Maak 6 - WƖA TENIŊ

Nazarɛt nɩaa vɩa Yesu

¹ Ŋɩɩ nɛ Yesu lɩɩ nɩmɛ a mʋ ʋ jaŋ Nazarɛt. Ʋ harɩ-tooroo ma to mʋ.

² Chɛ-wiesii-la chɛɛŋ ʋ mʋ jʋʋ Wɩɩchʋɔlɛ dɩa a dɩdagɛ nɩaa. Ba sɩ nɩa, ba jesiŋ kala hirigi a bʋl, “Ɛɛ nɛ ʋ ŋaa a jɩŋ wɩaa deemba? Kʋbɛɛ nɛ pʋ wʋjɩmɩŋ deeŋ? Ɛɛ nɛ ʋ wuo ŋɩŋaa wʋmagɩlaa deemba?

³ Kapɩnta-la dee ŋɩɩ? Mɛɛrɩ nanʋala dee? Jeems arɩ Josɛf arɩ Judas arɩ Saamɔŋ naambie dee? Ʋ dɩhaalaa na dee bɩ la tʋɔŋ hɛ ŋ-laa?” Ŋɩɩ nɛ ba vɩaʋ.

⁴ Yesu bʋla pɩba, “Wɩa wʋlaabʋllʋ nɛ mʋ lee-kala, ba yie zizilu nɛ, aŋ ka ʋ jaŋ nɩaa arɩ ʋ dɩa nɩaa sɩɩŋ bɩ ʋ ka su.”

⁵ A tɩŋ ba sɩ́ bɩ Wɩa laa dii, ʋ bɩ wʋmagɩl kala wuo ŋaa lee-la, ʋ ta joŋ ʋ nɩsɩŋ nɛ daŋ nyanyal tɩŋŋaa baŋmɛnɛ lɛ a vaarɛba.

⁶ Ʋ kperi Yesu arɩ ba sɩ bɩ ʋ laa dii. Ŋɩɩ nɛ ʋ sii a mʋ gɔllɛ tasɩŋ a dɩdagɛ nɩaa.

Yesu tɩŋ ʋ harɩ-tooroo fii arɩ balɩa

⁷ Ʋ yɩrɛ ʋ harɩ-tooroo fii arɩ balɩa a hilimi a tɩmba balɩa balɩa a pɩba doluŋ dɩ ba wuo jɩŋ-bɔŋŋɔɔ. Ŋɩɩ nɛ ʋ bʋla pɩba,

⁸ “Má sɩ́ kʋŋkala kaa pɛ vɛŋ wombii-la, see ma dantɩgɩsɩŋ dʋndʋŋa. Má sɩ́ kʋdiilee kaa mʋ. Má sɩ́ sʋllɩ-gbaŋa ma koru. Má sɩ́ moribiee ma koru.

⁹ Ama má hɛ nɛntɛŋŋɛɛ, a laalɛ gɛrɩ-bala-bala, aŋ sɩ́ gɛrʋ dɔŋ koro pɛ.

¹⁰ Dɩ ma nɛ mʋ jʋʋ taŋ kala, dɩa-la nɩaa sɩ laama, má hɛ dɩa-la lɛ halɩɩ dɩ bʋa-la lɛ ma sɩ jaŋ lɩɩ taŋ-la lɛ yi.

¹¹ Dɩ ma nɛ mʋ taŋ kala, dɩ taŋ-la nɩaa nɛ bɩ ma laa koo a bɩ ma wɩalɩŋ jegile nɩɩ, má kiele mʋ. Dɩ ma nɛ lɩa, má kpesi ma naasɩŋ hagɩla ta. Ba jaŋ jɩŋ arɩ ba ŋaa wɩɩ nɛ a cheima.”

¹² Ŋɩɩ nɛ ba lɩɩ mʋ bʋl Wɩa wɩaa pɩ nɩaa dɩ ba bɩrɩma lɩɩ ba wʋbɔŋŋɔɔ lɛ.

¹³ Ba kiri jɩŋ-bɔŋŋɔɔ ma a yʋgɛ nɩaa lɛ, aŋ joŋ nʋʋŋ ma a tɩsɛ nyanyal tɩŋŋaa yʋgɛ ba duori.

Ba keri Jɔɔŋ Wɩa lɩɩ-fooru-la nyuŋ

¹⁴ Ŋɩɩ nɛ Yesu yɩrɩŋ teeli lee na-kala. Kuoro Hɛrɔd ma nɩɩ ʋ wɩaa. Nɩaa dɔnsʋŋ sɩ, “Ʋ nɛ ŋaa Jɔɔŋ, Wɩa lɩɩ-fooru-la. Wɩa chɩsʋ sʋʋŋ lɛ nɛ. Ŋɩɩ nɛ tɩɩ ʋ kɛŋ doluŋ a ŋɩŋaa wʋmagɩlaa deemba.”

¹⁵ Ka dɔnsʋŋ ma sɩ, “Ʋ naga Ɩlaaja nɛ.” Dɔnsʋŋ ma sɩ, “Ʋ ŋaa Wɩa wʋlaabʋllʋ nɛ a nagɛ faafaa Wɩa wʋlaabʋlla-la dɔŋɔ.”

¹⁶ Kuoro Hɛrɔd sɩ nɩɩ ʋ wɩaa ʋ bʋl, “Jɔɔŋ nɛ ŋɩɩ. Ʋ nyuŋ nɛ mɩ ŋaa ba keri ŋɩɩ. Ʋ nɛ sii sʋʋŋ lɛ ŋɩɩ.”

¹⁷ Hɛrɔd tɩtɩa nɛ fa leŋe ba kɛŋ Jɔɔŋ tɔ dɩa. Ʋ ŋaa ŋɩɩ a tɩŋ ʋ sɩ laa ʋ naambie Fɩlɩp haala Hɛrɔdɩas jaa nɛ Jɔɔŋ bʋl ŋɩɩ bɩ wombiiŋ ŋaa.

¹⁸ Jɔɔŋ fa bʋla pɩ Hɛrɔd, “Ʋ bɩ wombiiŋ ŋaa dɩ ŋ laa ŋ naambie haala jaa.”

¹⁹ Ʋ sɩ bʋl ŋɩɩ Hɛrɔdɩas kɛŋ ʋ tʋɔŋ a chɩchɛ wombiiŋ dɩ ʋ kpʋ Jɔɔŋ. Ama ʋ bɩ wombiiŋ na,

²⁰ bɛɛ wɩaa Hɛrɔd faa fá Jɔɔŋ nɛ a ŋaa ba pɔʋ woruŋ. Ʋ jɩma dɩ Jɔɔŋ fa ŋaa tʋɔpʋl tɩɩna nɛ a bɩ wʋcheeli kala kɛnɛ. Wɩalɩŋ kala Jɔɔŋ fa sɩɩ bʋl kperu nɛ, arɩ ŋɩɩ kala ʋ ha cho dɩ ʋ jegile nɩɩba.

²¹ Kuoro Hɛrɔd chɛ-lʋlʋŋ tapʋlʋŋ bɩra yi. Bʋa-la lɛ nɛ Hɛrɔdɩas na wombiiŋ dɩ ʋ kpʋ Jɔɔŋ. Hɛrɔd ŋaa kʋdiilee yʋgɛ a kɛŋ ʋ tɩntɩnnɩ-hɩasɩŋ arɩ ʋ laalɩyuoro-hɩasɩŋ arɩ Galilii nɩbalaa kala, ba kala kɔ a hɔnɔ didii kɩaa.

²² Ba hɔnɔ dɩ Hɛrɔdɩas tolo nɛ kʋ jʋʋ ŋɩɩ a gʋgʋa. Hɛrɔd arɩ nɩalɩŋ kala tʋɔŋ tɔrɛ ʋ nyuŋ. Ŋɩɩ nɛ Hɛrɔd bʋla pʋ, “Kʋ-la na-kala ŋ sɩɩ chɛ, pɩɛsɛmɛ mɩ jaŋ pɩŋ.”

²³ Ʋ paala ŋmɩɛsɛ nɛ a bʋl, “Kʋ-la na-kala ŋ sɩɩ chɛ, pɩɛsɛmɛ, mɩ jaŋ pɩŋ. Dɩ ŋ nɩɩ chɛ mɩ tinteeŋ kpaa magɛ dɔŋɔ ma, mɩ jaŋ pɩŋ.”

²⁴ Hantolibie-la lɩɩ a pɩɛsɛ ʋ naaŋ, “Mɩ bʋl bɛɛ kʋŋ nɛ mɩɩ chɛ?” Ŋɩɩ nɛ Hɛrɔdɩas sɩ, “Bʋla pʋ arɩ ŋŋ chɛ Jɔɔŋ Wɩa lɩɩ-fooru-la nyuŋ nɛ.”

²⁵ Tolo-la mɩɩrɛ lɩma lɩma a mʋ kuoro teeŋ a bʋla pʋ, “Mɩɩ chɛ dɩ ŋ keri Jɔɔŋ Wɩa lɩɩ-fooru-la nyuŋ nɛ a hɛ pɩrata lɛ kʋ pɩmɛ lɛɛlɛ.”

²⁶ Kuoro sɩ nɩɩ wɩɩ-la, ʋ tʋɔŋ kala chei. Ama ʋ sɩ ŋmɩɛsa ŋɩɩ, nɩalɩŋ kala nɩɩ, ʋ bɩra bɩ ʋ niiŋ wuo bɩrɩmɛ.

²⁷ Ŋɩɩ nɛ ʋ tɩŋ laalɩyuoro-la sɩɩ pɔʋ dɔŋɔ dɩ ʋ mʋ keri Jɔɔŋ nyuŋ kaa kɔ. Laalɩyuoru-la mʋ lee-la ba sɩ kɛŋ Jɔɔŋ mʋ tɔ a keri ʋ nyuŋ

²⁸ a hɛ pɩrata lɛ a kaa kʋ pɩ tolo-la. Ʋ laa a kaa mʋ pɩ ʋ naaŋ.

²⁹ Jɔɔŋ harɩ-tooro-la sɩ nɩɩ wɩɩ-la, ba sii kɔ a laa ʋ kʋsʋʋŋ a kaa mʋ hugi.

Yesu pɩ nɩaa bʋɩ banɔŋ kʋdiilee

³⁰ Yesu harɩ-tooroo mɩɩra kɔ Yesu teeŋ a bʋl wɩalɩŋ kala ba sɩ ŋaa arɩ wɩalɩŋ kala ba sɩ daga a pʋ.

³¹ Nɩaa fa yʋga nɛ, dɔnsʋŋ lɩlɩɩ, ka dɔnsʋŋ ma kʋ jʋjʋʋ. Yesu arɩ ʋ harɩ-tooroo paala bɩ chɩnɩŋ na dɩ ba dii kɩaa. Ŋɩɩ nɛ ʋ bʋla pɩba, “Má leŋ dɩ la mʋ lee-la nɩaa sɩ tuo dɩ ma wiesi mʋa.”

³² Ŋɩɩ nɛ ba sii jʋʋ lɩɩŋ daboro a mʋ lee-la nɩaa sɩ tuo.

³³ Ama nɩaa yʋgɛ a naba a wuo jɩŋ dɩ ba nɛ. Nɩaa lɩɩ tasɩŋ yʋgɛ a fá mʋ lee-la Yesu fa sɩɩ mʋ a laa sɩpaaŋ yi nɩmɛ.

³⁴ Yesu sɩ kʋ lɩɩ lɩɩŋ daboro-la lɛ, ʋ na nɩ-daŋ dɩ ba hɔnɔ nenige kala kɛnʋ. Nɩalɩŋ fa nagɛ piesee sɩ bɩ dɩdaara kɛnɛ nɛ. Ŋɩɩ nɛ ʋ sii a dagɛba wɩaa yʋgɛ.

³⁵ Dɩdaanɩŋ kʋ yi, ʋ harɩ-tooroo kɔ ʋ teeŋ a bʋla pʋ, “Leriŋ deeŋ ŋaa gɩrɩŋ nɛ, ka wɩa fɩɛla ŋ-la.

³⁶ Ta nɩalɩŋ dɩ ba mʋ tasɩŋ arɩ bagɩsɩŋ sɩ kpagɛ daha a mʋ yɔɔ kʋdiilee a dii.”

³⁷ Yesu bʋl, “Má chɛ kʋdiilee pɩba dɩ ba dii.” Ba pɩɛsʋ, “Ŋŋ chɛ dɩ la kɛŋ siidi bʋɩ balɩa a kaa mʋ yɔɔ kʋdiilee a kaa kʋ pɩba dɩ ba dii?”

³⁸ Ʋ pɩɛsɛba, “Boroboro baŋmɛɛ nɛ ma kɛŋ? Má mʋ na.” Ba mʋ aŋ mɩɩra kʋ bʋl, “Banɔŋ nɛ arɩ chenfilee balɩa.”

³⁹ Ŋɩɩ nɛ Yesu bʋl dɩ ba leŋ dɩ nɩalɩŋ kala gulimo hɔŋ hɔŋ bugoo ya-fɩɛlɩŋ nyuŋ.

⁴⁰ Ŋɩɩ nɛ nɩalɩŋ gulimo hɔŋ hɔŋ bugoo, dɔnsʋŋ hɔŋ zɔlɔ zɔlɔ, dɔnsʋŋ ma mahɩŋ balɩa arɩ fii fii.

⁴¹ Ŋɩɩ nɛ ʋ joŋ boroboro-la banɔŋ arɩ chenfilee balɩa-la a wʋla beŋ wɩa-nyuŋ aŋ lɔllɛ Wɩa aŋ kaa chɔgɛ a pɩ ʋ harɩ-tooroo. Ba laa a kaa mʋ kpaa nɩalɩŋ. Ʋ joŋ chenfilee balɩa-la ma a kaa kpaa ba kala, ba dii.

⁴² Ba kala dii a vɔgɛ,

⁴³ ka ʋ harɩ-tooroo paa boroboroba-la arɩ chenfile-la kʋkaanaa a su sinsiŋ fii arɩ balɩa.

⁴⁴ Nɩalɩŋ sɩ dii kɩalɩŋ, ba tʋɔŋ baalaa fa ŋaa bʋɩ banɔŋ nɛ.

Yesu vɛŋ lɩɩŋ nyuŋ

⁴⁵ Ŋɩɩ nɛ Yesu guu leŋ ʋ harɩ-tooroo mʋ jʋʋ lɩɩŋ daboro a laa sɩpaaŋ duoro chol mʋga cholo a mʋ Bɛtɩsaada. Ka ʋ ta nɩ-daŋ-la ba viiri.

⁴⁶ Ʋ sɩ ta nɩalɩŋ, ʋ mʋ jɩl peel kʋbala nyuŋ dɩ ʋ chʋɔlɛ Wɩa.

⁴⁷ Wɩa tuu jʋʋ dɩ lɩɩŋ daboro-la ha hɛ lɩɩŋ tʋtʋɔbaanɩŋ, aŋ ka ʋ dʋndʋŋa ha hɛ lɩɩŋ niiŋ.

⁴⁸ Ŋɩɩ nɛ Yesu bee na dɩ peliŋ ka lu a pɔ dɩ lɩɩŋ daboro-la sɩ́ mʋ. Ʋ harɩ-tooroo duori duori lɩɩŋ daboro-la lɔl. Sɩɩpʋʋraa ʋ sii a vɛŋ lɩɩŋ nyuŋ a mʋmʋ a kʋ kpagɛba a chɩchɛ dɩ ʋ kieliba bal.

⁴⁹ Ba sɩ naʋ dɩ ʋʋ vɛŋ lɩɩŋ nyuŋ, ba bɩɩna dɩ nɩdɩma nɛ, fawʋllʋŋ kɛmba, ba ŋmoo niiŋ,

⁵⁰ bɛɛ wɩaa ba kala fa naʋ fawʋllʋŋ kɛmba nɛ. Ŋɩɩ nɛ ʋ guu bʋla pɩba, “Má nyɩrɛ bɔyɛ. Mɩ-na nɛ. Má sɩ́ leŋe dɩ fawʋllʋŋ kɛmma.”

⁵¹ Ŋɩɩ nɛ ʋ kʋ jʋʋ ba teeŋ lɩɩŋ daboro-la lɛ. Pel-la kɛrɛ. Ʋ ŋaaba wʋkpuŋkpere.

⁵² Ba fa na Yesu kɛŋ boroboro banɔŋ a kpaa nɩaa bʋɩ banɔŋ nɛ, ka ba ha bɩ ʋ wɩɩ-la bʋbʋɔŋ jɩŋ. Ba sɩaa ha bɩ suro.

Yesu vaarɛ nyanyal tɩŋŋaa Gɛnɛzarɛt lɛ

⁵³ Ŋɩɩ nɛ ba chol a kʋ yi taŋ kʋbala baa yɩrɛ Gɛnɛzarɛt a lɩɩ lɩɩŋ daboro-la lɛ aŋ kaa vɔɔ lɩɩŋ niiŋ.

⁵⁴ Ba sɩ lɩɩ lɩɩŋ daboro-la lɛ, nɩaa na Yesu a jɩŋ arɩ ʋ nɛ.

⁵⁵ Ba mʋ dʋʋrɛ ba tinteeŋ kala a paa nyanyal tɩŋŋaa arɩ ba bɔsʋnʋŋ a kaa mʋ lee-na kala ba sɩ nɩa dɩ Yesu hɛ.

⁵⁶ Lee-na kala Yesu sɩ mʋa, tabalaa koo tabiisiŋ koo bagɩsɩŋ lɛ, nɩaa yie paa ba nyanyal tɩŋŋaa kaa jʋʋ yɔɔsʋŋ tʋɔŋ a sʋlʋ dɩ ʋ leŋ ba digi ʋ gɛrɩŋ niipiniŋ lɛ. Dɩ ba nɛ dige, ba yie duori nɛ.