ arɩ mara arɩ fii nɛ. Ba dɩɩsɛba doho doho arɩ dɩa dɩa nɛ.

⁴¹ Gɛsɔŋ tɩmma-la doho kala sɩɩ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ niiŋ nɛ ŋɩɩ, La TƖƖNA sɩ leŋe Mosis arɩ Arɔŋ dɩɩsɛ.

⁴² Ba dɩɩsɛ Mɛrarɩ tɩŋŋaa ma doho doho arɩ dɩa dɩa nɛ.

⁴³ Ba dɩɩsɛ baala-la kala sɩ yi jɩsɩŋ mara arɩ fii a kaa mʋ mahɩŋ balɩa arɩ fii, nɩalɩŋ kala sɩ kʋʋ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ,

⁴⁴ ba ŋaa nɩaa bʋɩ batori arɩ zɔɔ-balɩa nɛ. Ba dɩɩsɛba doho doho arɩ dɩa dɩa nɛ.

⁴⁵ Mɛrarɩ tɩmma-la doho kala niiŋ nɛ ŋɩɩ, La TƖƖNA sɩ ŋaa Mosis arɩ Arɔŋ dɩɩsɛ.

⁴⁶ Ŋɩɩ nɛ Mosis arɩ Arɔŋ arɩ Iziral tɩŋŋaa sɩpaalaara-la dɩɩsɛ Levi doho nɩaa doho doho arɩ dɩa dɩa.

⁴⁷ Ba dɩɩsɛ baala-la kala sɩ yi jɩsɩŋ mara arɩ fii a kaa mʋ mahɩŋ balɩa arɩ fii, nɩalɩŋ sɩ kʋʋ tɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ aŋ pɛ chʋchʋŋ lɛbɩ-la.

⁴⁸ Ba kala fa ŋaa nɩaa bʋɩ chori arɩ zɔɔ-banɔŋ arɩ mahɩŋ banɛsɛ nɛ.

⁴⁹ La TƖƖNA sɩ dagɛ Mosis ŋɩɩ, ba dagɛ nʋʋkala ʋ tɩntɩmɩŋ arɩ kʋ-la nʋʋkala sɩ maga dɩ ʋ chʋŋ. Ŋɩɩ nɛ ba dɩɩsɛ nɩalɩŋ kala arɩ La TƖƖNA sɩ dagɛ Mosis ŋɩɩ.