NAMBABA 16 - WƖA TENIŊ

Kora, Dataŋ arɩ Abɩram ŋaa goŋ Mosis nyuŋ

¹ Tapʋlɩɩ kʋbala, Kora sɩ ŋaa Iza nanʋala a ŋaa Kohaf ma nihiŋ a ŋaa Levi doho nʋʋ, a pɛ Rubiŋ doho nɩaa deemba lɛ: Ɛlɩab hambolibiisiŋ Dataŋ arɩ Abɩram, a pɛ Pɛlɛf nanʋala Ɔŋ lɛ, ba sɩɩ a bɩrɩmɛ kʋhaa,

² a nyɛsɛ Mosis nyuŋ. Iziral tɩŋŋaa sɩpaalaaraa zɔɔ-balɩa arɩ mahɩŋ balɩa arɩ fii-la ba sɩ lɩɩsa, nʋʋkala jɩmba woruŋ, ma sii chɩŋ ba harɩŋ.

³ Ŋɩɩ nɛ ba kala sii kʋ nyɛsɛ Mosis arɩ Arɔŋ nyuŋ, a bʋla pɩba, “Ma ŋaa wɩalɩŋ kieli nɛ, la Iziral tɩŋŋaa kala ŋaa nɩa sɩ bɩ disiniŋ kɛnɛ nɛ La TƖƖNA teeŋ. La TƖƖNA hɛ la kʋŋkala teeŋ nɛ. Bɛɛ nɛ saa tɩɩ ma joŋ ma tɩtɩa arɩ ma nɛ kɩɩ la Iziral tɩŋŋaa kala?”

⁴ Mosis sɩ nɩɩ wɩɩŋ deeŋ, ʋ tuu tele chu.

⁵ Ŋɩɩ nɛ aŋ bʋla pɩ Kora arɩ ʋ harɩ-tooroo, “Chie chʋchʋɔŋ La TƖƖNA jaŋ dagɛ nɩɩ-la sɩ ŋaa ʋ nʋʋ arɩ nɩɩ-la sɩ bɩ disiniŋ kɛnɛ ʋ teeŋ. Nɩɩ-la ʋ sɩ lɩɩsa, ʋ jaŋ kɛnʋ mʋ kpagɛ ʋ tɩtɩa.

⁶ Ŋ-na Kora, ŋ dɩ ŋ harɩ-tooroo, má paa kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ.

⁷ Chie ma chaanɛ nyiniŋ hɛ a hɛ kʋsʋɔrʋsʋŋ, a kaa mʋ La TƖƖNA sɩpaaŋ. Nɩɩ-la La TƖƖNA sɩ lɩɩsa nɛ jaŋ ŋaa nɩɩ-la sɩ bɩ disiniŋ kɛnɛ ʋ teeŋ. Ma-na Levi doho nɩaa, ma nɛ ŋaa kieli.”

⁸ Ŋɩɩ nɛ Mosis bɩra bʋla pɩ Kora, “Lɛɛlɛ ma Levi doho nɩaa, má jegile nɩɩ,

⁹ ma bɩɩna wʋbie nɛ Iziral tɩŋŋaa Wɩa sɩ lɩɩsɛma ʋ nɩaa tʋɔŋ, a leŋ ma nɛ kpagʋ a tɩtɩŋ ʋ dɩ-zɔŋ-la lɛ, aŋ laa ba sɩpaaŋ a tɩma pɩpɩ baa?

¹⁰ Ʋ sɩ joŋ wɩɩŋ magɛ ŋ-la a pɩ ma Levi doho nɩaa, aŋ ka ma ha bɩra chɩchɛ dɩ ma laa Wɩɩsʋllɩ sɩpaalaaraa tɩntɩŋŋaa ma,

¹¹ La TƖƖNA nyuŋ nɛ ŋ dɩ ŋ harɩ-tooroo kala nyɛsɛ ŋɩɩ, Arɔŋ nyuŋ dee. Arɔŋ ma nɛ kʋbɛɛ?”

¹² Ŋɩɩ nɛ Mosis tɩma yɩrɛ Ɛlɩab hambolibiisiŋ Dataŋ arɩ Abɩram. Ba sɩ, “La bɩ kɔ.

¹³ Ŋ bɩɩna wʋbie nɛ ŋ ŋaa la lɛ ŋɩɩ, ŋ sɩ kɛnla lɩɩ tintee-la sɩ kɛŋ kɩaa woruŋ, a kɛnla kɔ tintee-hɩlɩŋ deeŋ lɛ dɩ la sʋʋ, aŋ ha chɩchɛ dɩ ŋ fʋfʋgɛla?

¹⁴ Ŋ sɩ sɩ ŋ jaŋ kɛnla mʋ tintee-la sɩ kɛŋ kɩaa woruŋ dɩ la kɛŋ la tɩtɩa tɩɩnɛnɛɛ bagɩsɩŋ arɩ ŋmaŋkaanɩŋ, ŋ kɛŋ la mʋ nɛ aŋ chɩchɛ dɩ ŋ nyɩnyɩsɛ laa? La bɩ kɔ.”

¹⁵ Ŋɩɩ nɛ Mosis chaasa na baanɩŋ, a bʋla pɩ La TƖƖNA, “Sɩ́ ba Wɩɩsʋlʋŋ laa, mɩ ha bɩ ba kʋŋkala kakumo kaa laa, mɩ ha bɩ ba kʋŋkala wɩɩ ma cheye.”

¹⁶ Ŋɩɩ nɛ aŋ bʋla pɩ Kora, “Ŋ dɩ ŋ harɩ-tooro-la arɩ Arɔŋ chie kɔ La TƖƖNA sɩpaaŋ.

¹⁷ Ŋ dɩ ŋ harɩ-tooroo zɔɔ-balɩa arɩ mahɩŋ balɩa arɩ fii-la kʋŋkala joŋ kʋ-la lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ, a chaanɛ nyiniŋ hɛ, a hɛ kʋsʋɔrʋsʋŋ a kaa kɔ La TƖƖNA sɩpaaŋ.”

¹⁸ Ŋɩɩ nɛ ba kʋŋkala joŋ ʋ kʋa a hɛ nyiniŋ arɩ kʋsʋɔrʋsʋ-la. Ba dɩ Mosis arɩ Arɔŋ kala mʋ chɩŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ.

¹⁹ Kora sɩ kɛŋ ʋ dɩ ʋ harɩ-tooro-la ba chɩna chaasɛ Mosis arɩ Arɔŋ lɛbɩ-la lɛ La TƖƖNA sɩ yie kɔ Iziral teeŋ boiŋ niiŋ ŋɩɩ, La TƖƖNA tʋla guu chaanɛ a hɛ Iziral tɩŋŋaa kala lɛ.

²⁰ Ŋɩɩ nɛ La TƖƖNA bʋla pɩ Mosis arɩ Arɔŋ,

²¹ “Má lɩɩ nɩalɩŋ tʋɔŋ ka dɩ mɩ dɛrɛba lɛɛlɛ.”

²² Ŋɩɩ nɛ Mosis arɩ Arɔŋ tuu tele chu aŋ ŋmoo niiŋ, “Ou Wɩa, ŋ nɛ ŋaa nuhuobiine mɩɩsɩŋ, nɩbala wʋbɔmʋŋ jaŋ leŋ dɩ ŋ na baanɩŋ ŋ nɩaa kala nyuŋ?”

²³ Ŋɩɩ nɛ La TƖƖNA bɩra bʋla pɩ Mosis,

²⁴ “Bʋla pɩ nɩalɩŋ kala dɩ ba sʋrɩsa lɩɩ, aŋ ka Dataŋ, Abɩram arɩ Kora arɩ ba lɛŋŋɛɛ.”

²⁵ Ŋɩɩ nɛ Mosis sii, Iziral tɩŋŋaa nɩhɩasɩŋ to ʋ harɩŋ ba mʋ Dataŋ arɩ Abɩram teeŋ.

²⁶ Ŋɩɩ nɛ Mosis chaasa bʋla pɩ nɩalɩŋ kala, “Má sʋrɩsa lɩɩ nɩbɔŋŋɔɔ deemba lɛŋŋɛɛ bʋbʋɔŋ. Má sɩ́ ba kʋŋkala digu. Dɩ ma nɛ ŋaa ŋɩɩ, ba wʋbɔŋ-la jaŋ pɛ diima.”

²⁷ Ŋɩɩ nɛ ba sʋrɩsa lɩɩ Kora, Dataŋ arɩ Abɩram lɛŋŋɛɛ bʋbʋɔŋ. Bʋa-la lɛ dɩ Dataŋ arɩ Abɩram kʋ lɩɩ chɩŋ ba lɛŋŋɛɛ boiŋ niiŋ arɩ ba haalaa arɩ ba biiriŋ.

²⁸ Mosis bɩra bʋla pɩ nɩalɩŋ, “Ŋ-la lɛ nɛ ma jaŋ to a jɩŋ arɩ La TƖƖNA nɛ tɩmmɛ dɩ mɩ ŋaa wɩaa deemba, mɩ tɩtɩa wʋchɛɛlɛɛ dee mɩɩ ŋaa:

²⁹ Dɩ nɩaa deemba sʋʋŋ nɛ yie dɩ ba sʋʋ, ka Wɩa bɩ ba dɔgɩsɔ, ŋɩɩ-na La TƖƖNA dee bɩ mɩ tɩma.

³⁰ Ama dɩ La TƖƖNA nɛ ŋaa wɩɩ nɩaa ha sɩ bɩ na aŋ ka, a leŋ dɩ tinteeŋ suri a paa ba dɩ ba kɩaa kala liŋ kʋweyee, ŋɩɩ nɛ ma jaŋ jɩŋ arɩ nɩaa deemba fa vɩa La TƖƖNA wɩaa nɛ.”

³¹ Mosis sɩ bʋl wɩaa deemba aa dɛrɛ, dɩ lee-la Dataŋ arɩ Abɩram sɩ chɩna suro,

³² a paa ba dɩ ba dɩa nɩaa arɩ ba kʋŋkala a liŋ, a kɛŋ Kora arɩ ʋ nɩaa ma arɩ ba kʋŋkala a pɛ.

³³ Tinteeŋ suro a paaba liŋ kʋweyee nɛ, ba dɩ ba kɩaa kala nyɩɩgɛ ba nɩaa tʋɔŋ.

³⁴ Iziral tɩmma-la kala fa sɩ hɛ lee-la a nɩɩ ba yele, ba fá aŋ bʋl, “Tinteeŋ ka chɛ ʋ paa la ma liŋ nɛ.”

³⁵ Ŋɩɩ nɛ La TƖƖNA leŋ nyiniŋ kʋ dii sɩpaalaara-la zɔɔ-balɩa arɩ mahɩŋ balɩa arɩ fii sɩɩ nyɩgɛ kʋsʋɔrʋsʋŋ.

³⁶ Ŋɩɩ nɛ La TƖƖNA bʋla pɩ Mosis,

³⁷ “Bʋla pɩ Elieza, Wɩɩsʋllɩ sɩpaalaara Arɔŋ nanʋala, dɩ ʋ mʋ chaarɛ kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ nyiniŋ sɩ dii nɩalɩŋ tʋɔŋ, a kɛŋ nyɩŋ-hala-la mʋ bɩsa ta dɩ-bolii mʋa, bɛɛ wɩaa kɩalɩŋ ŋaa kɩa sɩ bɩ disiniŋ kɛnɛ.

³⁸ Paa nɩalɩŋ sɩ ŋaa wʋbɔŋ-la a sʋʋ kɩalɩŋ hɛ dɔŋɔ lɛ, a kaa libi pɩrataba a joŋo tɔ koru-la, ʋ ŋɩɩ jaŋ ŋaa chagɩlɩna a pɩ Iziral tɩŋŋaa. Ba sɩ kɛŋ kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ kɔ mɩ sɩpaaŋ a nyɩgɛ kʋsʋɔrʋsʋŋ a ŋaa Wɩɩsʋlʋŋ ŋɩɩ, ba bɩrɩmɛ kʋzɔmɔ nɛ mɩ teeŋ.”

³⁹ Ŋɩɩ nɛ Wɩɩsʋllɩ sɩpaalaara Elieza mʋ a paa ba sɩ kɛŋ kɔlɩɩŋ libi kɩalɩŋ lɛ ba sɩ yie hɛ nyiniŋ aa nyɩgɛ kʋsʋɔrʋsʋŋ a kaa libi pɩrataba dɩ ʋ kaa tɔ koru-la,

⁴⁰ arɩ La TƖƖNA sɩ to Mosis lɛ a dagʋ ŋɩɩ. Wɩɩŋ deeŋ jaŋ liliisi Iziral tɩŋŋaa kala, dɩ Arɔŋ doho nʋʋ dee bɩ kʋsʋɔrʋsʋŋ nyɩga mʋ La TƖƖNA sɩpaaŋ, ka dɩ nʋʋ dɔŋ ŋaa ŋɩɩ, ʋ jaŋ joŋ wɩalɩŋ tɩtɩa ʋ sɩ joŋo ŋaa Kora arɩ ʋ harɩ-tooroo lɛ a ŋaa tɩɩna lɛ.

⁴¹ Taŋ sɩ pʋla, Iziral tɩŋŋaa kala gʋgʋrɩmɛ wɩaa Mosis arɩ Arɔŋ teeŋ a bʋl, “Ma kpʋ La TƖƖNA nɩaa nɛ.”

⁴² Nɩalɩŋ sɩ bɩ Mosis arɩ Arɔŋ sɛyɛ sɩ mɩɩra chaasa lɛbɩ-la lɛ La TƖƖNA sɩ yie kɔ Iziral tɩŋŋaa teeŋ, ba na dɩ duoŋ-bɩlɩmbaanɩŋ guu kʋ tɔ lɛbɩ-la kala, ka La TƖƖNA tʋla chaanɛ.

⁴³ Ŋɩɩ nɛ Mosis arɩ Arɔŋ mʋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ sɩpaaŋ.

⁴⁴ La TƖƖNA bʋla pɩ Mosis,

⁴⁵ “Má sʋrɩsa lɩɩ nɩalɩŋ tʋɔŋ, ka dɩ mɩ kpʋ ba kala lɛɛlɛ.” Ŋɩɩ nɛ ba tuu tele chu tinteeŋ.

⁴⁶ Ŋɩɩ nɛ Mosis bʋla pɩ Arɔŋ, “Mʋ joŋ ŋ kʋ-la lɛ ŋ sɩ yie hɛ nyiniŋ aa nyɩgɛ kʋsʋɔrʋsʋŋ, a chaanɛ nyiŋ-halaa koru-la lɛ a hɛ, a hɛ kʋsʋɔrʋsʋŋ a ŋaa lɩma mʋ nɩalɩŋ kala teeŋ a pɩɩsɛ ba wʋbɔŋŋɔɔ ta. La Tɩɩna chaasa na baanɩŋ nɛ nɩalɩŋ nyuŋ, a joŋ nyanyal bɔmʋŋ hɛ ba lɛ, ʋ suomo kpʋkpʋba.”

⁴⁷ Ŋɩɩ nɛ Arɔŋ ŋaa ŋɩɩ Mosis sɩ daga, a fá mʋ jʋʋ nɩalɩŋ tʋɔŋ. Ʋ mʋa ŋɩɩ dɩ nyanyal bɔŋ-la suomo kpʋkpʋba. Ŋɩɩ nɛ Arɔŋ joŋ kʋsʋɔrʋsʋ-la a sʋl Wɩɩsʋlʋŋ a pɩɩsɛ ba wʋbɔŋŋɔɔ ta.

⁴⁸ Arɔŋ fa chɩŋ nɩsʋʋnʋŋ arɩ nɩweyee pɛgɛ nɛ aŋ giri nyanyal bɔŋ-la.

⁴⁹ Nyanyal bɔŋ-la kpʋ nɩaa bʋɩ fii arɩ banɛsɛ arɩ zɔɔ-balɩpɛ nɛ, a pɛ Kora arɩ ʋ harɩ-tooro-la sɩ bɩ La TƖƖNA niiŋ sɛyɛ lɛ.

⁵⁰ Nyanyal bɔŋ-la sɩ kʋ dɛrɛ, Arɔŋ mɩɩra mʋ Mosis teeŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ.