NAHUM 2 - WƖA TENIŊ

Nɩnɩvɛ jaŋ tel

¹ Nɩnɩvɛ, bayuoru nɩɩ kɔ ŋ lɛ. Kɛŋ ŋ tɩtɩa hɛ dɔŋɔ, a pɔ ŋ dɩɩ-duoruŋ, aŋ bibeŋ ŋ wombiee ma. Kɛŋ ŋ laalɩyuoroo hɛ dɔŋɔ dɩ ma yuo laalɩŋ.

² Iziral tɩŋŋaa dʋndɔŋŋɔɔ chei ba tinteeŋ nɛ, ama La TƖƖNA jaŋ leŋ dɩ Iziral tɩŋŋaa bɩra kɛŋ tʋla arɩ ʋ fa sɩ nagɛ ŋɩɩ.

³ Hɔɔtaalɩ-la ʋ laalɩyuoroo sɩ kaa kɛrɛɛ laa bayuori hɛŋŋɛɛ kala fɩɛsa nɛ. Ba gɛnnɩŋ ma fɩɛsɛ. Ba laalɩŋ janɩŋ torukoba hɔɔnʋŋ ma lɩlɩgɩsɛ tapʋlɩɩ-la ba sɩ kɛŋ ba tɩtɩa a didii barɩŋ, ba tiŋŋee viviisi.

⁴ Ba laalɩŋ janɩŋ torukoba faasa fɩfá womporunuŋ lɛ a gɔllɛ vivilli ba jaŋ nɩaa dɩ-hilimiŋ. Ba nagɛ kapɩlaa nyiŋgeliŋ nɛ, ba vɛnɩŋ nagɛ duonuŋ sɩɩ lɩgɩsʋ.

⁵ Ʋ yɩrɛ ʋ bayuoro-la ʋ sɩ tʋɔsa a hɛ dɔŋɔ. Ama baa ŋmoo naasɩŋ nɛ wombiiŋ lɛ, ba yie guu fá mʋ yi tabal-la jeeŋ a kɛŋ hɔɔtaalɩ-la ba sɩ kaa kɛrɛɛ laa bayuori hɛŋŋɛɛ mʋ chaga chɩna gbɛrɛ dɩ ba yuo.

⁶ Fuo-la gɩba kɩɛsa nɛ, lɩɩŋ yigi kuoru dɩa lo.

⁷ Ba bʋla bil nɛ arɩ ba jaŋ kɛsɛ tabalɩŋ deeŋ nɩaa kaa mʋ yoŋ-baga. Ʋ hantolibiisi-la sɩ ŋaa yosi yiyel a nagɛ kokosuŋ aŋ paa nɩsaa vɔɔ ba bɔɩsɩŋ lɛ.

⁸ Nɩnɩvɛ nagɛ pɩlɩŋ sɩ yɛrɛ nɛ ʋ lɩɩŋ pɛllɛ lɩɩ. Ba dɔnsʋŋ ŋmoo niiŋ a bʋl, “Ma leŋ, ma leŋ,” ama nʋʋkala bɩ gɛlɛ daasɛ.

⁹ Má paa ba hɔpʋla. Má paa ba sɛlɩmɛ. Ba dʋa-la kala ba sɩ bile bɩ kʋ-dɛrɩɩ ŋaa.

¹⁰ Ba chei tabal-la kala nɛ ʋ pɩŋ hoi, kʋŋkala bɩra tuo ʋ lɛ. Fawʋllʋŋ kɛmba ba chichel, ba nandaasɩŋ kala yʋɔrɛ, ba sɩaa ma bibiri.

¹¹ Lɛɛlɛ, nɩɩ nɛ naachigee dɩjʋʋlʋŋ hɛ, lee-la ba sɩɩ dɩɛsɛ ba biiriŋ, lee-la naachigi-bele arɩ naachigi-haala arɩ ba biiriŋ sɩ mʋa a bɩ fawʋllʋŋ ka fá?

¹² Nɩnɩvɛ fa nagɛ naachigiŋ nɛ, a kpʋ kɩaa yʋgɛ a pɩ ʋ biiriŋ aŋ chigi bagɩla pɩ ʋ haala ma, ka ʋ dɩ-faalɩŋ arɩ ʋ dɩjʋʋlʋŋ kala su arɩ kɩalɩŋ ʋ sɩ kpʋa.

¹³ La TƖƖNA doluŋ kala Tɩɩna sɩ, “Mɩ chɩŋ ŋ lɛ nɛ. Mɩ jaŋ nyɩgɛ ŋ janɩŋ torukoba aŋ kpʋ ŋ laalɩyuoroo arɩ tokobiiŋ. Mɩ bɩ jaŋ leŋ kʋŋkala a pɩŋ tinteeŋ lɛ. Nʋʋ bɩra bɩ jaŋ nɩɩ ŋ tɩndaara-la sɩɩ fugisi nɩaa yikoro.”