Maak 9 - WƖA TENIŊ

¹ Ŋɩɩ nɛ Yesu bɩra bʋla pɩ ʋ harɩ-tooroo, “Wʋtɩtɩɩ nɛ mɩ bʋlaa pɩma, nɩaa dɔnsʋŋ hɛ daha, ba bɩ jaŋ sʋʋ, see dɩ ba na Wɩa kuorii-la chɩna dɛrɛ arɩ doluŋ.”

Yesu bɩrɩma

² Tapʋlaa balɩdʋ sɩ bala, Yesu kɛŋ Pɩɩta arɩ Jeems arɩ Jɔɔŋ, a kaa mʋ jɩl peel-bal kʋbala nyuŋ ba hɛ nɩmɛ ba dʋndʋŋa. Nɩmɛ nɛ Yesu bɩrɩmɛ ba sɩpaaŋ.

³ Ʋ gɛnnɩŋ kala pʋllɛ kɩŋkɛŋ a tʋtʋl. Gɛrɩ-chɛsɩrʋ kala bɩ jaŋ wuo chɛsɛ gɛnnɩŋ dɩ ba pʋlla nagɛ ŋɩɩ.

⁴ Ɩlaaja arɩ Mosis kʋ lɩɩ ba sɩpaaŋ a chɩna bʋbʋl wɩaa Yesu teeŋ.

⁵ Ŋɩɩ nɛ Pɩɩta bʋla pɩ Yesu, “La kʋhɩaŋ, ʋ ŋaa wʋzɔŋ nɛ arɩ la sɩ hɛ daha. Leŋ dɩ la hɛ lɛŋŋɛɛ batori, dɩ ŋ kɛŋ dɔŋɔ, dɩ Mosis ma kɛŋ dɔŋɔ, dɩ Ɩlaaja ma kɛŋ dɔŋɔ.”

⁶ Fawʋllʋŋ fa kɛmba nɛ woruŋ, ʋ fa bɩ jɩŋ wɩɩ-la kala ʋ sɩ jaŋ bʋl.

⁷ Ŋɩɩ nɛ duoŋ-bɩlɩmbaanɩŋ kʋ tɔba. Ka yikoro lɩɩ duoŋ-bɩlɩmbaaŋ-la tʋɔŋ a bʋbʋl, “Mɩ Bii-chooluŋ nɛ ŋ-la. Má jegile nɩɩ ʋ teeŋ.”

⁸ Ba guu beŋ leriŋ, ba bɩ nʋʋkala na see Yesu dʋndʋŋa.

⁹ Ba sɩ lɩɩ peel-la nyuŋ kʋʋ tuu, ŋɩɩ nɛ Yesu bʋla pɩba, “Mɩ bɩ chɛ dɩ ma bʋl wɩɩ-la ma sɩ na, see dɩ mɩ-na Nuhuobiine Bie sii sʋʋŋ lɛ.”

¹⁰ Ŋɩɩ nɛ ba sɛɩ a kɛŋ wɩɩ-la ba tʋɔŋ lɛ aŋ pɩpɩɛsɛ dɔŋɔ, “Sʋʋŋ lɛ siiniŋ bʋbʋɔŋ nɛ bɛɛ?”

¹¹ Ŋɩɩ nɛ ba pɩɛsɛ Yesu, “Bɛɛ nɛ tɩɩ Wɩa teniŋ kerichiba bʋl arɩ Ɩlaaja nɛ jaŋ laa sɩpaaŋ kɔ, aŋ ka dɩ Wɩa Bie-na kɔ?”

¹² Ʋ bʋla pɩba, “Wʋtɩtɩɩ, Ɩlaaja jaŋ sɛnɛ laa sɩpaaŋ kɔ a kɛŋ kʋŋkala wasa bil. Ba saa ŋmʋnsa bil Wɩa teniŋ tʋɔŋ a mʋ tɩgɛ mɩ-na Nuhuobiine Bie lɛ dɩ mɩ jaŋ na hɛɛŋ kɩŋkɛŋ, dɩ ba jaŋ bemmi a nagɛ nɩpɛɩ. Bɛɛ nɛ tɩɩ ba ŋmʋnsɛ ŋɩɩ?

¹³ Lɛɛlɛ mɩ jaŋ bʋla pɩma arɩ Ɩlaaja paala kɔ nɛ. Ba ŋaaʋ ŋɩɩ kala ba sɩɩ chɛ. Ba fa ŋmʋnsɛ ŋɩɩ nɛ a tɩgɛ ʋ lɛ Wɩa teniŋ tʋɔŋ.”

Yesu kiri jɩŋ-bɔmʋŋ bie lɛ

¹⁴ Ba sɩ kɔ ʋ harɩ-tooroo kʋkaana-la leriŋ, ba na dɩ nɩaa yʋga a hilimi nɩmɛ. Ba dɩ Wɩa teniŋ kerichiba kɛŋ wɩaa lɩlɛrɛ.

¹⁵ Nɩalɩŋ sɩ na Yesu dɩ ʋʋ kɔ, ba guu hirigi a sii fá a mʋ chemu a chʋɔlʋ.

¹⁶ Ŋɩɩ nɛ ʋ pɩɛsɛba, “Wʋbɛɛ nɛ ma hilimi ŋɩɩ a kaa lɩlɛrɛ?”

¹⁷ Nɩalɩŋ dɔŋɔ bʋl, “La kʋhɩaŋ, mɩ bie nɛ mɩ kaa kɔ ŋ teeŋ. Jɩŋ-bɔŋ nɛ kɛnʋ. Ʋ bɩrɩmɛ taŋɩɩ.

¹⁸ Ʋ nɛ sii ʋ lɛ na-kala ʋ yie joŋu lo tinteeŋ nɛ, nantʋɔ-fʋnfʋga tɔ ʋ niiŋ, ʋ chɩchaŋ ʋ nyɩlaa a terigi. Mɩ sʋl ŋ harɩ-tooroo dɩ ba kiri jɩŋ-bɔŋ-la ʋ lɛ, ama ba bɩ wuo kiri.”

¹⁹ Ŋɩɩ nɛ Yesu bʋla pɩba, “Ma lɛɛlɛ nɩaa, ma bɩ Wɩa laa dii. Ɛɛ nɛ mɩ jaŋ hɛ ma teeŋ a diene magɛ? Ɛɛ nɛ mɩ jaŋ nyalɩmɛ a diene magɛ? Má kɛŋ bile kaa kɔ mɩ teeŋ.”

²⁰ Ŋɩɩ nɛ ba kɛŋ bile kaa kɔ ʋ teeŋ. Jɩŋ-bɔŋ-la sɩ kʋ na Yesu, ʋ kɛŋ bile terigi, ʋ tuu tel tinteeŋ a bibilimi, nantʋɔ-fʋnfʋga kʋ tɔ ʋ niiŋ.

²¹ Ŋɩɩ nɛ Yesu pɩɛsɛ ʋ nyɩmma, “Wɩɩŋ deeŋ sɩ jʋʋ diene magɛ ɛɛ nɛ?” Ʋ bʋl, “Ʋ hambiiriŋ kala lɛ nɛ ʋ suomi.

²² Bʋa dɔŋɔ ʋ yie joŋu lo nyiniŋ lɛ arɩ lɩɩŋ lɛ a chɩchɛ dɩ ʋ kpʋʋ. Ŋ-na sɩ wuo wɩɩ-na kala ŋɩŋaa, fá la nenige aŋ pɛ la lɛ.”

²³ Ŋɩɩ nɛ Yesu pɩɛsʋ, “Bɛɛ nɛ tɩɩ ŋ sɩ dɩ mɩ nɛ jaŋ wuo? Nɩɩ-la kala sɩ laa Wɩa dii, ʋ jaŋ wuo ŋaa wɩɩ na-kala.”

²⁴ Ŋɩɩ nɛ bile nyɩmma sii chɩŋ a faasa bubunsi, “Mɩ laa Wɩa dii nɛ, ama ʋ bɩ yʋgɛ. Pɛ mɩ lɛ dɩ mɩ laaʋ dii a yʋgɛ.”

²⁵ Yesu sɩ na dɩ nɩ-daŋ fa kʋ hihilimiba, ʋ kpɩa jɩŋ-bɔŋ-la lɛ, “Jɩŋ-taŋɩɩ, mɩ nɛ bʋla, kʋ lɩɩ bile lɛ. Pʋpɔ dɩ ŋ maachie bɩra sɩ́ ʋ jʋʋ.”

²⁶ Jɩŋ-bɔŋ-la chɩɩrɛ aŋ kɛnʋ faasa terigi aŋ lɩɩ ʋ lɛ, ka bile nagɛ dɩ ʋ sʋba. Nɩalɩŋ jesiŋ kala bʋl, “Bile sʋba nɛ.”

²⁷ Ama Yesu mʋ kɛŋ ʋ nɩsɩŋ lɛ a chʋʋlɛ ʋ sii chɩŋ.

²⁸ Ŋɩɩ nɛ Yesu arɩ ʋ harɩ-tooroo jʋʋ dɩa. Ba lʋara pɩɛsʋ, “Bɛɛ nɛ tɩɩ la-na bɩ jɩŋ-bɔŋ-la wuo kiri?”

²⁹ Ʋ bʋla pɩba, “Nʋʋkala bɩ jɩŋ-bɔŋ-la sɩ nagɛ ŋɩɩ wuo kire tɩta, see ʋ chʋɔlɛ Wɩa woruŋ.”

Yesu bɩra bʋl ʋ sʋʋŋ wɩaa

³⁰ Ŋɩɩ nɛ ba sii lɩɩ lee-la a mʋ to Galilii tinteeŋ. Yesu bɩ cho dɩ nʋʋkala jɩŋ lee-la ʋ sɩ hɛ,

³¹ bɛɛ wɩaa ʋʋ dagɛ ʋ harɩ-tooroo nɛ arɩ ba jaŋ kɛŋ ʋ-na, Nuhuobiine Bie a hɛ nɩaa nɩsɩŋ lɛ dɩ ba kpʋʋ, ka dɩ ʋ sii sʋʋŋ lɛ tapʋlaa batori chɛɛŋ a kɛŋ mɩɩsɩŋ.

³² Ama ba fa bɩ wɩɩ-la ʋ sɩ bʋla bʋbʋɔŋ jɩŋ aŋ fɩfá fawʋllʋŋ dɩ ba pɩɛsʋ.

Yesu harɩ-tooroo chɛ dɩ ba jɩŋ ba tʋɔŋ kʋhɩaŋ

³³ Ŋɩɩ nɛ ba sii kɔ Kapɛnam. Ba sɩ jʋʋ dɩa, Yesu pɩɛsɛ ʋ harɩ-tooro-la, “Wʋbɛɛ nɛ ma fa kaa lɩlɛrɛ ŋɩɩ wombiiŋ lɛ?”

³⁴ Ŋɩɩ nɛ ba tɔrɛ ba niiŋ, bɛɛ wɩaa ba fa kɛŋ ba tʋɔŋ kʋhɩaŋ wɩaa nɛ lɩlɛrɛ.

³⁵ Ŋɩɩ nɛ Yesu hɔŋ aŋ yɩrɛ ʋ harɩ-tooro-la fii arɩ balɩa a bʋla pɩba, “Nɩɩ-la sɩɩ chɛ dɩ ʋ ŋaa ma tʋɔŋ kʋhɩaŋ, see dɩ ʋ kʋ ŋaa ma tʋɔŋ hambie a tɩmaa pɩ ma kala.”

³⁶ Ŋɩɩ nɛ ʋ kɛŋ bii-bie a kaa kʋ bil ba tʋtʋɔbaanɩŋ a guoru aŋ bʋla pɩba,

³⁷ “Dɩ nʋʋ nɛ kɛŋ bii-bie deeŋ dɔŋɔ woruŋ a tɩŋ mɩ wɩaa, mɩ nɛ ʋ kɛŋ woruŋ ŋɩɩ. Nɩɩ-la ma kala sɩ kɛmmɛ woruŋ, mɩ dʋndʋŋa dee ʋ kɛŋ woruŋ ŋɩɩ. Nɩɩ-la sɩ tɩmmɛ ma nɛ ʋ kɛŋ woruŋ ŋɩɩ.”

Baala kiri jɩŋ-bɔŋŋɔɔ Yesu yɩrɩŋ lɛ

³⁸ Ŋɩɩ nɛ Jɔɔŋ bʋla pɩ Yesu, “La Kʋhɩaŋ, la na baal kʋbala dɩ ʋʋ kiri jɩŋ-bɔŋŋɔɔ nɩaa lɛ ŋ yɩrɩŋ lɛ. La kiru dɩ ʋ sɩ́ ŋɩɩ ŋaa, bɛɛ wɩaa ʋ bɩ la dɔŋɔ ŋaa.”

³⁹ Ama Yesu bʋla pɩba, “Má sɩ́ ʋ kiru. Dɩ nʋʋ nɛ ŋaa wʋkpuŋkpere kala mɩ yɩrɩŋ lɛ, ʋ chie bɩra bɩ jaŋ chei mɩ yɩrɩŋ.

⁴⁰ Nɩɩ-la kala sɩ bɩ la harɩŋ lɩa, ʋ ŋaa la dɔŋɔ nɛ.

⁴¹ Wʋtɩtɩɩ mɩ bʋlaa pɩma, dɩ nʋʋ nɛ joŋ gbaŋa ŋaa lɩɩŋ a pɩ ma kʋŋ a tɩŋ ma sɩɩ tomi wɩaa, ʋ jaŋ laa ʋ time.

Wɩalɩŋ sɩ jaŋ kɛnɩŋ hɛ wʋbɔmʋŋ lɛ

⁴² Nɩɩ-la kala sɩ na hambiisi-la sɩɩ tomi dɔŋɔ a nyɩsʋ dɩ ʋ ŋaa wʋbɔmʋŋ, dɩ ba nɛ joŋ nɔmʋŋ a vɔɔ laalɛ ʋ baŋŋaa lɛ a joŋu yuo hɛ mʋgʋ-balɩŋ tʋɔŋ, ŋɩɩ nɛ kpɩa ʋ sɩ weye.

⁴³ Dɩ ŋ nɩsɩŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, kere ta. Ŋ sɩ jaŋ jʋʋ Wɩa kuorii-la tʋɔŋ arɩ nakuuŋ, ʋ nɛ kpɩa ŋ sɩ kɛŋ napilimee aŋ jʋʋ Wɩa nyiniŋ. Lee-la nyiŋ-la bɩ jaŋ dɩsɛ. [

⁴⁴ Lee-la nanchʋɔlaa jaŋ dii ŋ yaraa deeŋ deeŋ ba bɩ jaŋ sʋʋ, ka nyiŋ-la ma bɩ jaŋ dɩsɛ.]

⁴⁵ Dɩ ŋ naaŋ nɩɩ chɛ ʋ kɛnɩŋ hɛ wʋbɔmʋŋ lɛ, kere ta. Ŋ sɩ jaŋ jʋʋ Wɩa kuorii-la tʋɔŋ arɩ naakuuŋ, ʋ nɛ kpɩa ba sɩ jaŋ joŋuŋ yuo hɛ Wɩa nyiniŋ lɛ arɩ naapilimee. [

⁴⁶ Lee-la nanchʋɔlaa jaŋ dii ŋ yaraa deeŋ deeŋ ba bɩ jaŋ sʋʋ, ka nyiŋ-la ma bɩ jaŋ dɩsɛ.]

⁴⁷ Dɩ ŋ sɩɩŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, lɩɩsa ta. Ŋ sɩ jaŋ jʋʋ Wɩa kuorii-la tʋɔŋ arɩ sɩɩ-togo, ʋ nɛ kpɩa ba sɩ joŋuŋ yuo hɛ Wɩa nyiniŋ lɛ arɩ sɩaa balɩa.

⁴⁸ Lee-la nanchʋɔlaa jaŋ dii ŋ yaraa deeŋ deeŋ ba bɩ jaŋ sʋʋ, ka nyiŋ-la ma bɩ jaŋ dɩsɛ.

⁴⁹ Wɩa jaŋ leŋ dɩ nʋʋkala na hɛɛŋ aŋ-na na wʋzɔmʋŋ.

⁵⁰ Yɩsɩŋ sɩma, ama dɩ ʋ nɛ sɛbɩsɛ, ŋ bɩra bɩ jaŋ wuo ŋaa dɩ ʋ sɩŋ. Má leŋ dɩ ma tʋɔŋ sɩŋ, arɩ yɩsɩŋ sɩ sɩma ŋɩɩ, aŋ kala kɛŋ nii-bala.”