NAMBABA 31 - WƖA TENIŊ

La TƖƖNA leŋe Iziral tɩŋŋaa yuo dii Midiaŋ tɩŋŋaa

¹ La TƖƖNA bʋla pɩ Mosis,

² “Midiaŋ tɩŋŋaa sɩ ŋaa wɩalɩŋ Iziral tɩŋŋaa lɛ, joŋ ba chɩmɩŋ a tiŋ ba lɛ, ʋ ŋɩɩ harɩŋ ŋ jaŋ sʋʋ.”

³ Ŋɩɩ nɛ Mosis bʋla pɩ Iziral tɩŋŋaa, “Má chaarɛ nɩaa dɩ ba mʋ yuo Midiaŋ tɩŋŋaa a tiŋ chɩŋ-la arɩ La TƖƖNA sɩ dagɛ ŋɩɩ.

⁴ Iziral doho doho fii arɩ balɩa-la kala tʋɔŋ, má lɩɩsɛ laalɩyuoroo bʋɩ doho kala lɛ dɩ ba mʋ laal-la.”

⁵ Ŋɩɩ nɛ doho kala lɩɩsɛ laalɩyuoroo bʋɩ. Ba kala ŋaa nɩaa bʋɩ fii arɩ balɩa a kɛŋ ba tɩtɩa dɩ ba mʋ laal-la.

⁶ Mosis leŋe Elieza nanʋala Finihas Wɩɩsʋllɩ sɩpaalaara nɛ kɛmba mʋ laal-la. Ŋɩɩ nɛ Finihas paa kɩalɩŋ ba sɩ kaa tɩtɩŋ Wɩa dɩa lɛ, a pɛ paa banyilliŋ ʋ sɩ jaŋ kaa ŋmʋʋ bʋl wɩaa pɩpɩba.

⁷ Ba mʋ a yuo Midiaŋ tɩmma-la arɩ ŋɩɩ La TƖƖNA sɩ dagɛ Mosis a kpʋ ba baalaa kala.

⁸ Nɩalɩŋ ba sɩ kpʋa dɔnsʋŋ nɛ ŋaa Midiaŋ kuoroo deemba banɔŋ: Evi, Rekim, Zuu, Huu, arɩ Reba. Ba fa pɛ kpʋ Bioo nanʋala Balam ma nɛ laal-la lɛ.

⁹ Iziral tɩŋŋaa fa yuo dii Midiaŋ tɩŋŋaa kala nɛ a kɛsɛ ba haalaa, ba biiriŋ, ba nɛsɩŋ arɩ piesee, a paa ba dʋa kala.

¹⁰ Ba nyɩgɛ Midiaŋ tɩŋŋaa sɩ hɔŋ tabala-la lɛ arɩ ba bugoo kala.

¹¹ Ŋɩɩ nɛ ba paa kɩalɩŋ kala ba sɩ yuo dii a pɛ pʋsʋŋ arɩ nuhuobiine lɛ,

¹² a kaa mʋ Mosis arɩ Wɩɩsʋllɩ sɩpaalaara Elieza arɩ Iziral tɩŋŋaa kala teeŋ. Bʋa-la lɛ dɩ ba hɔŋ Mʋab tintee-taalɩsɩ-la lɛ a kpagɛ Jɔdaŋ fuo-la, Jeriko cholo.

¹³ Ŋɩɩ nɛ Mosis arɩ Wɩɩsʋllɩ sɩpaalaara Elieza arɩ Iziral tɩŋŋaa sɩpaalaara-la kala lɩɩ ba dɩhɔnʋŋ lɛ a chemba.

¹⁴ Mosis na baanɩŋ laalɩyuori-hɩasɩ-la kala sɩ mɩɩra lɩɩ laalɩŋ kɔ nyuŋ. Nɩalɩŋ sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba.

¹⁵ Ŋɩɩ nɛ Mosis pɩɛsɛba, “Bɛɛ nɛ tɩɩ ma bɩ haala-la ma kala kpʋa?

¹⁶ Haala-la nɛ paala to Balam niiŋ wɩaa lɛ, a leŋ Iziral tɩŋŋaa mɩɩrɛ La TƖƖNA harɩŋ a kpaarɛ vʋɩyaa Pio lɛ, ŋɩɩ lɛrɛ nyanyal bɔŋŋɔɔ kʋ hɛ Iziral tɩŋŋaa lɛ.

¹⁷ Lɛɛlɛ, má kpʋ hambolibiisi-la kala aŋ kpʋ haala-la kala sɩ jɩŋ baalaa.

¹⁸ Ama má leŋ hantolibiisi-la ha sɩ bɩ baalaa jɩŋ. Ma nɛ tɩɩba.

¹⁹ Ma Iziral tɩmma-la kala sɩ kpʋ nɩaa koo a digi sʋʋnʋŋ, ma sɩ kʋ jʋʋ ma dɩhɔnʋŋ a yi tapʋlaa balɩpɛ. Má hɛ ma dɩhɔnʋŋ harɩŋ tapʋlaa balɩpɛ. Tapʋl-tori arɩ tapʋl-pɛɩ chɛɛŋ maga dɩ ma pɩɩsɛ ma dɩ nɩalɩŋ kala ma sɩ yuo kɛsɛ disiniŋ ta.

²⁰ Má to pɩɩsɛ ma gɛnnɩŋ arɩ kɩalɩŋ kala ba sɩ kɛŋ tenniŋ koo bʋʋna pʋnaa koo daaŋ a ŋaa disiniŋ ta.”

²¹ Ŋɩɩ nɛ Wɩɩsʋllɩ sɩpaalaara Elieza bʋla pɩ laalɩyuoro-la sɩ lɩɩ laalɩŋ kɔ, “Wombie-la La TƖƖNA sɩ to Mosis lɛ a bʋl dɩ ba tuto nɛ ŋ-la:

²² Dɩ ma nɩɩ chɛ dɩ ma pɩɩsɛ sɛlɩmɛ, hɔpʋla, kɔlɩɩŋ, hɔɔ-bine, hɔɔ-la ba sɩ kaa ŋɩŋaa kɔŋkɔŋ arɩ fanɩ,

²³ koo kʋŋ na-kala sɩ jaŋ jʋʋ nyiniŋ aŋ bɩ dii, má joŋo hɛ nyiniŋ lɛ. Dɩ ma nɛ ŋaa ŋɩɩ, ʋ bɩra bɩ disiniŋ kɛnɛ. Ama ʋ maga dɩ ma ha kɛŋ lɩɩ-la ba sɩ kaa pɩpɩɩsɛ disiniŋ a pɩɩsɛba nɛ. Kʋŋ na-kala sɩ jaŋ jʋʋ nyiniŋ a dii, má kɛŋ lɩɩ-la ba sɩ kaa pɩɩsɛ disiniŋ dʋndʋŋa a chɛsɛ.

²⁴ Tapʋl-pɛɩ chɛɛŋ ma chɛsɛ ma gɛnnɩŋ, dɩ ma nɛ ŋaa ŋɩɩ ma bɩra bɩ disiniŋ kɛnɛ, ma jaŋ wuo kʋ jʋʋ ma dɩhɔnʋŋ.”

Ba kɛŋ dʋa-la ba sɩ yuo laa kpaa

²⁵ Ŋɩɩ nɛ La TƖƖNA bʋla pɩ Mosis,

²⁶ “Ŋ dɩ Wɩɩsʋllɩ sɩpaalaara Elieza arɩ Iziral tɩŋŋaa doho na-kala sɩpaalaara-la maga dɩ ma dɩɩsɛ nɩalɩŋ arɩ pʋsʋ-la ma sɩ yuo laalɩŋ a kɛsɛ.

²⁷ Kɛŋ kɩalɩŋ ba sɩ yuo laa a kpaa leree balɩa, a joŋ dɔŋɔ pɩ laalɩyuoro-la, aŋ joŋ dɔŋɔ ma pɩ Iziral tɩmma-la nɩkaanaa.

²⁸ Kpaal-la sɩ ŋaa laalɩyuoro-la kʋa nɛ: Nuhuobiinee, nɛsɩŋ, kakusuŋ, piesee arɩ bʋʋnaa, kɩaa deemba kʋŋkala zɔɔ-banɔŋ tʋɔŋ, lɩɩsɛ kʋbala dɩ ʋ ŋaa mɩ-na ma TƖƖNA kpaalɩŋ.

²⁹ Joŋo pɩ Wɩɩsʋllɩ sɩpaalaara Elieza, mɩ-na ma TƖƖNA toruŋ nɛ ŋɩɩ.

³⁰ Iziral tɩmma-la ma sɩ bɩ laalɩŋ mʋa kpaalɩŋ tʋɔŋ, nuhuobiinee, nɛsɩŋ, kakusuŋ, piesee arɩ bʋʋnaa arɩ pʋsʋŋ dɔnsʋŋ, mahɩŋ balɩa arɩ fii kala tʋɔŋ, lɩɩsɛ kʋbala a joŋo pɩ Levi doho nɩalɩŋ sɩɩ beŋ mɩ-na ma TƖƖNA dɩ-zɔŋ-la.”

³¹ Ŋɩɩ nɛ Mosis arɩ Wɩɩsʋllɩ sɩpaalaara Elieza ŋaa wɩalɩŋ kala arɩ La TƖƖNA sɩ dagɛ Mosis ŋɩɩ.

³² Laal-la sɩ dɛrɛ ka laalɩyuoro-la kɛŋ kɩalɩŋ kɔ nɛ ŋ-la: piesee bʋɩ zɔɔ-balɩdʋ mahɩŋ batori arɩ fii arɩ banɔŋ.

³³ Nɛsɩŋ ma bʋɩ mahɩŋ batori arɩ fii arɩ balɩa.

³⁴ Kakusuŋ ma bʋɩ mahɩŋ batori arɩ kʋbala.

³⁵ Haalaa ma sɩ bɩ baalaa jɩŋ bʋɩ mara arɩ fii arɩ balɩa.

³⁶ Laalɩyuoro-la kpaalɩŋ ba sɩ laa ŋaa piesee bʋɩ zɔɔ-batori mara arɩ fii arɩ balɩpɛ arɩ zɔɔ-banɔŋ nɛ.

³⁷ Ba tʋɔŋ kɩalɩŋ ba sɩ lɩɩsa a time pɩ La TƖƖNA ŋaa zɔɔ-balɩdʋ arɩ mahɩŋ batori arɩ fii arɩ banɔŋ nɛ.

³⁸ Nɛsɩŋ ŋaa bʋɩ mara arɩ fii arɩ balɩdʋ nɛ, ba joŋ kɩaa mahɩŋ batori arɩ fii arɩ balɩa a time pɩ La TƖƖNA.

³⁹ Kakusuŋ ma ŋaa bʋɩ mara arɩ fii arɩ zɔɔ-banɔŋ nɛ. Ba joŋ kɩaa mahɩŋ batori arɩ kʋbala a time pɩ La TƖƖNA.

⁴⁰ Haala-la ha sɩ bɩ baalaa jɩŋ ŋaa nɩaa bʋɩ fii arɩ balɩdʋ nɛ. Ba joŋ haala-la mara arɩ fii arɩ balɩa a pɩ La TƖƖNA.

⁴¹ Kɩalɩŋ kala ba sɩ joŋo pɩ La TƖƖNA, Mosis joŋo pɩ Wɩɩsʋllɩ sɩpaalaara Elieza nɛ, arɩ La TƖƖNA sɩ dagʋ ŋɩɩ.

⁴² Iziral tɩmma-la ma sɩ bɩ laalɩŋ mʋa kpaalɩŋ magɛ laalɩyuoro-la kʋa nɛ Mosis sɩ kaa kpaa.

⁴³ Piesee ŋaa bʋɩ zɔɔ-batori mara arɩ fii arɩ balɩpɛ arɩ zɔɔ-banɔŋ nɛ.

⁴⁴ Nɛsɩŋ ma ŋaa bʋɩ mara arɩ fii arɩ balɩdʋ.

⁴⁵ Kakusuŋ ma ŋaa bʋɩ mara arɩ fii arɩ zɔɔ-banɔŋ.

⁴⁶ Haala-la ma ha sɩ bɩ baalaa jɩŋ, ŋaa bʋɩ fii arɩ balɩdʋ nɛ.

⁴⁷ Iziral tɩmma-la sɩ bɩ laalɩŋ mʋa kpaal-la tʋɔŋ, nuhuobiinee mahɩŋ balɩa arɩ fii tʋɔŋ Mosis lɩɩsɛ nɩbala nɛ, pʋsʋŋ ma mahɩŋ balɩa arɩ fii tʋɔŋ, ʋ lɩɩsɛ ba ma kʋbala, arɩ La TƖƖNA sɩ dagʋ ŋɩɩ, a joŋo pɩ Levi doho nɩalɩŋ sɩɩ beŋ Wɩa dɩ-zɔŋ-la.

⁴⁸ Ŋɩɩ nɛ laalɩyuori-hɩasɩ-la kala, nɩalɩŋ sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba, kala sii mʋ Mosis teeŋ,

⁴⁹ a bʋla pʋ, “Ŋ tɩntɩnnaa dɩɩsɛ laalɩyuoro-la kala la sɩ kaa mʋ laalɩŋ nɛ, la kʋŋkala bɩ lɛlɛ.

⁵⁰ Ŋɩɩ nɛ la kɛŋ sɛlɩmɛ kpɩɛraa deemba la sɩ na kɔ dɩ la ŋaa Wɩɩsʋlʋŋ a pɩ La TƖƖNA a tɩŋ ʋ sɩ pɔla wɩaa: Kagunsuŋ, banzɔlɔba, kuori-nenii-pɩraa, dɩgɩlɩŋ-kpɛnsɩŋ arɩ naŋ-jɔlɔba.”

⁵¹ Ŋɩɩ nɛ Mosis arɩ Wɩɩsʋllɩ sɩpaalaara Elieza sɛɩ a laa sɛlɩmɛ kɩalɩŋ kala ba sɩ kaa kɔ dɩ ba ŋaa Wɩɩsʋlʋŋ.

⁵² Sɛlɩmɛ-la kala laalɩyuori-hɩasɩ-la sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba sɩ kaa kʋ ŋaa Wɩɩsʋlʋŋ pɩ La TƖƖNA yi kilo zɔɔ-balɩa nɛ.

⁵³ Laalɩyuoro-la kʋŋkala paa kɩalɩŋ dɔnsʋŋ ba sɩ yuo laa a kɛŋ nɛ.

⁵⁴ Ŋɩɩ nɛ Mosis arɩ Wɩɩsʋllɩ sɩpaalaara Elieza laa laalɩyuori-hɩasɩ-la sɩɩ beŋ laalɩyuoroo bʋɩba arɩ nɩalɩŋ sɩɩ beŋ laalɩyuoroo zɔlɔba sɛlɩmɛ a kaa jʋʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ a bil la TƖƖNA sɩpaaŋ, dɩ ʋ liliisi Iziral tɩŋŋaa wɩaa bʋa na-kala.