Matiu 17 - WƖA TENIŊ

Yesu bɩrɩma

¹ Tapʋlaa balɩdʋ sɩ bala, Yesu kɛŋ Pɩɩta arɩ Jeems arɩ ʋ naambie Jɔɔŋ, ba mʋ peel-bal kʋbala nyuŋ a hɛ nɩmɛ ba dʋndʋŋa.

² Nɩmɛ nɛ Yesu bɩrɩmɛ ba sɩpaaŋ. Ʋ sɩaa kala tʋtʋl a nagɛ wɩɩpɔsʋŋ sɩɩ tʋl ŋɩɩ. Ʋ gɛnnɩŋ ma pʋllɛ a tʋtʋl.

³ Ŋɩɩ nɛ Mosis arɩ Ɩlaaja kʋ lɩɩ ba sɩpaaŋ, a bʋbʋl wɩaa Yesu teeŋ.

⁴ Ŋɩɩ nɛ Pɩɩta bʋla pɩ Yesu, “La Tɩɩna, ʋ ŋaa wʋzɔŋ nɛ arɩ la sɩ hɛ daha. Dɩ ŋ nɩɩ chɛ la jaŋ hɛ lɛŋŋɛɛ batori daha, dɩ ŋ kɛŋ dɔŋɔ, dɩ Mosis ma kɛŋ dɔŋɔ, dɩ Ɩlaaja ma kɛŋ dɔŋɔ.”

⁵ Pɩɩta fa ha sɩɩ bʋl wɩaa ŋɩɩ, dɩ duoŋ-bɩlɩmbaanɩŋ kʋ tɔba, ka yikoro kʋbala lɩɩ duoŋ-bɩlɩmbaaŋ-la tʋɔŋ a bʋbʋl, “Mɩ Bii-chooluŋ nɛ ŋ-la. Mɩ tʋɔŋ tɔrɛ ʋ nyuŋ. Má jegile nɩɩ ʋ teeŋ.”

⁶ Yesu harɩ-tooro-la sɩ nɩɩ nɩɩ-la yikoro, fawʋllʋŋ kɛmba, ba tuu tel tinteeŋ.

⁷ Ŋɩɩ nɛ Yesu kɔ ba teeŋ a digiba aŋ bʋla pɩba dɩ ba sii aŋ sɩ́ fawʋllʋŋ fá.

⁸ Ba sɩ sie a beŋ, ba bɩ nʋʋkala na see Yesu dʋndʋŋa.

⁹ Ba sɩ lɩɩ peel-la nyuŋ kʋ tuu, Yesu bʋla pɩba, “Mɩ bɩ chɛ dɩ ma bʋl wɩɩ-la ma sɩ na a pɩ nʋʋkala, see tapʋlɩɩ-la mɩ-na Nuhuobiine Bie sɩ sii sʋʋŋ lɛ.”

¹⁰ Ŋɩɩ nɛ Yesu harɩ-tooro-la pɩɛsʋ, “Bɛɛ nɛ tɩɩ Wɩa teniŋ kerichiba bʋl dɩ Ɩlaaja nɛ maga ʋ laa sɩpaaŋ kɔ, aŋ ka dɩ Wɩa Bie-na kɔ?”

¹¹ Yesu bʋl, “Wʋtɩtɩɩ, Ɩlaaja jaŋ sɛnɛ laa sɩpaaŋ kɔ a kɛŋ kʋŋkala wasa bil.

¹² Ama mɩ bʋlaa pɩma arɩ Ɩlaaja paala kɔ nɛ, ama nɩaa bɩ wuo jɩmʋ. Ba ŋaaʋ ŋɩɩ kala ba sɩɩ chɛ nɛ. Ŋɩɩ tɩtɩa nɛ ba jaŋ dɔgɩsɛ mɩ-na Nuhuobiine Bie.”

¹³ Ŋɩɩ nɛ ʋ harɩ-tooro-la jɩŋ arɩ Jɔɔŋ Wɩa lɩɩ-fooru-la wɩaa nɛ ʋ bʋl ŋɩɩ.

Yesu kiri jɩŋ-bɔmʋŋ bie lɛ

¹⁴ Ŋɩɩ nɛ Yesu arɩ ʋ harɩ-tooroo batori-la sii lɩɩ peel-la nyuŋ a kʋ tuu nɩ-daŋ-la teeŋ. Dɩ baal kʋbala kɔ Yesu teeŋ a kpirimi ʋ sɩpaaŋ

¹⁵ aŋ bʋla pʋ, “Mɩ Tɩɩna, fá mɩ bie nenige, ʋʋ tel kuŋkunsuŋ nɛ. Nyanyalɩɩ-la jʋʋ-ʋ lɛ nɛ woruŋ ʋ nɩna hɛɛŋ, ʋ yie titel nyiniŋ koo lɩɩŋ lɛ.

¹⁶ Mɩ kɛnʋ kaa kɔ ŋ harɩ-tooroo teeŋ, ama ba bɩ wuo vaarʋ.”

¹⁷ Ŋɩɩ nɛ Yesu bʋl, “Ma lɛɛlɛ nɩaa deemba, ma bɩ Wɩa laa dii, ma ŋaa nɩbɔmɔ nɛ. Ɛɛ nɛ mɩ jaŋ nyalɩmɛ a diene magɛ ma teeŋ? Kɛŋ bile kaa kɔ mɩ teeŋ.”

¹⁸ Ŋɩɩ nɛ Yesu bʋl jɩŋ-bɔŋ-la lɛ dɩ ʋ lɩɩ bile lɛ, ʋ lɩɩ. Bile guu duori.

¹⁹ Ŋɩɩ nɛ Yesu harɩ-tooro-la kɔ ʋ teeŋ a lʋara pɩɛsʋ, “Bɛɛ nɛ tɩɩ la-na bɩ jɩŋ-bɔŋ-la wuo kiri?”

²⁰ Ŋɩɩ nɛ Yesu bʋla pɩba, “Ma Wɩa laa diiniŋ bɩ yʋgɛ, ŋɩɩ nɛ tɩɩ. Wʋtɩtɩɩ, mɩ bʋlaa pɩma, dɩ ma Wɩa laa diiniŋ nɛ paala muuri a magɛ kʋ-la ba sɩɩ yɩrɛ masɩtad biiŋ ma, ma fa jaŋ wuo bʋl peeliŋ lɛ dɩ ʋ sii daha a mʋ sɛmɛ dɔŋɔ, ʋ jaŋ sɛnɛ mʋ. Wɩɩkala tuo ma fa bɩ jaŋ wuo ŋaa. [

²¹ Ama Wɩa bɩ jaŋ pɩma doluŋ dɩ ma wuo kikiri jɩŋ-dosunuŋ deemba, see ma vɔɔ niiŋ aŋ pɛ chʋchʋɔlɛ Wɩa.]”

Yesu bɩra bʋl ʋ sʋʋŋ wɩaa

²² Ŋɩɩ nɛ Yesu arɩ ʋ harɩ-tooroo kala kʋ hilimi Galilii lɛ, ʋ bʋla pɩba, “Ba jaŋ kɛŋ mɩ-na Nuhuobiine Bie a hɛ nɩaa nɩsɩŋ lɛ

²³ dɩ ba kpʋmɛ, ama ŋɩɩ harɩŋ lɛ mɩ jaŋ sii sʋʋŋ lɛ tapʋlaa batori chɛɛŋ a kɛŋ mɩɩsɩŋ.” Ʋ sɩ bʋl ŋɩɩ, ʋ harɩ-tooroo tʋɔŋ chei.

Wɩa dɩa lampoo

²⁴ Yesu arɩ ʋ harɩ-tooroo sɩ kɔ Kapɛnam, nɩalɩŋ sɩɩ laa Wɩa dɩa lampoo kɔ Pɩɩta teeŋ a pɩɛsʋ, “Ma kʋhɩaŋ ka tiŋ Wɩa dɩa time nɛɛ?”

²⁵ Ŋɩɩ nɛ Pɩɩta bʋl dɩ ʋʋ tiŋ nɛ. Pɩɩta sɩ bʋl ŋɩɩ aŋ mɩɩra jʋʋ dɩa, Yesu laa sɩpaaŋ a pɩɛsʋ, “Kʋbɛɛ nɛ tiŋ lampoo a pɩpɩ dʋnɩa deeŋ kuoroo? Ba taŋ nɩaa koo nʋhʋɔraa? Bɛɛ nɛ ŋ bɩɩnɛ?”

²⁶ Ŋɩɩ nɛ Pɩɩta bʋl dɩ nʋhʋɔraa nɛ. Yesu bɩra bʋl, “Ŋɩɩ-na taŋ-la nɩaa bɩ maga ba tiŋ kʋŋkala.

²⁷ Ama la-na bɩ chɛ dɩ la ŋaa wɩɩ a chei nɩaa deemba tʋɔŋ, ŋɩɩ wɩaa kɛŋ gbɩaŋ tuu hɛ fuoŋ lɛ a kɛsɛ chenfilee. Gbɩaŋ-la sɩ jaŋ kɛŋ chenfil-bumbuŋ-la, kɛŋ ʋ niiŋ suri, ŋ jaŋ na moribiiŋ ʋ niiŋ lɛ. Lɩɩsɛ moribii-la a tiŋ mɩ dɩ ŋ nyʋŋ lampoo.”