Maak 15 - WƖA TENIŊ

Ba kɛŋ Yesu kaa mʋ Paalɩt teeŋ

¹ Ŋɩɩ nɛ chʋchʋɔ-fɩɛla, Wɩɩsʋllɩ sɩpaalaaraa kʋhɩasɩŋ arɩ ba taŋ kʋhɩasɩŋ arɩ Wɩa teniŋ kerichiba arɩ nɩalɩŋ kala sɩ yie hilimi a vʋvʋʋrɛ wɩaa, ba kala kʋ hilimi a vʋʋrɛ. Ba kɛŋ Yesu a vɔɔ a kɛnʋ kaa mʋ Paalɩt teeŋ.

² Ŋɩɩ nɛ Paalɩt pɩɛsɛ Yesu, “Ŋ nɛ Juu tɩŋŋaa kuoro?” Yesu bʋl, “Oo, mɩ nɛ.”

³ Ŋɩɩ nɛ Wɩɩsʋllɩ sɩpaalaaraa kʋhɩasɩŋ dagɛ wɩalɩŋ Yesu sɩ ŋaa chei a yʋgɛ.

⁴ Ŋɩɩ nɛ Paalɩt pɩɛsɛ Yesu, “Ŋ bɩ wɩɩ kɛnɛ ŋ sɩ jaŋ bʋla pɩbaa? Bee na wɩaa sɩ magɛ ŋɩɩ ba dagɛ arɩ ŋ cheye.”

⁵ Ama Yesu bɩra bɩ ʋ niiŋ suro. Wɩɩ-la kperi Paalɩt.

Ba sɛyɛ arɩ ba jaŋ kpʋ Yesu

⁶ Dɩ dɩɩsɩŋ kiele bal gbieli nɛ yie-na kala Paalɩt yie lɩɩsɛ nɩalɩŋ ba sɩ kaa tɔ dɩa dɔŋɔ nɛ a ta, nɩɩ-la nɩaa sɩ cho dɩ ba lɩɩsa ta.

⁷ Dɩ nɩaa dɔnsʋŋ ma fa hɛ nɩtɔɔrɩ dɩa lɛ, ba fa hɛ yuosuŋ nɛ a kpʋ nɩaa. Ba kɛmba kaa mʋ tɔ dɩa, ba dɔŋɔ yɩrɩŋ nɛ Barabas.

⁸ Ŋɩɩ nɛ nɩaa yʋgɛ a gire mʋ Paalɩt teeŋ a bʋl dɩ ʋ ŋaa ŋɩɩ ʋ sɩ vɛnɛɛ ŋaa pɩba.

⁹ Paalɩt pɩɛsɛba, “Ma cho dɩ mɩ lɩɩsɛ Juu tɩŋŋaa kuoru-la nɛ ta pɩmaa?”

¹⁰ Ʋ fa jɩma arɩ Wɩɩsʋllɩ sɩpaalaaraa kʋhɩasɩŋ yaraa bieri nɛ, ŋɩɩ nɛ tɩɩ ba kɛŋ Yesu a kɔ ʋ teeŋ.

¹¹ Ŋɩɩ nɛ Wɩɩsʋllɩ sɩpaalaaraa kʋhɩasɩŋ nyɩsɛ nɩaa hɛ dɩ ba sɛɩ dɩ ba lɩɩsɛ Barabas a ta aŋ leŋ Yesu.

¹² Ŋɩɩ nɛ Paalɩt bɩra pɩɛsɛ nɩalɩŋ, “Aŋ ka baal-la ma, ma sɩɩ yɩrɛ Juu tɩŋŋaa kuoro, bɛɛ nɛ ma sɩ mɩ ŋaa ʋ lɛ?”

¹³ Ŋɩɩ nɛ ba kala faasa kpɩa, “Leŋ dɩ ba kpaasʋ mɛrɛ daagɛsɛ nyuŋ.”

¹⁴ Ŋɩɩ nɛ Paalɩt pɩɛsɛba, “Wʋbɔŋ bɛɛ nɛ ʋ ŋaa?” Ŋɩɩ nɛ ba faasa kpɩa a kɩɩ bumbuŋ-la, “Leŋ dɩ ba kpaasʋ mɛrɛ daagɛsɛ nyuŋ.”

¹⁵ Paalɩt chɛ dɩ ʋ ŋaa dɩ nɩalɩŋ tʋɔŋ tɔrɛ. Ʋ lɩɩsɛ Barabas ta pɩba aŋ leŋ ba vɩɩrɛ Yesu aŋ kɛnʋ mʋ kpaasa daagɛsɛ nyuŋ.

Laalɩyuoroo mɔŋ Yesu

¹⁶ Ŋɩɩ nɛ laalɩyuoroo kɛnʋ lɩɩ ba kuoru-balɩŋ dɩa kaala tʋɔŋ a yɩrɛ ba laalɩyuoroo dɔnsʋŋ kala. Ba kala kʋ hilimi.

¹⁷ Ŋɩɩ nɛ ba joŋ gɛrɩ-fɩaŋ a laalʋ a chɛ sɔsʋŋ a kaa sʋa kuoru nyunchuulo a joŋo chuu.

¹⁸ Ba sieri ʋ lɛ a bʋl, “Juu tɩŋŋaa kuoro, laa chʋɔlʋŋ.”

¹⁹ Ba joŋ daaŋ ŋmoo ʋ nyuŋ lɛ, a tʋ nantʋɔrʋŋ ma a hɛ ʋ lɛ, a tuu kpirimi a nagɛ baa zilu.

²⁰ Ba sɩ mɔŋ ʋ lɛ a dɛrɛ, ba wuri gɛrɩ-fɩaŋ-la aŋ paa ʋ tɩtɩa gɛnnɩŋ a laalʋ, a kɛnʋ kaa lɩɩ wombiiŋ dɩ ba kɛnʋ kaa mʋ kpaasa mɛrɛ daagɛsɛ nyuŋ.

Ba kpaasɛ Yesu mɛrɛ daagɛsɛ nyuŋ

²¹ Ba sɩ kʋ lɩɩ ŋɩɩ, dɩ ba cheŋ baal kʋbala baa yɩrɛ Saamɔŋ. Ʋ jaŋ yɩrɩŋ nɛ Siriini. Ʋ nɛ fa ŋaa Alɛkɩzanda arɩ Rufas nyɩmma. Ʋ lɩɩ baga a jʋjʋʋ taŋ-la tʋɔŋ, ba kɛnʋ a fʋgʋ ʋ laa daagɛsɛ-la a baasɛ.

²² Ba kɛŋ Yesu kaa mʋ lee kʋbala, baa yɩrɛ Gɔlɩgɔta. Yɩrɩ-la bʋbʋɔŋ nɛ nyu-kuŋkogulo.

²³ Nɩmɛ nɛ, ba joŋ sɩnɩŋ a guoli tɩɩ-kel kʋbala baa yɩrɛ mɛɛ lɛ a joŋo pʋ dɩ ʋ nyʋa. Ʋ vɩa.

²⁴ Ba kɛŋ Yesu a kpaasɛ daagɛsɛ nyuŋ, aŋ kɛŋ ʋ gɛnnɩŋ kpaa. Ba tɔnsɔ nɛ a jɩŋ gɛrɩ-la nʋʋkala jaŋ laa.

²⁵ Dɩ wɩa magɛ ji-looluŋ, ka ba kpaasʋ daagɛsɛ-la nyuŋ.

²⁶ Ba sɩ sɩ Yesu ŋaa wɩalɩŋ chei, ba ŋmʋnsa mɛrɛ daagɛsɛ-la lɛ a bʋl, “JUU TƖŊŊAA KUORO NƐ Ŋ-LA.”

²⁷ Gaaraa balɩa ma nɛ ba fa kpaasɛ a pɛ Yesu lɛ. Dɔŋɔ hɛ Yesu nadiiŋ, dɔŋɔ ma hɛ ʋ nagʋa. [

²⁸ Ba fa ŋmʋnsa bil Wɩa teniŋ tʋɔŋ a bʋl dɩ ba jaŋ kɛnʋ kaa pɛ wʋbɔŋ ŋaaraa lɛ. Lɛɛlɛ wɩaa deemba kala sɛnɛ ŋaa.]

²⁹ Ba sɩ kpaasʋ mɛrɛ daagɛsɛ nyuŋ ŋɩɩ, nɩalɩŋ sɩ to nɩmɛ bɩbal, ba tʋtʋʋsʋ aŋ kɛŋ ba nyuŋ chuchugisi a bʋl, “Oi, ŋ nɛ nɩɩ-la sɩ sɩ ŋ jaŋ ŋmoo la Wɩa dɩɩ-balɩŋ lo aŋ bɩra wuo saaʋ tapʋlaa batori pɛgɛ.

³⁰ Lɩɩ daa-la nyuŋ tuu a laa ŋ tɩtɩa ta yei.”

³¹ Wɩɩsʋllɩ sɩpaalaaraa kʋhɩasɩ-la arɩ Wɩa teniŋ kerichiba, ba ma sisieri Yesu lɛ a bʋlaa pɩ dɔŋɔ, “Ʋ wuo nɩaa laa tɩta nɛ aŋ bɩ ʋ tɩtɩa wuo laa ta.

³² Ʋ sɩ sɩ ʋ nɛ ŋaa Kirisito, Juu tɩŋŋaa kuoro, leŋ dɩ ʋ lɩɩ daa-la nyuŋ kʋ tuu dɩ la na a laa ʋ wɩaa dii.” Nɩalɩŋ balɩa ma ba sɩ kpaasa a pɛ Kirisito lɛ, ba ma tʋʋsʋ.

Yesu sʋba

³³ Wɩa sɩ kʋ magɛ nyu-gbaŋa, leriŋ kala biri lim a mʋ yi dɩdaanɩŋ kerifi batori.

³⁴ Kerifi batori-la lɛ Yesu faasa ŋmoo niiŋ a bʋl, “Eloi, Eloi, lama sabakɩtanɩ.” Ʋ bʋbʋɔŋ nɛ: “Mɩ Wɩa, mɩ Wɩa, bɛɛ nɛ tɩɩ ŋ vɩamɛ ta?”

³⁵ Dɩ nɩaa dɔnsʋŋ fa chɩŋ nɩmɛ a nɩɩ wɩalɩŋ ʋ sɩ bʋla. Ŋɩɩ nɛ ba bʋl, “Má jegili, Ɩlaaja nɛ ʋ yɩyɩrɛ ŋɩɩ.”

³⁶ Nɩalɩŋ dɔŋɔ fá mʋ joŋ suosuo a kaa mʋ yuu sɩnɩŋ sɩ nyala a joŋo tuu daaŋ lɛ, a kaa mʋ hɛ Yesu niiŋ lɛ dɩ ʋ nyʋa. Ʋ sɩ ŋaa ŋɩɩ, ʋ bʋl, “Má leŋu nɩmɛ, má leŋ la gbɛrɛ a na arɩ Ɩlaaja jaŋ kʋ soru daa-la nyuŋ koo.”

³⁷ Ŋɩɩ nɛ Yesu faasa ŋmoo niiŋ, aŋ wiesi ʋ wiesi katɩɩ.

³⁸ Patɩɩsaŋ nɛ fa kɛrɛ Wɩa dɩɩ-bal-la tʋɔŋ. Ʋ kɩɛsɛ balɩa a chɩŋ nyu-gbaŋa a kʋ tuu.

³⁹ Ŋɩɩ nɛ dɩ laalɩyuoroo zɔlɔ kʋhɩaŋ kʋbala fa chɩŋ Yesu sɩpaaŋ a pɔʋ. Ʋ sɩ na Yesu dɩ ʋ wiesi ʋ wiesi katɩɩ ŋɩɩ, ʋ bʋl, “Wʋtɩtɩɩ, baala deeŋ sɛnɛ ŋaa Wɩa Bii nɛ.”

⁴⁰ Haalaa dɔnsʋŋ ma fa chɩŋ dɩ-bolii a bibeŋ. Ba tʋɔŋ, Mɛɛrɩ Magɩdalɩŋ arɩ Mɛɛrɩ sɩ ŋaa Jeems-wie arɩ Joozis naaŋ arɩ Salomi ma fa hɛ nɩmɛ.

⁴¹ Haalaa deemba kala faa to Yesu harɩŋ nɛ a pɩpɛ ʋ lɛ Galilii lɛ. Haala-la ma sɩ to Yesu harɩŋ a kɔ Jerusalɛm fa yʋga a hɛ nɩmɛ.

Ba hugi Yesu

⁴² Tapʋlɩɩ-la dɩ ba kɛŋ ba tɩtɩa hɛ dɔŋɔ a gbɛrɛ ba chɛ-wiesii-la, ʋ dɩdaanɩŋ nɛ,

⁴³ baal kʋbala ma fa hɛ nɩmɛ, ʋ yɩrɩŋ nɛ Josef, a lɩɩ Arɩmatɩya. Ʋ fa ŋaa nɩalɩŋ sɩ yie hilimi a vʋvʋʋrɛ wɩaa dɔŋɔ nɛ. Nɩaa zizilu. Ʋ ma fa gbɛrɛ Wɩa kuorii-la nɛ dɩ ʋ kɔ. Ŋɩɩ nɛ dɩdaaŋ-la ʋ mʋ Paalɩt teeŋ arɩ bɔɩ-duoŋ a sʋl Yesu kʋsʋʋŋ.

⁴⁴ Ŋɩɩ nɛ Paalɩt guu hirigi, ʋ sɩ nɩa arɩ Yesu daŋa sʋba. Ʋ yɩrɛ laalɩyuoroo zɔlɔ kʋhɩaŋ-la a pɩɛsʋ dɩ ʋ na Yesu daŋa sʋba nɛɛ.

⁴⁵ Laalɩyuoroo zɔlɔ kʋhɩaŋ-la bʋla pʋ arɩ ʋ sʋba nɛ, ʋ pɩ Josɛf wombiiŋ dɩ ʋ mʋ sori Yesu kʋsʋʋŋ.

⁴⁶ Ŋɩɩ nɛ Josɛf mʋ yɔɔ gɛrɩpɛ-pʋla a sori Yesu kʋsʋʋŋ a kɛŋ gɛrɩpɛɛ-la bɛʋ a joŋu hugi bʋbʋa ba sɩ lɔsɔ lɛ, a bilimi tabɩɩ-balɩŋ tɔ bʋa-la niiŋ.

⁴⁷ Mɛɛrɩ Magɩdalɩŋ arɩ Joozis naaŋ Mɛɛrɩ ma hɛ nɩmɛ a na lee-la ba sɩ joŋu hugi.