Matiu 8 - WƖA TENIŊ

Yesu vaarɛ gbege

¹ Yesu sɩ bʋl wɩaa deemba dɛrɛ, ʋ lɩɩ peeliŋ nyuŋ a kʋ tuu. Ŋɩɩ nɛ nɩ-daŋ tuto ʋ harɩŋ.

² Gbege kʋbala ma kɔ ʋ teeŋ a tuu kpirimi ʋ sɩpaaŋ aŋ sʋlʋ, “Kʋhɩaŋ, dɩ ŋ nɛ cho, ŋaa dɩ mɩ duori.”

³ Ŋɩɩ nɛ Yesu lɩɩsɛ ʋ nɩsɩŋ a digu aŋ bʋl, “Mɩ cho nɛ, duori.” Yawɩɩl-la guu leŋ baal-la.

⁴ Yesu bʋla pʋ, “Sɩ́ wɩɩŋ deeŋ bʋla pɩ nʋʋkala. Ama kɛŋ ŋ tɩtɩa mʋ dagɛ Wɩɩsʋllɩ sɩpaalaara, aŋ joŋ ŋ Wɩɩsʋlʋŋ kɩaa pʋ dɩ ʋ kpʋ a pɩɩsɛ ŋ disiniŋ ta arɩ Mosis fa sɩ dagɛma ŋɩɩ. Dɩ ŋ nɛ ŋaa ŋɩɩ, nɩaa jaŋ na arɩ ŋ bɩra bɩ disiniŋ kɛnɛ.”

Yesu vaarɛ Rom laalɩyuori-hɩaŋ dɩa tɩntɩnna

⁵ Ŋɩɩ nɛ Yesu sii mʋ Kapɛnam dɩ Rom laalɩyuoroo kʋhɩaŋ kʋ chemu a sʋlʋ dɩ ʋ pɛ ʋ lɛ a bʋl,

⁶ “Mɩ kʋhɩaŋ, mɩ dɩa tɩntɩnnʋ nɩɩ wɩɩlʋ a pɩŋ dɩa lɛ. Ʋ bɩ wuo vɛŋ a nɩna hɛɛŋ woruŋ.”

⁷ Ŋɩɩ nɛ Yesu bʋla pʋ, “Mɩ jaŋ kʋ ŋaa dɩ ʋ duori.”

⁸ Ama baal-la bʋla pʋ, “Mɩ Tɩɩna, mɩ bɩ maga dɩ ŋ kʋ jʋʋ mɩ dɩa. Ŋ-na yaa suri ŋ niiŋ a bʋl dɩ mɩ tɩntɩnnʋ-la duori, ʋ jaŋ duori.

⁹ Mɩ ma paalaa to mɩ laalɩyuori hɩasɩŋ niiŋ nɛ. Laalɩyuoroo dɔnsʋŋ ma tuto mɩ niiŋ. Dɩ mɩ nɛ sɩ nɩa deeŋ mʋ daha, ʋ yie mʋ nɛ, dɩ mɩ nɛ sɩ dɩ nɩa deeŋ kɔ daha, ʋ yie kɔ nɛ. Dɩ mɩ nɛ bʋla pɩ mɩ yomo dɩ ʋ ŋaa wɩɩŋ deeŋ, ʋ yie ŋaa nɛ.”

¹⁰ Yesu sɩ nɩɩ wɩaa deemba, ʋ ŋaaʋ wʋkpuŋkpere. Ŋɩɩ nɛ ʋ bʋla pɩ nɩ-daŋ-la fa sɩɩ to ʋ harɩŋ, “Wʋtɩtɩɩ nɛ mɩ bʋlaa pɩma, mɩ ha bɩ Wɩa laa diiniŋ deeŋ doho na Iziral nɩaa tʋɔŋ.

¹¹ Mɩ bʋlaa pɩma, nɩaa jaŋ yʋgɛ a lɩɩ wɩɩpɔsʋŋ arɩ wɩɩjʋʋlʋŋ a kʋ hɔŋ Wɩa kuorii-la tʋɔŋ dɩ ba dɩ Abɩraham arɩ Aɩzɩk arɩ Jekɔb dii kʋdiilee.

¹² Ama nɩalɩŋ fa sɩ maga dɩ ba hɛ Wɩa kuorii-la lɛ aŋ bɩ jʋa, ba jaŋ jomba yuo ta jeeŋ harɩŋ dɩ ba hɛ birimiŋ tʋɔŋ a pɩna yiyel aŋ dɩdɩŋ ba nyɩlaa.”

¹³ Ŋɩɩ nɛ Yesu bʋla pɩ laalɩyuori-hɩaŋ-la, “Mʋ dɩa, ŋ sɩ laa dii arɩ wɩɩ-la jaŋ ŋaa, ʋ jaŋ ŋaa.” Bʋa-la tɩtɩa lɛ laalɩyuori-hɩaŋ-la tɩntɩnnʋ-la duori.

Yesu vaarɛ nɩaa yʋgɛ

¹⁴ Ŋɩɩ nɛ Yesu mʋ Pɩɩta dɩa. Ʋ sɩ jʋa, ʋ na dɩ ʋ hɩɩlɩ-haala pɩna a wʋwɩɩlɛ, ʋ yaraa kala lɩŋ.

¹⁵ Ŋɩɩ nɛ Yesu digi ʋ nɩsɩŋ lɛ. Ʋ yaraa fa sɩ lɩma ŋɩɩ, ʋ fɩɛlɛ. Ʋ sii ŋaa kʋdiilee pɩba ba dii.

¹⁶ Dɩdaanɩŋ sɩ yie, ba kɛŋ nɩaa yʋgɛ jɩŋ-bɔŋŋɔɔ sɩ kɛnɛ a kɔ Yesu teeŋ. Yesu bʋl wɩaa a kiri jɩŋ-bɔmɔ-la ta aŋ vaarɛ nɩalɩŋ kala fa sɩɩ wɩɩlʋ.

¹⁷ Ʋ ŋaa wɩɩŋ deeŋ dɩ wɩalɩŋ Azaaya fa sɩ bʋla kʋ ŋaa wʋtɩtɩɩ nɛ. Azaaya fa ŋaa Wɩa wʋlaabʋllʋ nɛ. Ʋ fa bʋla, “Ʋ nɛ laa la nyanyalaa kala a chʋŋ.”

Nɩalɩŋ sɩ maga dɩ ba to Yesu harɩŋ

¹⁸ Yesu sɩ na dɩ nɩ-daŋ-la kʋ gollu, ʋ ŋaa ʋ dɩ ʋ harɩ-tooroo chol fuoŋ cholo dɔŋɔ.

¹⁹ Ŋɩɩ nɛ Wɩa teniŋ kerichi kʋbala kɔ ʋ teeŋ a bʋla pʋ, “Mɩ kʋhɩaŋ, mɩ ŋaa siri dɩ mɩ to ŋ harɩŋ a mʋ lee-na kala ŋ sɩɩ mʋ nɛ.”

²⁰ Ŋɩɩ nɛ Yesu bʋla pʋ, “Jolluŋ kɛŋ bʋɔsʋŋ nɛ a jʋjʋʋ, diibiisiŋ ma kɛŋ dɛllɩŋ a jʋjʋʋ, ama mɩ-na Nuhuobiine Bie bɩ dɩpɩnɩŋ kɛnɛ dɩ mɩ pɩna wiesi.”

²¹ Nɩaa dɔnsʋŋ ma fa sɩɩ to Yesu harɩŋ, ba tʋɔŋ kʋbala ma bʋla pʋ, “Mɩ Tɩɩna, leŋ dɩ mɩ laa sɩpaaŋ mʋ hugi mɩ nyɩmma.”

²² Ŋɩɩ nɛ Yesu bʋla pʋ, “To mɩ harɩŋ aŋ leŋ dɩ sʋʋnʋŋ huhugi ba tɩtɩa sʋʋnʋŋ.”

Yesu ŋaa peliŋ kɛrɛ

²³ Ŋɩɩ nɛ Yesu jʋʋ lɩɩŋ daboro. Ʋ harɩ-tooroo to ʋ harɩŋ jʋʋ.

²⁴ Pel-duo kʋbala guu lulu mʋga-la lɛ. Ŋɩɩ nɛ lɩɩ-peliŋ tɔ lɩɩŋ daboro-la. Ama Yesu fa pɩŋ doŋ nɛ.

²⁵ Ŋɩɩ nɛ ʋ harɩ-tooroo mʋ chɩsʋ a bʋla pʋ, “La Tɩɩna, laala ta, laa chɛ la sʋʋ nɛ.”

²⁶ Ŋɩɩ nɛ Yesu pɩɛsɛba, “Bɛɛ nɛ tɩɩ fawʋllʋŋ kɛmma? Ma Wɩa laa diiniŋ bɩ yʋgɛ.” Ŋɩɩ nɛ ʋ sii kpɩa pel-la lɛ aŋ bʋla pɩ fuo-la ma dɩ ʋ fɩɛla pɩŋ, leriŋ kala guu ŋaa fʋɩɩ.

²⁷ Ʋ ŋaa nʋʋkala wʋkpuŋkpere. Ŋɩɩ nɛ ba pɩpɩɛsɛ dɔŋɔ, “Nɩbɛɛ nɛ ŋ-la? Peliŋ arɩ lɩɩ-peliŋ kala tuto ʋ niiŋ.”

Yesu kiri jɩŋ-bɔŋŋɔɔ baalaa balɩa lɛ

²⁸ Ŋɩɩ nɛ Yesu sii mʋ tintee kʋbala baa yɩrɛ Gadara. Lee-la fa hɛ fuoŋ cholo nɛ. Dɩ baalaa balɩa lɩɩ vaamaa tʋɔŋ a kʋ chemu. Jɩŋ-bɔŋŋɔɔ nɛ fa kɛmba, ba nyɩnyaasɛ. Ŋɩɩ leŋ nʋʋkala fa bɩ wombii-la wuo to.

²⁹ Ba sɩ na Yesu, ba guu ŋmoo niiŋ a pɩɛsʋ, “Bɛɛ nɛ ŋ chɩchɛ dɩ ŋ ŋaa la lɛ Wɩa Bii? Ŋ kɔ dɩ ŋ dɔgɩsɛla nɛɛ, ka bʋa-la ha bɩ yiee?”

³⁰ Dɩ toonuŋ ma hɛ lee-la a yʋgɛ a gɔllɔ didii kɩaa.

³¹ Ŋɩɩ nɛ jɩnsɩ-la sʋl Yesu, “Dɩ ŋ nɩɩ chɛ dɩ ŋ kirila dɩ la lɩɩ, leŋ dɩ la mʋ jʋʋ toonuŋ deemba.”

³² Yesu bʋla pɩba, “Má lɩɩ.” Ŋɩɩ nɛ ba lɩɩ baala-la lɛ a mʋ jʋʋ toonu-la. Toonu-la kala sii fá a lɩɩ peel-la nyuŋ a tuu tel mʋga tʋɔŋ a sʋʋ.

³³ To-daara-la kɛŋ wɩɩŋ deeŋ fá mʋ bʋla pɩ ba taŋ-la nɩaa, arɩ wɩɩ-la sɩ ŋaa baala-la fa sɩ kɛŋ jɩŋ-bɔŋŋɔɔ lɛ.

³⁴ Ŋɩɩ nɛ nʋʋkala sɩ hɛ taŋ-la lɛ lɩɩ a mʋ dɩ ʋ na Yesu. Ba sɩ mʋ naʋ, ba sʋlʋ dɩ ʋ lɩɩ ba tinteeŋ lɛ.