NAMBABA 19 - WƖA TENIŊ

Lɩɩ-la ba sɩ kaa pɩɩsɛ disiniŋ tɩta

¹ La TƖƖNA bʋla pɩ Mosis arɩ Arɔŋ,

² “Wɩɩ-la mɩ-na ma TƖƖNA sɩ bʋla dɩ ma ŋaa nɛ ŋ-la: Bʋla pɩ Iziral tɩŋŋaa dɩ ba kɛŋ nɛ-pa-fɩaŋ sɩ bɩ nyɔɔ kala kɛnɛ kɔ, kʋ-la ba ha sɩ bɩ kaa tɩŋ aŋ ka.

³ Ma joŋo pɩ Wɩɩsʋllɩ sɩpaalaara Elieza, dɩ ʋ kaa lɩɩ ma dɩhɔnʋŋ lɛ a leŋ dɩ nʋʋ kpʋʋ ʋ sɩɩŋ lɛ.

⁴ Wɩɩsʋllɩ sɩpaalaara Elieza jaŋ kɛŋ ʋ neniiŋ, a tagɛ nɛŋ-la chalɩŋ a mɩsɛ lɛbɩ-la lɛ mɩ sɩ yie kɔ Iziral tɩŋŋaa teeŋ sɩpaaŋ naansɩɩŋ bʋlɩpɛ.

⁵ Elieza jaŋ bibeŋ, ka dɩ ba nyɩgɛ nɛ-paha-la teniŋ, ʋ nammɩa, ʋ chalɩŋ arɩ ʋ tʋɔŋ kɩaa kala.

⁶ Wɩɩsʋllɩ sɩpaalaara jaŋ joŋ kuolu daaŋ arɩ kaku-dɩgɩlɩŋ arɩ ŋmɛŋ-fɩaŋ a yuo hɛ nyiŋ-la lɛ ba sɩ nyɩgɛ nɛ-paha-la.

⁷ Ŋɩɩ harɩŋ lɛ, Wɩɩsʋllɩ sɩpaalaara jaŋ chɛsɛ ʋ gɛnnɩŋ a fo lɩɩŋ, aŋ-na mɩɩra jʋʋ ma dɩhɔnʋŋ. Ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ.

⁸ Baal-la ma sɩ nyɩgɛ nɛ-paha-la jaŋ chɛsɛ ʋ gɛnnɩŋ a fo lɩɩŋ, ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ.

⁹ Baala sɩ bɩ disiniŋ kɛnɛ nɛ jaŋ paa nɛ-paha-la tʋɔrʋŋ a hɛ dɔŋɔ lɛ, a joŋo bil lee sɩ bɩ disiniŋ kɛnɛ mɩ teeŋ ma dɩhɔnʋŋ harɩŋ. Tʋɔrʋ-la nɛ ba jaŋ ŋaa a hɛ lɩɩŋ lɛ a kaa pɩɩsɛ ba wʋbɔŋŋɔɔ tɩta.

¹⁰ Baal-la ma sɩ paa tʋɔrʋ-la hɛ dɔŋɔ lɛ, ʋ jaŋ chɛsɛ ʋ gɛnnɩŋ aŋ fo lɩɩŋ, arɩ ŋɩɩ kala ʋ ha jaŋ kɛŋ disiniŋ tapʋlɩɩ-la na-kala dɩ wɩa tuu jʋʋ. Wɩɩŋ deeŋ jaŋ chɩŋ a pɩ Iziral tɩŋŋaa arɩ nʋhʋɔra-la kala sɩ hɛ ba tʋɔŋ a kaa mʋ wuu.

¹¹ Dɩ nʋʋ nɛ digi sʋʋŋ, tɩɩna jaŋ kɛŋ disiniŋ tapʋlaa balɩpɛ.

¹² Tɩɩna maga dɩ ʋ kɛŋ lɩɩ-la ba sɩ kaa pɩɩsɛ disiniŋ a chɛsɛ ʋ tɩtɩa tapʋl-tori arɩ tapʋl-pɛɩ chɛɛŋ. Dɩ ʋ nɛ ŋaa ŋɩɩ, ʋ disiniŋ dɛrɛ nɛ. Ama dɩ ʋ nɛ bɩ ʋ tɩtɩa pɩɩsa tapʋl-tori arɩ tapʋl-pɛɩ-la chɛɛŋ, ʋ disiŋ-la bɩ jaŋ dɛrɛ.

¹³ Dɩ nʋʋ nɛ digi sʋʋŋ aŋ bɩ ʋ disiniŋ pɩɩsa ta, tɩɩna ŋaa disiniŋ hɛ mɩ-na ma TƖƖNA dɩ-zɔŋ-la lɛ nɛ. Tɩɩna maga dɩ ba keru ta Iziral tɩŋŋaa tʋɔŋ, bɛɛ wɩaa ba ha bɩ lɩɩ-la ba sɩ kaa pɩɩsɛ disiniŋ tɩta mɩsa hɛ ʋ lɛ, ʋ disiniŋ ha bɩ dɛrɛ.

¹⁴ Wombii-la sɩ hɛ nɩmɛ a mʋ tɩgɛ nʋʋ sɩ sʋʋ lɛbɩŋ tʋɔŋ nɛ ŋ-la: Dɩ nʋʋ nɛ hɛ lɛbɩŋ tʋɔŋ ka dɩ nʋʋ sʋʋ, tɩɩna jaŋ kɛŋ disiniŋ tapʋlaa balɩpɛ. Dɩ nʋʋ ma nɛ jʋʋ lɛbɩ-la, ʋ ma jaŋ kɛŋ disiniŋ tapʋlaa balɩpɛ.

¹⁵ Dɩ pupoiŋ koo taga nɛ hɛ lɛbɩ-la lɛ, ka ba bɩ ʋ nii-tɔlɔ joŋo tɔ, ʋ ma jaŋ kɛŋ disiniŋ.

¹⁶ Dɩ nʋʋ nɛ ba kpʋ dɩ-jalɩŋ koo dɩ ʋ paala sʋʋ ʋ Wɩa sʋʋŋ nɛ, dɩ nʋʋ mʋ digi, tɩɩna jaŋ kɛŋ disiniŋ tapʋlaa balɩpɛ. Koo dɩ nʋʋ nɛ digi nuhuobiine haŋgbeliŋ koo vaamɩŋ, tɩɩna jaŋ kɛŋ disiniŋ tapʋlaa balɩpɛ.

¹⁷ Dɩ ma nɩɩ chɛ dɩ ma pɩɩsɛ nɩdosunuŋ deemba disiniŋ ta, ma jaŋ ŋaa nɛ-paha-la ba fa sɩ kaa ŋaa Wɩɩsʋlʋŋ a nyɩgɛ ʋ tʋɔrʋŋ a hɛ taga lɛ a ŋaa lɩɩŋ sɩ zɔmɔ a hɛ.

¹⁸ Baal sɩ bɩ disiniŋ kɛnɛ mɩ teeŋ jaŋ joŋ kaku-dɩgɩlɩŋ, a yʋ lɩɩ-la a mɩsa hɛ lɛbɩ-la arɩ ʋ tʋɔŋ kɩaa arɩ nɩalɩŋ kala sɩ hɛ ʋ tʋɔŋ lɛ. Ʋ jaŋ bɩra ŋaa mɩsa hɛ nɩalɩŋ ma sɩ digi nuhuobiine haŋgbeliŋ koo vaamɩŋ koo nʋʋ ba sɩ kpʋa koo nʋʋ sɩ digi nʋʋ sɩ sʋʋ ʋ Wɩa sʋʋŋ lɛ.

¹⁹ Baal-la sɩ bɩ disiniŋ kɛnɛ mɩ teeŋ, jaŋ mɩsɛ lɩɩ-la hɛ nɩɩ-la sɩ kɛŋ disiniŋ lɛ tapʋl-tori arɩ tapʋl-pɛɩ chɛɛŋ. Tapʋl-pɛɩ-la chɛɛŋ, ʋ jaŋ pɩɩsɛ ʋ disiniŋ ta. Nɩɩ-la disiniŋ ʋ sɩ pɩɩsa ta jaŋ chɛsɛ ʋ gɛnnɩŋ a fo lɩɩŋ, dɩ wɩa nɛ jʋa, ʋ disiniŋ dɛrɛ nɛ.

²⁰ Ama dɩ nɩɩ-la sɩ kɛŋ disiniŋ nɛ bɩ ʋ disiniŋ pɩɩsa ta, ʋ maga dɩ ba keru ta Iziral tɩŋŋaa tʋɔŋ, bɛɛ wɩaa ʋ ŋaa disiniŋ hɛ mɩ-na ma TƖƖNA dɩ-zɔŋ-la lɛ nɛ a tɩŋ ba sɩ bɩ lɩɩ-la ba sɩ kaa pɩɩsɛ disiniŋ joŋo mɩsa hɛ ʋ lɛ, ʋ disiniŋ bɩ dɛrɛ.

²¹ Wɩɩŋ deeŋ jaŋ chɩŋ a pɩma a kaa mʋ wuu. Nɩɩ-la sɩ kɛŋ lɩɩ-la pɩɩsɛ nɩaa disiniŋ ta maga dɩ ʋ chɛsɛ ʋ gɛnnɩŋ. Dɩ nʋʋ ma nɛ digi lɩɩ-la, tɩɩna jaŋ kɛŋ disiniŋ dɩ wɩa tuu jʋʋ.

²² Kʋŋ na-kala nʋʋ sɩ kɛŋ disiniŋ sɩ dige, kʋ-la kɛŋ disiniŋ nɛ. Dɩ nʋʋkala nɛ digi kʋ-la, tɩɩna ma jaŋ kɛŋ disiniŋ dɩ wɩa tuu jʋʋ.”