Luuk 5 - WƖA TENIŊ

Yesu yɩrɛ ʋ bumbuŋ harɩ-tooroo

¹ Bʋa kʋbala Yesu chɩŋ mʋga kʋbala niiŋ baa yɩrɛ Gɛnɛzarɛt. Nɩaa yʋgɛ a yigi dɔŋɔ a kʋkɔ ʋ teeŋ dɩ ba nɩɩ Wɩa wɩaa.

² Ŋɩɩ nɛ Yesu na lɩɩŋ daborusuŋ balɩa dɩ ba chɩŋ lɩɩŋ niiŋ. Ba tɩŋŋaa kaa kʋ bil nɛ aŋ mʋ dɩ ba chɛsɛ ba jomba. Saamɔŋ nɛ tɩɩ dɔŋɔ.

³ Ŋɩɩ nɛ Yesu jʋʋ Saamɔŋ lɩɩŋ daboro aŋ bʋl dɩ ʋ yigu dɩ ʋ jʋʋ lɩɩŋ tʋɔŋ mʋa. Ʋ mʋ yigu. Ŋɩɩ nɛ Yesu hɔŋ lɩɩŋ daboro-la tʋɔŋ aŋ dɩdagɛ nɩ-daŋ-la kala.

⁴ Ʋ sɩ bʋl wɩaa pɩ nɩalɩŋ dɛrɛ, ʋ bʋla pɩ Saamɔŋ, “Kuosi lɩɩŋ daboro-la dɩ ʋ mʋ lee-la lɩɩŋ sɩ luŋie mʋa, dɩ ŋ dɩ ŋ nandɔnsʋŋ yuo ma jomba a kɛsɛ chenfilee.”

⁵ Ŋɩɩ nɛ Saamɔŋ bʋla pʋ, “Mɩ kʋhɩaŋ, la yuo jomba nɛ woruŋ tɩtaŋɩŋ kala aŋ bɩ kʋŋkala kɛnɛ. Ama ŋ-na sɩ bʋl ŋ-la, mɩ jaŋ yuo.”

⁶ Ŋɩɩ nɛ ba ŋaa ŋɩɩ a kɛsɛ chenfilee yʋgɛ kɩŋkɛŋ. Ba sɩ kɛsɛ yʋgɛ ŋɩɩ, ba jomba chɩchɛ dɩ ba kɩɛsɛ.

⁷ Dɩ ba nandɔnsʋŋ hɛ lɩɩŋ daboro dɔŋɔ tʋɔŋ. Ŋɩɩ nɛ ba yɩrɛba dɩ ba kʋ pɛ ba lɛ. Ba kɔ a chaarɛ chenfile-la a su lɩɩŋ daborusu-la balɩamɩŋ kala. Ba paala chɩchɛ dɩ ba tuu lɩɩŋ bʋbʋɔŋ.

⁸ Saamɔŋ yɩrɩŋ dɔŋɔ ma nɛ fa ŋaa Pɩɩta. Saamɔŋ Pɩɩta sɩ na wɩɩ-la sɩ ŋaa, ʋ tuu kpirimi Yesu sɩpaaŋ aŋ bʋl, “Mɩ Tɩɩna, sii lɩɩ mɩ teeŋ. Mɩ ŋaa wʋbɔŋ-ŋaarʋ nɛ.”

⁹ Ba sɩ kɛsɛ chenfile-la yʋgɛ ŋɩɩ, ʋ ŋaa Pɩɩta arɩ nɩalɩŋ kala wʋkpuŋkpere.

¹⁰ Saamɔŋ nandɔnsʋŋ Jeems arɩ Jɔɔŋ ma fa hɛ nɩmɛ. Ba fa ŋaa Zebidi biiriŋ nɛ. Wɩalɩŋ ba sɩ na ma ŋaaba wʋkpuŋkpere. Ŋɩɩ nɛ Yesu bʋla pɩ Saamɔŋ, “Sɩ́ fawʋllʋŋ fá. A suomi jɩnɩŋ, ŋ jaŋ chɛ kɩkɛsɛ nɩaa arɩ ŋ sɩɩ kɛsɛ chenfilee ŋɩɩ.”

¹¹ Ŋɩɩ harɩŋ ba kɛŋ lɩɩŋ dabori-biisi-la kaa kʋ lɩɩ lɩɩŋ niiŋ, a leŋ kʋŋkala ta nɩmɛ aŋ to ʋ harɩŋ.

Yesu vaarɛ gbege

¹² Ŋɩɩ nɛ Yesu mʋ taŋ kʋbala dɩ baal kʋbala nɛ ŋɩɩ. Ʋ ŋaa gbege nɛ. Ʋ na Yesu a tuu kpirimi ʋ sɩpaaŋ aŋ sʋlʋ a bʋl, “Mɩ Kʋhɩaŋ, dɩ ŋ nɛ cho, ŋaa dɩ mɩ duori.”

¹³ Ŋɩɩ nɛ Yesu lɩɩsɛ ʋ nɩsɩŋ a digu aŋ bʋl, “Mɩ cho nɛ, duori.” Yawɩɩl-la guu leŋ baal-la.

¹⁴ Ŋɩɩ nɛ Yesu bʋla pʋ, “Sɩ́ wɩɩŋ deeŋ bʋla pɩ nʋʋkala. Ama kɛŋ ŋ tɩtɩa mʋ dagɛ Wɩɩsʋllɩ sɩpaalaara, aŋ joŋ ŋ Wɩɩsʋlʋŋ kɩaa pʋ dɩ ʋ kpʋ a pɩɩsɛ ŋ disiniŋ ta arɩ Mosis fa sɩ dagɛma ŋɩɩ. Dɩ ŋ nɛ ŋaa ŋɩɩ, nɩaa jaŋ na arɩ ŋ bɩra bɩ disiniŋ kɛnɛ.”

¹⁵ Aŋ ka wɩɩ-la ha faasa teeli leriŋ kala. Nɩaa yʋga a kɔ ʋ teeŋ dɩ ba nɩɩ ʋ wɩaa, aŋ ka dɩ ʋ pɛ vaarɛ ba nyanyalaa maa.

¹⁶ Ka Yesu yie sii mʋ lee nɩaa sɩ tuo a chʋɔlɛ Wɩa.

Yesu vaarɛ gbɛrɩgɛ

¹⁷ Tapʋlɩɩ kʋbala Yesu dɩdagɛ nɩaa, dɩ Wɩa doluŋ hɛ ʋ lɛ ʋ kaa vɩvaarɛ nyanyal tɩŋŋaa. Farisii tɩŋŋaa arɩ Wɩa teniŋ kerichiba sɩ lɩɩ Galilii tinteeŋ arɩ Judiya tinteeŋ arɩ Jerusalɛm kala ma fa hɔŋ nɩmɛ.

¹⁸ Ŋɩɩ nɛ nɩaa chʋŋ gbɛrɩgʋ kʋbala arɩ ʋ bɔsɔ kala a kaa kɔ a wʋwalɩmɛ dɩ ba kɛnʋ kaa jʋʋ dɩa-la lɛ Yesu sɩ hɛ a bil ʋ sɩpaaŋ.

¹⁹ Ama nɩaa fa sɩ yʋga ŋɩɩ, ba bɩ wombiiŋ na dɩ ba kɛnʋ jʋʋ. Ŋɩɩ nɛ ba kɛnʋ kaa jɩl lusuŋ nyuŋ a ta luri a joŋu ta. Ʋ to nɩmɛ a tuu nɩalɩŋ tʋtʋɔbaanɩŋ Yesu sɩpaaŋ.

²⁰ Yesu sɩ na arɩ ba laaʋ dii woruŋ, ʋ bʋla pɩ gbɛrɩgʋ-la, “Mɩ nandɔŋ, mɩ joŋ ŋ wʋbɔŋŋɔɔ chɛŋ nɛ.”

²¹ Ŋɩɩ nɛ Farisii tɩŋŋaa arɩ Wɩa teniŋ kerichiba-la suomo pɩpɩɛsɛ dɔŋɔ a bʋl, “Kʋbɛɛ nɛ nɩa deeŋ sɩɩ tʋʋsɛ Wɩa joŋŋoo ŋ-la? Nʋʋkala bɩ jaŋ wuo joŋ nʋʋ wʋbɔŋŋɔɔ chɛʋ see Wɩa dʋndʋŋa.”

²² Ŋɩɩ nɛ Yesu wuo jɩŋ ba tʋɔbɩɩnaa a pɩɛsɛba, “Bɛɛ nɛ tɩɩ ma bɩbɩɩnɛ wɩaa deemba?

²³ Mɩ sɩ jaŋ bʋl mɩ joŋ ʋ wʋbɔŋŋɔɔ chɛʋ nɛ ŋaa mɔlɩɩ koo mɩ sɩ jaŋ bʋl ʋ sii a chuoli ʋ bɔsɔ a viiri nɛ ŋaa mɔlɩɩ?

²⁴ Mɩ jaŋ dagɛma arɩ mɩ-na Nuhuobiine Bie kɛŋ doluŋ dʋnɩa lɛ dɩ mɩ joŋ wʋbɔŋŋɔɔ chɛ nɩaa.” Ŋɩɩ nɛ ʋ bʋla pɩ gbɛrɩgʋ-la a bʋl, “Sii a joŋ ŋ bɔsɔ a mʋ dɩa.”

²⁵ Ʋ guu duori a sii a joŋ ʋ bɔsɔ-la ʋ fa sɩ pɩŋ ʋ nyuŋ a mʋ dɩa aŋ dɩdɛnnɛ Wɩa.

²⁶ Ʋ ŋaa nɩalɩŋ kala fa sɩ hɛ nɩmɛ wʋkpuŋkpere. Fawʋllʋŋ kɛmba. Ba dɛnnɛ Wɩa a bʋl, “La na wʋkpuŋkpere jɩnɩŋ.”

Yesu yɩrɛ Levi

²⁷ Ŋɩɩ harɩŋ Yesu bɩra sii a lɩɩ na lampoo laarʋ kʋbala baa yɩrɛ Levi dɩ ʋ hɔŋ ʋ tɩntɩnnɩ dɩa lɛ. Ŋɩɩ nɛ Yesu yɩrʋ a bʋla pʋ, “Sii a to mɩ harɩŋ.”

²⁸ Levi sii a leŋ ʋ kʋŋkala ta aŋ to ʋ harɩŋ.

²⁹ Ŋɩɩ nɛ Levi ŋaa ba gbieli gbieli-bal ʋ dɩa lɛ. Yesu arɩ ʋ harɩ-tooroo arɩ lampoo laaraa dɔnsʋŋ yʋgɛ, arɩ nɩaa dɔnsʋŋ ma fa hɛ nɩmɛ a didii kɩaa.

³⁰ Ŋɩɩ nɛ Farisii tɩŋŋaa dɔnsʋŋ arɩ Wɩa teniŋ kerichiba arɩ ba nandɔnsʋŋ sii a pɩɛsɛ Yesu harɩ-tooroo, “Bɛɛ nɛ tɩɩ ma dɩ lampoo laaraa arɩ wʋbɔŋ ŋaaraa kala hɔnɔ didii kʋdiilee?”

³¹ Yesu nɩɩ ba sɩɩ bʋl ŋɩɩ, ʋ bʋla pɩba, “Nɩalɩŋ sɩ kɛŋ yarɩfɩɛlaa bɩ daaluŋ ŋaara ka chɛ, see nɩalɩŋ sɩɩ wɩɩlʋ.

³² Mɩ kɔ dɩ mɩ yɩrɛ wʋbɔŋ ŋaaraa nɛ dɩ ba leŋ ba wʋbɔŋŋɔɔ. Nɩalɩŋ sɩ kɛŋ tʋɔpʋla mɩ sɩpaaŋ dee mɩ kɔ mɩ yɩrɛ.”

Ba pɩɛsɛ Yesu niiŋ vɔbʋŋ wɩaa

³³ Ŋɩɩ nɛ nɩaa dɔnsʋŋ kʋ pɩɛsɛ Yesu a bʋl, “Jɔɔŋ Wɩa lɩɩ-fooru-la harɩ-tooroo yie vʋvɔɔ niiŋ nɛ aŋ pɛ chʋchʋɔlɛ Wɩa bʋa na-kala lɛ. Farisii tɩŋŋaa harɩ-tooroo ma ŋɩŋaa ŋɩɩ tɩtɩa. Bɛɛ nɛ tɩɩ ŋ-na harɩ-tooroo bɩ niiŋ ka vɔɔ?”

³⁴ Ŋɩɩ nɛ Yesu ma pɩɛsɛba, “Dɩ nʋʋ nɛ mʋ jaa haala kaa kɔ, dɩ ʋ dɩ ʋ nandɔnsʋŋ gbigbieli hajaarɩ gbiele, ʋ nandɔnsʋŋ jaŋ vɔɔ niiŋ? Aɩ, ba bɩ niiŋ ka vɔɔ.

³⁵ Ama chɛɛ dɔŋ hɛ nɩmɛ, ba jaŋ kɛŋ baal-la kaa mʋ lee, ka ʋ nandɔsʋ-la vɔɔ niiŋ.”

³⁶ Ŋɩɩ nɛ ʋ bɩra magɛ namaga a pɩba, “Nʋʋkala bɩ jaŋ keri gɛrɩpɛ-falɩŋ a kaa tɔ gɛrɩ-bɩnɩŋ. Ŋ nɛ ŋaa ŋɩɩ, ŋ jaŋ chei gɛrɩ-falɩɩ-la. Gɛrɩpɛ-falɩɩ-la ma ŋ sɩ kere tɔ gɛrɩ-kɔsʋ-la ma bɩ jaŋ challɛ.

³⁷ Ŋɩɩ tɩtɩa nɛ nʋʋ ma bɩ jaŋ joŋ sɩ-huoŋ a hɛ pupoi-kpaaŋ lɛ. Ŋ nɛ ŋaa ŋɩɩ, pupoi-la jaŋ yɛrɛ a chei, dɩ sɩŋ-la kala bɩsa ta.

³⁸ Sɩ-huoŋ maga dɩ ŋ joŋu hɛ pupoi-zɔmʋŋ lɛ nɛ.

³⁹ Dɩ nʋʋ nɛ nyʋa sɩ-yele, ʋ bɩra bɩ chɛ dɩ ʋ nyʋa sɩ-huoŋ, bɛɛ wɩaa nʋʋkala jɩma arɩ sɩ-yele nɛ zɔmɔ kɩɩ sɩ-huoŋ.”