NAMBABA 3 - WƖA TENIŊ

Levi doho nɩaa

¹ Bʋa-la lɛ La TƖƖNA sɩ bʋl wɩaa pɩ Mosis Sɩnaɩ peel-la nyuŋ, dɩ Arɔŋ arɩ Mosis dɩa nɩaa nɛ ŋ-la:

² Arɔŋ hambolibiisiŋ yɩraa nɛ fa: Nadab, ʋ bii-hɩaŋ, Abihu, Elieza arɩ Ɩtama.

³ Arɔŋ hambolibiisiŋ deemba nɛ ba joŋ Wɩɩsʋllɩ nʋʋŋ tɩsɛ a jomba hɛ Wɩa nɩsɩŋ lɛ dɩ baa tɩŋ Wɩɩsʋllɩ sɩpaalaaraa tɩntɩŋŋaa.

⁴ Ama Nadab arɩ Abihu-na tel La TƖƖNA sɩpaaŋ nɛ a sʋʋ Sɩnaɩ tintee-hɩlɩɩ-la lɛ, bʋa-la ba sɩ nyɩgɛ Wɩɩsʋlʋŋ kɩaa pɩ La TƖƖNA, ka ʋ bɩ ba ŋɩɩ daga. Nadab arɩ Abihu fa bɩ biiriŋ lʋla, ŋɩɩ wɩaa ba nyɩmma Arɔŋ mɩɩsɩŋ lɛ Elieza arɩ Ɩtama dʋndʋŋa nɛ faa tɩŋ Wɩɩsʋllɩ sɩpaalaaraa tɩntɩŋŋaa.

⁵ Ŋɩɩ nɛ La TƖƖNA bʋla pɩ Mosis,

⁶ “Lɩɩsɛ Levi doho nɩaa dɩ ba pɛ Wɩɩsʋllɩ sɩpaalaara Arɔŋ lɛ dɩ ba tɩtɩŋ.

⁷ Ba nɛ jaŋ tɩtɩŋ Wɩa dɩ-zɔŋ-la tɩntɩŋŋaa lɛbɩ-la lɛ mɩ sɩ yie kɔ Iziral tɩŋŋaa teeŋ aa pɩ Arɔŋ arɩ Iziral tɩŋŋaa kala.

⁸ Ba nɛ maga dɩ ba bibeŋ lɛbɩ-la lɛ mɩ sɩ yie kɔ Iziral tɩŋŋaa teeŋ kpɩɛraa kala, a tɩtɩŋ tɩntɩmɩa-la kala Iziral tɩŋŋaa fa sɩ maga dɩ ba tɩtɩŋ Wɩa dɩ-zɔŋ-la lɛ.

⁹ Joŋ Levi tɩmma-la a hɛ Arɔŋ arɩ ʋ hambolibiisiŋ nɩsɩŋ lɛ. Ba nɛ ŋaa Iziral tɩmma-la ŋ sɩ jaŋ jomba arɩ ba wɩɩkala hɛ Arɔŋ nɩsɩŋ lɛ.

¹⁰ Lɩɩsɛ Arɔŋ arɩ ʋ hambolibiisiŋ dɩ ba nɛ tɩtɩŋ Wɩɩsʋllɩ sɩpaalaaraa tɩntɩŋŋaa. Dɩ nɩwogo nɛ chɛbɛ a chɩchɛ ʋ tɩŋ tɩntɩmɩa-la ba sɩɩ tɩŋ, ʋ maga dɩ ma kpʋʋ nɛ.”

¹¹ La TƖƖNA bɩra bʋla pɩ Mosis,

¹² “Mɩ lɩɩsɛ Levi doho nɩaa nɛ Iziral tɩŋŋaa tʋɔŋ dɩ ba nɛ chɩŋ Iziral tɩŋŋaa haal na-kala hambolibii bumbuŋ nyuŋ. Mɩ nɛ tɩɩ Levi doho nɩaa,

¹³ bɛɛ wɩaa hambolibii bumbumba kala ŋaa mɩ kɩaa nɛ. Bʋa-la lɛ mɩ sɩ kpʋ Ijipiti tɩŋŋaa hambolibii bumbumba, mɩ lɩɩsɛ Iziral tɩŋŋaa hambolibii bumbumba nɛ dɩ ba ŋaa mɩ kɩaa, nuhuobiinee arɩ pʋsʋŋ kala. Mɩ nɛ ma TƖƖNA.”

¹⁴ La TƖƖNA bɩra bʋla pɩ Mosis Sɩnaɩ tintee-hɩlɩɩ-la lɛ,

¹⁵ “Dɩɩsɛ Levi doho nɩaa doho doho arɩ dɩa dɩa. Dɩɩsɛ baal na-kala sɩ yi chɛnɛ koo a kɩɩ ŋɩɩ.”

¹⁶ Ŋɩɩ nɛ Mosis dɩɩsɛba arɩ La TƖƖNA sɩ dagʋ ŋɩɩ.

¹⁷ Levi hambolibiisiŋ yɩraa nɛ ŋ-la: Gɛsɔŋ, Kohaf arɩ Mɛrarɩ.

¹⁸ Gɛsɔŋ doho nɩaa nɛ ŋ-la: Libini arɩ Sɩmɛɩ.

¹⁹ Kohaf doho nɩaa nɛ: Amɩram, Ɩzɩha, Hɛbʋrɔŋ arɩ Ʋzɩɛl.

²⁰ Mɛrarɩ tɩŋŋaa doho nɩaa nɛ: Mali arɩ Musi. Levi doho nɩaa dɩa dɩa nɛ ŋɩɩ.

²¹ Gɛsɔŋ doho nɩaa nɛ ŋaa Libini tɩŋŋaa arɩ Sɩmɛɩ tɩŋŋaa.

²² Baala-la kala ba sɩ dɩɩsa sɩ yi chɛnɛ koo a kɩɩ ŋɩɩ, ba ŋaa nɩaa bʋɩ balɩpɛ arɩ zɔɔ-banɔŋ nɛ.

²³ Gɛsɔŋ doho nɩaa nɛ maga dɩ ba ŋmoo ba buguŋ Wɩa dɩ-zɔŋ-la harɩŋ wɩɩjʋʋlʋŋ dɩɩrɩŋ.

²⁴ Gɛsɔŋ tɩŋŋaa doho nɩalɩŋ sɩpaalaara nɛ ŋaa Laal nanʋala Ɛlɩasaf.

²⁵ Lɛbɩ-la lɛ La TƖƖNA sɩ yie kɔ Iziral tɩŋŋaa teeŋ, Gɛsɔŋ tɩmma-la nɩɩ beŋ Wɩa dɩ-zɔŋ-la arɩ ʋ lɛbɩŋ arɩ kɩalɩŋ kala sɩɩ tɔ lɛbɩ-la nyuŋ, a pɛ patɩɩsaŋ-la sɩ kɛrɛ ʋ boiŋ niiŋ lɛ,

²⁶ arɩ lɩga-la sɩ golli Wɩa dɩ-zɔŋ-la patɩɩsamba arɩ patɩɩsaŋ-la sɩ kɛrɛ lɩga-la boiŋ niiŋ, arɩ koru-la, ŋmɛsɩŋ, arɩ kɩalɩŋ kala sɩ pɛ kɩaa deemba lɛ ba kaa tɩtɩŋ.

²⁷ Kohaf doho nɩaa nɛ ŋaa Amɩram tɩŋŋaa, Iziha tɩŋŋaa, Hɛbʋrɔŋ tɩŋŋaa arɩ Ʋzɩɛl tɩŋŋaa.

²⁸ Ba sɩ dɩɩsɛ ba baala-la kala sɩ yi chɛnɛ koo a kɩɩ ŋɩɩ, ba ŋaa nɩaa bʋɩ chori arɩ zɔɔ-balɩdʋ nɛ. Kohaf tɩmma-la nɩɩ beŋ Wɩa dɩ-zɔŋ-la dɩ-zɔmʋŋ.

²⁹ Kohaf tɩŋŋaa doho nɩalɩŋ nɛ maga dɩ ba ŋmoo ba buguŋ Wɩa dɩ-zɔŋ-la wɩɩpɔsʋŋ nadiiŋ dɩɩrɩŋ.

³⁰ Ba sɩpaalaara nɛ ŋaa Ʋzɩɛl nanʋala Elizafaŋ.

³¹ Ba nɩɩ beŋ Wɩa niiriŋ daga-la, teebʋl, chaaŋ daaŋ, korunu-la, Wɩa dɩa tɩntɩnnɩ kɩaa, patɩɩsaŋ-la sɩ kɛrɛ Wɩa dɩ-zɔŋ-la, lee-la zɔmʋŋ sɩ bɩ magɩa kɛnɛ arɩ kɩalɩŋ kala sɩ pɛ kɩaa deemba lɛ ba kaa tɩtɩŋ.

³² Levi doho nɩaa sɩpaalaarɩ-hɩaŋ nɛ ŋaa Elieza, Wɩɩsʋllɩ sɩpaalaara Arɔŋ nanʋala. Ʋ nɛ ba lɩɩsɛ ʋ ŋaa nɩalɩŋ sɩɩ beŋ Wɩa dɩ-zɔŋ-la dɩ-zɔmʋŋ kʋhɩaŋ.

³³ Mɛrarɩ doho nɩaa nɛ ŋaa Mali tɩŋŋaa, arɩ Musi tɩŋŋaa.

³⁴ Ba sɩ dɩɩsɛ ba baala-la kala sɩ yi chɛnɛ koo a kɩɩ, ba ŋaa nɩaa bʋɩ balɩdʋ arɩ zɔɔ-balɩa nɛ.

³⁵ Ba sɩpaalaara nɛ fa ŋaa Abɩhɛɛl nanʋala Zʋrɩɛl. Ba nɛ maga dɩ ba ŋmoo ba buguŋ Wɩa dɩ-zɔŋ-la wɩɩpɔsʋŋ nagʋa.

³⁶ Mɛrarɩ tɩmma-la nɛ ba lɩɩsɛ ba bibeŋ Wɩa dɩ-zɔŋ-la daapɛsɩŋ, daa-gɛsɛɛ, daaterigeba, hɔ-taalɩŋ arɩ ba tɩntɩnnɩ kʋŋ na-kala,

³⁷ a saa pɛ lɩga-la sɩ golli Wɩa dɩ-zɔŋ-la daapɛsɩŋ, hɔ-taalɩŋ, lɛbɩ-la daapɛ-biisiŋ arɩ ŋmɛsɩŋ lɛ.

³⁸ Mosis arɩ Arɔŋ arɩ ʋ hambolibiisiŋ nɛ jaŋ ŋmoo ba buguŋ Wɩa dɩ-zɔŋ-la wɩɩpɔsʋŋ dɩɩrɩŋ, lɛbɩ-la lɛ La TƖƖNA sɩ yie kɔ Iziral tɩŋŋaa teeŋ sɩpaaŋ. Ba nɛ jaŋ tɩtɩŋ Wɩa dɩ-zɔŋ-la dɩ-zɔmʋŋ tɩntɩŋŋaa a pɩpɩ Iziral tɩŋŋaa. Dɩ nɩwogo nɛ mʋ kpagɛ lee-la, ʋ maga dɩ ma kpʋʋ nɛ.

³⁹ La TƖƖNA sɩ leŋe Mosis arɩ Arɔŋ dɩɩsɛ Levi doho nɩaa doho doho, baala-la kala sɩ yi chɛnɛ koo a kɩɩ ŋɩɩ, ba ŋaa nɩaa bʋɩ mara arɩ balɩa nɛ.

⁴⁰ Ŋɩɩ nɛ La TƖƖNA bʋla pɩ Mosis, “Dɩɩsɛ Iziral tɩŋŋaa hambolibii bumbumba kala sɩ yi chɛnɛ koo a kɩɩ ŋɩɩ, a ŋmʋnsɛ ba yɩraa.

⁴¹ Joŋ Levi doho nɩaa pɩmɛ dɩ ba nɛ chɩŋ Iziral tɩŋŋaa hambolibii bumbumba nyuŋ, aŋ joŋ Levi doho nɩaa pʋsʋŋ ma pɩmɛ dɩ ba ma chɩŋ Iziral tɩŋŋaa pʋsʋŋ bii-bumbumba nyuŋ. Mɩ-na nɛ ma TƖƖNA.”

⁴² Ŋɩɩ nɛ Mosis dɩɩsɛ Iziral tɩŋŋaa hambolibii bumbumba kala arɩ La TƖƖNA sɩ dagʋ ŋɩɩ.

⁴³ Hambolibiisi-la sɩ yi chɛnɛ koo a kɩɩ ŋɩɩ kala nɛ ba dɩɩsɛ a ŋmʋnsɛ ba yɩraa. Ba fa ŋaa nɩaa bʋɩ mara arɩ balɩa arɩ zɔɔ-balɩa arɩ mahɩŋ batori arɩ fii arɩ batori nɛ.

⁴⁴ La TƖƖNA bɩra bʋla pɩ Mosis,

⁴⁵ “Joŋ Levi doho nɩaa hɛ Iziral tɩŋŋaa hambolibii bumbumba nyuŋ, aŋ joŋ ba pʋsʋŋ ma hɛ Iziral tɩŋŋaa pʋsʋŋ bii-bumbumba nyuŋ. Levi doho nɩaa maga ba ŋaa mɩ nɩaa nɛ. Mɩ nɛ ma TƖƖNA.

⁴⁶ Iziral tɩŋŋaa hambolibii bumbumba sɩ kɩɩ Levi doho nɩaa arɩ nɩaa zɔɔ-balɩa arɩ mahɩŋ batori arɩ fii arɩ batori ŋɩɩ, dɩ ŋ nɩɩ chɛ ŋ time laaba,

⁴⁷ ʋ maga dɩ ŋ laa nʋʋkala nyuŋ warɩpʋla banɔŋ nɛ, a magɛ ŋɩɩ ba sɩɩ laa Wɩa dɩa lɛ.

⁴⁸ Joŋ moribie-la ba sɩ joŋo time laa Iziral tɩŋŋaa hambolibii bumbumba-la sɩ daŋa, a pɩ Arɔŋ arɩ ʋ hambolibiisiŋ.”

⁴⁹ Ŋɩɩ nɛ Mosis laa moribie-la Iziral tɩŋŋaa hambolibii bumbumba-la sɩ daŋa nyuŋ.

⁵⁰ Moribie-la kala ŋaa warɩpʋla bʋɩ arɩ zɔɔ-batori arɩ mahɩŋ batori arɩ banɔŋ nɛ a magɛ ŋɩɩ ba sɩɩ laa Wɩa dɩa lɛ.

⁵¹ Ŋɩɩ nɛ Mosis joŋ moribie-la kala a pɩ Arɔŋ arɩ ʋ hambolibiisiŋ arɩ La TƖƖNA sɩ dagʋ ŋɩɩ.