NAMBABA 34 - WƖA TENIŊ

Kɛnaŋ tinteeŋ bʋa

¹ La TƖƖNA bʋla pɩ Mosis,

² “Bʋla pɩ Iziral tɩŋŋaa, ‘Dɩ ma nɛ jʋʋ Kɛnaŋ tintee-la mɩ sɩ jaŋ joŋo pɩma, ʋ jaŋ kɛŋ bʋa.

³ Tintee-la wɩɩpɔsʋŋ nadiiŋ bʋa jaŋ chɩŋ Mʋgʋ-sʋʋ-la niiŋ wɩɩjʋʋlʋŋ a mʋ to Ziŋ tintee-hɩlɩɩ-la sɛmɛ dɔŋɔ a mʋ yi Ɛdɔm tɩŋŋaa tinteeŋ bʋa,

⁴ a bɩra chɩŋ wɩɩpɔsʋŋ na-dii-la a chaasɛ lee-la ba sɩɩ yɩrɛ Akɩrabɩm a to ŋɩɩ mʋ Ziŋ a mʋ yi Kadɛs Banɩa wɩɩpɔsʋŋ nadiiŋ, a lɩɩ nɩmɛ a to ŋɩɩ mʋ Haza Ada, a kaa mʋ yi Azɩmɔŋ.

⁵ Bʋa-la jaŋ bɩra chɩŋ Azɩmɔŋ lɛ a to ŋɩɩ mʋ fuonaa-la sɩ hɛ Ijipiti tinteeŋ niiŋ a mʋ dɛrɛ mʋgʋ-bal-la ba sɩɩ yɩrɛ Mediterenia lɛ.

⁶ Mʋgʋ-bal-la ba sɩɩ yɩrɛ Mediterenia nɛ jaŋ ŋaa tintee-la wɩɩjʋʋlʋŋ bʋa.

⁷ Ma tintee-la wɩɩpɔsʋŋ nagʋa bʋa jaŋ chɩŋ mʋgʋ-bal-la niiŋ a mʋ yi peel-la ba sɩɩ yɩrɛ Hɔɔ,

⁸ a chɩŋ peel-la ba sɩɩ yɩrɛ Hɔɔ lɛ a to Lebo-Hamaf a mʋ yi Zɛdad,

⁹ a bɩra chɩŋ Zɛdad lɛ a mʋ to Zɩfʋrɔŋ a mʋ dɛrɛ Haza-Enaŋ lɛ. Ma wɩɩpɔsʋŋ nagʋa bʋa nɛ ŋɩɩ.

¹⁰ Wɩɩpɔsʋŋ bʋa ma jaŋ chɩŋ Hɛzaa-Ɛna lɛ a mʋ to Sɛfam.

¹¹ Bʋa-la bɩra jaŋ chɩŋ Sɛfam lɛ a mʋ to Rɩbɩla sɩ hɛ Aɩŋ wɩɩpɔsʋŋ a to peele-la sɛmɛ ŋɩɩ a mʋ jʋʋ mʋga-la ba sɩɩ yɩrɛ Galilii sɩ hɛ wɩɩpɔsʋŋ,

¹² a lɩɩ nɩmɛ a mʋ to Jɔdaŋ fuo-la a mʋ dɛrɛ mʋga-la ba sɩɩ yɩrɛ Mʋgʋ-sʋʋŋ lɛ. Ma tintee-la mɩ sɩ jaŋ joŋo pɩma bʋa nɛ ŋɩɩ.’ ”

¹³ Ŋɩɩ nɛ Mosis bʋla pɩ Iziral tɩŋŋaa, “Tintee-la ma sɩ jaŋ tɔnsɛ a kaa kpaa nɛ ŋɩɩ. Ʋ nɛ La TƖƖNA sɩ dɩ ma kaa kpaa Iziral tɩŋŋaa doho doho nibi arɩ kpaa magɛ dɔŋɔ ŋɩɩ,

¹⁴ bɛɛ wɩaa Rubiŋ doho nɩaa arɩ Gad doho nɩaa arɩ Manasɛ doho nɩaa kpaa magɛ dɔŋɔ-na laa ba kpaalɩŋ nɛ.

¹⁵ Dosunuŋ deemba balɩa arɩ kpaa magɛ dɔŋɔ-la nɛ laa ba kpaalɩŋ Jɔdaŋ fuo-la wɩɩpɔsʋŋ dɩɩrɩŋ a chaasɛ Jeriko.”

¹⁶ Ŋɩɩ nɛ La TƖƖNA bʋla pɩ Mosis,

¹⁷ “Nɩaa deemba nɛ jaŋ kɛŋ tintee-la kpaama dɩ ʋ ŋaa ma kʋŋ: Wɩɩsʋllɩ sɩpaalaara Elieza arɩ Nuŋ nanʋala Josua.

¹⁸ Má lɩɩsɛ sɩpaalaarʋ doho kala tʋɔŋ dɩ ʋ pɛ ba lɛ dɩ ma kpaa tintee-la.”

¹⁹ Nɩalɩŋ La TƖƖNA sɩ lɩɩsa yɩraa nɛ ŋ-la: Juda doho nɩaa tʋɔŋ Jefuni nanʋala Kalɩb nɛ ʋ lɩɩsɛ.

²⁰ Simioŋ doho nɩaa tʋɔŋ, Amihud nanʋala Sɛmʋɛl nɛ ʋ lɩɩsɛ.

²¹ Bɛnjamɩŋ doho nɩaa tʋɔŋ Kɩsɩlɔŋ nanʋala Ɛlɩdad nɛ ʋ lɩɩsɛ.

²² Daŋ doho nɩaa tʋɔŋ, Jogili nanʋala Buki nɛ ʋ lɩɩsɛ.

²³ Josɛf nanʋala Manasɛ doho nɩaa tʋɔŋ, Ɛfɔd nanʋala Hanɩɛl nɛ ʋ lɩɩsɛ.

²⁴ Josɛf nanʋala Efirem doho nɩaa tʋɔŋ, Sɩfɩtaŋ nanʋala Kɛmʋɛl nɛ ʋ lɩɩsɛ.

²⁵ Zebuluŋ doho nɩaa tʋɔŋ, Panakɩ nanʋala Ɛlɩzafaŋ nɛ ʋ lɩɩsɛ.

²⁶ Ɩsaka doho nɩaa tʋɔŋ, Azaŋ nanʋala Palɩtɩɛl nɛ ʋ lɩɩsɛ.

²⁷ Asa doho nɩaa tʋɔŋ, Selomi nanʋala Ahihud nɛ ʋ lɩɩsɛ.

²⁸ Nafɩtalɩ doho nɩaa tʋɔŋ, Amihud nanʋala Pɛdahɛl nɛ ʋ lɩɩsɛ.

²⁹ Nɩaa deemba nɛ La TƖƖNA lɩɩsɛ dɩ ba kɛŋ Kɛnaŋ tinteeŋ kpaa Iziral tɩŋŋaa.