MƖKA 5 - WƖA TENIŊ

Wɩa hɛ niiŋ arɩ kuoro jaŋ lɩɩ Bɛtɩlɛhɛm nɛ

¹ Jerusalɛm tɩmma, má kɛŋ ma laalɩyuoroo hɛ dɔŋɔ, bɛɛ wɩaa ba golloo yuola nɛ. Ba jaŋ joŋ daaŋ ŋmoo Iziral kuoro chaŋkpaŋɩŋ lɛ.

² Bɛtɩlɛhɛm Ɛfɩrata, Juda tinteeŋ tasɩŋ kala tʋɔŋ ŋ nɛ muuro. Ama La TƖƖNA sɩ ʋ jaŋ lɩɩsɛ kuoro ŋ lɛ dɩ ʋ bibeŋ Iziral, nɩɩ-la doho nɩaa sɩɩ dii kuoruŋ faafaa kala.

³ Ŋɩɩ wɩaa ʋ jaŋ vɩa Iziral tɩŋŋaa ta a pɩ ba dʋndɔŋŋɔɔ a kaa mʋ yi bʋa-la lɛ hatolo kʋbala sɩ jaŋ kɛŋ luoruŋ a lʋl bie. Ŋɩɩ lɛ nɛ Iziral naambii-kaana-la sɩ hɛ yoŋ-baga lɛ jaŋ mɩɩra kɔ ba nɩaa teeŋ.

⁴ Bile jaŋ chaasa chɩŋ a kɛŋ ʋ TƖƖNA Wɩa doluŋ arɩ ʋ yɩrɩ-balɩŋ, a beŋ ʋ nɩaa nyuŋ a nagɛ pie-daara sɩɩ beŋ ʋ piesee nyuŋ ŋɩɩ. Ba jaŋ hɔŋ wɩɩkala bɩ baa walɩmɛ, bɛɛ wɩaa ʋ ballɩŋ jaŋ yi dʋnɩa sɛmɛ kala.

⁵ Ʋ nɛ jaŋ leŋ dɩ ba hɔŋ arɩ fɩɛlɩŋ. Dɩ Asiiria tɩŋŋaa nɛ kɔ dɩ ba yuo la tinteeŋ a chichei la dɩ-duoruŋ, la jaŋ leŋ la sɩpaalaarɩ duoruŋ baŋmɛnɛ ku lɩɩ yuoba.

La TƖƖNA jaŋ laa ʋ nɩaa ta

⁶ Ba jaŋ yuo dii Asiiria tinteeŋ, a jaŋ chei Nɩmɩrɔd tintee-la. Ba jaŋ laala ta Asiiria tɩŋŋaa nɩsɩŋ lɛ, dɩ ba nɛ kʋ jʋʋ la tinteeŋ a yuyuola.

⁷ Jekɔb doho nɩalɩŋ sɩ ka a bɩ sʋba jaŋ guoli nɩ-daŋ tʋɔŋ. Ba jaŋ pɛ ba lɛ a nagɛ La TƖƖNA sɩ yie leŋ nyalɩŋ nyala hɛ kɩaa lɛ, koo duonuŋ sɩ yie mirise hɛ kɩaa lɛ ba wasɛ ŋɩɩ. Wɩaa deemba kala ka ŋaa Wɩa doluŋ lɛ nɛ, nuhuobiine doluŋ lɛ dee.

⁸ Jekɔb doho nɩkaana-la jaŋ guoli tinteyee nɩaa tʋɔŋ, a hɛ nɩ-daŋ tʋɔŋ, a nagɛ naachigiŋ sɩ guoli baga kɩaa tʋɔŋ duuŋ lɛ. Ba nagɛ naachigi-bie sɩ guoli pie-laalɩŋ lɛ nɛ, a yie fɩla chɩchaalɛba a kɛmba pʋɔsa ta vɩvɛŋ ka nʋʋ tuo dɩ ʋ laaba ta.

⁹ Iziral tɩŋŋaa jaŋ yuo dii ma dʋndɔŋŋɔɔ, ma jaŋ chei ma dʋndɔmɔ-la kala.

La TƖƖNA jaŋ dɔgɩsɛ ʋ nɩaa

¹⁰ La TƖƖNA sɩ, “Bʋa-la lɛ, mɩ jaŋ chei ma janɩŋ a chei ma janɩŋ torukoba ma.

¹¹ Mɩ jaŋ chei tabalaa sɩ hɛ ma tinteeŋ lɛ, aŋ ŋmoo ma dɩ-duoruŋ ma kala lo.

¹² Mɩ jaŋ chei ma hɩl wɩalɩŋ dɩ ma bɩra sɩ́ vʋgʋ.

¹³ Mɩ jaŋ chei ma tɔmɔ-la ma sɩ kɛŋ daaŋ saa aŋ yɛrɛ vʋɩyaa tabɩa-la ma sɩ hɛ ma tʋɔŋ, dɩ ma bɩra sɩ́ kɩalɩŋ ma sɩ ŋaa sɩpaaŋ kpirimu.

¹⁴ Mɩ jaŋ churi vene-la ba sɩɩ yɩrɛ Asɩra daasɩ-la sɩ pɛ ma tʋɔŋ ta, aŋ ŋmoo ma tabalaa lo.

¹⁵ Mɩ jaŋ joŋ baaŋ-la mɩ sɩ faasa na a fɩɩsɛ tinteye-la nɩaa sɩ bɩ mɩ niiŋ sɛyɛ lɛ.”