Matiu 16 - WƖA TENIŊ

Nɩalɩŋ chɛ dɩ Yesu ŋaa wʋmagɩlɩŋ

¹ Ŋɩɩ nɛ Farisii tɩŋŋaa arɩ Saduusi tɩŋŋaa dɔnsʋŋ kɔ Yesu teeŋ dɩ ba magɩsʋ. Ba bʋla pʋ dɩ ʋ ŋaa wʋmagɩlɩŋ dɩ ba na a jɩŋ arɩ ʋ dol-la lɩɩ Wɩa teeŋ nɛ.

² Ŋɩɩ nɛ ʋ bʋla pɩba, “Dɩ wɩa nɩɩ jʋʋ, ka ma na wɩɩ-muluŋ sɩɩŋ dɩ ʋ fɩɛsa, ma yie bʋl dɩ leriŋ jaŋ fɩɛlɛ.

³ Chʋchʋɔ-fɩɛla ma, dɩ leriŋ nɛ bire, ma yie bʋl arɩ duonuŋ jaŋ nɩɩ. Ma yie wuo beŋ wɩa-nyuŋ a wuo jɩŋ wɩɩ-la sɩ jaŋ ŋaa, ama ma bɩ wuo jɩŋ wɩalɩŋ sɩɩ ŋaa dʋnɩa deeŋ lɛ lɛɛlɛ.

⁴ Jɩnɩŋ nɩaa ŋaa nɩbɔmɔ nɛ, ba bɩ Wɩa ka fá. Ma sɩ dɩ mɩ ŋaa wʋmagɩlɩŋ. Aɩ, mɩ bɩ ŋaa. Wʋmagɩl-la ma sɩɩ chɛ, ma bɩ jaŋ wuo naʋ, see Wɩa fa sɩ ŋaa wɩɩ-la a tɩgɛ Jona lɛ.” Ŋɩɩ nɛ Yesu lemba aŋ viiri.

Yesu bʋl wɩaa a tɩgɛ Farisii tɩŋŋaa arɩ Saduusi tɩŋŋaa wʋbʋlaa lɛ

⁵ Yesu harɩ-tooro-la sɩ jʋʋ lɩɩŋ daboro a duoro chol fuoŋ cholo ŋɩɩ, ba fa yʋa nɛ ba bɩ kʋdiilee koro mʋ.

⁶ Ŋɩɩ nɛ Yesu bʋla pɩba, “Má kɛŋ ma tɩtɩa woruŋ arɩ Farisii tɩŋŋaa arɩ Saduusi tɩŋŋaa, ba nagɛ sɩbʋrʋŋ nɛ.”

⁷ Ŋɩɩ nɛ ba suomo bʋla pɩpɩ dɔŋɔ, “La bɩ kʋdiilee koro kɔ, ŋɩɩ nɛ tɩɩ ʋ bʋl wɩɩŋ deeŋ.”

⁸ Ŋɩɩ nɛ Yesu jɩŋ wɩɩ-la ba sɩɩ bʋl a pɩɛsɛba, “Ma Wɩa laa diiniŋ bɩ yʋgɛ. Bɛɛ nɛ tɩɩ ma hɔnɔ vʋvʋʋrɛ arɩ ma bɩ kʋdiilee kɛnɛ? Ma ha bɩ wʋjɩmɩŋ kɛnɛɛ?

⁹ Ma ha bɩ wɩaa bʋbʋɔŋ jɩŋ? Ma bɩ bɩɩna yi bʋa-la lɛ mɩ sɩ joŋ boroboroba banɔŋ kaa chɔgɛ a pɩ nɩaa bʋɩ banɔŋ ba dii? Ba sɩ die a vɔgɛ, sinsiŋ baŋmɛɛ nɛ ma paa kʋkaanaa su?

¹⁰ Aŋ ka boroboro balɩpɛ-la mɩ sɩ kaa chɔgɛ a pɩ nɩaa bʋɩ banɛsɛ-la? Kʋkaanaa sinsiŋ baŋmɛɛ nɛ ma paa su?

¹¹ Ɛɛ nɛ ma bɩɩnɛ arɩ ma teeŋ nɛ mɩɩ bʋl kʋdiilee wɩaa? Má pɔ ma tɩtɩa lɛ arɩ Farisii tɩŋŋaa arɩ Saduusi tɩŋŋaa lɛ. Ba nagɛ sɩbʋrʋŋ nɛ.”

¹² Ŋɩɩ nɛ ʋ harɩ-tooroo jɩŋ arɩ ʋ bɩ sɩ dɩ ba pɔ ba tɩtɩa lɛ arɩ sɩ-bʋrʋ-la ba sɩ kaa hɩhɛ boroboro lɛ nɛ, ama ʋ sɩ ba pɔ ba tɩtɩa lɛ Farisii tɩŋŋaa arɩ Saduusi tɩŋŋaa wʋbʋlaa lɛ nɛ.

Pɩɩta dagɛ nɩɩ-la Yesu sɩ ŋaa

¹³ Ŋɩɩ nɛ Yesu sii mʋ Sɩzarɩya Fɩlɩpa tinteeŋ. Ŋɩɩ nɛ ʋ pɩɛsɛ ʋ harɩ-tooro-la, “Kʋbɛɛ nɛ nɩaa sɩ dɩ mɩ-na Nuhuobiine Bie ŋaa?”

¹⁴ Ŋɩɩ nɛ ba bʋl, “Dɔnsʋŋ sɩ dɩ ŋ nɛ ŋaa Jɔɔŋ, Wɩa lɩɩ-fooru-la. Dɔnsʋŋ ma sɩ ŋ nɛ ŋaa Ɩlaaja. Dɔnsʋŋ ma sɩ ŋ nɛ ŋaa Jɛrɩmaaya, koo Wɩa wʋlaabʋllaa dɔŋɔ.”

¹⁵ Ŋɩɩ nɛ Yesu bɩra pɩɛsɛ ʋ harɩ-tooro-la ma, “Ka ma ma, ma sɩ mɩ nɛ ŋaa kʋbɛɛ?”

¹⁶ Ŋɩɩ nɛ Saamɔŋ Pɩɩta bʋl, “Ŋ nɛ ŋaa Kirisito, Wɩa-la sɩ weye Bie.”

¹⁷ Ŋɩɩ nɛ Yesu bʋl, “Saamɔŋ, Jɔɔŋ bie, Wɩa jaŋ pɛ ŋ lɛ, wʋjɩmɩŋ deeŋ bɩ naga nuhuobiine nɛ pɩŋ. Ama mɩ Nyɩmma sɩ hɛ Wɩa-jaŋ nɛ pɩŋ.

¹⁸ Ŋɩɩ wɩaa Pɩɩta, mɩ bʋlaa pɩŋ arɩ ŋ nagɛ bʋŋ nɛ. Bʋŋ-la nyuŋ nɛ mɩ jaŋ saa nɩalɩŋ sɩ laa mɩ wɩaa dii dɩa. Sʋʋŋ ma bɩ jaŋ wuo yigi dɩa-la lo.

¹⁹ Mɩ jaŋ joŋ Wɩa kuorii-la boribiee pɩŋ. Wɩɩ-la ŋ sɩ vɩa dʋnɩa lɛ, ba jaŋ vɩaʋ Wɩa-jaŋ ma. Wɩɩ-la ma ŋ sɩ sɛyɛ dʋnɩa lɛ, ba jaŋ sɛyʋ Wɩa-jaŋ ma lɛ.”

²⁰ Ŋɩɩ nɛ Yesu bʋla pɩ ʋ harɩ-tooro-la arɩ sɩɩfɩɛsɩŋ dɩ ba sɩ́ bʋla pɩ nʋʋkala arɩ ʋ nɛ ŋaa Kirisito, nɩɩ-la Wɩa sɩ lɩɩsa.

Yesu bʋl ʋ hɛɛŋ nanɩŋ arɩ ʋ sʋʋnʋŋ wɩaa

²¹ A suomi bʋa-la lɛ Yesu chaasa bʋla pɩ ʋ harɩ-tooroo a bʋl, “Ʋ maga dɩ mɩ mʋ Jerusalɛm a na hɛɛŋ woruŋ Juu tɩŋŋaa nɩhɩasɩŋ arɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba nɩsɩŋ lɛ. Ba jaŋ kpʋmɛ, ama mɩ jaŋ sii sʋʋŋ lɛ tapʋlaa batori chɛɛŋ.”

²² Ŋɩɩ nɛ Pɩɩta kɛnʋ kaa sʋʋsa lɩɩ a kpɩaʋ lɛ a bʋl, “Wɩa bɩ jaŋ sɛɩ, mɩ Tɩɩna. Wɩɩ-la bɩ jaŋ kɔ dɩ ʋ ŋaa ŋ lɛ.”

²³ Ŋɩɩ nɛ Yesu mɩɩra chaasɛ Pɩɩta a bʋla pʋ, “Sɩtaanɩ, mʋ nɩmɛ! Ŋŋ chɛ ŋ nyɩsɛmɛ dɩ mɩ vɩa wɩɩ-la sɩ maga dɩ mɩ ŋaa nɛ. Wɩalɩŋ ŋ sɩɩ bʋl, nuhuobiine wombiiŋ nɛ, Wɩa wombiiŋ dee.”

²⁴ Ŋɩɩ nɛ ʋ bʋla pɩ ʋ harɩ-tooroo, “Dɩ nʋʋkala nɩɩ chɛ dɩ ʋ tomi, see dɩ ʋ vɩa ʋ tɩtɩa wombiiŋ aŋ joŋ ʋ daagɛsɛ baasɛ a to mɩ harɩŋ.

²⁵ Nɩɩ-la kala sɩɩ chɛ dɩ ʋ laa ʋ tɩtɩa mɩɩsɩŋ, ʋ jaŋ joŋ ʋ mɩɩsɩŋ ta, ama nɩɩ-la sɩ vɩa ʋ mɩɩsɩŋ ta a tɩŋ mɩ wɩaa, ʋ jaŋ sɛnɛ laa ʋ mɩɩsɩŋ.

²⁶ Dɩ ŋ nɛ kɛŋ dʋnɩa kʋŋkala aŋ bɩ mɩɩsɩŋ kɛnɛ Wɩa teeŋ, bɛɛ kʋŋ nyʋʋrɩɩ nɛ ŋ na? Dʋnɩa deeŋ lɛ, bɛɛ kʋŋ nɛ ŋ jaŋ wuo kaa lenni ŋ mɩɩsɩŋ?

²⁷ Mɩ-na Nuhuobiine Bie jaŋ kɔ arɩ mɩ Nyɩmma tʋla, a pɛ mɩ tɩndaaraa lɛ. Dɩ la nɛ kɔ, Wɩa jaŋ tiŋ nʋʋkala a magɛ ŋɩɩ ʋ sɩ tɩma.

²⁸ Wʋtɩtɩɩ nɛ, mɩ bʋlaa pɩma arɩ nɩaa dɔnsʋŋ hɛ nɩmɛ, ba bɩ jaŋ sʋʋ see dɩ ba na mɩ-na Nuhuobiine Bie dɩ mɩ kɔ arɩ mɩ kuorii-la.”