Matiu 26 - WƖA TENIŊ

Ba vʋʋra dɩ ba kpʋ Yesu

¹ Yesu sɩ dagɛ nɩaa dɛrɛ, ʋ bʋla pɩ ʋ harɩ-tooroo, “Ma jɩma

² tapʋlaa balɩa nɛ ka, ka dɩ dɩɩsɩŋ kiele bal gbiele-la yi. Bʋa-la lɛ ba jaŋ kɛŋ mɩ-na Nuhuobiine Bie a jommi hɛ nɩaa nɩsɩŋ lɛ dɩ ba kpaasɛmɛ daagɛsɛ nyuŋ.”

³ Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ kʋ hilimi Kayafas dɩa lɛ. Bʋa-la lɛ ʋ nɛ fa ŋaa Wɩɩsʋllɩ sɩpaalaaraa kʋhɩaŋ.

⁴ Ba hilimi a vʋvʋʋrɛ ba sɩ jaŋ to wombii-la a lʋara kɛŋ Yesu a kpʋʋ.

⁵ Ama ba bʋl dɩ ba sɩ́ ʋ kɛŋ ba gbiele-la lɛ, dɩ ba nɛ ŋaa ŋɩɩ, nɩaa jaŋ wuo sii hɛ yuosuŋ.

Ba kɛŋ tʋlaalɩɩ tɩsɛ Yesu

⁶ Yesu fa sɩ hɛ Bɛtanɩ lɛ ŋɩɩ, ʋ mʋ hɔŋ baal kʋbala dɩa lɛ baa yɩrɛ Saamɔŋ. Saamɔŋ fa ŋaa gbege nɛ aŋ duori.

⁷ Yesu fa sɩɩ dii kɩaa Saamɔŋ dɩa lɛ, haal kʋbala kɔ ʋ teeŋ a kɛŋ tʋlaalɩɩ arɩ loŋ a joŋo bɩsɛ hɛ ʋ nyuŋ lɛ. Tʋlaalɩɩ-la yallɩŋ hɛyɛ.

⁸ Ʋ harɩ-tooro-la sɩ na ŋɩɩ, ba baanɩŋ sii. Ba gʋrɩmɛ wɩaa pɩpɩɛsɛ dɔŋɔ, “Bɛɛ nɛ tɩɩ haala deeŋ kɛŋ tʋlaalɩɩ-la kaa chei ŋ-la?

⁹ Ba fa jaŋ wuo joŋ tʋlaalɩɩ-la a yallɛ a na moribiee yʋgɛ a joŋo pɩ summoo.”

¹⁰ Ama Yesu fa jɩŋ wɩɩ-la ba sɩɩ bʋl nɛ. Ŋɩɩ nɛ ʋ pɩɛsɛba, “Bɛɛ nɛ tɩɩ ma wʋwalɩmɛ haala deeŋ? Wʋzɔŋ nɛ ʋ ŋaa mɩ lɛ.

¹¹ Ma dɩ summoo jaŋ hɛ nɩmɛ bʋa na-kala lɛ, ama mɩ dɩ ma bɩ jaŋ hɛ nɩmɛ deeŋ deeŋ.

¹² Ʋ bɩsɛ tʋlaalɩɩ-la hɛ mɩ lɛ a ŋaa siri dɩ mɩ nɛ sʋba, dɩ ba jommi hugi.

¹³ Wʋtɩtɩɩ nɛ mɩ bʋlaa pɩma, dʋnɩa sɛmɛ-na kala ba sɩ jaŋ wuo mʋ a bʋl Wɩa wʋzɔmɔ-la, ba jaŋ liisi haala deeŋ ma wɩaa a bʋl.”

Judas sɛyɛ dɩ ʋ joŋ Yesu yallɛ

¹⁴ Ŋɩɩ nɛ Yesu harɩ-tooro-la fii arɩ balɩa dɔŋɔ mʋ Wɩɩsʋllɩ sɩpaalaaraa kʋhɩasɩŋ teeŋ, ʋ yɩrɩŋ nɛ fa Judas Ɩsɩkarɔt. Ʋ pɩɛsɛba,

¹⁵ “Dɩ mɩ nɛ kɛŋ Yesu a pɩma, bɛɛ nɛ ma jaŋ pɩmɛ?” Ŋɩɩ nɛ ba dɩɩsɛ warɩpʋla mara arɩ fii a joŋo pʋ.

¹⁶ A chɩŋ bʋa-la lɛ Judas suomo chɩchɛ wombiiŋ ʋ sɩ jaŋ to a kɛŋ Yesu yallɛ a pɩba.

Yesu arɩ ʋ harɩ-tooroo dii dɩɩsɩŋ kiele bal gbiele-la kʋdiilee

¹⁷ Gbiele-la lɛ ba sɩ yie dii boroboro-la sɩ bɩ sɩbʋrʋŋ kɛnɛ, ba chɛ-bumbuŋ, Yesu harɩ-tooroo kɔ ʋ teeŋ a pɩɛsʋ, “Nɩɩ nɛ ŋ cho dɩ la mʋ ŋaa dɩɩsɩŋ kiele bal gbiele-la kʋdiilee dɩ ŋ kʋ dii?”

¹⁸ Ŋɩɩ nɛ Yesu bʋla pɩba, “Má mʋ jʋʋ taŋ-la tʋɔŋ, a mʋ baal kʋbala teeŋ a bʋla pʋ, ‘La kʋhɩaŋ sɩ, bʋa-la lɛ ʋ sɩɩ chɛ dɩ ʋ dɩ ʋ harɩ-tooroo dii dɩɩsɩŋ kiele bal gbiele-la kʋdiilee yie nɛ, laa chɛ dɩ la dii kɩalɩŋ ŋ dɩa lɛ nɛ.’ ”

¹⁹ Ŋɩɩ nɛ Yesu harɩ-tooro-la ŋaa ŋɩɩ arɩ Yesu sɩ dagɛba a ŋaa dɩɩsɩŋ kiele bal gbiele-la kʋdiilee ba dii.

²⁰ Wɩa sɩ jʋa, Yesu arɩ ʋ harɩ-tooroo fii arɩ balɩa-la kʋ jʋʋ hɔŋ a didii kʋdiile-la.

²¹ Ba sɩɩ dii kɩalɩŋ ŋɩɩ, Yesu bʋla pɩba, “Wʋtɩtɩɩ nɛ mɩ bʋlaa pɩma, ma dɔŋɔ jaŋ jommi yallɛ.”

²² Ŋɩɩ nɛ ʋ harɩ-tooro-la tʋɔŋ chei. Ba suomo pɩpɩɛsʋ, kʋŋ kʋŋ. Dɔŋɔ yie pɩɛsɛ, “Mɩ Tɩɩna, mɩ nɛɛ?”

²³ Ŋɩɩ nɛ Yesu bʋla pɩba, “Mɩ dɩ nɩɩ-la sɩ chala kɛŋ boroboro tuu yuu gbaŋa tʋɔŋ nɛ jaŋ jommi yallɛ.

²⁴ Mɩ-na Nuhuobiine Bie jaŋ sʋʋ arɩ ba sɩ ŋmʋnsɛ ŋɩɩ a tɩgɛ mɩ lɛ. Ama nɩɩ-la sɩ jaŋ joŋ mɩ-na Nuhuobiine Bie yallɛ, aa, ʋ jaŋ na hɛɛŋ yʋgɛ. Ba fa sɩ bɩ ʋ lʋla nɛ kpɩa.”

²⁵ Ŋɩɩ nɛ Judas zɛmbɛ tɩɩna-la pɩɛsɛ Yesu, “Mɩ nɛ ŋ dɩdagɛɛ?” Ŋɩɩ nɛ Yesu bʋla pʋ, “Oo, ŋ nɛ.”

Kʋdiile-la Yesu sɩ sɩ dɩ ba dii a liliisi ʋ wɩaa

²⁶ Ba sɩ hɔnɔ didii kɩaa, ŋɩɩ nɛ Yesu sii a joŋ boroboro a lɔllɛ Wɩa aŋ kaa chɔgɛ chɔgɛ a joŋo pɩ ʋ harɩ-tooroo a bʋla pɩba, “Má laa dii, mɩ yaraa nammɩa nɛ ŋɩɩ.”

²⁷ Ŋɩɩ nɛ ʋ bɩra joŋ nyʋnyʋala ma arɩ sɩnɩŋ, a lɔllɛ Wɩa aŋ joŋo pɩba, “Má kala nyʋa nyʋnyʋala-la tʋɔŋ,

²⁸ bɛɛ wɩaa mɩ chalɩŋ nɛ ŋɩɩ. Chalɩŋ deeŋ nɛ Wɩa joŋo hɛ niiŋ ma dɩ ʋ pɛgɛ. Mɩ chalɩŋ jaŋ jaasɛ nɩ-daŋ wɩaa, dɩ Wɩa joŋ ba wʋbɔŋŋɔɔ chɛba.

²⁹ Mɩ bʋlaa pɩma, mɩ bɩra bɩ jaŋ kɔ dɩ mɩ nyʋa sɩnɩŋ deeŋ, see tapʋlɩɩ-la mɩ dɩ ma sɩ jaŋ nyʋa sɩ-falɩŋ mɩ Nyɩmma Wɩa kuorii-la tʋɔŋ.”

³⁰ Ŋɩɩ nɛ ba yɩɩ Wɩɩchʋɔlɛ yɩɩlɩŋ aŋ sii lɩɩ mʋ peel kʋbala ba sɩɩ yɩrɛ Olif leriŋ.

³¹ Ŋɩɩ nɛ Yesu bʋla pɩba, “Tɩtaŋɩŋ deeŋ tɩtɩa ma kala jaŋ fá viiri a tɩŋ mɩ wɩaa. Ba ŋmʋnsɛ Wɩa teniŋ tʋɔŋ dɩ ba jaŋ kpʋ pie-daara, aŋ ka piesee fá pɩsɛ.

³² Ama Wɩa jaŋ chɩsɛmɛ sʋʋŋ lɛ. Ʋ nɛ chɩsɛmɛ, mɩ jaŋ laa ma sɩpaaŋ a mʋ Galilii.”

Yesu bʋla pɩ Pɩɩta arɩ ʋ jaŋ bʋl ʋ bɩ ʋ jɩŋ

³³ Ŋɩɩ nɛ Pɩɩta bʋla pɩ Yesu, “Dɩ ba kala fá ma aŋ leŋiŋ, mɩ-na bɩ jaŋ mɩɩrɛ ŋ harɩŋ da.”

³⁴ Yesu bʋla pʋ, “Wʋtɩtɩɩ nɛ, jɩnɩŋ tɩtaŋɩŋ deeŋ ŋ-na Pɩɩta, ŋ jaŋ bʋl naansɩɩŋ butori arɩ ŋ bɩ mɩ jɩŋ, ka dɩ ji-bele-na yel.”

³⁵ Ŋɩɩ nɛ Pɩɩta bʋla pʋ, “Dɩ mɩ dɩŋ nɛ jaŋ paala sʋʋ hɛ dɔŋɔ ma, mɩ bɩ jaŋ bʋl arɩ mɩ bɩŋ jɩŋ.” Kʋkaana-la ma kala bʋl ŋɩɩ.

Yesu chʋɔlɛ Wɩa Gɛtɩsɛmanɩ lɛ

³⁶ Ŋɩɩ nɛ Yesu arɩ ʋ harɩ-tooroo mʋ jʋʋ lee kʋbala baa yɩrɛ Gɛtɩsɛmanɩ. Yesu bʋla pɩ ʋ harɩ-tooroo dɩ ba hɔŋ daha, ka ʋ mʋ chʋɔlɛ Wɩa aŋ kɔ.

³⁷ Ʋ kɛŋ Pɩɩta arɩ Zebidi biiriŋ balɩa a kaa mʋ nɩmɛ. Ʋ tʋɔŋ faasa chei woruŋ.

³⁸ Ʋ bʋla pɩ ʋ harɩ-tooroo, “Mɩ tʋɔŋ kala nɛ cheye a magɛ dɩ mɩ sʋʋ. Má hɔŋ dɩ la kala pɔ na.”

³⁹ Ba hɔŋ, ka ʋ sʋrɩsa mʋ sɩpaaŋ mʋa a tuu pɩna chigi tinteeŋ a sʋl Wɩa a bʋl, “Mɩ Nyɩmma, dɩ wombiiŋ nɛ hɛ nɩmɛ, lɩɩsɛ hɛɛ-la sɩɩ kɔ mɩ lɛ. Ama mɩ-na tʋɔtɔrʋŋ lɛ dee, ŋ-na tʋɔtɔrʋŋ lɛ nɛ.”

⁴⁰ Ʋ chʋɔla dɛrɛ aŋ sii kɔ ʋ harɩ-tooroo teeŋ dɩ ba pɩŋ doŋ. Ŋɩɩ nɛ ʋ pɩɛsɛ Pɩɩta, “Ŋ pɩna nɛɛ? Ŋ bɩ doŋ mʋapɩlɩɩ ma wuo bɛrɛ aa yi hawa kʋbalaa?

⁴¹ Má chʋɔlɛ Wɩa aŋ pʋpɔ dɩ Sɩtaanɩ nɛ kʋ magɩsɛma dɩ ʋ sɩ́ ma wuo. Ma tʋɔŋ lɛ ma cho dɩ ma ŋaa wʋzɔŋŋɔɔ, aŋ ka ma bɩ doluŋ kɛnɛ.”

⁴² Ʋ bɩra mʋ a chʋɔlɛ Wɩa lɩamɩŋ lɛ a bɩra bʋl, “Mɩ Nyɩmma, dɩ wombiiŋ nɛ tuo dɩ ŋ laa hɛɛŋ deeŋ mɩ nɩsɩŋ lɛ, leŋ dɩ wɩɩ-la ŋ sɩɩ chɛ ŋaa.”

⁴³ Ʋ mɩɩra kɔ dɩ ba bɩra pɩŋ doŋ, bɛɛ wɩaa doŋ kɛmba nɛ woruŋ.

⁴⁴ Ŋɩɩ nɛ Yesu mʋ chʋɔlɛ Wɩa torimuŋ lɛ a bɩra bʋl ŋɩɩ tɩtɩa.

⁴⁵ Ŋɩɩ nɛ ʋ mɩɩra kɔ ʋ harɩ-tooroo teeŋ a pɩɛsɛba, “Ma ha pɩnaa wiesi nɛɛ? Má bee na, bʋa-la yie nɛ. Ba jaŋ kɛŋ mɩ-na Nuhuobiine Bie a hɛ wʋbɔŋ ŋaaraa nɩsɩŋ lɛ.

⁴⁶ Má sii la mʋ, nɩɩ-la sɩ jaŋ jommi yallɛ ka kɔ nɛ.”

Ba kɛŋ Yesu

⁴⁷ Yesu ha bɩ wɩaa bʋla dɛrɛ, dɩ Judas nɩɩ kɔ ŋɩɩ. Ʋ fa ŋaa Yesu harɩ-tooro-la fii arɩ balɩa dɔŋɔ nɛ. Nɩaa yʋgɛ a tuto ʋ harɩŋ. Dɔnsʋŋ kori tokobiee arɩ toŋguloo. Wɩɩsʋllɩ sɩpaalaaraa kʋhɩasɩŋ arɩ ba taŋ kʋhɩasɩŋ nɛ tɩmba, ba kɔ.

⁴⁸ Zɛmbɛ tɩɩna-la fa pɩ nɩalɩŋ magɩl nɛ, “Nɩɩ-la mɩ sɩ mʋ guori, ʋ nɛ ŋɩɩ. Má kɛnʋ.”

⁴⁹ Ŋɩɩ nɛ Judas vɛŋ tegi tegi a mʋ Yesu teeŋ a bʋla pʋ, “Mɩ kʋhɩaŋ, mɩɩ chʋɔlʋŋ,” aŋ guoru.

⁵⁰ Yesu bʋla pʋ, “Mɩ nandɔŋɔ, ŋaa wɩɩ-la ŋ sɩ kɔ dɩ ŋ ŋaa?” Ŋɩɩ nɛ ba kala guu kɔ a gurigu.

⁵¹ Yesu harɩ-tooro-la dɔŋɔ lɩɩsɛ ʋ tokobii a ta nʋʋ dɩgɩlɩŋ keri. Nɩɩ-la fa ŋaa Wɩɩsʋllɩ sɩpaalaaraa kʋhɩaŋ yomo nɛ.

⁵² Ŋɩɩ nɛ Yesu bʋla pʋ, “Joŋ ŋ tokobiiŋ a hɛ ʋ dɩ-hɛɛlɩŋ. Nɩɩ-la sɩ lɩɩsɛ tokobiiŋ, tokobiiŋ nɛ ba jaŋ kaa kpʋʋ.

⁵³ Ŋ bɩ jɩŋ arɩ mɩ fa jaŋ wuo yɩrɛ mɩ Nyɩmma dɩ ʋ pɛ mɩ lɛɛ? Dɩ mɩ nɛ fa yɩrʋ, ʋ fa jaŋ ta ʋ tɩndaaraa bʋɩ bʋɩba dɩ ba kʋ pɛ mɩ lɛ.

⁵⁴ Ama dɩ ʋ nɛ fa saa ŋaa ŋɩɩ, ɛɛ nɛ wɩalɩŋ ba fa sɩ ŋmʋnsa Wɩa teniŋ tʋɔŋ jaŋ kʋ ŋaa wʋtɩtɩɩ?”

⁵⁵ Ŋɩɩ nɛ Yesu pɩɛsɛ nɩ-daŋ-la, “Mɩ ŋaa wʋcheeru nɛ ma sii kɛŋ tokobiee arɩ toŋguloo a kʋkɔ dɩ ma kɛmmɛɛ? Tapʋlɩɩ kala nɛ mɩ yie hɔŋ Wɩa dɩa lɛ a dɩdagɛ nɩaa, aŋ ka ma bɩ walɩma dɩ ma kɛmmɛ nɩmɛ.

⁵⁶ Ama wɩɩŋ deeŋ kala ŋaa dɩ wɩalɩŋ Wɩa wʋlaabʋllaa sɩ ŋmʋnsa kʋ ŋaa wʋtɩtɩɩ nɛ.” Ŋɩɩ nɛ Yesu harɩ-tooro-la kala vɩaʋ aŋ fá.

Yesu chɩŋ nɩalɩŋ sɩ hilime vʋvʋʋrɛ wɩaa sɩpaaŋ

⁵⁷ Ŋɩɩ nɛ nɩalɩŋ sɩ kɛŋ Yesu, kɛnʋ kaa mʋ Kayafas dɩa. Ʋ nɛ fa ŋaa Wɩɩsʋllɩ sɩpaalaaraa kʋhɩaŋ. Dɩ Wɩa teniŋ kerichiba arɩ ba taŋ kʋhɩasɩŋ kala hilimi nɩmɛ.

⁵⁸ Pɩɩta daa tuto ba harɩŋ a to jʋʋ Wɩɩsʋllɩ sɩpaalaaraa kʋhɩaŋ kaala. Ʋ jʋʋ kaala-la a mʋ hɔŋ nɩalɩŋ sɩɩ pɔ kaala-la teeŋ dɩ ʋ na wɩɩ-la sɩ jaŋ ŋaa Yesu lɛ.

⁵⁹ Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ nɩalɩŋ kala sɩ yie hilime vʋvʋʋrɛ wɩaa chɩchɛ dɩ ba nyɩɛ wɩaa a tɩgɛ Yesu lɛ dɩ ba kpʋʋ.

⁶⁰ Nɩaa paala yʋgɛ a kʋ nyɩɛ wɩaa pʋ, ama ba fa bɩ wuo na wɩɩkala ʋ sɩ ŋaa chei. Ŋɩɩ nɛ nɩaa balɩa kʋ lɩɩ

⁶¹ a bʋl, “Baala deeŋ sɩ ʋ jaŋ wuo ŋmoo Wɩa dɩɩ-bal-la lo aŋ bɩra saaʋ tapʋlaa batori pɛgɛ.”

⁶² Ŋɩɩ nɛ Wɩɩsʋllɩ sɩpaalaaraa kʋhɩaŋ sii chɩŋ a pɩɛsɛ Yesu, “Ŋ bɩ nɩa nɩaa deemba sɩ bʋl wɩalɩŋ a tɩgɛ ŋ lɛɛ? Ŋ-na bɩ wɩɩ kɛnɛ ŋ sɩ jaŋ bʋl?”

⁶³ Yesu tɔrɛ ʋ niiŋ. Ŋɩɩ nɛ Wɩɩsʋllɩ sɩpaalaaraa kʋhɩaŋ bʋla pʋ, “Wɩa-la sɩ weye yɩrɩŋ lɛ, bʋla pɩla, ŋ nɛ ŋaa Kirisito, nɩɩ-la Wɩa sɩ lɩɩsaa? Ŋ nɛ Wɩa Biee?”

⁶⁴ Ŋɩɩ nɛ Yesu bʋla pʋ, “Mɩ-na nɛ, ama mɩ bʋlaa pɩma kala, a lɩɩ bʋa deeŋ lɛ a kaa mʋ, ma jaŋ na mɩ-na Nuhuobiine Bie dɩ mɩ hɔŋ Wɩa doluŋ kala Tɩɩna nadiiŋ, nɩduoŋ dɩhɔnʋŋ a to duoŋ-bɩlɩmbaanaa tʋɔŋ kʋʋ tuu.”

⁶⁵ Yesu sɩ bʋl ŋɩɩ, Wɩɩsʋllɩ sɩpaalaaraa kʋhɩaŋ kɛŋ ʋ gɛnnɩŋ kɩɛsɛ aŋ bʋl, “Ŋ chei Wɩa yɩrɩŋ. Ʋ bɩ maga dɩ la bɩra chɛ dansɩaba. Ma kala bɩ nɩa ʋ sɩ chei Wɩa yɩrɩŋ ŋɩɩ?

⁶⁶ Bɛɛ nɛ ma bɩɩnɛ?” Ba bʋl, “Ʋ kɛŋ cheeriŋ nɛ. Ʋ maga dɩ ba kpʋʋ nɛ.”

⁶⁷ Ŋɩɩ nɛ ba tʋ nantʋɔrʋŋ hɛ ʋ sɩaa lɛ a ŋmobu. Nɩalɩŋ dɔnsʋŋ sɩɩ ŋmobu bʋl,

⁶⁸ “Ŋ-na Kirisito, ka ŋ ŋaa Wɩa wʋlaabʋllʋ nɛ, dagɛla nɩɩ-la sɩ ŋmobuŋ.”

Pɩɩta sɩ ʋ bɩ Yesu jɩŋ

⁶⁹ Pɩɩta sɩ hɔŋ kaala-la lɛ, ŋɩɩ nɛ tolo kʋbala sɩɩ tɩŋ kaala lɛ kʋ lɩɩ a bʋl, “Ŋ ma faa to Yesu sɩ lɩɩ Galilii harɩŋ nɛ.”

⁷⁰ Ama Pɩɩta bɩ sɛyɛ aŋ bʋl ba kala sɩpaaŋ, “Mɩ bɩ wɩɩ-la ŋ sɩ paala bʋbʋl jɩŋ.”

⁷¹ Ŋɩɩ nɛ ʋ sii lɩɩ chɩŋ zawʋra tʋɔŋ. Ʋ sɩ chɩŋ nɩmɛ, ŋɩɩ nɛ tɩntɩnnɩ-tolo dɔŋɔ ma bɩra naʋ a bʋla pɩ nɩalɩŋ sɩ chɩna kpagʋ, “Baala deeŋ ma ŋaa Yesu sɩ lɩɩ Nazarɛt harɩ-tooro-la dɔŋɔ nɛ.”

⁷² Pɩɩta bɩra nyɩɛ wɩaa aŋ ŋmɩɛsa bʋl dɩ ʋ dee.

⁷³ Mʋasʋa nɩalɩŋ sɩ chɩŋ nɩmɛ ma bʋla pʋ, “Wʋtɩtɩɩ nɛ, ŋ ma ŋaa ba dɔŋɔ nɛ, ŋ yikoro nɛ dagɛ ŋɩɩ.”

⁷⁴ Ŋɩɩ nɛ Pɩɩta ŋmɩɛsɛ, “Mɩ bɩ baala deeŋ jɩŋ.” Ʋ sɩ bʋl ŋɩɩ dɛrɛ, dɩ ji-bele yele.

⁷⁵ Pɩɩta liisi wɩɩ-la Yesu sɩ bʋla pʋ arɩ ʋ jaŋ nyɩɛ wɩaa a pʋ naansɩɩŋ butori, ŋɩɩ nɛ ʋ lɩɩ a faasa yel.