NAHUM 3 - WƖA TENIŊ

Wɩaa puu Nɩnɩvɛ nɩaa

¹ Wɩaa puu tabal-la sɩ suo arɩ nɩkpʋʋraa, a su arɩ wʋnyɩɛrɩŋ. Dʋa su tabal-la nɛ nɩaa sɩ jaŋ yuo laa.

² Má jegili, chɩbɩsɩŋ ka dɔŋ nɛ, gɩrɩŋgɩrɩmba ma ŋmoo dɔŋɔ a dʋdɔŋ, janɩŋ naasɩŋ ma dʋdɔŋ, laalɩŋ janɩŋ torukoba ma dɔmɔ tuto.

³ Ja-jɩllaa lɔgɛ ba janɩŋ hɛ nɛ, tokobiee lɩlɩgɩsɛ, tiŋŋee ma tʋtʋl. Nɩalɩŋ ba sɩ bolimo yʋga, sʋʋnʋŋ daŋ dɔŋɔ lɛ a paala bɩ nii kɛnɛ, nɩaa nʋɔsa bɩbal.

⁴ Wɩaa deemba kala ka ŋaa, a tɩŋ Nɩnɩvɛ sɩ nagɛ hachɔrʋŋ, a kɛŋ daalusuŋ nyɩsa kɩkɛsɛ nɩaa, a nyagɛ tinteyee bil arɩ ʋ wʋchɔrʋŋ wɩaa, aŋ kɛŋ ʋ hɩllɩŋ ma fʋgɛ nɩaa bil.

⁵ Ŋɩɩ nɛ La TƖƖNA doluŋ kala Tɩɩna bʋl, “Mɩ chɩŋ ŋ lɛ nɛ. Mɩ jaŋ kɛŋ ŋ gondoŋ wuro tɔ ŋ sɩaa, aŋ leŋ dɩ tinteyee nɩaa na ŋ yarɩ-biree, dɩ ŋ hɩɩsɩŋ lɩɩ.

⁶ Mɩ jaŋ joŋ disiŋ-jɩgɩŋ hɛ ŋ lɛ, a leŋ dɩ ŋ ŋaa ta-tɔɔ, dɩ nʋʋkala nɛ naŋ, ʋ chaarɛ sɩaa pɛ ŋ lɛ.

⁷ Dɩ nʋʋkala nɛ naŋ, ʋ jaŋ fá aŋ bʋl, ‘Nɩnɩvɛ pɩŋ jikpeeŋ nɛ, kʋbɛɛ nɛ jaŋ yele pʋʋ? Kʋbɛɛ nɛ jaŋ nyagɛ ʋ bɔyɛ?’ ”

⁸ Ŋ kpɩa Tɛbɛs sɩ ŋaa Ijipiti tinteeŋ tabalɩŋ nɛɛ? Tabal-la sɩ hɛ Naayɩl fuo-la sɛmɛ, ka lɩɩŋ gollu chu nɛɛ? Tabal-la fuonuŋ sɩ kɛrɛ lɩɩŋ nagɛ kɛrɛ a golli.

⁹ Kus arɩ Ijipiti tinteyee nɛ fa chaasa pʋ doluŋ, aŋ ka Puti arɩ Libiya tinteeŋ nɩaa ma fa ŋaa ba sɩŋŋaa.

¹⁰ Arɩ ŋɩɩ kala, ba fa yuo kɛnʋ nɛ a kaa mʋ yoŋ-baga. Ba paa ʋ bii-mulluŋ vɩɩra kpʋ nɛ ba womporunuŋ lɛ. Nɩalɩŋ sɩ yuo diiu tɔnsɔ lɩɩsɛ ʋ nɩyuŋŋoo nɛ, aŋ kɛŋ ʋ nɩbalaa kala hɛ chɔrʋmɔɔ.

¹¹ Nɩnɩvɛ, ŋ ma jaŋ gɛrɛ a nagɛ sɩ-nyʋara, ŋ jaŋ faa dɩ ŋ dʋndɔŋŋɔɔ sɩ́ŋ na.

¹² Ŋ dɩɩ-duoruŋ ŋ sɩ kaa pʋpɔ ŋ tɩtɩa nagɛ tutogusuŋ nɛŋ-bumbumba sɩ bɩa nɛ. Dɩ ba nɛ jagɩsɛba, nɛnɛ-la yie tel ba dɩ-diiree niiree lɛ nɛ.

¹³ Beŋ ŋ laalɩyuoroo na, ba kala nagɛ haalaa nɛ. Nyiniŋ dii ŋ tinteeŋ boi-baalaa kala nɛ, ba suro chɩŋ a pɩ ŋ dʋndɔŋŋɔɔ.

¹⁴ Má ŋaa lɩɩŋ, a kɛŋ ma tɩtɩaba gbɛrɛ nɩalɩŋ sɩɩ kɔ dɩ ba yuoma. Má pɔ ma dɩ-duoruŋ woruŋ. Má buu tɩɛrɩŋ a nʋɔsɛ, má chɛ tiebii-pɛɛsɩrɩ kʋa bil.

¹⁵ Arɩ ŋɩɩ kala nyiniŋ jaŋ diima, koo dɩ ba kpʋma laalɩ-baga lɛ a nagɛ nyaŋgɩrɩgɛba sɩ dii kɩaa. Ma pʋŋa nɛ a nagɛ nyaŋgɩrɩgɛba koo hɔbɔ.

¹⁶ Ma leŋe ma bayallaa pʋŋa pɛ nɛ a paala kɩɩ chɛnwʋlaa sɩ hɛ wɩa-nyuŋ. Ama ba nagɛ hɔbɔ sɩ dii tinteeŋ kɩaa kala dɛrɛ nɛ aŋ file viiri.

¹⁷ Nɩalɩŋ sɩɩ pɔma nagɛ hɔbɔ nɛ, ma tɩntɩnnɩ-hɩasɩŋ ma nagɛ hɔbɩ-laalɩŋ nɛ a sagɛ kɛrɛ nyuŋ dɩ leriŋ nɛ fɩɛla, ama dɩ wɩa nɛ pɔsɔ ba file viiri, nʋʋkala bɩ jɩŋ lee-la ba sɩ mʋa.

¹⁸ Asiiria tinteeŋ kuoru-balɩŋ, ŋ sɩpaalaaraa ka dɩɛgɛ doŋ nɛ, ŋ nɩbalaa ma pɩŋ aa wiesi. Ŋ nɩaa pɩsa hɛ peelee nyusuŋ nɛ, ka nʋʋkala tuo dɩ ʋ kɛmba kʋ hɛ dɔŋɔ.

¹⁹ Kʋŋkala tuo sɩ jaŋ wuo vaarɩŋ, bɛɛ wɩaa ŋ sɩ bolimi ŋɩɩ yʋga kieli nɛ. Nʋʋkala sɩ nɩa dɩ ŋ tele, ʋ yie porisi nɩsaa nɛ, bɛɛ wɩaa nʋʋkala na hɛɛŋ nɛ a tɩŋ ŋ wʋbɔmɔ-la sɩ bɩ dɛrɛ wɩaa.