Matiu 14 - WƖA TENIŊ

Jɔɔŋ Wɩa lɩɩ-fooru-la sʋba

¹ Bʋa-la lɛ nɛ Galilii kuoro Hɛrɔd nɩɩ Yesu wɩaa.

² Ʋ bʋla pɩ ʋ nanzɔɔba arɩ Jɔɔŋ Wɩa lɩɩ-fooru-la nɛ ŋɩɩ. Wɩa nɛ chɩsʋ sʋʋŋ lɛ, ŋɩɩ nɛ tɩɩ ʋ kɛŋ doluŋ a wuo ŋɩŋaa wʋmagɩlaa deemba.

³ Hɛrɔd-la fa sie a mʋ jaa haal kʋbala nɛ. Ʋ yɩrɩŋ nɛ Hɛrɔdɩas. Ʋ fa ŋaa ʋ ŋaana Fɩlɩp haala nɛ, ʋ laa jaa.

⁴ Ŋɩɩ nɛ Jɔɔŋ bʋla pɩ Hɛrɔd, “Ŋ sɩ kɛŋ ŋ ŋaana haala laa jaa ŋɩɩ, ʋ bɩ wombiiŋ ŋaa.”

⁵ Ŋɩɩ nɛ Hɛrɔd faa chɛ dɩ ʋ kpʋ Jɔɔŋ, ama ʋ faa fá Juu tɩŋŋaa nɛ. Ŋɩɩ wɩaa ʋ ŋaa ba kɛnʋ tɔ dɩa. Juu tɩŋŋaa fa sɩ dɩ Jɔɔŋ ŋaa Wɩa wʋlaabʋllʋ nɛ.

⁶ Ŋɩɩ nɛ Hɛrɔd chɛ-lʋlʋŋ tapʋlʋŋ bɩra yi. Ʋ yɩrɛ ʋ nɩaa dɩ ba kʋ gbieli. Hɛrɔdɩas tolo kʋ gʋa ba kala sɩpaaŋ, Hɛrɔd tʋɔŋ tɔrɛ ʋ nyuŋ.

⁷ Ŋɩɩ nɛ ʋ bʋla pɩ tolo-la, “Mɩ ŋmɩɛsa, mɩ jaŋ pɩŋ kʋŋkala ŋ sɩɩ chɛ.”

⁸ Ŋɩɩ nɛ tolo-la mʋ bʋl wɩɩŋ deeŋ a pɩ ʋ naaŋ aŋ pɩɛsʋ, “Mɩ bʋl mɩɩ chɛ bɛɛ kʋŋ nɛ?” Ŋɩɩ nɛ ʋ naaŋ bʋla pʋ arɩ ʋ bʋl ʋʋ chɛ dɩ ʋ keri Jɔɔŋ Wɩa lɩɩ-fooru-la nyuŋ a hɛ pɩrata lɛ nɛ a pʋ. Tolo-la bʋl ŋɩɩ.

⁹ Kuoro sɩ nɩɩ wɩɩ-la, ʋ tʋɔŋ kala chei. Ama ʋ sɩ ŋmɩɛsa ŋɩɩ, nɩaa kala nɩɩ, ŋɩɩ nɛ ʋ bʋl dɩ ba ŋaa ŋɩɩ tolo-la sɩɩ chɛ a pʋ.

¹⁰ Ʋ ŋaa ba mʋ keri Jɔɔŋ nyuŋ bɩnɩŋ dɩa lɛ

¹¹ a hɛ pɩrata lɛ a kaa kʋ pɩ tolo-la. Ŋɩɩ nɛ ʋ laa a kaa mʋ pɩ ʋ naaŋ.

¹² Jɔɔŋ harɩ-tooro-la sɩ nɩɩ wɩɩ-la, ba sii kʋ laa ʋ kʋsʋʋŋ a kaa mʋ hugi. Ŋɩɩ nɛ ba mʋ bʋla pɩ Yesu wɩalɩŋ sɩ ŋaa.

Yesu pɩ nɩaa bʋɩ banɔŋ kʋdiilee

¹³ Yesu sɩ nɩɩ Jɔɔŋ wɩaa, ʋ sii lee-la ʋ fa sɩ hɛ a jʋʋ lɩɩŋ daboro a mʋmʋ nɩaa sɩ tuo lee-la, ʋ dʋndʋŋa. Ama nɩaa nɩɩ Yesu wɩaa a lɩɩ ba jaŋ lɛ a vɛŋ naasɩŋ lɛ a kiri ʋ harɩŋ.

¹⁴ Yesu sɩ mʋ lɩɩ lɩɩŋ daboro-la lɛ, ʋ na nɩ-daŋ dɩ ba hɔnɔ gbɛrʋ. Nenige kala kɛnʋ. Ŋɩɩ nɛ ʋ vaarɛ nɩalɩŋ sɩɩ wɩɩlʋ.

¹⁵ Dɩdaanɩŋ kʋ yi, ʋ harɩ-tooroo kɔ ʋ teeŋ a bʋla pʋ, “Taŋ bire nɛ. Leriŋ deeŋ ŋaa gɩrɩŋ nɛ. Ta nɩalɩŋ dɩ ba mʋ tasɩ-la sɩ kpagɛ daha a yɔɔ kʋdiilee a dii.”

¹⁶ Ŋɩɩ nɛ Yesu bʋl, “Má sɩ́ leŋe dɩ ba viiri. Má-na mʋ chɛ kʋdiilee pɩba dɩ ba dii.”

¹⁷ Ŋɩɩ nɛ ʋ harɩ-tooro-la bʋl, “Kʋ-la kala la sɩ kɛnɛ nɛ boroboroba banɔŋ arɩ chenfilee balɩa.”

¹⁸ Ŋɩɩ nɛ Yesu bʋl, “Má kaa kʋ pɩmɛ.”

¹⁹ Ʋ ŋaa nɩalɩŋ tuu hɔŋ yaŋ nyuŋ. Ŋɩɩ nɛ ʋ laa boroboroba banɔŋ-la arɩ chenfile-la balɩa a wʋla beŋ wɩa-nyuŋ aŋ lɔllɛ Wɩa aŋ kaa chɔgɛ chɔgɛ a pɩ ʋ harɩ-tooroo. Ʋ harɩ-tooroo laa kpaa nɩalɩŋ.

²⁰ Nʋʋkala dii a vɔgɛ. Ka ʋ harɩ-tooro-la paa kʋkaaŋ-biisiŋ a su sinsiŋ fii arɩ balɩa.

²¹ Nɩalɩŋ fa sɩ dii boroboro-la, ba tʋɔŋ baalaa fa ŋaa bʋɩ banɔŋ nɛ, haalaa arɩ hambiisiŋ-na bɩ pɛ.

Yesu vɛŋ lɩɩŋ nyuŋ

²² Ŋɩɩ nɛ Yesu leŋ ʋ harɩ-tooroo laa sɩpaaŋ mʋ jʋʋ lɩɩŋ daboro a duoro chol mʋga cholo, aŋ ka dɩ ʋ ta nɩ-daŋ-la dɩ ba viiri.

²³ Ʋ sɩ ta nɩ-daŋ-la ba viiri, ʋ mʋ jɩl peeliŋ nyuŋ dɩ ʋ chʋɔlɛ Wɩa. Ŋɩɩ nɛ wɩa tuu jʋʋ, dɩ ʋ dʋndʋŋa nɛ ha hɛ peel-la nyuŋ.

²⁴ Bʋa-la lɛ dɩ lɩɩŋ daboro-la yi lɩɩŋ tʋtʋɔbaanɩŋ. Lɩɩ-peliŋ kaa viviisi, ba fa chaasɛ pel-la nɛ.

²⁵ Sɩɩpʋʋraa, Yesu sii vɛŋ lɩɩŋ nyuŋ a mʋmʋ ʋ harɩ-tooro-la teeŋ.

²⁶ Ba sɩ naʋ dɩ ʋʋ vɛŋ lɩɩŋ nyuŋ, fawʋllʋŋ kɛmba. Ba bʋl dɩ nɩdɩma nɛ aŋ ŋmuŋmoo niiŋ.

²⁷ Ŋɩɩ nɛ Yesu guu bʋla pɩba, “Má nyɩrɛ bɔyɛ. Mɩ-na nɛ. Má sɩ́ leŋe dɩ fawʋllʋŋ kɛmma.”

²⁸ Ŋɩɩ nɛ Pɩɩta bʋl, “Mɩ Tɩɩna, dɩ ŋ nɛ, bʋl dɩ mɩ lɩɩ kɔ ŋ teeŋ lɩɩ-la nyuŋ.”

²⁹ Ŋɩɩ nɛ Yesu bʋl dɩ ʋ kɔ. Ʋ sɩ bʋl ŋɩɩ, Pɩɩta lɩɩ lɩɩŋ daboro-la tʋɔŋ a vɛŋ lɩɩŋ nyuŋ a mʋmʋ Yesu teeŋ.

³⁰ Ama Pɩɩta sɩ bee na lɩɩ-pel-la, fawʋllʋŋ kɛnʋ. Ʋ suomo tutuu lɩɩ-la bʋbʋɔŋ. Ŋɩɩ nɛ ʋ faasa ŋmoo niiŋ a bʋl, “Mɩ Tɩɩna, laamɛ ta.”

³¹ Yesu guu lɩɩsɛ ʋ nɩsɩŋ a yɩa a kɛnʋ aŋ bʋla pʋ, “Ŋ Wɩa laa diiniŋ bɩ yʋgɛ. Bɛɛ nɛ tɩɩ ŋ bɩ mɩ wɩaa laa dii?”

³² Ba sɩ mʋ jʋʋ lɩɩŋ daboro-la dɛrɛ, pel-la kɛrɛ.

³³ Nɩalɩŋ kala sɩ hɛ lɩɩŋ daboro-la tʋɔŋ chʋɔlɛ Yesu aŋ bʋl, “Wʋtɩtɩɩ, ŋ nɛ ŋaa Wɩa Bie.”

Yesu vaarɛ nyanyal tɩɩna Gɛnɛzarɛt lɛ

³⁴ Ŋɩɩ nɛ ba chol a kʋ yi taŋ kʋbala baa yɩrɛ Gɛnɛzarɛt.

³⁵ Nɩalɩŋ sɩ hɛ lee-la na Yesu a jɩŋ arɩ ʋ nɛ. Ba tɩŋ tɩndaarɩŋ pɩ tintee-la sɩ golliba nɩaa ba paa ba nyanyal tɩŋŋaa kala a kaa kɔ Yesu teeŋ.

³⁶ Ba sʋlʋ dɩ ʋ leŋ dɩ nɩalɩŋ sɩɩ wɩɩlʋ digi ʋ gɛrɩŋ niipiniŋ lɛ. Dɩ ba nɛ dige, ba yie duori nɛ.