Matiu 20 - WƖA TENIŊ

Yesu magɛ namaga a tɩgɛ baga tɩntɩnnaa lɛ

¹ Ŋɩɩ nɛ Yesu bɩra magɛ namaga a pɩba a bʋl dɩ Wɩa kuorii-la nagɛ baal kʋbala sɩ kɛŋ ʋ baga nɛ. Chʋchʋɔ-fɩɛla ʋ lɩɩ chɩchɛ nɩaa dɩ ba mʋ pɛrɛ ʋ baga-la lɛ ka ʋ timba.

² Ba sɛɩ arɩ ba jaŋ mʋ pɛrɛ, ka ʋ timba warɩpʋla kʋbala. Ŋɩɩ nɛ ʋ leŋ ba mʋ ʋ baga-la a pɩpɛrɛ.

³ Ʋ kʋ magɛ kerifi nibi, ʋ bɩra lɩɩ a na nɩaa dɔnsʋŋ dɩ ba chɩŋ yɔbɔ tʋɔŋ pɛɩ. Ba bɩ tɩntɩmɩɩ kala ka tɩŋ.

⁴ Ŋɩɩ nɛ ʋ bʋla pɩba dɩ ba ma mʋ a pɛrɛ ʋ baga-la lɛ ka dɩ ʋ timba, dɩ ʋ jaŋ pɩba ŋɩɩ kala sɩ maga. Ŋɩɩ nɛ ba ma mʋ.

⁵ Kerifi fii arɩ balɩa yi, ʋ bɩra lɩɩ a na nɩaa dɔnsʋŋ a ŋaa ba ma mʋ ʋ baga-la. Ʋ bɩra lɩɩ kerifi batori bʋa lɛ a bɩra na nɩaa dɔnsʋŋ a ŋaa ba ma mʋ ʋ baga-la.

⁶ Ʋ bɩra kʋ kpagɛ kerifi banɔŋ, ʋ bɩra lɩɩ yɔbɔ tʋɔŋ a na nɩaa dɔnsʋŋ ma dɩ ba ha chɩŋ nɩmɛ. Ŋɩɩ nɛ ʋ pɩɛsɛba, “Bɛɛ nɛ tɩɩ ma chɩŋ daha pɛɩ chʋchʋɔŋ arɩ wɩɩhɛyɛ kala, ma bɩ tɩntɩmɩɩ kala ka tɩŋ?”

⁷ Ŋɩɩ nɛ ba bʋla pʋ arɩ ba bɩ tɩntɩŋŋaa na dɩ ba tɩŋ. Ŋɩɩ nɛ ʋ bʋla pɩba dɩ ba ma mʋ a tɩŋ ʋ baga lɛ. Ba ma mʋ.

⁸ Dɩdaanɩŋ sɩ yie, ŋɩɩ nɛ baga-la tɩɩna yɩrɛ nɩɩ-la sɩɩ beŋ ʋ baga-la dɩ ʋ yɩrɛ nɩalɩŋ sɩ tɩŋ ʋ baga-la lɛ a timba, dɩ ʋ suomi nɩalɩŋ sɩ to harɩŋ mʋ baga-la a timba aŋ-na mʋ yi nɩalɩŋ sɩ laa sɩpaaŋ mʋ baga-la.

⁹ Nɩalɩŋ sɩ to harɩŋ mʋ baga-la, ʋ timba warɩpʋla kʋbala.

¹⁰ Nɩalɩŋ sɩ laa sɩpaaŋ mʋ baga-la sɩ kɔ dɩ ba laa ba time, ba fa bɩɩna arɩ ba jaŋ laa kɩɩ nɩalɩŋ sɩ to harɩŋ, ama ba tiŋ ba ma magɛ ŋɩɩ nɛ.

¹¹ Ba laa moribie-la aŋ gʋgʋrɩmɛ wɩaa baga-la tɩɩna teeŋ.

¹² Ŋɩɩ nɛ ba bʋla pʋ, “Nɩaa deemba sɩ to harɩŋ kɔ, ba tɩŋ hawa kʋbala dʋndʋŋ nɛ, aŋ ka la-na tɩŋ chʋchʋɔŋ arɩ wɩɩhɛyɛ kala, aŋ ka ŋ tiŋ la kala magɛ dɔŋɔ.”

¹³ Ŋɩɩ nɛ baga-la tɩɩna bʋla pɩ ba dɔŋɔ, “Jegile nɩɩ, mɩ bɩ ma gʋra. Ma sɛyɛ arɩ ma jaŋ tɩŋ dɩ wɩa jʋʋ nɛ aŋ laa warɩpʋla kʋbala.

¹⁴ Má laa ma moribiee a viiri. Mɩɩ chɛ dɩ mɩ tiŋ baalaa deemba sɩ to harɩŋ kɔ ŋɩɩ tɩtɩa mɩ sɩ timma nɛ.

¹⁵ Mɩ bɩ wombiiŋ kɛnɛ dɩ mɩ kɛŋ mɩ moribiee tɩŋ mɩ tʋɔtɔrɛ wɩaa? Koo ma yaraa bieru a tɩŋ mɩ sɩ kɛŋ zile wɩaa nɛ?”

¹⁶ Ŋɩɩ nɛ Yesu bʋl, “Sɩpaalaaraa jaŋ bɩrɩmɛ harɩ-tooroo, dɩ harɩ-tooroo ma bɩrɩmɛ sɩpaalaaraa.”

Yesu bʋl ʋ sʋʋŋ wɩaa

¹⁷ Yesu sɩ bʋl ŋɩɩ dɩ ba hɛ wombiiŋ lɛ nɛ a mʋmʋ Jerusalɛm. Ŋɩɩ nɛ ʋ kɛŋ ʋ harɩ-tooroo fii arɩ balɩa dʋndʋŋa a sʋʋsa lɩɩ a bʋla pɩba wombiiŋ lɛ,

¹⁸ “Má jegili mɩ teeŋ. Laa mʋ Jerusalɛm nɛ. Dɩ la nɛ yi nɩmɛ, ba jaŋ kɛŋ mɩ-na Nuhuobiine Bie a kaa mʋ pɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba. Ba jaŋ diimi sarɩya aŋ ŋaa dɩ ba kpʋmɛ

¹⁹ aŋ kɛmmɛ kaa mʋ hɛ nɩalɩŋ sɩ bɩ Juu tɩŋŋaa ŋaa nɩsɩŋ lɛ. Ba jaŋ mɔmmɛ, a vɩɩrɛmɛ aŋ kpaasɛmɛ mɛrɛ daagɛsɛ nyuŋ, ka dɩ mɩ sii sʋʋŋ lɛ tapʋlaa batori chɛɛŋ.”

Zebidi haala sʋl Yesu a chɩchɛ dɩhɔnʋŋ dɩ ʋ pɩ ʋ biiriŋ balɩa

²⁰ Ŋɩɩ nɛ Zebidi haala kɛŋ ʋ biiriŋ balɩa kɔ Yesu teeŋ a kpirimi ʋ sɩpaaŋ aŋ sʋlʋ dɩ ʋ pɛ ʋ lɛ.

²¹ Ŋɩɩ nɛ Yesu pɩɛsʋ, “Wʋbɛɛ nɛ ŋŋ chɛ dɩ mɩ ŋaa pɩŋ?” Ʋ bʋl, “Ŋ sɩ jaŋ dii Wɩa kuorii-la a hɔŋ ŋ kuoru kpasa nyuŋ, leŋ dɩ mɩ biiriŋ deemba balɩa ŋaa ŋ bʋbʋɔŋ hʋhɔnnɔɔ, dɩ dɔŋɔ hɔŋ ŋ nadiiŋ, dɩ dɔŋɔ ma hɔŋ ŋ nagʋa.”

²² Ŋɩɩ nɛ Yesu bʋla pɩ ʋ biiriŋ, “Ma bɩ jɩŋ kʋ-la ma sɩɩ chɛ. Ma jaŋ wuo nyalɩma na hɛɛ-la mɩ sɩ jaŋ naa? Ba sɩ: Oo, la jaŋ wuo.”

²³ Ŋɩɩ nɛ Yesu bʋla pɩba, “Wʋtɩtɩɩ nɛ ma bʋl. Hɛɛ-la mɩ sɩ jaŋ na, ʋ nɛ ma ma jaŋ na. Ama mɩ nadiiŋ arɩ mɩ nagʋa hʋhɔnnɔ-la, mɩ dee bɩ jaŋ tʋɔsɛba. Wɩa nɛ jaŋ lɩɩsɛba dɩ ba hɔŋ nɩmɛ.”

²⁴ Yesu harɩ-tooroo fii-la sɩ nɩɩ Jeems arɩ Jɔɔŋ sɩ bʋl wɩɩ-la, ba na baanɩŋ ba nyuŋ.

²⁵ Ŋɩɩ nɛ Yesu yɩrɛ ʋ harɩ-tooroo kala ba kɔ ʋ teeŋ. Ʋ bʋla pɩba, “Ma jɩma nɩalɩŋ sɩ bɩ Juu tɩŋŋaa ŋaa kuoroo hɔŋ nɩaa nyuŋ nɛ. Ba nɩhɩasɩŋ ma kɛŋ doluŋ ba nɩaa nyuŋ.

²⁶ Ama ʋ bɩ maga dɩ ma-na ŋɩŋaa ŋɩɩ. Ma tʋɔŋ nɩɩ-la sɩɩ chɛ ʋ ŋaa ma sɩpaalaara, ʋ maga dɩ ʋ nɛ tɩma pɩpɩma.

²⁷ Ma tʋɔŋ nɩɩ-la ma sɩɩ chɛ ʋ ŋaa ma kʋhɩaŋ, ʋ maga dɩ ʋ nɛ ŋaa ma tʋɔŋ yomo.

²⁸ Mɩ-na Nuhuobiine Bie, mɩ bɩ kɔ dɩ mɩ chɛ nɩaa dɩ ba tɩma pɩmɛ, mɩ kɔ dɩ mɩ tɩma pɩba nɛ a sʋʋ a laa nɩ-daŋ mɩɩsɩŋ pɩba.”

Yesu vaarɛ nyʋlɩmaa balɩa

²⁹ Yesu arɩ ʋ harɩ-tooroo sɩ lɩɩ Jeriko lɛ, nɩ-daŋ to ba harɩŋ.

³⁰ Nyʋlɩmaa balɩa fa hɔŋ wombiiŋ niiŋ a nɩɩ dɩ Yesu nɩɩ bal. Ŋɩɩ nɛ ba faasa yɩrɛ a bʋla pʋ, “La Tɩɩna, Devit nihii, fá la nenige.”

³¹ Ŋɩɩ nɛ nɩ-daŋ-la kpɩa ba lɛ dɩ ba kɛŋ goŋ. Ama ba faasa yɩrɛ a kɩɩ ŋɩɩ a bʋl, “La Tɩɩna, Devit nihii, fá la nenige.”

³² Ŋɩɩ nɛ Yesu chɩŋ aŋ yɩrɛba a pɩɛsɛba, “Bɛɛ kʋŋ nɛ maa chɛ mɩ ŋaa pɩma?”

³³ Ba bʋl, “La Tɩɩna, laa chɛ dɩ ŋ suri la sɩaa nɛ.”

³⁴ Ŋɩɩ nɛ Yesu fá ba nenige a digi ba sɩaa lɛ. Ba sɩaa guu suri, ba tuto ʋ harɩŋ.