NAMBABA 30 - WƖA TENIŊ

Wɩalɩŋ sɩ mʋʋ tɩgɛ niiŋ hɛnɩŋ lɛ

¹ Mosis bʋla pɩ Iziral tɩŋŋaa doho doho nɩhɩasɩŋ, “Ŋ-la nɛ La TƖƖNA dagɛ:

² Dɩ nʋʋ nɛ hɛ niiŋ arɩ ʋ jaŋ ŋaa wɩɩ a pɩ La TƖƖNA, koo dɩ ʋ ŋmɩɛsa nɛ arɩ ʋ bɩ jaŋ ŋaa wɩɩ, tɩɩna maga dɩ ʋ ŋaa wɩalɩŋ kala ʋ sɩ daga nɛ, ʋ bɩ maga dɩ ʋ vɩa.

³ Dɩ hantolibie nɛ ha hɛ ʋ nyɩmma dɩa lɛ aŋ hɛ niiŋ dɩ ʋ ŋaa wɩɩ pɩ La TƖƖNA, koo dɩ ʋ ŋmɩɛsa nɛ arɩ ʋ bɩ jaŋ ŋaa wɩɩ,

⁴ dɩ ʋ nyɩmma nɛ nɩɩ wɩalɩŋ aŋ bɩ wɩɩ bʋla, nii-la ʋ sɩ hɛ arɩ ŋmɩaŋ-la jaŋ chɩŋ.

⁵ Ama dɩ ʋ nyɩmma nɛ nɩɩ wɩalɩŋ a bɩ sɛyɛ, nii-la arɩ ŋmɩaŋ-la kʋŋkala bɩ jaŋ chɩŋ. La TƖƖNA jaŋ joŋo chɛʋ, bɛɛ wɩaa ʋ nyɩmma bɩ sɛyɛ.

⁶ Dɩ tolo nɛ ha bɩ bala jaa aŋ hɛ niiŋ arɩ ʋ jaŋ ŋaa wɩɩ a pɩ La TƖƖNA, koo dɩ ʋ ŋmɩɛsa nɛ arɩ ʋ bɩ jaŋ ŋaa wɩɩ, dɩ ʋ sɛnɛ nɛ koo dɩ ʋ chele nɛ a hɛ nii-la, dɩ ʋ nɛ kʋ jaa bala,

⁷ dɩ ʋ bala nɛ nɩa aŋ bɩ wɩɩ bʋla, nii-la ʋ sɩ hɛ arɩ ŋmɩaŋ-la jaŋ chɩŋ.

⁸ Ama dɩ ʋ bala nɛ nɩɩ wɩalɩŋ a bɩ sɛyɛ, nii-la arɩ ŋmɩaŋ-la bɩ jaŋ chɩŋ. La TƖƖNA jaŋ joŋo chɛʋ.

⁹ Dɩ yo-haal koo haal sɩ jaa bala aŋ lɩɩ nɛ hɛ niiŋ arɩ ʋ jaŋ ŋaa wɩɩ koo dɩ ʋ ŋmɩɛsa nɛ arɩ ʋ bɩ jaŋ ŋaa wɩɩ, ʋ maga dɩ ʋ ŋaa wɩalɩŋ kala ʋ sɩ daga nɛ.

¹⁰ Dɩ haala sɩ kɛŋ bala nɛ hɛ niiŋ dɩ ʋ ŋaa wɩɩ, koo dɩ ʋ ŋmɩɛsa nɛ arɩ ʋ bɩ jaŋ ŋaa wɩɩ,

¹¹ dɩ ʋ bala nɛ nɩɩ wɩalɩŋ aŋ bɩ wɩɩ bʋla, nii-la ʋ sɩ hɛ arɩ ŋmɩaŋ-la jaŋ chɩŋ.

¹² Ama dɩ ʋ bala nɛ nɩɩ wɩalɩŋ a bɩ sɛyɛ, nii-la ʋ sɩ hɛ arɩ ŋmɩaŋ-la bɩ jaŋ chɩŋ. La TƖƖNA jaŋ joŋo chɛʋ.

¹³ Ʋ bala kɛŋ wombiiŋ dɩ ʋ leŋ dɩ nii-la arɩ ŋmɩaŋ-la chɩŋ koo ʋ leŋ ba sɩ́ chɩŋ.

¹⁴ Ama dɩ ʋ bala nɛ nɩɩ wɩalɩŋ aŋ bɩ wɩɩkala bʋla a yi tapʋlɩɩ, nii-la ʋ sɩ ta arɩ ŋmɩaŋ-la jaŋ chɩŋ. Haal-la maga dɩ ʋ ŋaa wɩalɩŋ nɛ.

¹⁵ Dɩ ʋ bala-la nɛ nɩɩ wɩalɩŋ a leŋ dɩ tapʋlɩɩ kieli ka dɩ ʋ bʋl wɩɩ, ʋ nɛ jaŋ mɩɩra laa cheeriŋ.”

¹⁶ Wɩalɩŋ La TƖƖNA sɩ bʋla pɩ Mosis a mʋʋ tɩgɛ baala arɩ ʋ haala pɛgɛ, arɩ nyɩmma arɩ ʋ tolo ha sɩ bɩ bala jaa aŋ hɛ ʋ dɩa lɛ pɛgɛ nɛ ŋɩɩ.