Maak 2 - WƖA TENIŊ

Yesu vaarɛ gbɛrɩgɛ

¹ Tapʋlaa baŋmɛnɛ harɩŋ, Yesu mɩɩra mʋ Kapɛnam. Nɩaa nɩɩ dɩ ʋ mɩɩra kɔ a hɛ dɩa lɛ.

² Ŋɩɩ nɛ nɩ-daŋ gire kɔ a tɔ lee-la kala a tɔ boiŋ niiŋ ma. Ka ʋ bʋl Wɩa wɩaa pɩpɩba.

³ Ŋɩɩ nɛ dɩ nɩaa dɔnsʋŋ nɛ ŋɩɩ. Ba banɛsɛ joŋ gbɛrɩgʋ kʋbala kaa kɔ. Ʋ pɩŋ ʋ bɔsɔ lɛ.

⁴ Nɩaa sɩ tɔ leriŋ kala ŋɩɩ, ba bɩ jɩŋ lee-la ba sɩ jaŋ to a jʋʋ. Ŋɩɩ nɛ ba jɩl lusuŋ nyuŋ a ta luri a joŋ bɔsɔ-la arɩ gbɛrɩgʋ-la kala a to bʋa-la ta ʋ tuu Yesu sɩpaaŋ.

⁵ Yesu sɩ na arɩ ba laaʋ dii woruŋ, ʋ bʋla pɩ gbɛrɩgʋ-la, “Mɩ bii, mɩ joŋ ŋ wʋbɔŋŋɔɔ chɛŋ nɛ.”

⁶ Dɩ Wɩa teniŋ kerichiba dɔnsʋŋ ma hɔŋ nɩmɛ a bʋbʋl ba tʋɔŋ lɛ,

⁷ “Bɛɛ nɛ tɩɩ baala deeŋ bʋbʋl ŋɩɩ? Ʋʋ tʋʋsɛ Wɩa joŋŋoo nɛ. Kʋbɛɛ nɛ jaŋ wuo joŋ wʋbɔŋŋɔɔ chɛ nʋʋ, dɩ Wɩa dʋndʋŋa dee?”

⁸ Yesu guu jɩŋ ba tʋɔbɩɩnaa a pɩɛsɛba, “Bɛɛ nɛ tɩɩ ma bɩbɩɩnɛ wɩaa deemba?

⁹ Mɩ sɩ jaŋ bʋl gbɛrɩgʋ-la lɛ arɩ mɩ joŋ ʋ wʋbɔŋŋɔɔ chɛʋ nɛ ŋaa mɔlɩɩ koo mɩ sɩ jaŋ bʋl ʋ sii chuoli ʋ bɔsɔ a viiri nɛ ŋaa mɔlɩɩ?

¹⁰ Mɩ jaŋ dagɛma arɩ mɩ-na Nuhuobiine Bie kɛŋ doluŋ dʋnɩa lɛ dɩ mɩ joŋ wʋbɔŋŋɔɔ chɛ nɩaa.”

¹¹ Ŋɩɩ nɛ ʋ bʋla pɩ gbɛrɩgʋ-la, “Sii a joŋ ŋ bɔsɔ mʋ dɩa.”

¹² Baal-la guu sii a joŋ ʋ bɔsɔ a vɛnɛ lɩɩ ka nɩalɩŋ bibenu. Ba kala hirigi a dɛnnɛ Wɩa a bʋl, “La ha bɩ wɩɩŋ deeŋ dɔŋɔ na.”

Yesu yɩrɛ Levi

¹³ Ŋɩɩ nɛ Yesu sii nɩmɛ a mɩɩra tuu mʋga niiŋ. Nɩaa yʋgɛ a kʋ hilimi, ʋ dɩdagɛba.

¹⁴ Ʋ sɩ kiele mʋ sɩpaaŋ, ʋ na baal kʋbala baa yɩrɛ Levi. Ʋ nyɩmma yɩrɩŋ nɛ Alɩfɩyas. Levi fa ŋaa lampoo laarʋ nɛ a hɔŋ ʋ tɩntɩnnɩ dɩa lɛ. Ŋɩɩ nɛ Yesu yɩrʋ a bʋla pʋ, “Sii a tuto mɩ harɩŋ.” Ʋ sii to.

¹⁵ Ŋɩɩ nɛ Yesu mʋ jʋʋ Levi dɩa, ʋ dɩ ʋ harɩ-tooroo kala, a hɔnɔ didii kɩaa. Lampoo laara-la dɔnsʋŋ arɩ wʋbɔŋ ŋaaraa ma kɔ, ba kala didii kɩalɩŋ. Ba fa yʋga woruŋ a tuto Yesu harɩŋ.

¹⁶ Wɩa teniŋ kerichiba arɩ Farisii tɩŋŋaa naba a pɩɛsɛ Yesu harɩ-tooroo, “Bɛɛ nɛ tɩɩ Yesu arɩ wʋbɔŋ ŋaaraa arɩ lampoo laaraa kala hɔnɔ didii kɩaa?”

¹⁷ Yesu sɩ nɩɩ wɩɩ-la, ʋ bʋla pɩba, “Nɩalɩŋ sɩ kɛŋ yarɩfɩɛlaa bɩ daaluŋ ŋaara ka chɛ, see nɩalɩŋ sɩɩ wɩɩlʋ. Mɩ kɔ dɩ mɩ yɩrɛ wʋbɔŋ ŋaaraa nɛ. Nɩalɩŋ sɩ kɛŋ tʋɔpʋla dee mɩ kɔ dɩ mɩ yɩrɛ.”

Ba bʋl niiŋ vɔbʋŋ wɩaa

¹⁸ Chɛɛ dɔŋ Jɔɔŋ, Wɩa lɩɩ-fooru-la harɩ-tooroo arɩ Farisii tɩŋŋaa harɩ-tooroo vʋvɔɔ niiŋ. Ŋɩɩ nɛ nɩaa sii kʋ pɩɛsɛ Yesu, “Bɛɛ nɛ tɩɩ Jɔɔŋ harɩ-tooroo arɩ Farisii tɩŋŋaa harɩ-tooro-naa vɔɔ niiŋ, aŋ ka ŋ harɩ-tooro-na bɩ vɔɔ?”

¹⁹ Ŋɩɩ nɛ Yesu pɩɛsɛba, “Dɩ nʋʋ mʋ jaa haal kaa kɔ, dɩ ʋ dɩ ʋ nandɔnsʋŋ hɔŋ, ʋ nandɔsʋ-la jaŋ vɔɔ niiŋ? Aɩ, dɩ baal-la arɩ ʋ nandɔnsʋŋ nɛ hɔnɔ, ba bɩ niiŋ ka vɔɔ.

²⁰ Ama chɛɛ dɔŋ nɛ hɛ nɩmɛ, ba jaŋ kɛŋ baal-la kaa mʋ lee, aŋ ka dɩ ʋ nandɔsʋ-la vɔɔ niiŋ.”

²¹ Ŋɩɩ nɛ ʋ bɩra bʋla pɩba, “Dɩ ŋ nɛ kɛŋ gɛrɩ-bɩnɩŋ dɩ ʋ luri, ŋ jaŋ joŋ gɛrɩpɛ-falɩŋ a tɔɔ? Aɩ, ŋ ŋaa ŋɩɩ, kʋfalɩɩ-la jaŋ kʋʋrɛ dɩ gɛrɩ-la wasa kɩɛsa kɩɩ ŋɩɩ.

²² Nʋʋkala bɩ jaŋ joŋ girep nɛnɛɛ sɩ-falɩŋ a hɛ pupo-kpaaŋ lɛ. Ŋ nɛ ŋaa ŋɩɩ, pupoi-la jaŋ yɛrɛ, dɩ sɩŋ-la kala ta. Ŋ yie joŋ girep nɛnɛɛ sɩ-falɩŋ a hɛ pupoi-zɔmʋŋ lɛ nɛ.”

Ba bʋl chɛ-wiesii-la wɩaa

²³ Chɛ-wiesiŋ chɛɛ kʋbala Yesu arɩ ʋ harɩ-tooroo sii to nyonso baga tʋɔŋ mʋmʋ. Ba sɩɩ mʋmʋ ŋɩɩ, ʋ harɩ-tooro-la bubori nyonso-la nyusuŋ.

²⁴ Ŋɩɩ nɛ Farisii tɩŋŋaa pɩɛsʋ, “Ŋ bɩ naa? Chɛ-wiesii-la chɛɛŋ kɩsɩŋ nɛ ba chichei ŋɩɩ. Bɛɛ nɛ tɩɩ?”

²⁵ Ŋɩɩ nɛ Yesu pɩɛsɛba, “Ma ha bɩ wɩɩ-la Devit fa sɩ ŋaa bʋa-la lɛ losuŋ fa sɩ kɛŋ ʋ dɩ ʋ harɩŋ nɩaa ba chɩchɛ kʋdiilee dɩ ba dii karɩmaa?

²⁶ Ʋ fa jʋʋ Wɩa dɩa nɛ bʋa-la lɛ Abɩata sɩ ŋaa Wɩɩsʋllɩ sɩpaalaaraa nɩhɩaŋ, a joŋ boroboro-la ba sɩ yie joŋo bil Wɩa sɩpaaŋ a chɔgɔ dii aŋ chɔgɔ pɩ ʋ harɩŋ nɩaa ba dii. Ʋ fa ŋaa kɩsɩŋ nɛ arɩ nɩwogo sɩ jaŋ joŋ boroboro-la dii, see Wɩɩsʋllɩ sɩpaalaara dʋndʋŋa.”

²⁷ Ŋɩɩ nɛ Yesu bɩra bʋla pɩba, “Wɩa lɩɩsɛ chɛ-wiesii-la pɩ nɩaa nɛ dɩ ba tɩɩʋ. Ʋ bɩ sɩ dɩ chɛ-wiesii-la nɛ tɩɩ nɩaa.

²⁸ Mɩ-na Nuhuobiine Bie nɛ ŋaa chɛ-wiesii-la Tɩɩna ŋɩɩ.”