Maak 14 - WƖA TENIŊ

Nɩaa ka chɛ ba kpʋ Yesu

¹ Tapʋlaa balɩa nɛ ka, ka dɩ ba dɩɩsɩŋ kiele bal gbiele-la yi, gbiele lɛ nɛ ba yie dii boroboro sɩ bɩ sɩbʋrʋŋ kɛnɛ. Ŋɩɩ nɛ Wɩɩsʋllɩ sɩpaalaaraa arɩ Wɩa teniŋ kerichiba chɩchɛ wombiiŋ dɩ ba lʋara kɛŋ Yesu a kpʋ.

² Ba bʋla dɩ ba sɩ́ ʋ kɛŋ ba gbiele-la chɛɛŋ, dɩ ba nɛ ŋaa ŋɩɩ, nɩaa jaŋ hɛ yuosuŋ.

Haala joŋ nʋʋŋ a bɩsa hɛ Yesu nyuŋ lɛ

³ Yesu mʋ Bɛtanɩ a hɔŋ Saamɔŋ dɩa lɛ a didii kɩaa. Saamɔŋ fa ŋaa gbege nɛ aŋ kʋ duori. Ʋʋ dii kɩaa dɩ haal kʋbala kʋ jʋʋ a kɛŋ tʋlaalɩɩ arɩ loŋ. Ʋ sʋɔra sɩma, ʋ yalɩŋ ma hɛyɛ. Ʋ kɛŋ loŋ-la suri a bɩsɛ tʋlaalɩɩ-la a hɛ Yesu nyuŋ lɛ.

⁴ Nɩalɩŋ dɔnsʋŋ na baanɩŋ a pɩpɩɛsɛ dɔŋɔ, “Bɛɛ nɛ tɩɩ haala deeŋ kɛŋ tʋlaalɩɩ-la kaa chei ŋ-la?

⁵ Ba fa jaŋ wuo joŋ tʋlaalɩɩ-la a yallɛ a na moribiee yʋgɛ a joŋo pɩ summoo.” Ba bʋl haal-la teeŋ woruŋ.

⁶ Ŋɩɩ nɛ Yesu bʋla pɩba, “Má leŋ haal-la. Bɛɛ nɛ tɩɩ ma wʋwalɩmʋ? Wʋzɔŋ nɛ ʋ ŋaa mɩ lɛ.

⁷ Ma dɩ summoo jaŋ hɛ nɩmɛ bʋa na-kala lɛ. Bʋa na-kala lɛ nɛ ma chɩchɛ ma ŋaa wʋzɔmʋŋ a pɩ summo-la, ma jaŋ wuo ŋaa, ama mɩ dɩ ma bɩ jaŋ hɛ nɩmɛ deeŋ deeŋ.

⁸ Haal-la ŋaa wɩɩ-la ʋ sɩ jaŋ wuo ŋaa nɛ. Ʋ bɩsɛ tʋlaalɩɩ-la hɛ mɩ yaraa lɛ a kɛmmɛ hɛ dɔŋɔ nɛ dɩ ba hugi.

⁹ Wʋtɩtɩɩ nɛ mɩ bʋlaa pɩma, dʋnɩa sɛmɛ na-kala ba sɩ jaŋ mʋ a bʋl Wɩa wʋzɔmɔ-la, ba jaŋ liisi haala deeŋ ma wɩaa a bʋl.”

Judas sɛyɛ dɩ ʋ joŋ Yesu yallɛ

¹⁰ Ŋɩɩ nɛ Judas Ɩsɩkarɔt sɩ ŋaa Yesu harɩ-tooro-la fii arɩ balɩa dɔŋɔ sii, a mʋ Wɩɩsʋllɩ sɩpaalaaraa kʋhɩasɩŋ teeŋ a bʋl dɩ ʋ jaŋ kɛŋ Yesu yalla pɩba.

¹¹ Ba sɩ nɩɩ ŋɩɩ, ba tʋɔŋ tɔrɛ. Ba bʋl ba jaŋ pʋ moribiee. A chɩŋ bʋa-la lɛ ʋ suomo chɩchɛ wombii-la ʋ sɩ jaŋ to a joŋ Yesu yalla pɩba.

Yesu arɩ ʋ harɩ-tooroo dii dɩɩsɩŋ kiele bal gbiele kʋdiilee

¹² Ba gbiele-la ba sɩ yie gbieli a dii boroboro sɩ bɩ sɩbʋrʋŋ kɛnɛ ʋ tapʋl-bumbuŋ, bʋa-la lɛ sɩ maga dɩ ba kpʋ dɩɩsɩŋ kiele bal gbiele-la pie-bie, Yesu harɩ-tooroo pɩɛsʋ, “Nɩɩ nɛ ŋ cho dɩ la mʋ wasɛ leriŋ a ŋaa dɩɩsɩŋ kiele bal gbiele-la kʋdiilee dɩ ŋ kʋ dii?”

¹³ Ŋɩɩ nɛ ʋ tɩŋ ʋ harɩ-tooroo balɩa a bʋla pɩba, “Má mʋ jʋʋ tabal-la tʋɔŋ, ma jaŋ cheŋ baal kʋbala dɩ ʋ chʋŋ nyuvie arɩ lɩɩŋ. Má to ʋ harɩŋ.

¹⁴ Dɩa-na kala ʋ sɩ jʋa, má to jʋʋ bʋla pɩ dɩa-la tɩɩna, ‘La kʋhɩaŋ sɩ, la pɩɛsɩŋ dɩ nɩɩ lɛ nɛ nʋhʋɔra dɩa hɛ dɩ ʋ dɩ ʋ harɩ-tooroo jʋʋ hɔnɔ dii dɩɩsɩŋ kiele bal gbiele kʋdiilee?’

¹⁵ Ʋ jaŋ dagɛma lusuŋ nyuŋ dɩɩ-bal kʋbala, ba wasɛ ʋ kala nɛ. Lee-la nɛ ma jaŋ ŋaa kʋdiile-la.”

¹⁶ Ŋɩɩ nɛ ʋ harɩ-tooroo sii lɩɩ a mʋ tabal-la tʋɔŋ a sɛnɛ na wɩalɩŋ kala Yesu sɩ bʋla. Ŋɩɩ nɛ ba ŋaa dɩɩsɩŋ kiele bal gbiele-la kʋdiilee.

¹⁷ Dɩdaanɩŋ, Yesu arɩ ʋ harɩ-tooro-la fii arɩ balɩa kʋ jʋʋ dɩa-la.

¹⁸ Ba sɩ hɔnɔ dii kɩaa ŋɩɩ, ŋɩɩ nɛ Yesu bʋla pɩba, “Wʋtɩtɩɩ nɛ, mɩ bʋlaa pɩma, ma nɩaa deemba sɩɩ dii kɩaa, ma dɔŋɔ jaŋ jommi yallɛ. Mɩ dɩ ʋ nɛ pɛ dɔŋɔ a didii kɩaa ŋɩɩ lɛɛlɛ.”

¹⁹ Ba sɩ nɩɩ wɩɩ-la, ba tʋɔŋ chei. Ba kala pɩpɩɛsɛ Yesu kʋŋ kʋŋ. Dɔŋɔ yie pɩɛsɛ, “Mɩ nɛɛ?”

²⁰ Yesu bʋla pɩba, “Ma fii arɩ balɩa deeŋ tʋɔŋ dɔŋɔ nɛ, mɩ dɩ ʋ nɛ chala kɛŋ boroboro tutuu gbaŋa-la tʋɔŋ.

²¹ Mɩ-na, Nuhuobiine Bie, mɩ jaŋ sʋʋ arɩ ba sɩ ŋmʋnsɛ ŋɩɩ a tɩgɛ mɩ lɛ. Ama nɩɩ-la sɩ joŋ mɩ-na Nuhuobiine Bie yallɛ, aa, ʋ jaŋ na hɛɛŋ yʋgɛ. Ba fa sɩ bɩ ʋ lʋla, ʋ nɛ kpɩa.”

Kʋdiile-la Yesu sɩ sɩ dɩ la dii a liliisi ʋ wɩaa

²² Ba sɩ hɔnɔ didii kɩaa, ŋɩɩ nɛ Yesu joŋ boroboro a lɔllɛ Wɩa aŋ kaa chɔgɛ chɔgɛ, a joŋo pɩ ʋ harɩ-tooroo, a bʋla pɩba, “Má laa. Mɩ yaraa nammɩa nɛ ŋɩɩ.”

²³ Ŋɩɩ nɛ ʋ bɩra joŋ nyʋnyʋala ma arɩ sɩnɩŋ a lɔllɛ Wɩa aŋ joŋo pɩba. Ba kala nyʋa nyʋnyʋal-bala-la tʋɔŋ.

²⁴ Ŋɩɩ nɛ Yesu bʋla pɩba, “Mɩ chalɩŋ nɛ ŋɩɩ. Chalɩŋ deeŋ nɛ Wɩa kaa hɛ niiŋ ma dɩ ʋ pɛgɛ. Mɩ chalɩŋ jaŋ jaasɛ nɩ-daŋ wɩaa, dɩ Wɩa joŋ ba wʋbɔŋŋɔɔ chɛba.

²⁵ Wʋtɩtɩɩ nɛ mɩ bʋlaa pɩma, mɩ bɩra bɩ jaŋ kɔ dɩ mɩ nyʋa sɩnɩŋ deeŋ, see tapʋlɩɩ-la mɩ sɩ jaŋ kɔ nɛ, mɩ jaŋ nyʋa sɩ-falɩŋ Wɩa kuorii-la tʋɔŋ.”

²⁶ Ŋɩɩ nɛ ba yɩɩ Wɩɩchʋɔlɛ yɩɩlɩŋ a dɛrɛ aŋ sii lɩɩ a mʋ peel kʋbala baa yɩrɛ Olif nyuŋ.

Yesu bʋla pɩ Pɩɩta arɩ ʋ jaŋ bʋl ʋ bɩ ʋ jɩŋ

²⁷ Yesu bʋla pɩba, “Ma kala jaŋ fá viiri. Ba ŋmʋnsɛ Wɩa teniŋ tʋɔŋ arɩ Wɩa sɩ, ‘Mɩ jaŋ kpʋ pie-daara, aŋ ka dɩ piesee fá pɩsɛ.’

²⁸ Wɩa jaŋ chɩsɛmɛ sʋʋŋ lɛ. Ʋ nɛ chɩsɛmɛ, mɩ jaŋ laa ma sɩpaaŋ a mʋ Galilii tinteeŋ.”

²⁹ Ŋɩɩ nɛ Pɩɩta bʋla pɩ Yesu, “Dɩ ba kala fá ma aŋ leŋiŋ, mɩ-na bɩ jaŋ mɩɩrɛ ŋ harɩŋ.”

³⁰ Ŋɩɩ nɛ Yesu bʋla pʋ, “Wʋtɩtɩɩ nɛ, jɩnɩŋ tɩtaŋɩŋ deeŋ, ŋ-na Pɩɩta, ŋ jaŋ bʋl naansɩɩŋ butori arɩ ŋ bɩ mɩ jɩŋ, ka dɩ ji-bele-na yel naansɩɩŋ bʋlɩa.”

³¹ Ŋɩɩ nɛ Pɩɩta bʋl arɩ sɩɩfɩɛsɩŋ, “Mɩ dɩŋ paala sʋsʋʋ ma, mɩ bɩ jaŋ bʋl arɩ mɩ bɩŋ jɩŋ.” Kʋkaanaa ma kala bʋl ŋɩɩ tɩtɩa.

Yesu chʋɔlɛ Wɩa Gɛtɩsɛmanɩ lɛ

³² Ŋɩɩ nɛ ba mʋ jʋʋ lee kʋbala baa yɩrɛ Gɛtɩsɛmanɩ. Yesu bʋla pɩ ʋ harɩ-tooroo, “Má hɔŋ daha, ka mɩ mʋ chʋɔlɛ Wɩa aŋ kɔ.”

³³ Ʋ kɛŋ Pɩɩta arɩ Jeems arɩ Jɔɔŋ a kaa mʋ nɩmɛ. Yesu tʋɔŋ kala chei. Ʋ tʋɔŋ bɩ pɩna.

³⁴ Ʋ bʋla pɩ ʋ harɩ-tooroo, “Mɩ tʋɔŋ kala nɛ cheye a magɛ dɩ mɩ sʋʋ. Má hɔnɔ pɔ daha.”

³⁵ Ba hɔŋ. Ka ʋ sʋʋsa mʋ sɩpaaŋ mʋa a tuu kpirimi tinteeŋ a sʋl Wɩa a bʋl dɩ ʋ nɛ kɛŋ wombiiŋ, dɩ ʋ sɩ́ leŋe dɩ wɩɩ-la jʋʋ-ʋ lɛ

³⁶ a bɩra bʋl, “Mɩ Nyɩmma, ŋ jaŋ wuo ŋaa wɩɩkala, lɩɩsɛ hɛɛ-la sɩɩ kɔ mɩ lɛ. Ama mɩ-na ŋ-la tʋɔtɔrʋŋ lɛ dee, ŋ-na tʋɔtɔrʋŋ lɛ nɛ.”

³⁷ Ʋ chʋɔla dɛrɛ aŋ sii kɔ ʋ harɩ-tooroo teeŋ dɩ ba pɩŋ doŋ. Ŋɩɩ nɛ ʋ pɩɛsɛ Pɩɩta, “Ŋ pɩna nɛɛ? Ŋ bɩ doŋ mʋapɩlɩɩ ma wuo bɛrɛɛ yi hawa kʋbalaa?

³⁸ Má chʋɔlɛ Wɩa aŋ pʋpɔ, dɩ Sɩtaanɩ nɛ kʋ magɩsɛma dɩ ʋ sɩ́ ma wuo. Ma tʋɔŋ lɛ ma cho dɩ ma ŋaa wʋzɔŋŋɔɔ, aŋ ka ma bɩ doluŋ kɛnɛ.”

³⁹ Ʋ bɩra mʋ a chʋɔlɛ Wɩa a bɩra bʋl ŋɩɩ tɩtɩa.

⁴⁰ Ʋ mɩɩra kɔ dɩ ba bɩra pɩŋ doŋ, bɛɛ wɩaa doŋ kɛmba nɛ woruŋ. Ba bɩ jɩŋ ba sɩ jaŋ bʋl wɩɩ-la kala a pʋ.

⁴¹ Ʋ mɩɩra mʋ torimuŋ aŋ kʋ pɩɛsɛba, “Ma ha pɩnaa wiesi nɛɛ? Ʋ maga nɛ má sii, bʋa-la yie nɛ. Ma bee na, ba jaŋ kɛŋ mɩ-na, Nuhuobiine Bie a pɩ wʋbɔŋ ŋaaraa.

⁴² Má sii dɩ la mʋ. Nɩɩ-la sɩ jaŋ jommi yallɛ ka kɔ nɛ.”

Ba kɛŋ Yesu

⁴³ Yesu ha bɩ wɩaa bʋla dɛrɛ, dɩ Judas nɩɩ kɔ ŋɩɩ. Ʋ fa ŋaa Yesu harɩ-tooro-la fii arɩ balɩa dɔŋɔ nɛ. Nɩaa yʋga a tuto ʋ harɩŋ, dɔnsʋŋ kori tokobiee arɩ toŋguloo. Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba arɩ ba taŋ kʋhɩasɩŋ nɛ tɩmba, ba kɔ.

⁴⁴ Zɛmbɛ tɩɩna-la fa pɩ nɩalɩŋ magɩl nɛ, “Nɩɩ-la mɩ sɩ mʋ guori, ʋ nɛ ŋɩɩ. Má kɛnʋ.”

⁴⁵ Judas sɩ yi lee-la Yesu sɩ hɛ, ʋ mʋ ʋ teeŋ tegi tegi aŋ bʋl, “La Kʋhɩaŋ!” aŋ guoru.

⁴⁶ Ba kala gurigu a kɛnʋ.

⁴⁷ Ka nɩaa chɩna bibeŋ. Ba tʋɔŋ dɔŋɔ lɩɩsɛ ʋ tokobiiŋ, a ta nʋʋ dɩgɩlɩŋ keri. Nɩɩ-la fa ŋaa Wɩɩsʋllɩ sɩpaalaaraa kʋhɩaŋ dɩa yoŋ nɛ.

⁴⁸ Ŋɩɩ nɛ Yesu pɩɛsɛba, “Mɩ ŋaa wʋcheeru nɛ ma sii paa tokobiee arɩ toŋguloo a kʋkɔ dɩ ma kɛmmɛɛ?

⁴⁹ Tapʋlɩɩ kala nɛ mɩ dɩ ma yie hɛ Wɩa dɩɩ-balɩŋ lɛ, mɩ dagɛ Wɩa wɩaa a pɩpɩma, ka ma bɩ mɩ kɛmmɛ nɩmɛ. Ama wɩalɩŋ kala ba sɩ ŋmʋnsa Wɩa teniŋ tʋɔŋ a tɩgɛ mɩ lɛ, maga dɩ ba ŋaa nɛ.”

⁵⁰ Ŋɩɩ nɛ ʋ harɩ-tooroo kala vɩaʋ aŋ fá.

⁵¹ Ka bapʋɔsɩɩ kʋbala baagɛ gɛrɩ-bɔsɔ a tuto Yesu harɩŋ a mʋmʋ. Baa walɩmɛ dɩ ba kɛnʋ.

⁵² Ama ʋ wuri gɛrɩ-bɔsɔ-la a ta aŋ kɛŋ yarɩ-biree fá viiri.

Ba kɛŋ Yesu kaa mʋ Wɩɩsʋllɩ sɩpaalaaraa kʋhɩaŋ teeŋ

⁵³ Ba kɛŋ Yesu a kaa mʋ Wɩɩsʋllɩ sɩpaalaaraa kʋhɩaŋ teeŋ. Ba kɔ nɩmɛ dɩ Wɩɩsʋllɩ sɩpaalaaraa kʋhɩasɩŋ arɩ ba Wɩɩchʋɔlɛ hɩasɩŋ arɩ Wɩa teniŋ kerichiba kala hilime.

⁵⁴ Ba kɛnʋ mʋmʋ ŋɩɩ, ka Pɩɩta daa tuto ba harɩŋ a mʋ jʋʋ Wɩɩsʋllɩ sɩpaalaaraa kʋhɩaŋ kaala. Ʋ jʋa dɩ nɩalɩŋ sɩɩ pɔ kaala-la hɔnɔ a wiwieni nyiniŋ. Ʋ mʋ pɛ ba lɛ.

⁵⁵ Ŋɩɩ nɛ Wɩɩsʋllɩ sɩpaalaaraa kʋhɩasɩ-la arɩ nɩalɩŋ kala sɩ yie hilime vʋvʋʋrɛ wɩaa chɩchɛ dɩ ba na Yesu sɩ ŋaa wɩɩ-la chei dɩ ba kpʋʋ a chɛ wɩɩ ka.

⁵⁶ Nɩaa yʋga a nyɩɛ wɩaa pʋ. Ama ba bʋl nii-lɩɛrɩŋ nɛ, ba bɩ nii-bala bʋla.

⁵⁷ Ŋɩɩ nɛ nɩaa dɔnsʋŋ sii chɩŋ a nyɩɛ wɩaa pʋpʋ,

⁵⁸ “La nɩa arɩ Yesu sɩ ʋ jaŋ ŋmoo Wɩa dɩɩ-bal-la nɩaa sɩ saa a lo aŋ bɩra wuo saa ʋ dɔŋɔ tapʋlaa batori chɛɛŋ, dɩ nɩaa dee bɩ jaŋ saa dɩa-la-na.”

⁵⁹ Ama ba wɩalɩŋ kala bɩ kʋbala ŋaa.

⁶⁰ Ŋɩɩ nɛ Wɩɩsʋllɩ sɩpaalaaraa kʋhɩaŋ sii lɩɩ chɩŋ nɩalɩŋ tʋtʋɔbaanɩŋ a pɩɛsɛ Yesu, “Ŋ bɩ nɩa nɩaa deemba sɩ bʋl wɩalɩŋ a tɩgɛ ŋ lɛɛ? Ŋ-na bɩ wɩɩ kɛnɛ ŋ sɩ jaŋ bʋl?”

⁶¹ Ŋɩɩ nɛ Yesu tɔrɛ ʋ niiŋ. Ʋ bɩ wɩɩkala bʋla. Ŋɩɩ nɛ baal-la bɩra pɩɛsʋ, “Ŋ nɛ ŋaa Kirisito, Nɩɩ-la Wɩa sɩ lɩɩsa? Ŋ nɛ Wɩa Biee?”

⁶² Ŋɩɩ nɛ Yesu bʋl, “Mɩ-na nɛ. Ma jaŋ na mɩ-na Nuhuobiine Bie dɩ mɩ hɔŋ Wɩa doluŋ kala Tɩɩna nadiiŋ sɛmɛ, nɩduoŋ dɩhɔnʋŋ, a to duoŋ-bɩlɩmbaanaa tʋɔŋ a kʋʋ tuu.”

⁶³ Ʋ bʋl ŋɩɩ, baal-la kɛŋ ʋ gɛnnɩŋ kaa kɩɛsɛ aŋ bʋl, “Ʋ bɩ maga dɩ la bɩra chɛ pɛ-naaraa.

⁶⁴ Ma kala bɩ nɩa ʋ sɩ chei Wɩa yɩrɩŋ ŋɩɩ? Bɛɛ nɛ ma bɩɩnɛ?” Ŋɩɩ nɛ nɩalɩŋ kala bʋl dɩ ʋ cheye nɛ, ʋ maga dɩ ba kpʋʋ nɛ.

⁶⁵ Dɔnsʋŋ ma sii a tʋ nantʋɔrʋŋ a hɛ ʋ sɩaa lɛ aŋ vɔɔ ʋ sɩaa tɔ a ŋmobu aŋ bʋla pʋ dɩ ʋ dagɛ nɩɩ-la sɩ ŋmobu. Ŋɩɩ nɛ ka ba kɛnʋ kaa mʋ pɩ laalɩyuoroo. Ba laaʋ a ŋmobu.

Pɩɩta bʋla arɩ ʋ bɩ Yesu jɩŋ

⁶⁶ Pɩɩta sɩ hɔŋ kaala-la lɛ, ŋɩɩ nɛ Wɩɩsʋllɩ sɩpaalaaraa kʋhɩaŋ dɩa tɩntɩnnɩ-tolo kʋbala kʋ lɩɩ

⁶⁷ a na Pɩɩta dɩ ʋ hɔnɔ a wiwieni nyiniŋ. Ʋ benu woruŋ aŋ bʋla pʋ, “Ŋ ma faa to Yesu harɩŋ nɛ, baal-la sɩ lɩɩ Nazarɛt.”

⁶⁸ Ŋɩɩ nɛ Pɩɩta nyɩɛ wɩaa, “Mɩ bɩ Yesu jɩŋ. Mɩ bɩ wɩɩ-la ŋ sɩ paala bʋbʋl jɩŋ,” aŋ sii lɩɩ chɩŋ zawʋra tʋɔŋ.

⁶⁹ Pɩɩta sɩ chɩŋ nɩmɛ, ŋɩɩ nɛ tɩntɩnnɩ-tolo bɩra naʋ a bʋla pɩ nɩalɩŋ sɩ chɩna kpagʋ, “Baala deeŋ ma ŋaa Yesu harɩ-tooro-la dɔŋɔ nɛ.”

⁷⁰ Pɩɩta bɩra nyɩɛ wɩaa a bʋl dɩ ʋ dee. Mʋasʋa nɩalɩŋ sɩ chɩŋ nɩmɛ ma bʋla pʋ, “Wʋtɩtɩɩ nɛ, ŋ ma ŋaa ba dɔŋɔ nɛ, ŋ lɩɩ Galilii nɛ.”

⁷¹ Ŋɩɩ nɛ Pɩɩta ŋmɩɛsɛ a bʋl, “Mɩ bɩ baala deeŋ jɩŋ.”

⁷² Ʋ sɩ bʋl ŋɩɩ dɛrɛ dɩ ji-bele yele lɩamɩŋ lɛ. Pɩɩta liisi wɩɩ-la Yesu sɩ bʋla pʋ arɩ ʋ jaŋ nyɩɛ wɩaa a tɩgɛ ʋ lɛ naansɩɩŋ butori, ka dɩ ji-bele-na yel naansɩɩŋ bʋlɩa. Ʋ kɛŋ nyuŋ gʋrɛ a yiyel.