Maak 13 - WƖA TENIŊ

Yesu bʋl ŋɩɩ ba sɩ jaŋ ŋmoo Wɩa dɩɩ-balɩŋ lo

¹ Yesu sɩ kʋʋ lɩɩ Wɩa dɩɩ-bal-la tʋɔŋ, ŋɩɩ nɛ ʋ harɩ-tooroo dɔŋɔ bʋla pʋ, “Mɩ kʋhɩaŋ, na tabɩa-la ba sɩ kaa saa dɩa-la sɩ zɔmɔ ŋɩɩ, dɩɩsɩ-la ma kala zɔŋ.”

² Ŋɩɩ nɛ Yesu bʋla pʋ, “Ŋ na dɩɩ zɔŋŋɔɔ deemba? Ba jaŋ ŋmoo ba kala lo. Ba bɩ jaŋ leŋ dɩ tabɩɩ-bala ma ka daŋ ʋ dɔŋɔ lɛ.”

Hɛɛ-la sɩ jaŋ kɔ

³ Ba mʋ jɩl peel kʋbala baa yɩrɛ Olif, a hɔŋ ʋ nyuŋ, a chaasɛ Wɩa dɩɩ-bal-la. Pɩɩta, Jeems, Jɔɔŋ arɩ Anduru lʋara pɩɛsʋ,

⁴ “Bʋa bɛɛ lɛ nɛ wɩaa deemba jaŋ ŋaa? Wʋbɛɛba nɛ la jaŋ na, ka dɩ wɩaa deemba-na ŋaa?” Dagɛla.

⁵ Ŋɩɩ nɛ Yesu bʋla pɩba, “Má kɛŋ ma tɩtɩa woruŋ dɩ nʋʋkala sɩ́ ma nyɩsʋ.

⁶ Nɩaa jaŋ yʋgɛ a kɔ mɩ yɩrɩŋ lɛ a bʋl ba nɛ ŋaa Kirisito, a nyɩsɛ nɩ-daŋ.

⁷ Ma jaŋ nɩɩ arɩ laalɩŋ hɛ daha a hɛ dɩ-bolii ma, ama má sɩ́ leŋe dɩ ma bɔyɛ joŋ. Wɩaa deemba kala jaŋ ŋaa bal, ama dʋnɩa dɩdɛrɩŋ ha dee ŋɩɩ.

⁸ Tinteeŋ dɔŋɔ nɩaa jaŋ sii a mʋ a yuo tinteeŋ dɔŋɔ nɩaa. Taŋ kuoro arɩ ʋ nɩaa jaŋ sii gire mʋ yuo kuoro dɔŋɔ arɩ ʋ nɩaa. Tinteeŋ jaŋ zigili leree yʋgɛ, dɩ losuŋ ma jʋʋ. Wɩaa deemba kala ŋaa hɛɛŋ dɩ-suomuŋ nɛ ŋɩɩ.

⁹ Ama má kɛŋ ma tɩtɩa woruŋ. Ba jaŋ kɛmma kaa mʋ nɩalɩŋ sɩ yie hilime vʋvʋʋrɛ wɩaa teeŋ dɩ ba dii ma sarɩya. Ba jaŋ ŋmooma Wɩɩchʋɔlɛ dɩɩsɩŋ lɛ. Ma jaŋ chɩŋ kuoroo arɩ taŋ kʋhɩasɩŋ sɩpaaŋ a tɩŋ mɩ wɩaa a ŋaa mɩ pɛ-naaraa.

¹⁰ Ʋ maga dɩ ba laa sɩpaaŋ bʋl Wɩa wʋzɔŋŋɔɔ a pɩ tinteyee nɩaa kala, ka dɩ dʋnɩa dɩdɛrɩŋ na yi.

¹¹ Dɩ ba nɛ kɛmma kaa mʋ dɩ ba diima sarɩya, má sɩ́ leŋe dɩ ma bɔɩsɩŋ joŋ wɩalɩŋ ma sɩ jaŋ bʋl a laa ma tɩtɩa lɛ. Bʋa-la lɛ Wɩa jaŋ joŋ wʋjɩmɩŋ a hɛ ma nyuŋ lɛ. Wɩɩ-la kala sɩ kɔ ma nyuŋ, má bʋl. Ma dee bɩ jaŋ bʋl, Wɩa Dɩŋ-zɔŋ-la nɛ jaŋ bʋl.

¹² Naambiiriŋ jaŋ kɛŋ dɔŋɔ kaa mʋ pa dɩ ba kpʋ. Nyɩmmaba ma jaŋ ŋaa ŋɩɩ ba biiriŋ lɛ. Biiriŋ ma jaŋ kɛsɛ ba nyɩmmaba arɩ ba naamba, a kaa mʋ pa dɩ ba kpʋ.

¹³ Nʋʋkala jaŋ bɛrɛma a tɩŋ mɩ wɩaa. Ama nʋʋkala sɩ nyalɩma a mʋ dɛrɛ, Wɩa jaŋ laaʋ ta.”

Yesu bʋl wɩaa a tɩgɛ kʋ-la sɩ kɛŋ disiniŋ aa chei leriŋ sɩ jaŋ hɛ nɩmɛ

¹⁴ Ma jaŋ na dɩ ba joŋ kʋ-la sɩ kɛŋ disiniŋ aa chei leriŋ a bil lee-la ʋ sɩ bɩ maga ʋ hɛ. Kʋa deeŋ jaŋ ŋaa wʋbɔŋŋɔɔ. Ʋ jaŋ chei Wɩa yɩrɩŋ. (Ma sɩ jaŋ karɩmɛ wɩaa deemba, ma jaŋ jɩŋ ba bʋbʋɔŋ.) Dɩ ma nɛ na ŋɩɩ, má leŋ dɩ nɩalɩŋ sɩ hɛ Judiya tinteeŋ lɛ, dɩ ba fá jɩl peelee nyuŋ a faa.

¹⁵ Dɩ nʋʋkala hɛ lusuŋ nyuŋ a nɩɩ wɩaa deemba, dɩ ʋ nɛ kʋ tuu, dɩ ʋ sɩ́ ʋ dɩa jʋʋ a chɩchɛ ʋ paa ʋ kɩaa.

¹⁶ Dɩ nʋʋ nɛ hɛ baga lɛ a nɩɩ wɩaa deemba, dɩ ʋ sɩ́ mɩɩra mʋ dɩa a chɩchɛ dɩ ʋ joŋ ʋ gɛrɩŋ.

¹⁷ Nɩalɩŋ sɩ kɛŋ luoruŋ arɩ haala-la sɩ nɔgɛ biiriŋ, oi, ba jaŋ na hɛɛŋ yʋgɛ.

¹⁸ Má sʋl Wɩa dɩ wɩɩŋ deeŋ sɩ́ waarɩŋ bʋa lɛ ŋaa.

¹⁹ Wɩa sɩ ŋaa dʋnɩa a kʋʋ lɩɩ jɩnɩŋ, nʋʋkala ha bɩ hɛɛŋ deeŋ na a nagɛ ŋɩɩ, nʋʋ bɩra bɩ jaŋ na hɛɛŋ ŋɩɩ a kaa mʋ wuu.

²⁰ Dɩ La Tɩɩna fa bɩ tapʋlɩa-la kere ta, nɩbala ma fa bɩ jaŋ ka. Ama nɩalɩŋ ʋ sɩ lɩɩsa dɩ baa tou, ba wɩaa nɛ tɩɩ ʋ keri tapʋlɩa-la ta.

²¹ Dɩ nʋʋkala nɛ bʋla pɩŋ, “Beŋ daha a na Kirisito, koo beŋ nɩmɛ a naʋ, sɩ́ ʋ laa dii.

²² Nɩaa dɔnsʋŋ jaŋ sii fugo bʋl dɩ ba nɛ ŋaa Kirisito, Nɩɩ-la Wɩa sɩ lɩɩsa. Dɔnsʋŋ ma jaŋ sii fugo bʋl dɩ ba ŋaa Wɩa wʋlaabʋllaa nɛ. Ba jaŋ ŋaa wʋmagɩlaa arɩ wʋkpuŋkperisiŋ a chɩchɛ dɩ ba nyɩsɛ nɩalɩŋ Wɩa sɩ lɩɩsa dɩ baa tou.

²³ Wɩaa deemba kala mɩ laa sɩpaaŋ bʋla pɩma nɛ, ka dɩ bʋa-la-na yi. Má kɛŋ ma tɩtɩa woruŋ.”

Yesu bʋla pɩ nɩaa dɩ ʋ jaŋ mɩɩra kɔ

²⁴ Ŋɩɩ nɛ Yesu bɩra bʋla pɩba, “Tapʋlɩa-la hɛɛŋ deeŋ sɩ jaŋ dɛrɛ, leriŋ jaŋ biri dɩ taŋ nɛ pʋla ma. Chɛnɛ ma bɩra bɩ jaŋ pɔsɛ.

²⁵ Chɛnwʋlaa jaŋ lɩɩ wɩa-nyuŋ kʋ tuu a titel. Ba jaŋ kiri wɩa-nyuŋ kɩalɩŋ kala sɩ kɛŋ doluŋ dɩ ba lɩɩ ba leree.

²⁶ Ŋɩɩ lɛ nɛ ma jaŋ na mɩ-na Nuhuobiine Bie, dɩ mɩ to duoŋ-bɩlɩmbaanaa tʋɔŋ kʋʋ tuu. Mɩ jaŋ kɛŋ doluŋ yʋgɛ a chaanɛ.

²⁷ Ŋɩɩ lɛ nɛ mɩ jaŋ tɩŋ Wɩa tɩndaaraa dɩ ba mʋ dʋnɩa sɛmɛ na-kala a kɛŋ nɩalɩŋ kala Wɩa sɩ lɩɩsa dɩ baa tou a hilimi.

Yesu bʋl sɔjaamɩŋ wɩaa

²⁸ Má gʋnnɛ wɩɩŋ a lɩɩ sɔjaamɩŋ lɛ, dɩ ma nɛ na ʋ kʋʋ tɔsɛ, ma jɩma arɩ lɩmbaŋa yie nɛ.

²⁹ Namaga deeŋ lɛ ma jaŋ gʋnnɛ wɩaa. Dɩ ma nɛ na wɩaa deemba kala dɩ baa ŋaa, ma jɩŋ dɩ mɩ-na Nuhuobiine Bie kɔɔnʋŋ kpaga nɛ.

³⁰ Wʋtɩtɩɩ nɛ mɩ bʋlaa pɩma, ma lɛɛlɛ nɩaa deemba sɩ hɛ ma mɩɩsɩŋ lɛ bɩ jaŋ sʋʋ, ka dɩ wɩaa deemba ŋaa.

³¹ Wɩa-nyuŋ arɩ tinteeŋ kala jaŋ lɛl, ama wɩalɩŋ mɩ sɩ bʋla bɩ jaŋ lɛl.

Nʋʋkala bɩ jaŋ jɩŋ chɛɛ-la wɩaa deemba sɩ jaŋ ŋaa

³² Ama nʋʋkala bɩ jaŋ jɩŋ chɛɛ-la lɛ koo bʋa-la lɛ wɩaa deemba sɩ jaŋ ŋaa. Wɩa tɩndaaraa sɩ hɛ Wɩa-jaŋ ma paala bɩ jaŋ jɩŋ. Mɩ-na Wɩa Bie ma bɩ jaŋ jɩŋ, see mɩ Nyɩmma dʋndʋŋa.

³³ Má kɛŋ ma tɩtɩa woruŋ a pɔ, bɛɛ wɩaa ma bɩ wɩalɩŋ sɩ jaŋ ŋaa chɛɛ-la jɩŋ.

³⁴ Ʋ nagɛ baala sɩ sie a chɩchɛ ʋ vɛŋ wombiiŋ nɛ. Dɩ ʋ nɩɩ chɛ ʋ lɩɩ dɩa lɛ, ʋ jaŋ dagɛ ʋ tɩntɩnnaa ba tɩntɩŋŋaa aŋ bʋla pɩ nɩɩ-la sɩɩ pɔ ʋ dɩa ma dɩ ʋ pɔ woruŋ dɩ ʋ mɩɩra kɔ.

³⁵ Má saa pɔ woruŋ, bɛɛ wɩaa ma bɩ jɩŋ bʋa-la lɛ dɩa-la tɩɩna sɩ jaŋ kɔ, dɩ dɩdaanɩŋ nɛɛ, dɩ tɩta-siesee nɛɛ, dɩ sɩɩpʋʋraa nɛɛ, koo chʋchʋɔŋ nɛɛ, ma bɩ jɩŋ.

³⁶ Dɩ ʋ nɛ guu kɔ, ʋ bɩ maga dɩ ʋ kɔ dɩ ma pɩŋ doŋ.

³⁷ Wɩɩ-la mɩ sɩ bʋlaa pɩma, ʋ nɛ mɩ bʋlaa pɩ nʋʋkala, má pɔ woruŋ.”