Luuk 4 - WƖA TENIŊ

Sɩtaanɩ kʋ magɩsɛ Yesu

¹ Ŋɩɩ nɛ Yesu mɩɩra lɩɩ Jɔdaŋ fuo-la tʋɔŋ kʋ lɩɩ dɩ Wɩa Dɩŋ-zɔmʋŋ hɛ ʋ lɛ woruŋ. Ŋɩɩ nɛ ʋ kɛnʋ kaa jʋʋ tintee-hɩlɩŋ tʋɔŋ tapʋlaa mahɩŋ balɩa, Sɩtaanɩ yie kɔ a mɩmagɩsʋ.

² Tapʋlaa mahɩŋ balɩa deemba kala pɛgɛ ʋ bɩ kʋŋkala die. Ŋɩɩ nɛ losuŋ kɛnʋ.

³ Sɩtaanɩ kʋ bʋla pʋ, “Dɩ ŋ nɛ ŋaa Wɩa Bie, leŋ dɩ tabɩɩŋ deeŋ ŋ sɩ na bɩrɩmɛ kʋdiilee.”

⁴ Ŋɩɩ nɛ Yesu bʋla pʋ, “Ba ŋmʋnsɛ Wɩa teniŋ tʋɔŋ a bʋl, ‘Kʋdiilee dʋndʋŋa dee bɩ nuhuobiine mɩɩsɩŋ ka pa.’ ”

⁵ Ŋɩɩ harɩŋ Sɩtaanɩ bɩra kɛnʋ kaa jɩla dagɛ dʋnɩa kuoruŋ fine

⁶ aŋ bʋl, “Kuoruŋ deeŋ kala ŋaa mɩ kʋa nɛ. Mɩ jaŋ ŋaa dɩ ŋ kɛŋ ba kala doluŋ a tɩɩ ba kala a nɩɩ ba sɩma. Mɩ nɛ jaŋ wuo joŋo pɩ nʋʋkala mɩ sɩɩ chɛ.

⁷ Dɩ ŋ nɛ tuu kpirimi mɩ sɩpaaŋ a chʋɔlɛmɛ, kɩaa deemba kala jaŋ ŋaa ŋ kɩaa.”

⁸ Ŋɩɩ nɛ Yesu bɩra bʋla pʋ, “Ba ŋmʋnsɛ Wɩa teniŋ tʋɔŋ, ‘Má chʋchʋɔlɛ La Tɩɩna Wɩa dʋndʋŋa nɛ a tutou.’ ”

⁹ Sɩtaanɩ kɛnʋ kaa mʋ Jerusalɛm a kɛnʋ jɩl Wɩa dɩɩ-balɩŋ nyu-gbaŋa aŋ bʋla pʋ, “Dɩ ŋ nɛ ŋaa Wɩa Bie, joŋ ŋ tɩtɩa yuo daha a tuu chigisi tinteeŋ.

¹⁰ Ba ŋmʋnsɛ Wɩa teniŋ tʋɔŋ a bʋl, ‘Wɩa jaŋ leŋ dɩ ʋ tɩndaaraa kʋ cheme kɛnɩŋ,

¹¹ dɩ ŋ sɩ́ ŋ naaŋ joŋo ŋmoo tabɩɩŋ.’ ”

¹² Ŋɩɩ nɛ Yesu bʋla pʋ, “Ba ŋmʋnsɛ Wɩa teniŋ tʋɔŋ a bʋl, ‘Má sɩ́ ma Tɩɩna Wɩa magɩsʋ.’ ”

¹³ Sɩtaanɩ sɩ magɩsɛ Yesu ŋɩɩ a dɛrɛ, ʋ leŋu, ka dɩ ʋ bɩra ŋaa tapʋlɩɩ dɔŋ.

Yesu suomi ʋ tɩntɩŋŋaa Galilii tinteeŋ lɛ

¹⁴ Ŋɩɩ nɛ Yesu lɩɩ tintee-hɩlɩɩ-la tʋɔŋ Wɩa Dɩŋ-zɔmʋŋ doluŋ lɛ a mʋ Galilii tinteeŋ. Ʋ wɩaa teeli Galilii tinteeŋ kala.

¹⁵ Ŋɩɩ nɛ ʋ dagɛ nɩaa Wɩɩchʋɔlɛ dɩɩsɩŋ lɛ. Ba kala bɩbɛsɛ ʋ lɛ.

Ba vɩa Yesu Nazarɛt lɛ

^16-17 Ŋɩɩ nɛ Yesu mʋ Nazarɛt, lee-la ba sɩ lʋlʋ. Chɛ-wiesii-la chɛɛŋ ʋ mʋ jʋʋ Wɩɩchʋɔlɛ dɩa arɩ ʋ sɩ vɛnɛɛ ŋaa ŋɩɩ. Ŋɩɩ nɛ ʋ sii dɩ ʋ karɩmɛ Wɩa teniŋ a pɩ nɩaa. Ba joŋ Wɩa teniŋ sɛmɛ dɔŋɔ pʋ, teŋ-la Wɩa wʋlaabʋlla Azaaya sɩ ŋmʋnsa lɛ. Ʋ suri a na lee-la ba sɩ ŋmʋnsɛ ŋ-la a karɩmɛ,

¹⁸ “Wɩa Dɩŋ-zɔmʋŋ hɛ mɩ lɛ nɛ. Ʋ nɛ lɩɩsɛmɛ dɩ mɩ bʋl Wɩa wʋzɔmɔ-la a pɩ summoo. Ʋ tɩmmɛ nɛ dɩ mɩ heele bʋla pɩ nɩalɩŋ ba sɩ yuo kɛsɛ arɩ ba jaŋ jomba ta, a bɩra bʋla pɩ nyʋlɩmaa dɩ ba sɩaa jaŋ suri. Ʋ bɩra tɩmmɛ dɩ mɩ laa nɩaa ba sɩ nyaga bil a ta,

¹⁹ ʋ sɩ mɩ heele arɩ jɩna jaŋ yi dɩ La Tɩɩna Wɩa laa ʋ nɩaa ta.”

²⁰ Yesu sɩ karɩmɛ teŋ-la dɛrɛ, ʋ kaa tɔ aŋ joŋo pɩ nɩɩ-la sɩɩ bil teŋ-la aŋ tuu hɔŋ. Nɩalɩŋ kala sɩ hɛ Wɩɩchʋɔlɛ dɩa-la lɛ chaarɛ sɩaa a pɛ ʋ lɛ.

²¹ Ŋɩɩ nɛ Yesu bʋla pɩba, “Teŋ-la mɩ sɩ karɩma pɩma, jɩnɩŋ ʋ sɛnɛ kʋ ŋaa wʋtɩtɩɩ nɛ.”

²² Ŋɩɩ nɛ nɩaa kala tʋɔŋ tɔrɛ ʋ nyuŋ. Wʋzɔmɔ-la kala ʋ sɩ bʋla pɩba ŋaaba wʋkpuŋkpere. Ba pɩpɩɛsɛ dɔŋɔ, “Josɛf bile dee ŋ-laa?”

²³ Ŋɩɩ nɛ Yesu bɩra bʋla pɩba, “Mɩ laa dii arɩ ma jaŋ magɛ namaga a pɩmɛ. Ʋ nɛ ŋ-la: ‘Daalusuŋ tɩɩna, mʋ vaarɛ ŋ tɩtɩa.’ Ma jaŋ bɩra bʋla pɩmɛ a bʋl dɩ wɩalɩŋ kala mɩ sɩ ŋaa Kapɛnam lɛ, dɩ mɩ ŋaaba mɩ tɩtɩa jaŋ ma lɛ.”

²⁴ Ŋɩɩ nɛ Yesu bɩra bʋl, “Wʋtɩtɩɩ, mɩ bʋlaa pɩma arɩ Wɩa wʋlaabʋlla nɛ kɔ ʋ tɩtɩa jaŋ, ʋ nɩaa bɩ ʋ cho.”

²⁵ Ŋɩɩ nɛ Yesu bɩra bʋl, “Má jegili, wʋtɩtɩɩ nɛ mɩ bʋlaa pɩma. Ɩlaaja fa sɩ hɛ ʋ mɩɩsɩŋ lɛ, duonuŋ bɩ nɩa jɩsɩŋ batori arɩ kpaa magɛ dɔŋɔ. Ɩlaaja fa ŋaa Wɩa wʋlaabʋllʋ nɛ. Losuŋ jʋʋ Iziral tinteeŋ woruŋ. Bʋa-la lɛ yo-haalaa yʋga a fa hɛ nɩmɛ.

²⁶ Ama Wɩa bɩ leŋe Ɩlaaja mʋ pɛ Juu tɩŋŋaa yo-haalaa kʋŋkala lɛ. Ʋ tɩmʋ ʋ mʋ pɛ yo-haal kʋbala dʋndʋŋ lɛ nɛ a lɩɩ Sɩdɔŋ tinteeŋ taŋ kʋbala baa yɩrɛ Zarɛfaf.

²⁷ Bʋa-la lɛ Ɩlaasa ma fa sɩ hɛ ʋ mɩɩsɩŋ lɛ, gbegisiŋ ma yʋga nɛ a hɛ Iziral tinteeŋ lɛ, ama Wɩa bɩ leŋe Ɩlaasa vaarɛ ba kʋŋkala see baal kʋbala baa yɩrɛ Neemaŋ. Ʋ lɩɩ Siiria tinteeŋ nɛ.”

²⁸ Nɩalɩŋ kala fa sɩ hɛ Wɩɩchʋɔlɛ dɩa-la lɛ a nɩɩ wɩɩŋ deeŋ, ba baanɩŋ sii ʋ nyuŋ.

²⁹ Ba sii a kɛŋ Yesu lɛrɛ lɩɩ ba taŋ tʋɔŋ a kɛnʋ kaa jɩl dundolo-la nyuŋ ba fa sɩ saa ba jaŋ. Ba kɛnʋ kaa jɩl dundolo-la nyuŋ dɩ-bolii aa chɛ dɩ ba joŋu yuo ta dɩ ʋ tuu tel tinteeŋ.

³⁰ Ka ʋ to nɩalɩŋ tʋɔŋ a lɩɩ viiri.

Jɩŋ-bɔmʋŋ kɛŋ baala

³¹ Ŋɩɩ nɛ Yesu lɩɩ Nazarɛt lɛ a mʋ Kapɛnam sɩ hɛ Galilii tinteeŋ. Chɛ-wiesii-la chɛɛŋ ʋ mʋ jʋʋ Wɩɩchʋɔlɛ dɩa a dɩdagɛ nɩaa.

³² Ʋ sɩɩ dagɛba ŋɩɩ, ʋ ŋaaba wʋkpuŋkpere, bɛɛ wɩaa ʋʋ bʋl wɩaa arɩ doluŋ nɛ.

³³ Dɩ baal kʋbala nɛ fa hɛ Wɩɩchʋɔlɛ dɩa-la lɛ. Jɩŋ-bɔmʋŋ nɛ fa kɛnʋ. Ŋɩɩ nɛ ʋ faasa chɩɩrɛ

³⁴ a bʋl, “Yesu ŋ sɩ lɩɩ Nazarɛt, bɛɛ kʋŋ nɛ ŋ chɛ ŋ ŋaala lɛ? Ŋ kɔ dɩ ŋ kpʋla nɛɛ? Mɩ jɩmɩŋ nɛ. Ŋ ŋaa Wɩa tʋɔpʋl Tɩɩna nɛ.”

³⁵ Yesu sɩ nɩɩ wɩalɩŋ baal-la sɩ bʋla, ʋ kpɩa jɩŋ-bɔŋ-la lɛ, “Kɛŋ goŋ aŋ kʋ lɩɩ baal-la lɛ.” Jɩŋ-bɔŋ-la ŋaa baal-la tel ba kala sɩpaaŋ aŋ lɩɩ baal-la lɛ, a bɩ ʋ pɩra.

³⁶ Ba sɩ na ŋɩɩ, ʋ ŋaa nʋʋkala wʋkpuŋkpere. Ŋɩɩ nɛ ba pɩpɩɛsɛ dɔŋɔ, “Ɛɛ nɛ ʋ wuo bʋl ŋ-la? Baala deeŋ kɛŋ doluŋ a wuo jɩŋ-bɔŋŋɔɔ, a bʋl wɩaa pɩba ba lɩɩ nɩaa lɛ.”

³⁷ Ŋɩɩ nɛ Yesu wɩaa teeli lee-la kala.

Yesu vaarɛ nɩaa yʋgɛ

³⁸ Ŋɩɩ nɛ Yesu lɩɩ Wɩɩchʋɔlɛ dɩa-la lɛ a mʋ baal kʋbala baa yɩrɛ Saamɔŋ dɩa. Ʋ mʋa dɩ Saamɔŋ hɩɩlɩ-haala pɩna aa wɩɩlɛ. Ʋ yaraa kala lɩŋ. Ba sɩ bʋl ʋ wɩaa pʋ,

³⁹ Yesu mʋ chɩŋ ʋ sɛmɛ aŋ kpɩa nyanyalɩɩ-la lɛ dɩ ʋ leŋu. Nyanyalɩɩ-la leŋ haal-la, ʋ guu sii a ŋaa kʋdiilee pɩba.

⁴⁰ Dɩ nɩaa dɔnsʋŋ ma nɛ ŋɩɩ, ba nandɔnsʋŋ wʋwɩɩlɛ. Nyanyal doho kala nɛ kɛmba. Wɩa sɩ jʋa, ba kɛmba kaa kɔ Yesu teeŋ. Ʋ joŋ ʋ nɩsaa a daŋ ba kʋŋkala lɛ, ba duori.

⁴¹ Jɩŋ-bɔŋŋɔɔ ma lɩɩ nɩaa lɛ a yʋgɛ aa chɩɩrɛ, a bʋla pɩ Yesu, “Ŋ nɛ ŋaa Wɩa Bie.” Ŋɩɩ nɛ Yesu kpɩa ba lɛ dɩ ba sɩ́ ʋ wɩaa bʋl, bɛɛ wɩaa ba jɩma arɩ ʋ nɛ ŋaa Kirisito.

Yesu bʋl Wɩa wɩaa Judiya tinteeŋ lɛ

⁴² Sɩɩpʋʋraa Yesu lɩɩ taŋ-la lɛ a mʋ lee-la nɩaa sɩ tuo nɩmɛ. Ŋɩɩ nɛ nɩaa suomo chɩchɛʋ. Ba sɩ mʋ naʋ, ba wʋwalɩmɛ dɩ ba kɛnʋ bil dɩ ʋ sɩ́ viiru.

⁴³ Ŋɩɩ nɛ Yesu bʋla pɩba, “Ʋ maga dɩ mɩ mʋ tasɩŋ dɔnsʋŋ ma a bʋl Wɩa kuorii-la wɩaa nɩmɛ. Ŋɩɩ nɛ Wɩa tɩmmɛ dɩ mɩ kʋ ŋaa.”

⁴⁴ Ŋɩɩ nɛ ʋ bʋl Wɩa wɩaa Judiya tinteeŋ, Wɩɩchʋɔlɛ dɩɩsɩŋ lɛ.