Matiu 22 - WƖA TENIŊ

Yesu magɛ namaga a tɩgɛ hajaarɩ gbiele kʋdiilee lɛ

¹ Ŋɩɩ nɛ Yesu bɩra magɛ namaga dɔŋɔ a dɩdagɛ nɩaa.

² Ʋ sɩ, “Wɩa kuorii-la nagɛ kuoru kʋbala bie sɩ jaa haala nɛ. Ŋɩɩ nɛ ʋ ŋaa ba gbigbieli hajaarɩ gbiele a ŋaa ba yɩrɛ nɩaa dɩ ba kɔ gbiele-la.

³ Ba sɩ ŋaa kʋdiile-la dɛrɛ, ʋ tɩŋ ʋ tɩntɩnnaa dɩ ba mʋ yɩrɛ nɩalɩŋ ʋ sɩ yɩra arɩ ba ŋaa siri nɛ dɩ ba gbieli gbiele-la. Ba sɩ mʋ yɩrɛba, ba vɩa.

⁴ Ŋɩɩ nɛ ʋ bɩra tɩŋ ʋ tɩntɩnnaa dɔnsʋŋ dɩ ba mʋ bʋla pɩ nɩalɩŋ ʋ sɩ yɩra arɩ ba kpʋ nɛ-belliŋ arɩ nɛ-nɩɩnɩŋ kala nɛ a ŋaa kʋdiile-la dɛrɛ, dɩ ba kɔ hajaarɩ gbiele-la.

⁵ Ŋɩɩ nɛ nɩalɩŋ ʋ sɩ yɩra bɩra vɩa dɩ ba mʋ aŋ tɩtɩŋ ba tɩntɩŋŋaa. Dɔŋɔ sii mʋ ʋ baga, dɔŋɔ ma sii mʋ ʋ kɩaa dɩ-yallɩŋ.

⁶ Ka dɔnsʋŋ ma kɛsɛ kuoro dɩa tɩntɩnna-la a ŋmooba aŋ kpʋba.

⁷ Ŋɩɩ nɛ kuoru-la na baanɩŋ a ta ʋ laalɩyuoroo, ba mʋ kpʋ nɩalɩŋ sɩ kpʋ ʋ dɩa tɩntɩnna-la aŋ nyɩgɛ ba tabalɩŋ kala.

⁸ Ŋɩɩ nɛ ʋ yɩrɛ ʋ tɩntɩnnaa dɔnsʋŋ a bɩra bʋla pɩba, ‘Mɩ gbiele kʋdiile-la ŋaa siri nɛ, ama nɩalɩŋ mɩ sɩ yɩra bɩ maga dɩ ba kɔ gbiele-la.

⁹ Má saa lɩɩ mʋ womporunuŋ a yɩrɛ nɩalɩŋ kala ma sɩ na nɩmɛ a bʋla pɩba dɩ ba kɔ a dii kʋdiile-la.’

¹⁰ Ŋɩɩ nɛ tɩntɩnna-la lɩɩ womporunu-la a yɩrɛ nɩalɩŋ kala ba sɩ na lee-la, nɩzɔŋŋɔɔ arɩ nɩbɔŋŋɔɔ kala. Ŋɩɩ nɛ ba kala kʋ jʋʋ su dɩa-la lɛ ba fa sɩɩ gbieli gbiele-la.

¹¹ Ŋɩɩ nɛ kuoru-la jʋʋ dɩ ʋ na nɩalɩŋ sɩ kɔ a na baal kʋbala dɩ ʋ bɩ hajaarɩ gbiele gɛrɩŋ laala.

¹² Ʋ pɩɛsʋ, ‘Mɩ nandɔŋ, ɛɛ nɛ ŋ ŋaa kʋ jʋʋ daha aŋ bɩ hajaarɩ gbiele gɛrɩŋ laala?’ Baal-la bɩ wɩɩ kɛnɛ dɩ ʋ bʋl.

¹³ Ŋɩɩ nɛ kuoru-la bʋla pɩ ʋ tɩntɩnnaa, ‘Má kɛŋ baala deeŋ a vɔɔ ʋ nɩsaa arɩ ʋ naasɩŋ a joŋu yuo ta jeeŋ harɩŋ birimiŋ tʋɔŋ dɩ ʋ pɩna yiyel aŋ chɩchaŋ ʋ nyɩlaa.’ ”

¹⁴ Ŋɩɩ nɛ Yesu bʋl, “Ba yie yɩrɛ nɩaa yʋgɛ nɛ, ama ba tʋɔŋ ba yie tʋɔsɛ nɩaa baŋmɛnɛ nɛ.”

Ba bʋl lampoo timiŋ wɩaa

¹⁵ Ŋɩɩ nɛ Farisii tɩŋŋaa sii lɩɩ a vʋʋrɛ ŋɩɩ ba sɩ jaŋ magɩsɛ Yesu a bɛrɛ kɛnʋ arɩ wʋpɩɛsaa.

¹⁶ Ŋɩɩ nɛ ba tɩŋ ba harɩ-tooroo dɔnsʋŋ arɩ Hɛrɔd ma harɩ-tooroo dɔnsʋŋ dɩ ba mʋ Yesu teeŋ. Ŋɩɩ nɛ ba kɔ ʋ teeŋ a pɩɛsʋ, “La kʋhɩaŋ, la jɩma dɩ ŋ kɛŋ wʋtɩtɩɩ nɛ a dɩdagɛ Wɩa tonuŋ wombii-tɩtɩɩ-la. Ŋ sɩpaaŋ tuo nʋʋ lɛ. Ŋ bɩ nɩbal sɩɩ ka fá.

¹⁷ Saa bʋla pɩla, ʋ ŋaa wombii nɛ a magɛ la tiŋ lampoo a pɩ Rom tinteeŋ kuoru-balɩŋ ba sɩɩ yɩrɛ Siiza? Ɛɛ nɛ ŋ ma bɩɩnɛ?”

¹⁸ Yesu fa jɩŋ ba tʋɔbɩɩŋ bɔmɔ-la nɛ a bʋla pɩba, “Ma kanfugi tɩmma! Bɛɛ nɛ tɩɩ maa magɩsɛmɛ?

¹⁹ Má kɛŋ moribii-la ma sɩ kaa titiŋ lampoo kɔ dɩ mɩ bee na.”

²⁰ Ba kɛŋ dɔŋɔ kaa kɔ. Ŋɩɩ nɛ ʋ pɩɛsɛba, “Kʋbɛɛ nyuŋ nɛ hɛ nɩmɛ? Kʋbɛɛ yɩrɩŋ ma nɛ ba tuuro hɛ moribii-la lɛ?”

²¹ Ŋɩɩ nɛ ba bʋl dɩ Siiza yɩrɩŋ nɛ. Ʋ bʋla pɩba, “Tɔɔ, má joŋ Rom tinteeŋ kuori-bal-la kɩaa pʋ aŋ joŋ Wɩa ma kɩaa pʋ.”

²² Yesu sɩ bʋl ŋɩɩ, ʋ ŋaaba wʋkpuŋkpere ba sii viiri.

Ba pɩɛsɛ Yesu a tɩgɛ nɩalɩŋ sɩ sʋba lɛ

²³ Chɛɛ-la tɩtɩa nɩalɩŋ dɔnsʋŋ ba sɩɩ yɩrɛ Saduusi tɩŋŋaa, ba kɔ ʋ teeŋ. Saduusi tɩŋŋaa yie bʋl dɩ nʋʋ nɛ sʋba, ʋ bɩra bɩ jaŋ sii. Ba kɔ a pɩɛsʋ wɩaa,

²⁴ “La kʋhɩaŋ, Mosis fa sɩ dɩ baala nɛ jaa haala, dɩ haal-la arɩ baal-la nɛ bɩ bii lʋla, aŋ ka dɩ baal-la sʋʋ, ʋ maga dɩ ʋ ŋaana joŋ yo-haal-la jaa nɛ. Dɩ ʋ lʋl biiriŋ pɩ ʋ maala-la sɩ sʋba, biiri-la jaŋ chɩŋ ʋ nyuŋ lɛ.

²⁵ Naambiiriŋ balɩpɛ nɛ fa hɛ la tʋɔŋ, ba kala ŋaa baalaa nɛ. Ba kʋhɩaŋ jaa haala. Ʋ dɩ haal-la bɩ bii lʋla, aŋ ka ʋ sʋʋ. Ʋ sɩ sʋba, ʋ ŋaana dɔŋɔ joŋ haal-la jaa.

²⁶ Lɩamɩŋ ma sʋʋ. Torimuŋ tɩɩna ma joŋ haal-la jaa. Ʋ ma ŋɩɩ tɩtɩa nɛ. Naambiiri-la balɩpɛ kala nɛ jaa haal-la. Ʋ bɩ lʋla.

²⁷ Ŋɩɩ harɩŋ lɛ nɛ haal-la ma tɩtɩa sʋʋ.

²⁸ Tapʋlɩɩ-la nɩaa sɩ jaŋ sii sʋʋŋ lɛ, baalaa deemba balɩpɛ tʋɔŋ, kʋbɛɛ nɛ jaŋ tɩɩ haal-la? Ba kala balɩpɛ nɛ jaaʋ.”

²⁹ Ŋɩɩ nɛ Yesu bʋla pɩba, “Ma bɩ Wɩa teniŋ jɩŋ. Ma bɩ Wɩa doluŋ jɩŋ. Ŋɩɩ nɛ tɩɩ ma yeŋŋi.

³⁰ Tapʋlɩɩ-la nɩaa sɩ jaŋ sii sʋʋŋ lɛ, baalaa bɩra bɩ jaŋ jaa haalaa, haalaa ma bɩra bɩ jaŋ jaa balaba. Ba kala jaŋ nagɛ Wɩa tɩndaaraa sɩ hɛ Wɩa-jaŋ lɛ.”

³¹ Ŋɩɩ nɛ Yesu bʋla pɩba, “Na ma pɩɛsɛmɛ nɩalɩŋ sɩ jaŋ sii sʋʋŋ lɛ wɩaa nɛ. Ma bɩ wɩalɩŋ Wɩa fa sɩ bʋla pɩ nɩaa ʋ teniŋ lɛ karɩmaa? Abɩraham arɩ Aɩzɩk arɩ Jekɔb sʋʋŋ harɩŋ lɛ, Wɩa fa sɩ,

³² ‘Mɩ nɛ ŋaa Abɩraham, Aɩzɩk arɩ Jekɔb Wɩa.’ Wɩa ŋaa nɩweyee Wɩa nɛ, ʋ bɩ nɩsʋʋnʋŋ Wɩa ŋaa.”

³³ Nɩ-daŋ-la sɩ nɩɩ ŋɩɩ ʋ sɩɩ dagɛ wɩaa, ʋ ŋaaba wʋkpuŋkpere.

Wɩalɩŋ sɩ maga dɩ la ŋɩŋaa, ba tʋɔŋ wʋbalɩŋ

³⁴ Farisii tɩŋŋaa sɩ nɩa arɩ Yesu bʋl wɩaa lo Saduusi tɩŋŋaa ba ŋaa fʋɩɩ, ba kala kʋ pɛ dɔŋɔ lɛ.

³⁵ Ŋɩɩ nɛ Wɩa teniŋ kerichiba dɔŋɔ wʋwalɩmɛ dɩ ʋ magɩsɛ Yesu a pɩpɩɛsʋ wɩaa.

³⁶ Ʋ pɩɛsɛ Yesu a bʋl, “Kʋhɩaŋ, wɩalɩŋ Wɩa sɩ dagɛ nɩaa baa to, wʋbɛɛ nɛ ŋaa ba tʋɔŋ sɩɩfɩaŋ wɩɩŋ?”

³⁷ Ŋɩɩ nɛ Yesu bʋl, “Kɛŋ ŋ tʋɔŋ arɩ ŋ wɩɩ-wɩɩkala a cho ŋ Tɩɩna Wɩa.

³⁸ Wɩalɩŋ Wɩa sɩ dagɛ nɩaa baa to, ba tʋɔŋ wʋbalɩŋ arɩ ba tʋɔŋ bumbuŋ nɛ ŋɩɩ arɩ ba tʋɔŋ sɩɩfɩaŋ wɩɩŋ nɛ ŋɩɩ.

³⁹ Wʋlɩamɩŋ ma nɛ ŋ-la: ‘Cho ŋ dɔŋɔ tɩɩna arɩ ŋ sɩ cho ŋ tɩtɩa ŋɩɩ.’

⁴⁰ Wɩalɩŋ Mosis fa sɩ ŋmʋnsa bil dɩ nɩaa tuto arɩ wɩalɩŋ kala Wɩa wʋlaabʋllaa sɩɩ bʋl, ba kala lɩɩ wɩaa deemba balɩamɩŋ tʋɔŋ nɛ.”

Ba pɩɛsɛ Kirisito wɩaa

⁴¹ Farisii tɩŋŋaa ha sɩ hilimi ŋɩɩ, Yesu ma pɩɛsɛba,

⁴² “Bɛɛ nɛ maa bɩɩnɛ a mʋʋ tɩgɛ Kirisito, nɩɩ-la Wɩa sɩ lɩɩsa wɩaa? Kʋbɛɛ doho nʋʋ nɛ ʋ ŋaa?” Ŋɩɩ nɛ ba bʋl dɩ ʋ ŋaa Devit doho nʋʋ nɛ.

⁴³ Ŋɩɩ nɛ Yesu bɩra pɩɛsɛba, “Bɛɛ nɛ saa tɩɩ Wɩa Dɩŋ-zɔmʋŋ fa dagɛ Devit dɩ ʋ kɛnʋ yɩrɛ ʋ Tɩɩna?

⁴⁴ Ŋ-la nɛ ʋ bʋl: ‘La Tɩɩna bʋla pɩ mɩ Tɩɩna dɩ ʋ hɔŋ ʋ nadiiŋ, nɩduoŋ dɩhɔnʋŋ, see dɩ ʋ yuo dii ʋ dʋndɔŋŋɔɔ kala dɛrɛ.’

⁴⁵ Devit tɩtɩa sɩ yɩrɛ nɩa deeŋ ʋ Tɩɩna, ɛɛ nɛ saa ʋ jaŋ wuo ŋaa ʋ nihii dʋndʋŋ?”

⁴⁶ Yesu sɩ bʋl ŋɩɩ, nʋʋkala bɩra bɩ wɩɩ wuo bʋl. A chɩŋ tapʋlɩɩ-la kala a kaa mʋ, nʋʋkala bɩra bɩ nyuduoŋ kɛnɛ dɩ ʋ pɩɛsʋ wɩɩkala.