Matiu 10 - WƖA TENIŊ

Yesu harɩ-tooroo fii arɩ balɩa-la

¹ Ŋɩɩ nɛ Yesu yɩrɛ ʋ harɩ-tooroo fii arɩ balɩa a hɛ dɔŋɔ lɛ a pɩba doluŋ dɩ ba wuo kikiri jɩŋ-bɔŋŋɔɔ aŋ pɛ vɩvaarɛ nɩaa nyanyal dosunuŋ.

² Nɩalɩŋ ʋ sɩ lɩɩsa yɩraa nɛ ŋ-la: Saamɔŋ, ba fa kɛnʋ yɩyɩrɛ Pɩɩta ma nɛ, arɩ ʋ naambie Anduru, arɩ Jeems sɩ ŋaa Zebidi nanʋala, arɩ Jɔɔŋ. Jɔɔŋ fa ŋaa Jeems ŋaana nɛ.

³ Ʋ bɩra lɩɩsɛ Fɩlɩp, arɩ Batolomi, arɩ Tɔmas, arɩ Matiu lampoo laarʋ-la, arɩ Alɩfɩyas nanʋala Jeems, arɩ Tadɩyas,

⁴ arɩ Saamɔŋ Zɛlɔt, arɩ Judas Ɩsɩkarɔt, nɩɩ-la sɩ kʋ ŋaa zɛmbɛ tɩɩna a yallɛ Yesu.

Yesu tɩŋ ʋ harɩ-tooroo fii arɩ balɩa

⁵ Nɩaa deemba fii arɩ balɩa, Yesu nɛ tɩmba ba lɩɩ. Ŋ-la nɛ ʋ bʋla pɩba aŋ ka ba lɩɩ: “Má sɩ́ nɩalɩŋ sɩ bɩ Juu tɩŋŋaa ŋaa tinteeŋ mʋ. Má sɩ́ Samarɩa tinteeŋ ma mʋ.

⁶ Ama má mʋ Iziral tɩŋŋaa teeŋ, nɩaa deemba nagɛ piesee sɩ lɛlɛ nɛ a bɩra bɩ dɩa wɛnɩŋ jɩŋ.

⁷ Má mʋ a bʋla pɩba arɩ Wɩa kuorii-la kpaga nɛ.

⁸ Má vaarɛ nyanyal tɩŋŋaa a chɩsɛ sʋʋnʋŋ a vaarɛ gbegisiŋ a kiri jɩŋ-bɔŋŋɔɔ nɩaa lɛ. Dɩ ma nɛ ŋaa ŋɩɩ, má sɩ́ time kala laa, bɛɛ wɩaa ma ma bɩ kʋŋkala time aŋ laa.

⁹ Má sɩ́ moribiee koru.

¹⁰ Má sɩ́ sʋllɩ-gbansɩŋ koru a kaa vɛŋ wombii-la, a sɩ́ gɛnnɩŋ tʋŋ-bʋlɩa koo nɛntɛŋŋɛɛ tʋŋ-bʋlɩa koru, ma sɩ́ dantɩga ma koru. Dɩ tɩntɩnna nɛ tɩma, ʋ maga dɩ ba timu nɛ.

¹¹ Dɩ ma nɛ mʋ yi tabal koo tabie, má jʋʋ taŋ-la tʋɔŋ a bee chɛ nɩɩ-la sɩ jaŋ wuo laama bil a chʋchʋa dɩɩ-bala-la lɛ halɩɩ dɩ bʋa-la ma sɩ jaŋ lɩɩ taŋ-la lɛ yi.

¹² Dɩ ma nɛ mʋ jʋʋ dɩa kala, má laa sɩpaaŋ chʋɔlɛ dɩa-la nɩaa a bʋl, ‘Dɩa deeŋ nɩaa jaŋ hɔŋ arɩ yarɩfɩɛlaa.’

¹³ Dɩ ba nɛ laama, ba jaŋ kɛŋ yarɩfɩɛlaa. Dɩ ba nɛ bɩ ma laa, yarɩfɩɛla-la jaŋ mɩɩra kɔ ma teeŋ.

¹⁴ Dɩ ma nɛ mʋ nʋʋkala teeŋ, dɩ ʋ pɔ dɩ ma sɩ́ jʋʋ a bɩ ma wɩaa ma jegilee nɩɩ, má lɩɩ dɩa-la lɛ koo taŋ-la lɛ a kpesi ma naasɩŋ hagɩla ta. Ba jaŋ jɩŋ arɩ ba ŋaa wɩɩ nɛ a chei ma lɛ.

¹⁵ Mɩ bʋlaa pɩma arɩ sarɩya chɛ-diiliŋ, Wɩa jaŋ dɔgɩsɛ taŋ-la nɩaa a kɩɩ bʋa-la lɛ ʋ sɩ dɔgɩsɛ Sodom arɩ Gomora nɩaa ŋɩɩ.”

Hɛɛ-la sɩ jaŋ kɔ

¹⁶ Ŋɩɩ nɛ Yesu bɩra bʋl, “Má jegile nɩɩ, ma nagɛ piesee nɛ, mɩɩ tɩmma dɩ ma mʋ guoli guŋgurusuŋ tʋɔŋ. Má saa kɛŋ wʋjɩmɩŋ a nagɛ dɩŋŋaa sɩ kɛŋ wʋjɩmɩŋ ŋɩɩ, aŋ leŋ dɩ ma sɩaa fɩɛlɛ a nagɛ kokosuŋ sɩaa sɩ fɩɛla ŋɩɩ.

¹⁷ Má kɛŋ ma tɩtɩa woruŋ nɩbɔŋŋɔɔ deemba teeŋ. Ba jaŋ kɛmma kaa mʋ nɩalɩŋ sɩ yie hilime vʋvʋʋrɛ wɩaa teeŋ dɩ ba dii ma sarɩya. Ba jaŋ vɩɩrɛma Wɩɩchʋɔlɛ dɩɩsɩŋ lɛ.

¹⁸ A tɩŋ mɩ wɩaa, ba jaŋ kɛmma kaa mʋ kuoroo arɩ taŋ nɩhɩasɩŋ sɩpaaŋ dɩ ma ŋaa mɩ pɛ-naaraa. Ba jaŋ kɛmma kaa mʋ nɩalɩŋ sɩ bɩ Juu tɩŋŋaa ŋaa ma sɩpaaŋ.

¹⁹ Dɩ ba nɛ kɛmma kaa mʋ dɩ ba dii ma sarɩya, má sɩ́ leŋe dɩ ma bɔɩsɩŋ joŋ wɩalɩŋ ma sɩ jaŋ bʋl lɛ a laa ma tɩtɩa. Bʋa-la lɛ Wɩa jaŋ joŋ wʋjɩmɩŋ a hɛ ma nyuŋ lɛ.

²⁰ Wɩalɩŋ ma sɩ jaŋ bʋl, ma dee bɩ jaŋ bʋl. Ma Nyɩmma Wɩa jaŋ leŋ dɩ ʋ Dɩŋ-zɔmʋŋ to ma lɛ a bʋl wɩaa.

²¹ Naambiiriŋ jaŋ kɛŋ dɔŋɔ a kaa mʋ pa dɩ ba kpʋ. Nyɩmmaba ma jaŋ ŋaa ŋɩɩ ba biiriŋ lɛ. Biiriŋ ma jaŋ ŋaa ŋɩɩ a kɛsɛ ba nyɩmmaba arɩ ba naamba a kaa mʋ pa dɩ ba kpʋ.

²² Nʋʋkala jaŋ bɛrɛma a tɩŋ mɩ wɩaa. Ama nɩɩ-la kala sɩ nyalɩma a mʋ dɛrɛ, Wɩa jaŋ laaʋ ta.

²³ Dɩ ba nɩɩ dɔgɩsɛma taŋ lɛ, má lɩɩ a fá mʋ taŋ dɔŋɔ. Mɩ bʋlaa pɩma arɩ ma bɩ jaŋ wuo tɩŋ tɩntɩmɩɩ-la dɛrɛ Iziral tasɩŋ kala lɛ, ka dɩ mɩ-na Nuhuobiine Bie-na kɔ.

²⁴ Sikuuri bie bɩ nɩɩ-la sɩɩ dagʋ ka kɩɩ, nɩɩ-la sɩɩ tɩŋ tɩntɩŋŋaa nʋʋ dɔŋ teeŋ ma bɩ yʋga kɩɩ nɩɩ-la teeŋ ʋ sɩɩ tɩŋ. Tɩntɩnna bɩ ʋ kʋhɩaŋ ka kɩɩ.

²⁵ Ama dɩ sikuuri bile nɛ gʋnnɛ woruŋ, ʋ dɩ nɩɩ-la sɩ dagʋ jaŋ magɛ dɔŋɔ. Dɩ tɩntɩnnʋ-la ma nɛ gʋnnɛ tɩntɩmɩɩ-la dɛrɛ, ʋ dɩ nɩɩ-la sɩ dagʋ kala magɛ dɔŋɔ nɛ. Dɩ ba nɛ saa kɛŋ dɩa tɩɩna kaa yɩrɛ Bɛlizibul (Sɩtaanɩ yɩrɩŋ dɔŋɔ nɛ ŋɩɩ), ŋɩɩ-na ba jaŋ hɛ yɩrɩ-bɔŋŋɔɔ a kɩɩ ŋɩɩ a pɩ ʋ dɩa nɩaa kala.

Nɩɩ-la sɩ maga dɩ la fá

²⁶ Ŋɩɩ wɩaa, ma sɩ́ nuhuobiinee fá. Wɩɩkala sɩ faa jaŋ kʋ lɩɩ pʋlʋmʋŋ, nɩaa ma jaŋ nɩɩ wɩɩ-la sɩ ŋaa wʋfaalɩɩ.

²⁷ Wɩɩkala mɩ sɩ bʋla pɩma birimiŋ tʋɔŋ, ʋ maga dɩ ma bʋlʋ pʋlʋmʋŋ tʋɔŋ. Wɩɩkala mɩ sɩ munso bʋla pɩma birimiŋ tʋɔŋ, má heele bʋlʋ lusuŋ nyuŋ.”

²⁸ Ŋɩɩ nɛ Yesu bɩra bʋl, “Má sɩ́ nɩalɩŋ sɩ jaŋ wuo kpʋ ma yaraa fá, nɩaa deemba bɩ ma dɩma wuo kpʋ. Ama má fá Wɩa. Ʋ nɛ kɛŋ doluŋ dɩ ʋ wuo joŋ ma yaraa arɩ ma dɩnsɩŋ kala a hɛ Wɩa nyiniŋ tʋɔŋ. Mɩ bʋlaa pɩma, má fɩfáʋ.

²⁹ Zaarɩ-kokobiisiŋ balɩa dee ba yie joŋo yallɛ kɔbʋʋ? Ama ba tʋɔŋ kʋbala ma bɩ jaŋ lɛl, see ma Nyɩmma Wɩa sɛyɛ.

³⁰ Wɩa paala jɩŋ ma nyu-pʋnaa kala ma niiŋ nɛ.

³¹ Ŋɩɩ wɩaa, má sɩ́ leŋe dɩ fawʋllʋŋ kɛmma. Ma nɛ paala kɩɩ zaarɩ-kokobii laalɩŋ.

³² Nɩɩ-la kala sɩ jaŋ wuo bʋl nɩaa tʋɔŋ arɩ ʋ ŋaa mɩ nʋʋ nɛ, mɩ ma jaŋ bʋl ŋɩɩ a tɩgɛ ʋ lɛ mɩ Nyɩmma Wɩa sɩ hɛ Wɩa-jaŋ lɛ sɩpaaŋ.

³³ Ama nɩɩ-la kala sɩ vɩamɛ nɩaa tʋɔŋ, mɩ ma jaŋ vɩaʋ mɩ Nyɩmma Wɩa sɩ hɛ Wɩa-jaŋ lɛ sɩpaaŋ.

Yesu sɩ ʋ bɩ dʋnɩa kɔ dɩ nɩaa sɩŋ, ama dɩ ba yuo dɔŋɔ

³⁴ Ma fa bɩɩna mɩ kɔ dʋnɩa dɩ nɩaa sɩŋ nɛɛ? Aɩ, yuosuŋ nɛ mɩ kaa kɔ.

³⁵ Mɩ kɔ dɩ nɩaa pɔrɛ dɔŋɔ lɛ nɛ. Bie jaŋ kɛŋ ʋ nyɩmma dɩ ba yuo dɔŋɔ. Tolo ma jaŋ kɛŋ ʋ naaŋ dɩ ba yuyuo dɔŋɔ. Bii-haala ma jaŋ kɛŋ ʋ bala naaŋ dɩ ba yuyuo dɔŋɔ.

³⁶ Nuhuobiine dʋndɔŋŋɔɔ nɛ ŋaa ʋ tɩtɩa dɩa nɩaa.

³⁷ Nɩɩ-la kala sɩ cho ʋ nyɩmma arɩ ʋ naaŋ a kɩɩmɛ, ʋ bɩ maga dɩ ʋ ŋaa mɩ harɩ-tooru. Nɩɩ-la kala ma sɩ cho ʋ bie koo ʋ tolo a kɩɩmɛ, ʋ bɩ maga dɩ ʋ ŋaa mɩ harɩ-tooru.

³⁸ Nɩɩ-la kala sɩ bɩ ʋ tɩtɩa daagɛsɛ baasa a to mɩ harɩŋ, ʋ bɩ maga dɩ ʋ ŋaa mɩ harɩ-tooru.

³⁹ Nɩɩ-la kala sɩɩ chɛ ʋ tɩtɩa mɩɩsɩŋ, ʋ jaŋ joŋ ʋ mɩɩsɩŋ ta. Ama nɩɩ-la kala sɩ vɩa ʋ mɩɩsɩŋ ta a tɩŋ mɩ wɩaa, ʋ jaŋ kɛŋ mɩɩsɩŋ.

Time-la Wɩa sɩ jaŋ joŋo tinla

⁴⁰ Nɩɩ-la kala sɩ kɛmma woruŋ, ʋ tɩɩna kɛŋ mɩ ma woruŋ nɛ. Nɩɩ-la ma kala sɩ kɛmmɛ woruŋ, ʋ kɛŋ Tɩɩna ma sɩ tɩmmɛ woruŋ nɛ.

⁴¹ Nɩɩ-la kala sɩ laa Wɩa tɩntɩnnʋ a kɛnʋ woruŋ ʋ dɩa lɛ a tɩŋ ʋ sɩ ŋaa Wɩa tɩntɩnnʋ, ʋ jaŋ laa ʋ time. Time-la Wɩa sɩ jaŋ joŋo timu, ʋ jaŋ magɛ time-la Wɩa sɩ jaŋ tiŋ ʋ tɩntɩnnʋ-la. Nɩɩ-la kala ma sɩ laa tʋɔpʋl tɩɩna bil a tɩŋ ʋ sɩ ŋaa tʋɔpʋl tɩɩna wɩaa, time-la Wɩa sɩ jaŋ joŋo timu, ʋ jaŋ magɛ time-la ʋ sɩ jaŋ joŋo tiŋ tʋɔpʋl tɩɩna-la.

⁴² Nɩɩ-la ma kala sɩ ŋaa lɩɩ-fɩɛla pɩ mɩ harɩ-tooroo deemba tʋɔŋ kʋbie a tɩŋ ʋ sɩɩ to mɩ harɩŋ wɩaa, ʋ tɩɩna ma jaŋ laa ʋ time.”