Luuk 23 - WƖA TENIŊ

Ba kɛŋ Yesu kaa mʋ Paalɩt teeŋ

¹ Ŋɩɩ nɛ nɩalɩŋ kala sɩ kʋ hilimi sii a kɛŋ Yesu a kaa mʋ Paalɩt teeŋ.

² Nɩmɛ nɛ ba suomo dɩdagɛ wɩalɩŋ ʋ sɩ cheye, “La kɛŋ baala deeŋ dɩ ʋ nyɩsɛ la nɩaa dɩ ba vɩa la wombii-la la sɩɩ to, aŋ bʋl dɩ ba sɩ́ lampoo ma time pɩ Rom tinteeŋ kuoru-balɩŋ. Ʋ bɩra bʋla a tɩgɛ ʋ tɩtɩa lɛ dɩ ʋ nɛ ŋaa Kirisito, Nɩɩ-la Wɩa sɩ lɩɩsa, aŋ bʋl dɩ ʋ ŋaa kuoru ma nɛ.”

³ Ŋɩɩ nɛ Paalɩt pɩɛsʋ, “Ŋ nɛ ŋaa Juu tɩŋŋaa kuoro?” Yesu bʋla pʋ, “Oo, mɩ nɛ.”

⁴ Ŋɩɩ nɛ Paalɩt bʋla pɩ Wɩɩsʋllɩ sɩpaalaaraa kʋhɩasɩŋ arɩ nɩ-daŋ-la kala sɩ hilime, “Mɩ bɩ wɩɩ-la baala deeŋ sɩ ŋaa chei na a magɛ dɩ ba kpʋʋ.”

⁵ Ŋɩɩ nɛ nɩalɩŋ sɩɩ bʋl Yesu teeŋ ha pɛsɛ a bʋl, “Ʋ dagɛ nɩaa ba hɛ yuosuŋ Judiya tinteeŋ kala lɛ nɛ. Ʋ suomi Galilii lɛ nɛ, aŋ lɛɛlɛ kɔ Jerusalɛm ma ŋ-la.”

Ba kɛŋ Yesu mʋ Hɛrɔd teeŋ

⁶ Paalɩt sɩ nɩɩ ŋɩɩ, ʋ pɩɛsɛ nɩalɩŋ sɩɩ bʋl Yesu teeŋ, “Baala deeŋ ŋaa Galilii tɩɩna nɛɛ?”

⁷ Paalɩt sɩ nɩa arɩ Hɛrɔd nɛ faa beŋ tintee-la Yesu sɩ lɩa, ʋ ŋaa ba kɛnʋ kaa mʋ Hɛrɔd teeŋ. Bʋa-la lɛ dɩ Hɛrɔd hɛ Jerusalɛm lɛ.

⁸ Hɛrɔd tʋɔŋ kala tɔrɛ ʋ sɩ na Yesu, bɛɛ wɩaa ʋ nɩɩ ʋ wɩaa faafaa kala nɛ a yie chɩchɛ dɩ ʋ naʋ. Ʋ faa chɛ dɩ Yesu ŋaa wʋkpuŋkpere nɛ dɩ ʋ na.

⁹ Ŋɩɩ nɛ Hɛrɔd pɩɛsɛ Yesu wɩaa yʋgɛ, ama ʋ bɩ wɩɩ bʋla.

¹⁰ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba-la sii tʋɔra mʋ Yesu lɛ a faasa bʋl ʋ teeŋ woruŋ.

¹¹ Hɛrɔd arɩ ʋ laalɩyuoroo sieri Yesu lɛ a dɔgɩsʋ, aŋ leŋ ba joŋ gɛrɩ-zɔŋ kʋbala laalʋ, aŋ mɩɩra kɛnʋ mʋ Paalɩt teeŋ.

¹² Hɛrɔd arɩ Paalɩt faa yuo dɔŋɔ nɛ. A chɩŋ tapʋlɩɩ-la nɛ, ba sɩŋ a ŋaa nandɔsɛ.

Ba sɩ dɩ ba kɛŋ Yesu mʋ kpʋ

¹³ Ŋɩɩ nɛ Paalɩt yɩrɛ Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ arɩ nɩaa dɔnsʋŋ,

¹⁴ a bʋla pɩba, “Má kɛŋ baala deeŋ kaa kɔ mɩ teeŋ a bʋla pɩmɛ arɩ ʋ nyɩsɛ nɩaa dɩ ba vɩa wombii-la la sɩɩ to nɛ. Mɩ saa pɩɛsʋ wɩaa nɛ ma kala sɩpaaŋ. Wɩalɩŋ ma sɩ bʋla arɩ ʋ cheye, mɩ bɩ ba tʋɔŋ kʋbala ma na dɩ ʋ ŋaa chei.

¹⁵ Hɛrɔd ma sɩ bɩ na ʋ sɩ ŋaa wɩɩ-la chei, ŋɩɩ nɛ tɩɩ ʋ leŋ ba bɩra kɛnʋ kaa kɔ daha. Má bee na, baala deeŋ bɩ wɩɩkala ŋaa chei a magɛ dɩ ba kpʋʋ.

¹⁶ Mɩ jaŋ leŋ dɩ ba vɩɩrʋ aŋ joŋu ta.”

¹⁷ Ama dɩɩsɩŋ kiele bal gbiele-la nɛ yie-na kala, ba yie leŋ Paalɩt lɩɩsɛ dansarɩkaba tʋɔŋ kʋbala nɛ a ta, nɩɩ-la Juu tɩŋŋaa sɩ cho dɩ ba lɩɩsa.

¹⁸ Ŋɩɩ nɛ nɩalɩŋ kala kpɩa goŋ a bʋl, “Kpʋ Yesu aŋ lɩɩsɛ Barabas ta pɩla.”

¹⁹ Bʋa kʋbala lɛ, nɩaa sii hɛ yuosuŋ nɛ ba tabalɩŋ lɛ. Barabas kpʋ nʋʋ, ŋɩɩ nɛ tɩɩ ba kɛnʋ mʋ tɔ dɩa.

²⁰ Paalɩt fa cho dɩ ʋ joŋ Yesu ta nɛ, ŋɩɩ nɛ ʋ bɩra bʋl wɩaa aa sʋl nɩ-daŋ-la.

²¹ Ama ba faasa kpɩa goŋ a bʋl, “Má kpaasʋ daagɛsɛ nyuŋ, má kpaasʋ daagɛsɛ nyuŋ.”

²² Ŋɩɩ nɛ Paalɩt bʋl wɩaa pɩba torimuŋ lɛ, “Wʋbɛɛ nɛ baala deeŋ ŋaa chei? Mɩ-na bɩ wɩɩ-la ʋ sɩ ŋaa chei na a magɛ dɩ ba kpʋʋ. Mɩ jaŋ leŋ dɩ ba vɩɩrʋ aŋ joŋu ta.”

²³ Ama ba ha pɛsɛ, a faasa kpɩa goŋ a bʋl, “Ʋ maga dɩ ba kɛŋ Yesu a kpaasɛ daagɛsɛ nyuŋ nɛ.” Ba sɩɩ ŋaa goŋ ŋɩɩ, Paalɩt kʋ sɛɩ ba kʋa

²⁴ a bʋl dɩ ba kɛŋ Yesu kpaasɛ daagɛsɛ nyuŋ, arɩ nɩalɩŋ fa sɩɩ chɛ ŋɩɩ.

²⁵ Ŋɩɩ nɛ Paalɩt lɩɩsɛ nɩɩ-la ba fa sɩ cho a ta, nɩɩ-la ba fa sɩ kaa tɔ dɩa a tɩŋ ʋ sɩ hɛ yuosuŋ a kpʋ nɩaa. Ʋ joŋ Yesu a hɛ ba nɩsɩŋ lɛ dɩ ba ŋaaʋ wɩɩ-la kala ba sɩ cho.

Ba kpaasɛ Yesu daagɛsɛ nyuŋ

²⁶ Ŋɩɩ nɛ laalɩyuoroo kɛŋ Yesu kaa lɩɩ dɩ ba kpaasɛ daagɛsɛ nyuŋ, a cheŋ baal kʋbala baa yɩrɛ Saamɔŋ a lɩɩ Siriini, dɩ ʋ lɩɩ baga a jʋjʋʋ Jerusalɛm. Ba kɛnʋ a joŋ daagɛsɛ-la baasʋ ʋ kaa tuto Yesu harɩŋ.

²⁷ Nɩ-daŋ nɛ faa to ʋ harɩŋ, ba tʋɔŋ haalaa ma fa yʋga a yiyel Yesu wɩaa.

²⁸ Ŋɩɩ nɛ Yesu mɩɩra daasɛba aŋ bʋla pɩba, “Jerusalɛm haalaa, má sɩ́ mɩ wɩaa yel. Má yel ma tɩtɩa arɩ ma biiriŋ wɩaa.

²⁹ Tapʋlaa ka kɔ nɛ, nɩaa jaŋ bʋl, ‘Hapɩraa tʋɔŋ jaŋ tɔrɛ, haala-la sɩ bɩ biiriŋ lʋla a dɩɛsɛ.’

³⁰ Bʋa-la lɛ nɛ nɩaa jaŋ bʋl, ‘Peelee, má tele tɔla, dundolluŋ, má tɔla.’

³¹ Mɩ sɩ nagɛ tɩɩ-weyiŋ, aŋ ka ba dɔgɩsɛmɛ ŋ-la, ɛɛ nɛ ba jaŋ ŋaa ma ma lɛ, ma sɩ nagɛ tɩɩ-hɩlaa?”

³² Ba sɩ kɛŋ Yesu mʋ ŋɩɩ, ba kɛŋ nɩbɔŋŋɔɔ balɩa ma kaa mʋ dɩ ba kpʋba a pɛ Yesu lɛ.

³³ Ŋɩɩ nɛ ba mʋ yi lee kʋbala baa yɩrɛ nyu-kuŋkogulo. Ba sɩ yi lee-la, ba joŋ Yesu arɩ nɩbɔmɔ-la balɩa a kpaasɛba daagɛsɛ nyuŋ. Dɔŋɔ daagɛsɛ hɛ Yesu nadiiŋ, dɔŋɔ ma daagɛsɛ hɛ ʋ nagʋa.

³⁴ Ŋɩɩ nɛ Yesu chʋɔlɛ Wɩa a bʋl, “Mɩ Nyɩmma, joŋ wɩɩ-la ba sɩ ŋaa a chɛba, bɛɛ wɩaa ba bɩ jɩŋ wɩɩ-la kala ba sɩɩ ŋaa.” Ŋɩɩ nɛ ba tɔnsɛ a kɛŋ Yesu gɛnnɩŋ kpaa.

³⁵ Nɩaa dɔnsʋŋ ma chɩŋ nɩmɛ a bibeŋ, aŋ ka Juu tɩŋŋaa kʋhɩasɩŋ sisieri ʋ lɛ a bʋl, “Ʋ laa nɩaa tɩta nɛ, ma leŋ dɩ ʋ laa ʋ tɩtɩa ta yeii, dɩ ʋ nɛ ŋaa Kirisito, Nɩɩ-la Wɩa sɩ lɩɩsa.”

³⁶ Laalɩyuoroo ma sieri ʋ lɛ a ŋaa sɩnɩŋ sɩ nyala a kaa mʋ pʋ dɩ ʋ nyʋa

³⁷ aŋ bʋl, “Dɩ ŋ nɛ ŋaa Juu tɩŋŋaa kuoro, laa ŋ tɩtɩa ta.”

³⁸ Ba ŋmʋnsa mɛrɛ ʋ daagɛsɛ-la lɛ a bʋl: JUU TƖŊŊAA KUORO NƐ Ŋ-LA.

³⁹ Ŋɩɩ nɛ nɩbɔmɔ-la dɔŋɔ ma sɩ sagɛ daagɛsɛ nyuŋ tʋʋsɛ Yesu a bʋl, “Ŋ dee Nɩɩ-la Wɩa sɩ lɩɩsaa? Saa laa ŋ tɩtɩa ta aŋ pɛ laa la ma ta.”

⁴⁰ Ŋɩɩ nɛ nɩbɔŋ-la dɔŋɔ kpɩa ʋ lɛ a bʋl, “Ŋ bɩ Wɩa ka fáa? La dɩ ʋ kala nɛ jʋʋ wʋbala.

⁴¹ Ʋ maga dɩ ba ŋaa la-na ŋɩɩ nɛ, bɛɛ wɩaa la ŋaa wʋbɔŋ nɛ, aŋ ka ʋ-na bɩ wɩɩkala cheye.”

⁴² Ŋɩɩ nɛ aŋ ka ʋ bʋla pɩ Yesu, “Yesu, dɩ ŋ nɛ dii kuoruŋ, liisi mɩ ma wɩaa.”

⁴³ Ŋɩɩ nɛ Yesu bʋla pʋ, “Wʋtɩtɩɩ nɛ mɩ bʋlaa pɩŋ, mɩ dɩŋ kala jaŋ hɛ Wɩa-jaŋ lɛ jɩnɩŋ.”

Yesu sʋba

⁴⁴ Wɩa sɩ kʋ magɛ nyu-gbaŋa, leriŋ kala biri lim a mʋ yi dɩdaanɩŋ, ka leriŋ bɩra pʋllɛ.

⁴⁵ Patɩɩsaŋ nɛ fa hɛ Wɩa dɩɩ-bal-la tʋɔŋ ba kaa kɛrɛ. Ʋ kɩɛsɛ balɩa.

⁴⁶ Ŋɩɩ nɛ ka Yesu faasa yɩrɛ a bʋl, “Mɩ Nyɩmma, mɩ joŋ mɩ tɩtɩa a hɛ ŋ nɩsɩŋ lɛ.” Ʋ bʋl ŋɩɩ nɛ aŋ wiesi ʋ wiesi katɩɩ aŋ sʋʋ.

⁴⁷ Ŋɩɩ nɛ dɩ laalɩyuoroo zɔlɔ kʋhɩaŋ kʋbala fa chɩŋ nɩmɛ. Ʋ na wɩɩ-la sɩ ŋaa, a dɛnnɛ Wɩa a bʋl, “Wʋtɩtɩɩ, baala deeŋ fa ŋaa tʋɔpʋl tɩɩna nɛ, ʋ bɩ wɩɩkala cheye.”

⁴⁸ Nɩalɩŋ kala fa sɩ hilimi nɩmɛ dɩ ba na wɩɩ-la sɩ jaŋ ŋaa, aŋ lɛɛlɛ na wɩɩ-la sɩ ŋaa, ba paa ba nɩsaa chʋŋ nyuŋ lɛ a mɩɩra mʋ dɩa.

⁴⁹ Nɩalɩŋ kala fa sɩ jɩŋ Yesu, arɩ haala-la kala fa sɩɩ to ʋ harɩŋ a lɩɩ Galilii kɔ, ba chɩŋ dɩ-bolii a na wɩaa deemba kala.

Ba hugi Yesu

⁵⁰ Baal kʋbala ma nɛ fa hɛ nɩmɛ baa yɩrɛ Josɛf. Ʋ fa ŋaa nɩalɩŋ sɩ yie hilimi a vʋvʋʋrɛ wɩaa dɔŋɔ nɛ, a ŋaa nɩzɔŋ, a ŋaa tʋɔpʋl tɩɩna.

⁵¹ Ba fa sɩɩ vʋʋrɛ dɩ ba kpʋ Yesu ŋɩɩ, ʋ fa bɩ sɛyɛ. Ʋ fa lɩɩ Juda taŋ-la ba sɩɩ yɩrɛ Arɩmatɩya nɛ a gbɩgbɛrɛ Wɩa kuorii-la dɩ ʋ kɔ.

⁵² Ŋɩɩ nɛ ʋ sii mʋ Paalɩt teeŋ a sʋl Yesu kʋsʋʋŋ, ʋ sɛɩ.

⁵³ Ʋ mʋ sori a joŋ gɛrɩ-pʋla a bɛʋ, a kɛnʋ kaa mʋ hugi bʋŋ ba sɩ lɔsɔ lɛ. Ba ha bɩ nʋʋkala hugo nɩmɛ.

⁵⁴ Zʋma chɛɛŋ nɛ ŋɩɩ, dɩ baa ŋaa siri dɩ ba suomi ba chɛ-wiesii-la.

⁵⁵ Haala-la fa sɩ to Yesu harɩŋ a lɩɩ Galilii kɔ, ba to Josɛf harɩŋ a mʋ na bʋbʋa-la, arɩ ŋɩɩ ʋ sɩ hugi Yesu.

⁵⁶ Ŋɩɩ nɛ ba mɩɩra mʋ dɩa a chɛ tʋlaalɩɩ dɩ ba kaa mʋ tɩsɛ Yesu. Ba sii chɛ-wiesii-la chɛɛŋ a wiesi, arɩ wɩalɩŋ Mosis fa sɩ ŋmʋnsa bil dɩ nɩaa tuto sɩ dagɛ ŋɩɩ.