NAMBABA 2 - WƖA TENIŊ

Ŋɩɩ Iziral tɩŋŋaa doho doho-la sɩ jaŋ ŋmoo ba bugoo a kɩɛlɛ

¹ La TƖƖNA bʋla pɩ Mosis arɩ Arɔŋ,

² “Iziral doho doho-la kala maga dɩ ba ŋmoo bugoo a hɔnɔ golli Wɩa dɩ-zɔŋ-la nɛ, aŋ sɩ́ ʋ kpagʋ, doho kala arɩ ʋ jɔnjɔŋ arɩ ʋ magɩlɩŋ.

³ Iziral doho doho-la sɩ jaŋ hɔŋ Wɩa dɩ-zɔŋ-la wɩɩpɔsʋŋ dɩɩrɩŋ nɛ: Juda doho nɩaa, Ɩsaka doho nɩaa arɩ Zebuluŋ doho nɩaa. Ba jaŋ hɔŋ arɩ ba magɩlɩŋ. Amɩnadab nanʋala Nasɔŋ nɛ ŋaa Juda doho nɩaa sɩpaalaara.

⁴ Ʋ laalɩyuoroo ŋaa bʋɩ mahɩŋ batori arɩ fii arɩ banɛsɛ arɩ zɔɔ-balɩdʋ nɛ.

⁵ Ɩsaka doho nɩaa nɛ jaŋ hɔnɔ tɩgɛ Juda doho nɩaa lɛ. Zʋaa nanʋala Nɛtanɛl nɛ ŋaa ba sɩpaalaara.

⁶ Ʋ laalɩyuoroo ŋaa bʋɩ mahɩŋ balɩa arɩ fii arɩ banɛsɛ arɩ zɔɔ-banɛsɛ nɛ.

⁷ Zebuluŋ doho nɩaa ma nɛ jaŋ hɔnɔ tɩgɛ Ɩsaka doho nɩaa lɛ. Heloŋ nanʋala Ɛlɩab nɛ ŋaa ba sɩpaalaara.

⁸ Ʋ laalɩyuoroo ŋaa bʋɩ mahɩŋ balɩa arɩ fii arɩ balɩpɛ arɩ zɔɔ-banɛsɛ nɛ.

⁹ Laalɩyuoro-la kala sɩ hɛ Wɩa dɩ-zɔŋ-la wɩɩpɔsʋŋ ŋaa nɩaa bʋɩ zɔlɔ mahɩŋ banɛsɛ arɩ balɩdʋ arɩ zɔɔ-banɛsɛ nɛ. Juda buguŋ laalɩyuoroo nɛ ŋɩɩ. Ba nɛ jaŋ laa sɩpaaŋ a lɩɩ.

¹⁰ Iziral doho doho deemba nɛ jaŋ hɔŋ Wɩa dɩ-zɔŋ-la wɩɩpɔsʋŋ nadiiŋ dɩɩrɩŋ arɩ ba magɩlɩŋ: Rubiŋ doho nɩaa, Simioŋ doho nɩaa arɩ Gad doho nɩaa. Sediu nanʋala Elizu nɛ ŋaa Rubiŋ doho nɩaa sɩpaalaara.

¹¹ Ʋ laalɩyuoroo kala ŋaa bʋɩ mahɩŋ balɩa arɩ balɩdʋ arɩ zɔɔ-banɔŋ nɛ.

¹² Simioŋ doho nɩaa ma nɛ jaŋ hɔnɔ tɩgɛ Rubiŋ doho nɩaa lɛ. Zurisadai nanʋala Sɛlʋmɩɛl nɛ ŋaa ba sɩpaalaara.

¹³ Ʋ laalɩyuoroo ŋaa bʋɩ mahɩŋ balɩa arɩ fii arɩ nibi arɩ zɔɔ-batori nɛ.

¹⁴ Gad doho nɩaa ma nɛ jaŋ hɔnɔ tɩgɛ Simioŋ doho nɩaa lɛ. Dʋɛl (ʋ nɛ ha Rɛwɛl) ʋ nanʋala Eliasaf nɛ ŋaa ba sɩpaalaara.

¹⁵ Ʋ laalɩyuoroo ŋaa bʋɩ mahɩŋ balɩa arɩ banɔŋ arɩ zɔɔ-balɩdʋ arɩ mahɩŋ balɩa arɩ fii nɛ.

¹⁶ Laalɩyuoro-la kala sɩ hɛ Wɩa dɩ-zɔŋ-la wɩɩpɔsʋŋ nadiiŋ kala ŋaa bʋɩ zɔlɔ arɩ mahɩŋ balɩa arɩ fii arɩ kʋbala arɩ zɔɔ-banɛsɛ arɩ mahɩŋ balɩa arɩ fii nɛ. Rubiŋ buguŋ laalɩyuoroo nɛ ŋɩɩ, ba nɛ jaŋ ŋaa lɩa a lɩɩ.

¹⁷ Dɩ ba nɛ sie ba vɛŋ, lɛbɩ-la lɛ mɩ sɩ yie kɔ Iziral tɩŋŋaa teeŋ arɩ Levi doho nɩaa buguŋ sɩ hɛ tʋtʋɔbaanɩŋ jaŋ sii. Ba sɩ hɔŋ ŋɩɩ, dɩ ba nɛ sie dɩ ba vɛŋ, ŋɩɩ tɩtɩa nɛ ba jaŋ vɩvɛŋ, nʋʋkala arɩ ʋ leriŋ arɩ ʋ magɩlɩŋ.

¹⁸ Iziral doho doho-la sɩ jaŋ hɔŋ Wɩa dɩ-zɔŋ-la wɩɩjʋʋlʋŋ dɩɩrɩŋ arɩ ba magɩlɩŋ nɛ ŋ-la: Efirem doho nɩaa, Manasɛ doho nɩaa arɩ Bɛnjamɩŋ doho nɩaa. Efirem doho nɩaa sɩpaalaara nɛ ŋaa Amihud nanʋala Ɛlɩsama.

¹⁹ Ʋ laalɩyuoroo ŋaa bʋɩ mahɩŋ balɩa arɩ zɔɔ-banɔŋ nɛ.

²⁰ Manasɛ doho nɩaa ma nɛ jaŋ hɔnɔ tɩgɛ Efirem doho nɩaa lɛ. Manasɛ doho nɩaa sɩpaalaara nɛ ŋaa Pedazu nanʋala Gamalɩɛl.

²¹ Ʋ laalɩyuoroo ŋaa bʋɩ mara arɩ fii arɩ balɩa arɩ zɔɔ-balɩa nɛ.

²² Bɛnjamɩŋ doho nɩaa ma nɛ jaŋ hɔnɔ tɩgɛ Manasɛ doho nɩaa lɛ. Bɛnjamɩŋ doho nɩaa sɩpaalaara nɛ ŋaa Gidioni nanʋala Abɩdaŋ.

²³ Ʋ laalɩyuoroo ŋaa bʋɩ mara arɩ fii arɩ banɔŋ arɩ zɔɔ-banɛsɛ nɛ.

²⁴ Laalɩyuoro-la kala sɩ hɛ Wɩa dɩ-zɔŋ-la wɩɩjʋʋlʋŋ dɩɩrɩŋ ŋaa bʋɩ zɔlɔ arɩ chori arɩ zɔlɔ nɛ. Efirem buguŋ laalɩyuoroo nɛ ŋɩɩ. Ba nɛ jaŋ lɩɩ tori.

²⁵ Iziral doho doho deemba ma nɛ jaŋ hɛ Wɩa dɩ-zɔŋ-la wɩɩpɔsʋŋ nagʋa dɩɩrɩŋ arɩ ba magɩlɩŋ: Daŋ doho nɩaa, Asa doho nɩaa arɩ Nafɩtalɩ doho nɩaa. Daŋ doho nɩaa sɩpaalaara nɛ Amɩsadaɩ nanʋala Ahieza.

²⁶ Ʋ laalɩyuoroo ŋaa nɩaa bʋɩ mahɩŋ batori arɩ balɩa arɩ zɔɔ-balɩpɛ nɛ.

²⁷ Asa doho nɩaa ma nɛ jaŋ hɔnɔ tɩgɛ Daŋ doho nɩaa lɛ. Asa doho nɩaa sɩpaalaara nɛ ŋaa Ɔkɩraŋ nanʋala Pagɩɛl.

²⁸ Ʋ laalɩyuoroo ŋaa bʋɩ mahɩŋ balɩa arɩ kʋbala arɩ zɔɔ-banɔŋ nɛ.

²⁹ Nafɩtalɩ doho nɩaa ma nɛ jaŋ hɔnɔ tɩgɛ Asa doho nɩaa lɛ. Nafɩtalɩ doho nɩaa sɩpaalaara nɛ ŋaa Ɛnaŋ nanʋala Ahɩra.

³⁰ Ʋ laalɩyuoroo ŋaa nɩaa bʋɩ mahɩŋ balɩa arɩ fii arɩ batori arɩ zɔɔ-banɛsɛ nɛ.

³¹ Laalɩyuoroo kala sɩ hɛ Wɩa dɩ-zɔŋ-la wɩɩpɔsʋŋ nagʋa dɩɩrɩŋ ŋaa bʋɩ zɔlɔ mahɩŋ balɩa arɩ fii arɩ balɩpɛ arɩ zɔɔ-balɩdʋ nɛ. Daŋ buguŋ laalɩyuoroo nɛ ŋɩɩ. Ba nɛ jaŋ to harɩŋ lɩɩ arɩ ba magɩlɩŋ.”

³² Iziral tɩŋŋaa laalɩyuoro-la kala ba sɩ dɩɩsa doho doho nɛ ŋ-la: ba ŋaa nɩaa bʋɩ zɔɔ-balɩdʋ arɩ batori arɩ zɔɔ-banɔŋ arɩ mahɩŋ balɩa arɩ fii nɛ.

³³ Ba bɩ Levi doho nɩaa-na dɩɩsa pɛ Iziral tɩŋŋaa lɛ, arɩ ŋɩɩ La TƖƖNA sɩ dagɛ Mosis.

³⁴ Ŋɩɩ nɛ Iziral tɩŋŋaa ŋaa wɩalɩŋ kala La TƖƖNA sɩ dagɛ Mosis, a ŋmoo ba bugoo a hɔŋ arɩ ba magɩlaa. Dɩ ba nɛ sie ba vɛŋ ma, ba yie vɛŋ doho doho arɩ dɩa dɩa nɛ.