Matiu 4 - WƖA TENIŊ

Sɩtaanɩ magɩsɛ Yesu

¹ Ŋɩɩ nɛ Wɩa Dɩŋ-zɔmʋŋ kɛŋ Yesu kaa jʋʋ tintee-hɩlɩŋ tʋɔŋ dɩ Sɩtaanɩ magɩsʋ.

² Yesu fa sɩ hɛ tintee-hɩlɩŋ tʋɔŋ ŋɩɩ, ʋ vɔɔ niiŋ tɩtaŋɩŋ arɩ wɩɩhɛyɛ kala tapʋlaa mahɩŋ balɩa, ŋɩɩ nɛ losuŋ kɛnʋ.

³ Ŋɩɩ nɛ Sɩtaanɩ kɔ ʋ teeŋ a bʋla pʋ, “Dɩ ŋ nɛ ŋaa Wɩa Bie, leŋ dɩ tabɩaa deemba bɩrɩmɛ kʋdiilee.”

⁴ Ŋɩɩ nɛ Yesu bʋla pʋ, “Ba ŋmʋnsɛ Wɩa teniŋ tʋɔŋ a bʋl, ‘Kʋdiilee dʋndʋŋa dee bɩ nuhuobiine mɩɩsɩŋ ka pa, ama Wɩa niiŋ wɩalɩŋ ʋ sɩɩ bʋl nɩɩ pa mɩɩsɩŋ.’ ”

⁵ Sɩtaanɩ kɛnʋ kaa mʋ Jerusalɛm a kɛnʋ jɩl Wɩa dɩɩ-balɩŋ nyu-gbaŋa

⁶ aŋ bʋla pʋ, “Dɩ ŋ nɛ ŋaa Wɩa Bie, joŋ ŋ tɩtɩa yuo daha a tuu chigisi tinteeŋ. Ba ŋmʋnsɛ Wɩa teniŋ tʋɔŋ a bʋl, ‘Wɩa jaŋ leŋ dɩ ʋ tɩndaaraa kʋ cheme kɛnɩŋ, dɩ ŋ sɩ́ ŋ naaŋ joŋo ŋmoo tabɩɩŋ.’ ”

⁷ Ŋɩɩ nɛ Yesu bʋla pʋ, “Ba bɩra ŋmʋnsɛ Wɩa teniŋ sɛmɛ dɔŋɔ a bʋl, ‘Má sɩ́ ma Tɩɩna Wɩa magɩsʋ.’ ”

⁸ Ŋɩɩ nɛ Sɩtaanɩ bɩra kɛŋ Yesu a kaa jɩl peel-bal kʋbala nyuŋ a dagʋ dʋnɩa kuoruŋ fine arɩ ʋ zɔmʋŋ

⁹ aŋ bʋla pʋ, “Mɩ jaŋ joŋ kɩaa deemba kala pɩŋ dɩ ŋ nɛ jaŋ tuu kpirimi a chʋɔlɛmɛ.”

¹⁰ Ŋɩɩ nɛ Yesu bʋla pʋ, “Sɩtaanɩ, mʋ nɩmɛ, Wɩa teniŋ tʋɔŋ ba ŋmʋnsa, ‘Má chʋchʋɔlɛ La Tɩɩna Wɩa dʋndʋŋa a tutou.’ ”

¹¹ Ŋɩɩ nɛ Sɩtaanɩ viiri aŋ ka Yesu, Wɩa tɩndaaraa kʋ pɛ ʋ lɛ.

Yesu suomi ʋ tɩntɩŋŋaa Galilii lɛ

¹² Bʋa deeŋ lɛ dɩ ba kɛŋ Jɔɔŋ Wɩa lɩɩ-fooru-la tɔ dɩa. Yesu sɩ nɩɩ ŋɩɩ, ʋ sii Judiya lɛ a mʋ Galilii tinteeŋ.

¹³ Ʋ bɩra bɩ Nazarɛt lɛ hɔnɔ aŋ sii mʋ hɔŋ taŋ kʋbala baa yɩrɛ Kapɛnam lɛ. Taŋ-la kpagɛ Galilii mʋgʋ-bal-la nɛ a hɛ Zebuluŋ arɩ Nafɩtalɩ tinteeŋ lɛ.

¹⁴ Wɩɩŋ deeŋ ŋaa dɩ wɩalɩŋ Azaaya fa sɩ bʋla kʋ ŋaa wʋtɩtɩɩba nɛ.

¹⁵ Azaaya fa ŋaa Wɩa wʋlaabʋllʋ nɛ. Ʋ fa bʋl wɩaa a pɩ Zebuluŋ arɩ Nafɩtalɩ doho nɩaa nɛ a chaasɛ mʋgʋ-balɩŋ dɩɩrɩŋ, Jɔdaŋ sɛmɛ, a hɛ Galilii tinteeŋ lɛ. Ba ŋaa nɩalɩŋ sɩ bɩ Juu tɩŋŋaa ŋaa nɛ.

¹⁶ Ʋ bʋla pɩba, “Nɩalɩŋ sɩ hɛ birimiŋ tʋɔŋ na pʋlʋŋ-bal nɛ. Tintee-la nɩaa fa sɩ hɛ biriŋ lim tʋɔŋ, pʋlʋmʋŋ lɛɛlɛ chaana hɛ ba lɛ nɛ.”

¹⁷ Yesu sɩ hɛ Kapɛnam lɛ, ʋ suomi ʋ tɩntɩŋŋaa a bʋl Wɩa wɩaa pɩ nɩaa a bʋl, “Má bɩrɩma lɩɩ ma wʋbɔŋŋɔɔ lɛ, bɛɛ wɩaa, Wɩa kuorii-la kpaga nɛ.”

Yesu yɩrɛ chenfil-kpʋʋraa banɛsɛ

¹⁸ Yesu fa sɩ joŋ Galilii mʋgʋ-bal-la niiŋ a vɩvɛŋ, ʋ na naambiiriŋ balɩa. Dɔŋɔ yɩrɩŋ nɛ Saamɔŋ, ʋ yɩrɩŋ dɔŋɔ ma nɛ Pɩɩta. Ʋ naambie ma yɩrɩŋ nɛ Anduru. Ʋ naba dɩ baa kɛsɛ chenfilee nɛ fuo-la lɛ arɩ ba jomba, bɛɛ wɩaa ba fa ŋaa chenfil kpʋʋra nɛ.

¹⁹ Ŋɩɩ nɛ Yesu bʋla pɩba, “Má kʋ to mɩ harɩŋ, mɩ jaŋ ŋaa ma kɩkɛsɛ nɩaa a nagɛ ŋɩɩ ma sɩɩ kɛsɛ chenfilee.”

²⁰ Ba guu leŋ ba jomba ta aŋ to ʋ harɩŋ.

²¹ Ŋɩɩ nɛ ʋ bɩra vɛŋ a mʋ na naambiiriŋ balɩa, ba yɩraa nɛ Jeems arɩ Jɔɔŋ. Ba fa ŋaa Zebidi biiriŋ nɛ. Ʋ naba dɩ ba dɩ ba nyɩmma fa hɛ ba lɩɩŋ daboro tʋɔŋ nɛ. Ba kɛŋ ba jomba ŋaa siri dɩ ba yuo.

²² Ŋɩɩ nɛ Yesu yɩrɛba. Ba guu leŋ ba lɩɩŋ daboro arɩ ba nyɩmma aŋ to ʋ harɩŋ.

Yesu bʋl Wɩa wɩaa pɩ nɩaa aŋ pɛ vaarɛ nyanyal tɩŋŋaa

²³ Ŋɩɩ nɛ Yesu gɔllɛ Galilii tinteeŋ kala a dɩdagɛ nɩaa ba Wɩɩchʋɔlɛ dɩɩsɩŋ lɛ a bʋbʋl Wɩa wʋzɔmɔ-la wɩaa arɩ Wɩa kuorii-la wɩaa a pɩ nɩaa aŋ pɛ vɩvaarɛ nɩaa nyanyal dosunuŋ kala.

²⁴ Yesu wɩaa teeli Siiria tinteeŋ kala. Ŋɩɩ nɛ nɩaa kɛŋ ba nyanyal tɩŋŋaa kɔ ʋ teeŋ arɩ nyanyal dosunuŋ, jɩŋ-bɔŋŋɔɔ fa kɛŋ dɔnsʋŋ, dɔnsʋŋ ma titel kuŋkunsuŋ, dɔnsʋŋ ma fa ŋaa gbɛrɩgɛɛ. Ŋɩɩ nɛ Yesu vaarɛ ba kala.

²⁵ Nɩ-daŋ nɛ fa to Yesu harɩŋ. Dɔnsʋŋ lɩɩ Galilii tinteeŋ arɩ tasɩŋ fii. Dɔnsʋŋ ma lɩɩ Jerusalɛm sɩ hɛ Judiya tinteeŋ lɛ, dɔnsʋŋ ma lɩɩ Jɔdaŋ fuoŋ cholo sɛmɛ dɔŋɔ.