Matiu 7 - WƖA TENIŊ

Yesu sɩ dɩ la sɩ́ la dɔnsʋŋ tɩŋŋaa wɩaa laa jɩŋ

¹ Má sɩ́ ma dɔnsʋŋ tɩŋŋaa wɩaa laa jɩŋ. Dɩ ma nɛ ŋaa ŋɩɩ, Wɩa ma jaŋ joŋ cheeriŋ pɩma.

² Wɩa jaŋ dii ma sarɩya arɩ ŋɩɩ tɩtɩa ma sɩɩ ŋaa ma dɔnsʋŋ tɩŋŋaa lɛ. Ŋɩɩ ma sɩ joŋo to ma dɔnsʋŋ tɩŋŋaa lɛ, ŋɩɩ tɩtɩa nɛ Wɩa ma jaŋ joŋo to ma lɛ.

³ Ɛɛ nɛ ŋ jaŋ wuo na daa-bie sɩ tel ŋ naambie sɩɩŋ lɛ aŋ bɩ daa-bal-la sɩ tel ŋ tɩtɩa sɩɩŋ lɛ ka na?

⁴ Ɛɛ nɛ ŋ jaŋ wuo bʋla pɩ ŋ naambie arɩ ʋ leŋ dɩ ŋ lɩɩsɛ daa-bie-la sɩ hɛ ʋ sɩɩŋ lɛ, aŋ bɩ daa-bal-la sɩ hɛ ŋ tɩtɩa sɩɩŋ lɛ ka na?

⁵ Ŋ-na kanfugi tɩɩna, laa sɩpaaŋ lɩɩsɛ daa-bal-la sɩ hɛ ŋ tɩtɩa sɩɩŋ lɛ, ka ŋ sɩaa wuo na, ŋɩɩ nɛ ŋ jaŋ wuo pɛ ŋ naambie lɛ a lɩɩsɛ daa-bie-la sɩ hɛ ʋ sɩɩŋ lɛ.

⁶ Má sɩ́ Wɩa kɩaa joŋo pɩ nuhuobiiŋ-vasɩŋ, a sɩ́ ma kʋzɔŋŋɔɔ joŋo bil nuhuobiiŋ-toonuŋ sɩpaaŋ. Dɩ ma nɛ ŋaa ŋɩɩ, ba jaŋ nʋɔsɛba arɩ naasɩŋ aŋ to ma harɩŋ a dɩmma.

Má chɛ kɩaa, ma jaŋ na

⁷ Má sʋl kɩaa, ma jaŋ laa, má chɛ kɩaa, ma jaŋ na. Má du boro, ba jaŋ kaa suro pɩma.

⁸ Nɩɩ-la kala sɩ sʋl kɩaa Wɩa teeŋ, ʋ yie laa nɛ. Nɩɩ-la sɩɩ chɛ kɩaa, ʋ yie na nɛ. Nɩɩ-la ma sɩ du boro, ba yie kaa suro pʋ nɛ.

⁹ Ma kʋbɛɛ bie nɛ jaŋ pɩɛsa chɩchɛ boroboro, dɩ ŋ joŋ tabɩɩŋ pʋ?

¹⁰ Koo dɩ ʋ nɛ pɩɛsa chɩchɛ chenfiliŋ, ŋ jaŋ joŋ dɩmɩŋ a pʋʋ?

¹¹ Dɩ ma nɛ bɔmɔ aŋ jɩŋ kʋzɔŋŋɔɔ joŋo pɩ ma biiriŋ, ɛɛ nɛ ma Nyɩmma sɩ hɛ Wɩa-jaŋ, a kɛŋ kʋzɔŋŋɔɔ bɩ jaŋ joŋo pɩ nɩalɩŋ sɩ sʋla chɩchɛ?

¹² Wɩalɩŋ ma sɩ cho dɩ nɩaa joŋo ŋɩŋaa ma lɛ, má ma joŋ ŋɩɩ ŋɩŋaa ba lɛ. Wɩalɩŋ Mosis fa sɩ ŋmʋnsa bil dɩ nɩaa tuto arɩ Wɩa wʋlaabʋllaa wʋdagaa wʋnyuŋ nɛ wɩɩŋ deeŋ.”

Má to boi-bie a mʋ Wɩa-jaŋ

¹³ Yesu bɩra bʋl, “Má to boi-bie a mʋ Wɩa-jaŋ. Boi-la ba sɩ to a mʋmʋ Wɩa nyiniŋ, ʋ jalɩa nɛ, wombii-la ma vɛnɩŋ bɩ hɛɩ. Nɩaa yʋga nɛ a tuto wombii-la.

¹⁴ Ama Wɩa-jaŋ boiŋ niiŋ muuro nɛ, wombii-la ma sɩɩ mʋ nɩmɛ, ʋ vɛnɩŋ hɛyɛ. Nɩaa baŋmɛnɛ dʋndʋŋ nɛ yie wuo na wombii-la a to.

Yesu bʋl wɩaa a tɩgɛ wʋnyɩɛrɩ Wɩa wʋlaabʋllaa lɛ

¹⁵ Má pɔ ma tɩtɩa lɛ arɩ wʋnyɩɛrɩ Wɩa wʋlaabʋllaa. Ba jaŋ kɔ ma teeŋ a nagɛ nɩzɔmɔ ba sɩaa lɛ, ama ba tʋɔŋ lɛ, ba ŋaa nɩbɔmɔ nɛ a nagɛ guŋgurusuŋ sɩ yie kɛsɛ kɩaa chɩchaŋ.

¹⁶ Ma jaŋ to ba wʋŋaalaa lɛ nɛ a jɩmba. Sɔjaamɩŋ bɩ chɩchʋɛŋ ka nɛŋ, sɔ-gbuŋgbeŋe ma bɩ tutogi nambɩlaa ka nɛŋ.

¹⁷ Tɩa-la kala sɩ kɛŋ yarɩfɩɛlaa, ʋʋ nɛŋ nɛŋ-zɔŋŋɔɔ nɛ, ama tɩa-la sɩ bɩ yarɩfɩɛlaa kɛnɛ nɩɩ nɛŋ nɛŋ-lɔrʋnʋŋ.

¹⁸ Tɩa-la sɩ kɛŋ yarɩfɩɛlaa bɩ nɛŋ-lɔrʋnʋŋ wuo nɛŋ, tɩa-la sɩ bɩ yarɩfɩɛlaa kɛnɛ ma bɩ nɛŋ-zɔŋŋɔɔ wuo nɛŋ.

¹⁹ Tɩa kala sɩ bɩ nɛŋ-zɔŋŋɔɔ ka nɛŋ, ba jaŋ kere ta a joŋo yuo hɛ nyiniŋ tʋɔŋ.

²⁰ Ŋɩɩ lɛ nɛ ma jaŋ to a jɩŋ wʋnyɩɛrɩ Wɩa wʋlaabʋllaa.

Nʋʋkala dee bɩ jaŋ jʋʋ Wɩa kuorii-la tʋɔŋ

²¹ Nʋʋkala sɩ yɩrɛmɛ, ‘mɩ Tɩɩna, mɩ Tɩɩna,’ dee bɩ jaŋ jʋʋ Wɩa kuorii-la tʋɔŋ, see nɩalɩŋ sɩɩ ŋaa wɩalɩŋ mɩ Nyɩmma sɩ hɛ Wɩa-jaŋ sɩ daga.

²² Dɩ Wɩa sarɩya chɛ-diiliŋ nɛ yie, nɩaa jaŋ yʋgɛ a bʋl, ‘La Tɩɩna, La Tɩɩna, la bʋl Wɩa wɩaa a pɩ nɩaa ŋ yɩrɩŋ lɛ aŋ kiri jɩnsɩŋ ma nɩaa lɛ ŋ yɩrɩŋ lɛ, a ŋaa wʋmagɩlaa ma yʋgɛ ŋ yɩrɩŋ lɛ.’

²³ Ama mɩ jaŋ bʋla pɩba: Mɩ paala bɩ ma jɩŋ. Ma wʋbɔŋ ŋɩŋaaraa, má sʋrɩsa lɩɩ mɩ teeŋ.”

Yesu magɛ namaga a tɩgɛ dɩɩ-saaraa balɩa lɛ

²⁴ Yesu bɩra sɩ, “Nɩɩ-la kala sɩ kɔ mɩ teeŋ a jegile nɩɩ mɩ niiŋ wɩaa deemba mɩ sɩ bʋla pɩma a tutoba, mɩ jaŋ dagɛma ŋɩɩ ʋ sɩ naga. Ʋ nagɛ wʋjɩnna sɩ saa ʋ dɩa nɛ. Ʋ saaʋ kpagɩnyɩlɩŋ nyuŋ nɛ.

²⁵ Ŋɩɩ nɛ duonuŋ nɩɩ. Lɩɩŋ su leriŋ kala, peliŋ ma lu a ŋmoo lɩɩ-la a yagɛ dɩa-la, ka dɩa-la bɩ tele, bɛɛ wɩaa ba bil ʋ gentine woruŋ nɛ a saaʋ kpagɩnyɩlɩŋ nyuŋ.

²⁶ Ama nɩɩ-la kala sɩ jegile nɩɩ mɩ niiŋ wɩaa deemba mɩ sɩ bʋla pɩma aŋ bɩ ba to, ʋ nagɛ nɩyaarɩ-la sɩ saa ʋ dɩa hagɩlɩ-bumbugulo tʋɔŋ nɛ.

²⁷ Ŋɩɩ nɛ duonuŋ nɩɩ, lɩɩŋ su leriŋ kala, peliŋ ma lu a ŋmoo lɩɩ-la yagɛ dɩa-la, dɩa-la kala tel wuru.”

²⁸ Yesu sɩ bʋl wɩaa deemba dɛrɛ, ba ŋaa nɩ-daŋ-la kala wʋkpuŋkpere.

²⁹ Ʋ bɩ ba daga a nagɛ ba Wɩa teniŋ kerichiba sɩɩ dagɛba ŋɩɩ. Ʋ-na kɛŋ wɩɩ-la doluŋ nɛ a dagɛba.