NAMAGABA 4 - WƖA TENIŊ

Wʋjɩmɩŋ nɛ kɩɩ kʋŋkala

¹ Mɩ bii, jegile nɩɩ wɩalɩŋ kala mɩ sɩ jaŋ dagɩŋ, dɩ ŋɩɩ wuo leŋ dɩ ŋ jɩŋ wɩaa bʋbʋɔŋ.

² Wɩalɩŋ mɩ sɩɩ dagɛ ŋaa wʋzɔmɔ nɛ, sɩ́ wɩalɩŋ vɩa.

³ Mɩ fa sɩ ŋaa bii-bie mɩ nyɩmma dɩa lɛ, a ŋaa mɩ naaŋ bie kala,

⁴ ʋ fa dagɛmɛ a bʋl, “Wɩalɩŋ mɩ sɩ dagɩŋ, jomba hɛ ŋ tʋɔŋ lɛ a tutoba, ŋɩɩ jaŋ leŋ dɩ ŋ kɛŋ mɩɩsɩŋ.

⁵ Kɛŋ wʋjɩmɩŋ, a jɩjɩŋ wɩaa bʋbʋɔsʋŋ, a pʋpɔ ŋ sɩ́ wɩalɩŋ mɩ sɩɩ dagɩŋ yʋ, a sɩ́ ba vɩa ta.

⁶ Sɩ́ wʋjɩmɩŋ vɩa, ʋ jaŋ pɔŋ. Dɩ ŋ nɛ chou, ʋ jaŋ pɔŋ.

⁷ Wʋjɩmɩŋ ŋaa sɩɩfɩaŋ kʋŋ nɛ a magɛ ŋ kɛnʋ. Joŋ kʋŋkala ŋ sɩ kɛnɛ a yɔɔ wʋjɩmɩŋ.

⁸ Dɩ ŋ nɛ chou, ʋ jaŋ kɛnɩŋ je. Dɩ ŋ nɛ mɩlʋ kpɛrɛ, ʋ jaŋ ziliŋ.

⁹ Ʋ jaŋ nagɛ tɩɩfɩɩlaa ba sɩ kaa ŋaa kuoru nyunchuulo a kpɩɛrɛ a joŋo chu.”

¹⁰ Mɩ bii, dɩ ŋ nɛ jegile nɩɩ mɩ wʋdagaa a kɛmba tɩŋ, ŋɩɩ jaŋ leŋ dɩ ŋ mɩɩsɩŋ duomi.

¹¹ Mɩ dagɩŋ wʋjɩmɩŋ wombiiŋ nɛ, a dagɩŋ wombii-la sɩ tʋʋla.

¹² Dɩ ŋ nɩɩ vɛŋ, kʋŋkala bɩ jaŋ gɛsɛ ŋ wombiiŋ lɛ, dɩ ŋ nɩɩ fá ma, ŋ bɩ jaŋ gɛrɛ kʋŋ.

¹³ Kɛŋ wɩalɩŋ mɩ sɩ dagɩŋ woruŋ, sɩ́ leŋe dɩ ba fori ŋ nɩsɩŋ lɛ. Kɛmba woruŋ, bɛɛ wɩaa ŋ mɩɩsɩŋ nɛ ŋɩɩ.

¹⁴ Nɩbɔŋŋɔɔ sɩɩ ŋaa wʋbɔmɔ-la, sɩ́ ba ŋaa, sɩ́ ba naabʋɔsʋŋ to.

¹⁵ Sɩ́ ŋɩɩ ŋaa, sɩ́ sɛnsʋ, lɩɩsɛ ŋ tɩtɩa ba lɛ.

¹⁶ Nɩbɔŋŋɔɔ-na bɩ doŋ ka pɩŋ, see dɩ ba ŋaa wʋbɔŋ. Ba bɩ doŋ ka pɩŋ see dɩ ba ŋaa wɩɩ jʋʋ nʋʋ lɛ.

¹⁷ Bɔnsʋŋ nagɛ kʋdiilee nɛ ba teeŋ, doluŋ diiniŋ ma nagɛ sɩnɩŋ ba teeŋ.

¹⁸ Tʋɔpʋl tɩŋŋaa wombiiŋ nagɛ taŋ sɩ pʋlaa kɔ leriŋ pʋpʋllɛ nɛ, a pʋllɛ ŋɩɩ a mʋ yi bʋa-la lɛ leriŋ sɩ chaasa pʋlla dɛrɛ.

¹⁹ Ama nɩbɔŋŋɔɔ wombiiŋ-na nagɛ leriŋ sɩ chaasa biri nɛ, ba bɩ jaŋ jɩŋ kʋ-la kala sɩ jaŋ leŋ dɩ ba gɛrɛ tel.

²⁰ Mɩ bii, suri ŋ dɩgɩlaa a jegile nɩɩ wɩalɩŋ mɩ sɩɩ bʋl.

²¹ Sɩ́ leŋe dɩ wɩalɩŋ lɛl ŋ teeŋ, jomba hɛ ŋ tʋɔŋ lɛ.

²² Nɩɩ-la kala sɩ jɩŋ ba bʋbʋɔŋ, ba jaŋ pʋ mɩɩsɩŋ arɩ yarɩfɩɛlaa.

²³ Kɛŋ ŋ tʋɔbɩɩnaa woruŋ, bɛɛ wɩaa, ba nɛ jaŋ leŋ dɩ ŋ wʋŋaalaa tʋʋlɛ.

²⁴ Sɩ́ wɩɩkala sɩ bɩ wʋtɩtɩɩ ŋaa bʋl, a sɩ́ wɩaa nyɩɛ.

²⁵ Bibeŋ sɩpaaŋ tegi tegi, leŋ dɩ ŋ sɩaa tʋʋlɛ sɩpaaŋ.

²⁶ Wɩɩ na-kala ŋ sɩɩ chɛ dɩ ŋ ŋaa, bɩɩnɛ woruŋ aŋ-na ŋaa, dɩ ŋ nɛ ŋaa ŋɩɩ, ŋ wɩɩkala jaŋ vɛŋ woruŋ.

²⁷ Pʋpɔ ŋ sɩ́ begile mʋ nadiiŋ koo nagʋa, lɩɩsɛ ŋ tɩtɩa wʋbɔŋŋɔɔ lɛ.