Matiu 19 - WƖA TENIŊ

Yesu dagɛ nɩaa dɩ ba sɩ́ ba haalaa vɩa

¹ Yesu sɩ bʋl wɩaa deemba dɛrɛ, ʋ lɩɩ Galilii tinteeŋ a mʋ Judiya tinteeŋ a chol Jɔdaŋ fuo-la.

² Nɩ-daŋ bɩra to ʋ harɩŋ. Ŋɩɩ nɛ ʋ vaarɛ nɩalɩŋ sɩɩ wɩɩlʋ nɩmɛ.

³ Ŋɩɩ nɛ Farisii tɩŋŋaa dɔnsʋŋ ma sii kɔ ʋ teeŋ a chɩchɛ dɩ ba magɩsʋ a pɩɛsʋ, “Dɩ ŋ kɛŋ wɩɩ a tɩgɛ ŋ haala lɛ a chɩchɛ ŋ vɩaʋ, ʋ ŋaa wombii nɛɛ?”

⁴ Yesu mɩɩra pɩɛsɛba, “Ma bɩ karɩma arɩ bʋa-la lɛ Wɩa sɩ bugumo ŋaa dʋnɩa, nɩalɩŋ ʋ sɩ ŋaa, ba fa ŋaa baal arɩ haal nɛɛ?

⁵ Ŋɩɩ nɛ tɩɩ baala jaŋ leŋ ʋ nyɩmma arɩ ʋ naaŋ aŋ ka ʋ dɩ ʋ haala mɛrɛ dɔŋɔ lɛ. Nɩaa deemba balɩa jaŋ kɛŋ chal-bala.

⁶ Ba bɩra bɩ jaŋ ŋaa nɩaa balɩa, see kʋbala. Nɩalɩŋ saa Wɩa sɩ kaa mɛrɛ dɔŋɔ lɛ, ʋ bɩ maga dɩ nuhuobiine kɛmba pɔrɛ dɔŋɔ lɛ.”

⁷ Ŋɩɩ nɛ ʋ harɩ-tooro-la bɩra pɩɛsʋ wɩɩŋ deeŋ, “Bɛɛ nɛ saa tɩɩ Mosis fa sɩ dɩ baala nɩɩ chɛ ʋ vɩa ʋ haala, dɩ ʋ laa sɩpaaŋ a ŋmʋnsɛ teniŋ a pɩ haal-la aŋ-na vɩaʋ?”

⁸ Ŋɩɩ nɛ Yesu bɩra bʋla pɩba, “Ma tʋɔŋ dolie. Ŋɩɩ nɛ tɩɩ Mosis fa sɛɩ dɩ ma vɩa ma haalaa. Ama dʋnɩa dɩ-suomuŋ, ba fa bɩ ŋɩɩ ŋaa.

⁹ Mɩ bʋlaa pɩma, baal-na kala sɩ vɩa ʋ haala aŋ bɩra jaa dɔŋɔ, baal-la ŋaa bachɔrʋŋ nɛ, see dɩ haal-la ka ŋaa hachɔrʋŋ wɩaa.”

¹⁰ Ŋɩɩ nɛ Yesu harɩ-tooro-la bʋla pʋ arɩ ŋɩɩ-na nɛ, ʋ bɩ maga dɩ nʋʋ jaa haal.

¹¹ Yesu mɩɩra bʋla pɩba, “Wɩɩŋ deeŋ bɩ naga arɩ nʋʋkala jaŋ wuo ŋaa. Nɩalɩŋ Wɩa sɩ joŋ doluŋ pa, ba dʋndʋŋa nɛ jaŋ wuo ŋaa ŋɩɩ.

¹² Wɩɩ-la sɩ tɩɩ baalaa bɩ haalaa ka jaa, ba yʋga nɛ. Ba lʋl dɔnsʋŋ ba paala bɩ haalaa wuo pɩŋ. Dɔnsʋŋ ma, nuhuobiinee nɛ ŋaaba ŋɩɩ, dɔnsʋŋ ma bɩ haalaa jaa a tɩŋ Wɩa kuorii-la wɩaa. Nɩɩ-la sɩ jaŋ wuo laa wɩɩŋ deeŋ dii, ʋ sɛɩ.”

Yesu joŋ ʋ nɩsɩŋ daŋ hambiisiŋ lɛ

¹³ Ŋɩɩ nɛ nɩaa sii kɔ Yesu teeŋ a kɛŋ ba hambiisiŋ kaa kɔ dɩ ʋ joŋ ʋ nɩsɩŋ daŋ ba lɛ a chʋɔlɛ Wɩa pɩba. Ŋɩɩ nɛ ʋ harɩ-tooroo kpɩa nɩalɩŋ lɛ.

¹⁴ Yesu sɩ na ŋɩɩ, ʋ bʋla pɩba, “Má leŋ dɩ hambiisi-la kɔ mɩ teeŋ, má sɩ́ ba kiru! Nɩaa deemba doho nɛ jaŋ jʋʋ Wɩa kuorii-la tʋɔŋ.”

¹⁵ Ŋɩɩ nɛ ʋ joŋ ʋ nɩsɩŋ daŋ ba lɛ aŋ viiri.

Kɩaa tɩɩna kɔ Yesu teeŋ

¹⁶ Baal kʋbala ma nɛ sie a kɔ Yesu teeŋ. Ŋɩɩ nɛ ʋ pɩɛsɛ Yesu, “Mɩ kʋhɩaŋ, wʋzɔŋ bɛɛ nɛ mɩ jaŋ ŋaa a kɛŋ mɩɩsɩ-la sɩ bɩ dɛrɛ?”

¹⁷ Ŋɩɩ nɛ Yesu pɩɛsʋ, “Bɛɛ nɛ tɩɩ ŋ pɩɛsɛmɛ wʋzɔmɔ-la ŋ sɩ jaŋ ŋɩŋaa wɩaa? Nɩbala dʋndʋŋa nɛ zɔmɔ. Dɩ ŋ nɩɩ chɛ dɩ ŋ kɛŋ mɩɩsɩ-la sɩ bɩ dɛrɛ, tuto wɩalɩŋ Wɩa sɩ daga.”

¹⁸ Ŋɩɩ nɛ baal-la pɩɛsʋ, “Wʋbɛɛba nɛ?” Yesu sɩ, “Sɩ́ nɩaa kpʋ, sɩ́ ŋ dɔŋɔ tɩɩna haala chɛ, sɩ́ gaa, dɩ ŋ nɛ ŋaa pɛ-naarʋ wɩɩ lɛ, sɩ́ wɩaa nyɩɛ pɛ.

¹⁹ Zizil ŋ nyɩmma arɩ ŋ naaŋ, a cho ŋ dɔŋɔ tɩɩna arɩ ŋ sɩ cho ŋ tɩtɩa ŋɩɩ.”

²⁰ Baal-la bʋla pɩ Yesu, “Mɩ kʋhɩaŋ, mɩ to wɩaa deemba kala nɛ. Bɛɛ nɛ saa ka?”

²¹ Yesu bʋla pʋ, “Dɩ ŋ nɩɩ chɛ ŋ ŋaa nɩzɔŋ a sɩ́ wɩɩkala kɛŋ, joŋ ŋ kɩaa kala yallɛ a joŋ moribie-la a pɩ summoo aŋ kʋ tomi. Ŋ nɛ ŋaa ŋɩɩ, ŋ jaŋ kɛŋ kɩaa Wɩa-jaŋ lɛ.”

²² Yesu sɩ bʋl ŋɩɩ, baal-la tʋɔŋ chei, ʋ sii viiri, bɛɛ wɩaa ʋ kɛŋ kɩaa nɛ woruŋ.

²³ Ŋɩɩ nɛ Yesu bʋla pɩ ʋ harɩ-tooroo, “Wʋtɩtɩɩ, mɩ bʋlaa pɩma, ʋ ŋaa wʋduo nɛ arɩ nɩɩ-la sɩ kɛŋ kɩaa sɩ jaŋ wuo jʋʋ Wɩa kuorii-la tʋɔŋ.

²⁴ Mɩ bɩra bʋlaa pɩma, ʋ bɩ hɛɩ arɩ bʋntaŋŋa sɩ jaŋ wuo to gɛrɩ-hɛmɩŋ bʋa lɩɩ arɩ ʋ sɩ hɛyɛ ŋɩɩ nɩɩ-la sɩ kɛŋ kɩaa sɩ jaŋ wuo jʋʋ Wɩa kuorii-la tʋɔŋ.”

²⁵ Ʋ harɩ-tooro-la sɩ nɩɩ wɩaa deemba, ba faasa hirigi a pɩɛsɛ Yesu, “Dɩ ʋ nɛ nagɛ ŋ-la, kʋbɛɛ nɛ saa Wɩa jaŋ laa ta?”

²⁶ Yesu mɩɩra bemba aŋ bʋl, “Wɩɩ-la sɩ jaŋ kperi nuhuobiine, ʋ bɩ Wɩa wuo kperi. Wɩa wuo wɩɩkala ŋaa nɛ.”

²⁷ Ŋɩɩ nɛ Pɩɩta bʋla pʋ, “Na, la-na leŋ la kʋŋkala nɛ aŋ tuto ŋ harɩŋ. Bɛɛ nɛ saa la jaŋ na?”

²⁸ Ŋɩɩ nɛ Yesu bʋla pɩ ʋ harɩ-tooro-la, “Wʋtɩtɩɩ nɛ mɩ bʋlaa pɩma, dɩ dʋnɩa falɩɩ-la nɛ yie, mɩ-na Nuhuobiine Bie jaŋ hɔŋ mɩ kuoru kpasa nyuŋ Wɩa pʋlʋmʋŋ tʋɔŋ. Bʋa-la lɛ, ma harɩ-tooroo deemba fii arɩ balɩa-la sɩ to mɩ harɩŋ, ma ma jaŋ hɔŋ kuoru kpasɩnɩŋ fii arɩ balɩa nyuŋ a bibeŋ Iziral tinteyee fii arɩ balɩa-la a dii ba sarɩya.

²⁹ Bɩra, nɩɩ-la kala sɩ leŋ ʋ dɩɩsɩŋ koo ʋ naambiiriŋ koo ʋ nyɩmma koo ʋ naaŋ koo ʋ biiriŋ koo ʋ bagɩsɩŋ a tɩŋ mɩ wɩaa, ʋ tɩɩna jaŋ bɩra na kɩaa deemba naansɩɩŋ zɔlɔ, aŋ pɛ kɛŋ mɩɩsɩ-la sɩ bɩ dɛrɛ.

³⁰ Ama sɩpaalaaraa yʋga sɩ jaŋ bɩrɩmɛ harɩ-tooroo. Harɩ-tooroo ma yʋga sɩ jaŋ kʋ bɩrɩmɛ sɩpaalaaraa.”