Luuk 24 - WƖA TENIŊ

Yesu sii sʋʋŋ lɛ

¹ Lahadi chɛɛŋ sɩɩpʋʋraa, haala-la sii a kɛŋ tʋlaalɩɩ-la a kaa mʋ bʋa-la leriŋ.

² Ba sɩ yi lee-la, ba na dɩ tabɩɩ-la ba fa sɩ kaa tɔ bʋa-la niiŋ suro.

³ Ŋɩɩ nɛ ba jʋʋ bʋa-la tʋɔŋ, ama ba bɩ La Tɩɩna Yesu kʋsʋʋŋ na.

⁴ Ba chɩŋ nɩmɛ a bɩ jɩŋ wɩɩ-la kala ba sɩ jaŋ ŋaa. Ba ŋaa dɩ ba beŋ, dɩ baalaa balɩa nɛ chɩŋ ba sɛmɛ ŋɩɩ. Ba gɛnnɩŋ faasa tʋtʋl.

⁵ Fawʋllʋŋ faasa kɛŋ haala-la. Ba kɛŋ ba nyusuŋ gʋrɛ. Ŋɩɩ nɛ baala-la pɩɛsɛba, “Bɛɛ nɛ tɩɩ ma chɩchɛ nɩɩ-la sɩ weye nɩsʋʋnʋŋ tʋɔŋ?

⁶ Ʋ tuo daha. Ʋ sie nɛ. Má liise mʋ yi wɩɩ-la ʋ fa sɩ bʋla pɩma lɛ, bʋa-la lɛ ʋ fa sɩ hɛ Galilii lɛ.

⁷ Ʋ fa bʋla pɩma arɩ ba jaŋ joŋ ʋ-na Nuhuobiine Bie a hɛ wʋbɔŋ ŋaaraa nɩsɩŋ lɛ dɩ ba kpaasʋ daagɛsɛ nyuŋ dɩ ʋ sʋʋ, aŋ sii sʋʋŋ lɛ tapʋlaa batori chɛɛŋ.”

⁸ Ŋɩɩ nɛ haala-la liise yi wɩalɩŋ ʋ fa sɩ bʋla pɩba lɛ.

⁹ Ba mɩɩra lɩɩ bʋa-la leriŋ a mʋ bʋla pɩ Yesu harɩ-tooroo fii arɩ kʋbala-la arɩ nɩalɩŋ dɔnsʋŋ fa sɩɩ to ʋ harɩŋ wɩalɩŋ kala sɩ ŋaa.

¹⁰ Haala-la sɩ mʋ bʋa-la leriŋ nɛ ŋ-la: Mɛɛrɩ Magɩdalɩŋ, Jʋana arɩ Jeems naaŋ Mɛɛrɩ. Ba dɩ haalaa dɔnsʋŋ nɛ bʋl wɩaa deemba sɩ ŋaa a pɩ Yesu nanzɔɔba-la.

¹¹ Ama Yesu nanzɔɔba-la fa bɩɩna arɩ wɩɩ-la haala-la sɩ bʋla ŋaa wʋnyɩɛrɩŋ nɛ. Ba bɩ laa dii.

¹² Ama Pɩɩta sii a fá mʋ bʋa-la leriŋ, a mʋ jʋʋ bʋa-la, a beŋ a na gɛnnɩ-la ba fa sɩ joŋo bɛ Yesu dɩ ba pɩna, aŋ ka ʋ bɩ kʋŋkala na. Ŋɩɩ nɛ ʋ kperu ʋ mɩɩra mʋ dɩa a kɛŋ wɩɩ-la sɩ ŋaa a bɩbɩɩnɛ.

Nɩaa balɩa fa sɩɩ to Yesu harɩŋ mʋ taŋ kʋbala baa yɩrɛ Emayɔs

¹³ Tapʋlɩɩ-la tɩtɩa nɛ nɩaa balɩa fa sɩɩ to Yesu harɩŋ mʋmʋ taŋ kʋbala baa yɩrɛ Emayɔs. Emayɔs arɩ Jerusalɛm yi arɩ meel-daasɩŋ balɩpɛ nɛ.

¹⁴ Ba sɩɩ mʋ ŋɩɩ, ba bʋbʋl wɩalɩŋ kala sɩ ŋaa.

¹⁵ Ba sɩ bʋl wɩalɩŋ vɩvɛŋ ŋɩɩ, Yesu tɩtɩa kɔ ba teeŋ ba kala vɩvɛŋ,

¹⁶ ama ba bɩ wuo jɩŋ arɩ ʋ nɛ.

¹⁷ Ŋɩɩ nɛ Yesu pɩɛsɛba, “Wʋbɛɛ nɛ ma bʋlaa vɛŋ ŋɩɩ?” Ŋɩɩ nɛ ba chɩŋ, ba tʋɔŋ kala chei.

¹⁸ Ba dɔŋɔ yɩrɩŋ nɛ Kiliopas. Ŋɩɩ nɛ Kiliopas pɩɛsʋ, “Ŋ dʋndʋŋa nɛ ŋaa nʋhʋɔrʋ a hɛ Jerusalɛm lɛ a bɩ wɩɩ-la sɩ ŋaa tapʋlaa deemba nɩaa?”

¹⁹ Ŋɩɩ nɛ ʋ pɩɛsɛba, “Wʋbɛɛ nɛ ŋɩɩ?” Ŋɩɩ nɛ ba bʋla pʋ, “Wɩɩ-la sɩ ŋaa Yesu sɩ lɩɩ Nazarɛt lɛ. Baala deeŋ fa ŋaa Wɩa wʋlaabʋllʋ nɛ. Wɩalɩŋ ʋ sɩɩ ŋaa arɩ wɩalɩŋ ʋ sɩɩ bʋl fa kɛŋ doluŋ Wɩa arɩ nuhuobiinee kala teeŋ.

²⁰ Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ joŋu hɛ Paalɩt nɩsɩŋ lɛ dɩ ʋ kpʋʋ. Ŋɩɩ nɛ Paalɩt ŋaa ba kpaasʋ mɛrɛ daagɛsɛ nyuŋ ʋ sʋʋ.

²¹ La fa kɛŋ yɩɛlaa arɩ ʋ nɛ ŋaa nɩɩ-la sɩ kɔ dɩ ʋ laa Iziral tɩŋŋaa ta. Ba sɩ kpʋ Yesu, ʋ tapʋlaa batori nɛ jɩnɩŋ.

²² La dɩ haala-la dɔnsʋŋ fa sɩɩ to Yesu harɩŋ kʋ bʋl wɩɩ pɩla ʋ kperila. Ba sii mʋ bʋa-la leriŋ sɩɩpʋʋraa,

²³ aŋ bɩ Yesu kʋsʋʋŋ na. Ba kʋ bʋl ŋɩɩ pɩla. Ba bʋla arɩ ba na Wɩa tɩndaaraa a nagɛ duosoo tʋɔŋ. Ba bʋla pɩba arɩ Yesu weye nɛ.

²⁴ La tʋɔŋ dɔnsʋŋ ma mʋ bʋa-la leriŋ a na arɩ wɩɩ-la haala-la sɩ bʋla ŋaa wʋtɩtɩɩ nɛ. Ba bɩ Yesu na.”

²⁵ Ŋɩɩ nɛ Yesu bʋla pɩba, “Nɩyaaraa, ma tʋɔŋ dolie, ma bɩ wɩalɩŋ Wɩa wʋlaabʋllaa fa sɩ bʋla laa dii.

²⁶ Ma bɩ jɩŋ arɩ ʋ maga dɩ Nɩɩ-la Wɩa sɩ lɩɩsa, na hɛɛŋ nɛ aŋ-na jʋʋ ʋ kuorii-la tʋɔŋ a laa yɩrɩŋ?”

²⁷ Ŋɩɩ nɛ Yesu dagɛ wɩalɩŋ kala ba sɩ ŋmʋnsa Wɩa teniŋ tʋɔŋ a tɩgɛ ʋ lɛ bʋbʋɔŋ a pɩba. Ʋ suomi teniŋ-la Mosis sɩ ŋmʋnsa a kaa mʋ tenni-la kala Wɩa wʋlaabʋllaa sɩ ŋmʋnsa lɛ.

²⁸ Ba sɩ kʋ kpagɛ taŋ-la ba sɩɩ mʋ, Yesu ŋaa a nagɛ dɩ ʋ ha kielee mʋ nɛ.

²⁹ Ŋɩɩ nɛ ba kɛnʋ bil aŋ bʋl, “Chʋa la teeŋ, taŋ bire nɛ.” Ŋɩɩ nɛ ʋ jʋʋ dɩ ʋ chʋa ba teeŋ.

³⁰ Ba sɩ hɔnɔ dɩ ba dii kʋdiilee, Yesu joŋ boroboro a chʋɔlɛ Wɩa aŋ kaa chɔgɔ pɩba dɩ ba dii.

³¹ Ʋ sɩ ŋaa ŋɩɩ, ba sɩaa lʋɔmɛ ba jɩŋ arɩ Yesu nɛ. Ka ʋ lɛl ba sɩpaaŋ.

³² Ŋɩɩ nɛ ba bʋla pɩ dɔŋɔ, “La yaraa fa fɩɛla nɛ woruŋ ʋ sɩ bʋl wɩaa pɩpɩla wombiiŋ lɛ, aŋ pɛ dɩdagɛla Wɩa teniŋ wɩalɩŋ bʋbʋɔŋ.”

³³ Ŋɩɩ nɛ ba sii lɩma lɩma a mɩɩra mʋ Jerusalɛm, a na Yesu harɩ-tooro-la fii arɩ kʋbala, arɩ nɩalɩŋ dɔnsʋŋ ma fa sɩɩ to Yesu harɩŋ dɩ ba hilime,

³⁴ a bʋbʋl, “Wʋtɩtɩɩ La Tɩɩna sɛnɛ sii sʋʋŋ lɛ nɛ ʋ kɛŋ ʋ tɩtɩa kʋ dagɛ Saamɔŋ nɛ.”

³⁵ Ŋɩɩ nɛ nɩalɩŋ balɩamɩŋ ma bʋl wɩɩ-la sɩ ŋaa wombiiŋ lɛ, arɩ ŋɩɩ ba sɩ kʋ jɩŋ arɩ Yesu nɛ. Ba sɩ dɩ bʋa-la lɛ ʋ sɩ kɛŋ boroboro chɔgɛ a pɩba lɛ nɛ ba jɩŋ arɩ ʋ nɛ.

Yesu kɛŋ ʋ tɩtɩa kʋ dagɛ ʋ harɩ-tooroo

³⁶ Nɩalɩŋ balɩa sɩɩ bʋl wɩalɩŋ ŋɩɩ, dɩ Yesu tɩtɩa nɛ chɩŋ ba tʋtʋɔbaanɩŋ ŋɩɩ a bʋla pɩba, “Ma jaŋ hɔŋ arɩ yarɩfɩɛlaa.”

³⁷ Ŋɩɩ nɛ fawʋllʋŋ kɛmba, ba bɩɩna arɩ nɩdɩma nɛ ba na ŋɩɩ.

³⁸ Ŋɩɩ nɛ Yesu pɩɛsɛba, “Bɛɛ nɛ tɩɩ fawʋllʋŋ kɛmma, ma tʋɔbɩɩnaa bibegili?

³⁹ Má beŋ mɩ nɩsaa arɩ mɩ naasɩŋ na a jɩŋ dɩ mɩ nɛ. Má digimi na. Ma jɩma arɩ nɩdɩma bɩ yaraa kɛnɛ arɩ mɩ sɩ kɛnɛ ŋɩɩ.”

⁴⁰ Ʋ sɩ bʋl ŋɩɩ, ʋ kɛŋ ʋ nɩsaa arɩ ʋ naasɩŋ kala a dagɛba.

⁴¹ Ba ha bɩ laa dii, ka wɩɩ-la sɩma pɩba aŋ ŋaaba wʋkpuŋkpere. Ŋɩɩ nɛ ʋ pɩɛsɛba, “Ma kɛŋ kʋdiilee nɛɛ?”

⁴² Ŋɩɩ nɛ ba joŋ chenfiliŋ ba sɩ wasa a pʋ.

⁴³ Ʋ laa chaŋ ba sɩpaaŋ.

⁴⁴ Ŋɩɩ nɛ ʋ bʋla pɩba, “Mɩ fa sɩ hɛ ma teeŋ, mɩ bʋla pɩma arɩ wɩɩ-na kala ba fa sɩ ŋmʋnsa a tɩgɛ mɩ lɛ jaŋ kʋ ŋaa wʋtɩtɩɩ: Wɩalɩŋ Mosis fa sɩ ŋmʋnsa bil dɩ nɩaa tuto arɩ wɩalɩŋ Wɩa wʋlaabʋllaa fa sɩ ŋmʋnsa, arɩ Wɩa teniŋ sɛmɛ dɔŋɔ ba sɩɩ yɩrɛ Wɩa yɩɩlaa tʋɔŋ.”

⁴⁵ Ŋɩɩ nɛ Yesu ŋaa ba kɛŋ wʋjɩmɩŋ dɩ ba wuo jɩŋ Wɩa teniŋ wɩaa bʋbʋɔŋ.

⁴⁶ Ŋɩɩ nɛ ʋ bʋla pɩba, “Ŋ-la nɛ ba ŋmʋnsa bil: Ʋ maga dɩ Kirisito, Nɩɩ-la Wɩa sɩ lɩɩsa na hɛɛŋ a sʋʋ aŋ sii sʋʋŋ lɛ tapʋlaa batori chɛɛŋ.

⁴⁷ Ba jaŋ bʋl Wɩa wɩaa ʋ yɩrɩŋ lɛ, tintee kala lɛ, dɩ nɩaa bɩrɩma lɩɩ ba wʋbɔŋŋɔɔ lɛ dɩ Wɩa joŋ ba wʋbɔŋŋɔɔ chɛba. Ba jaŋ suomo ŋaa ŋɩɩ Jerusalɛm lɛ.

⁴⁸ Ma ŋaa wɩaa deemba kala sɩada nɛ, dɩ ma wuo bʋla pɩ nɩaa.

⁴⁹ Mɩ jaŋ leŋ dɩ kʋ-la mɩ Nyɩmma sɩ sɩ ʋ jaŋ joŋo pɩma kɔ ma teeŋ. Ama má gbɛrɛ Jerusalɛm lɛ, a kaa mʋ yi bʋa-la lɛ doluŋ sɩ jaŋ lɩɩ Wɩa teeŋ a kʋ tuu hɛ ma lɛ.”

Yesu jɩl Wɩa-jaŋ

⁵⁰ Ŋɩɩ nɛ ʋ kɛŋ ʋ harɩ-tooro-la ba lɩɩ tabal-la lɛ a joŋ wombiiŋ a mʋmʋ Bɛtanɩ dɩɩrɩŋ. Nɩmɛ nɛ ʋ kɛŋ ʋ nɩsaa je ba nyuŋ aŋ chʋɔlɛ Wɩa pɩba.

⁵¹ Ʋ ha sɩ chʋɔlɛ Wɩa pɩpɩba ŋɩɩ, ŋɩɩ nɛ ʋ sii ba teeŋ (ka Wɩa joŋu kaa jɩl Wɩa-jaŋ).

⁵² Ŋɩɩ nɛ ba chʋɔlʋ aŋ mɩɩra mʋ Jerusalɛm. Ba tʋɔŋ kala faasa tɔrɛ.

⁵³ Ba yie jʋʋ Wɩa dɩɩ-bal-la bʋa na-kala lɛ a chʋchʋɔlɛ Wɩa.