Luuk 22 - WƖA TENIŊ

Ba vʋʋra dɩ ba kpʋ Yesu

¹ Bʋa-la lɛ ba sɩ yie gbieli dɩɩsɩŋ kiele bal gbiele-la fa kpaga nɛ, gbiele-la lɛ ba sɩ yie dii boroboro-la sɩ bɩ sɩbʋrʋŋ kɛnɛ.

² Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba wʋwalɩmɛ dɩ ba na wombii-la ba sɩ jaŋ to a kpʋ Yesu dɩ nɩalɩŋ bɩ jɩŋ, bɛɛ wɩaa baa fá nɩalɩŋ nɛ.

Judas sɛyɛ dɩ ʋ joŋ Yesu yallɛ

³ Ŋɩɩ nɛ Sɩtaanɩ kʋ jʋʋ Yesu harɩ-tooroo fii arɩ balɩa-la dɔŋɔ ba sɩɩ yɩrɛ Judas Ɩsɩkarɔt.

⁴ Ŋɩɩ nɛ Judas sii mʋ bʋla pɩ Wɩɩsʋllɩ sɩpaalaaraa kʋhɩasɩŋ arɩ Wɩa dɩɩ-bal-la kʋhɩasɩŋ ŋɩɩ ʋ sɩ jaŋ to a kɛŋ Yesu yalla pɩba.

⁵ Ba tʋɔŋ tɔrɛ. Ba sɛɩ arɩ ba jaŋ pʋ moribiee.

⁶ Ŋɩɩ nɛ Judas sɛɩ, a suomo chɩchɛ wombii-la ʋ sɩ jaŋ to a kɛŋ Yesu yalla pɩba dɩ nɩalɩŋ bɩ jɩŋ.

Yesu arɩ ʋ harɩ-tooroo dii dɩɩsɩŋ kiele bal gbiele kʋdiilee

⁷ Ŋɩɩ nɛ gbiele-la lɛ ba sɩ yie dii boroboro sɩ bɩ sɩbʋrʋŋ kɛnɛ yi, bʋa-la lɛ sɩ maga dɩ ba kpʋ pie-bie-la ba sɩ jaŋ kaa ŋaa gbiele-la kʋdiilee.

⁸ Ŋɩɩ nɛ Yesu tɩŋ Pɩɩta arɩ Jɔɔŋ a bʋl dɩ ba mʋ ŋaa ba dɩɩsɩŋ kiele bal gbiele kʋdiilee dɩ ba dii.

⁹ Ŋɩɩ nɛ ba pɩɛsʋ, “Nɩɩ nɛ ŋŋ chɛ dɩ la ŋaa kʋdiile-la?”

¹⁰ Ʋ bʋla pɩba, “Bee na, dɩ ma nɛ jʋʋ tabal-la tʋɔŋ, ma jaŋ cheŋ baal kʋbala dɩ ʋ chʋŋ nyuvie arɩ lɩɩŋ. Má to ʋ harɩŋ jʋʋ dɩa-la ʋ sɩɩ jʋʋ.

¹¹ Dɩ ma nɛ jʋa, má bʋla pɩ dɩa-la tɩɩna, ‘La kʋhɩaŋ sɩ la pɩɛsɩŋ dɩ nɩɩ lɛ nɛ nʋhʋɔraa dɩa hɛ, dɩ ʋ dɩ ʋ harɩ-tooroo jʋʋ hɔnɔ dii dɩɩsɩŋ kiele bal gbiele-la kʋdiilee?’

¹² Ʋ jaŋ dagɛma lusuŋ nyuŋ dɩɩ-bal kʋbala, ba wasɛ ʋ kala nɛ. Lee-la nɛ ma jaŋ ŋaa kʋdiile-la.”

¹³ Ŋɩɩ nɛ ba mʋ a na wɩalɩŋ kala ʋ sɩ bʋla pɩba arɩ ba jaŋ na, a ŋaa dɩɩsɩŋ kiele bal gbiele kʋdiile-la.

Kʋdiile-la la sɩ jaŋ dii a liliisi Yesu wɩaa

¹⁴ Bʋa-la sɩ yie dɩ ba dii kʋdiile-la, Yesu arɩ ʋ nanzɔɔba kala hɔŋ dɩ ba dii kɩaa.

¹⁵ Ŋɩɩ nɛ Yesu bʋla pɩba, “Mɩ fa paala cho dɩ la dɩ ma dii kɩaa deemba nɛ, aŋ ka dɩ mɩ-na na hɛɛŋ.

¹⁶ Mɩ jaŋ bʋla pɩma arɩ mɩ bɩra bɩ jaŋ kɔ dɩ mɩ dii kʋdiilee deemba, a kaa mʋ yi bʋa-la lɛ Wɩa kuorii-la sɩ jaŋ kɔ.”

¹⁷ Ŋɩɩ nɛ ʋ joŋ nyʋnyʋala arɩ sɩnɩŋ a lɔllɛ Wɩa aŋ joŋo pɩ ʋ nanzɔɔba-la aŋ bʋl, “Má laa nyʋnyʋala deeŋ arɩ sɩnɩŋ a kaa kpaa ma tɩtɩa.

¹⁸ Mɩ bʋlaa pɩma, mɩ bɩra bɩ jaŋ kɔ dɩ mɩ nyʋa sɩnɩŋ deeŋ, a kaa mʋ yi bʋa-la lɛ Wɩa kuorii-la sɩ jaŋ kɔ.”

¹⁹ Ŋɩɩ nɛ Yesu bɩra joŋ boroboro a lɔllɛ Wɩa aŋ kaa chɔgɛ chɔgɛ, a joŋo pɩba aŋ bʋl, “Mɩ yaraa nɛ ŋɩɩ, mɩ joŋo pɩ Wɩa a tɩŋ ma wɩaa, má laa dii. Maa ŋaa ŋɩɩ a liliisi mɩ wɩaa.”

²⁰ Ba sɩ dii kɩalɩŋ dɛrɛ, ʋ bɩra joŋ nyʋnyʋala arɩ sɩŋ-la a pɩba aŋ bʋl, “Nyʋnyʋala arɩ sɩnɩŋ deeŋ ŋaa nii-falɩɩ nɛ Wɩa hɛ ʋ dɩ ma pɛgɛ. Mɩ chalɩŋ sɩ jaŋ jaasɛ ma wɩaa nɛ tɩɩ Wɩa ta nii-la.

²¹ Má bee na, nɩɩ-la sɩ jaŋ kɛmmɛ yallɛ hɛ la tʋɔŋ nɛ, la kala didii kɩaa.

²² Mɩ-na Nuhuobiine Bie, mɩ jaŋ sʋʋ arɩ Wɩa sɩ dagɛ ŋɩɩ, ama nɩɩ-la sɩ jaŋ jommi yallɛ, ʋ jaŋ na hɛɛŋ yʋgɛ.”

²³ Ŋɩɩ nɛ Yesu nanzɔɔba-la suomo pɩpɩɛsɛ dɔŋɔ arɩ ba tʋɔŋ kʋbɛɛ nɛ jaŋ ŋaa ŋɩɩ?

Yesu harɩ-tooroo kɛŋ ba tʋɔŋ kʋhɩaŋ wɩaa kaa lɩlɛrɛ

²⁴ Ŋɩɩ nɛ Yesu harɩ-tooroo kɛŋ ba tʋɔŋ kʋhɩaŋ wɩaa kaa lɩlɛrɛ.

²⁵ Yesu bʋla pɩba, “Nɩalɩŋ sɩ bɩ Juu tɩŋŋaa ŋaa kɛŋ ba doluŋ kaa hɔŋ ba nɩaa nyuŋ nɛ. Kuoroo dɔnsʋŋ sɩɩ beŋ nɩaa, ba cho dɩ nɩalɩŋ ba sɩɩ beŋ kɛmba kaa yɩyɩrɛ nɩzɔmɔ.

²⁶ Ama ʋ bɩ maga dɩ ma ŋɩŋaa ŋɩɩ. Ʋ maga dɩ ma tʋɔŋ kʋhɩaŋ nɛ bɩrɩmɛ hambie, dɩ ma sɩpaalaara ma nagɛ ma tɩntɩnna.

²⁷ Dɩ nʋʋ nɛ hɔnɔ, aŋ ka ʋ dɔŋɔ ŋaa kʋdiilee pʋ dɩ ʋ didii, ʋ dɩ nɩɩ-la sɩ ŋaa kʋdiile-la pʋpʋ, ba tʋɔŋ kʋbɛɛ nɛ yʋga? Nɩɩ-la sɩ hɔnɔ, ka ba ŋaa kʋdiilee pʋpʋ, ʋ nɛ yʋga. Ama mɩ-na hɛ ma tʋɔŋ a tɩma pɩpɩma nɛ.

²⁸ Ma chɩna gbɛrɛmɛ nɛ mɩ wʋwalɩmaa kala lɛ.

²⁹ Mɩ Nyɩmma pɩmɛ doluŋ nɛ dɩ mɩ dii kuoruŋ. Ŋɩɩ tɩtɩa nɛ mɩ ma jaŋ pɩma doluŋ dɩ ma dii kuoruŋ.

³⁰ Mɩ dɩ ma kala jaŋ dii kʋdiilee Wɩa kuorii-la tʋɔŋ. Ma jaŋ hɔŋ kuoru kpasɩnɩŋ nyuŋ a dii Iziral doho doho fii arɩ balɩa-la sarɩya.”

Yesu bʋla pɩ Pɩɩta arɩ ʋ jaŋ bʋl dɩ ʋ bɩ ʋ jɩŋ

³¹ Ŋɩɩ nɛ Yesu bʋla pɩ Saamɔŋ Pɩɩta, “Saamɔŋ, Saamɔŋ, Sɩtaanɩ laa wombiiŋ nɛ dɩ ʋ magɩsɛ ma kala, dɩ ʋ pɔrɛ nɩzɔŋŋɔɔ nɩbɔŋŋɔɔ lɛ, a nagɛ paara sɩ yie chaarɛ mɩɩ-jɔrʋŋ ta, aŋ ka mɩɩ-biiŋ ŋɩɩ.

³² Ama mɩ chʋɔlɛ Wɩa pɩ ŋ-na Saamɔŋ nɛ dɩ ŋ Wɩa laa diiniŋ sɩ́ lɛl. Dɩ ŋ nɛ mɩɩra kɔ mɩ teeŋ, pɛ ŋ naambiiriŋ ma lɛ dɩ ba chɩŋ ba sɩ laa Wɩa dii naaŋ lɛ woruŋ.”

³³ Ŋɩɩ nɛ Pɩɩta bʋla pʋ, “Mɩ Tɩɩna, dɩ ba nɛ tɔŋ dɩa ma, mɩ ma ŋaa siri nɛ dɩ ba tɔmɛ. Dɩ ba nɛ jaŋ kpʋŋ ma, mɩ ma ŋaa siri nɛ dɩ mɩ sʋʋ.”

³⁴ Ŋɩɩ nɛ Yesu bʋla pɩ Pɩɩta, “Pɩɩta, ji-bele bɩ jaŋ yel jɩnɩŋ, aŋ ka dɩ ŋ bʋl naansɩɩŋ butori arɩ ŋ bɩ mɩ jɩŋ.”

Yesu bʋl moribiee arɩ tokobiee wɩaa pɩ ʋ harɩ-tooroo

³⁵ Ŋɩɩ nɛ Yesu pɩɛsɛ ʋ harɩ-tooroo, “Bʋa-la lɛ mɩ sɩ tɩmma, ma lɩɩ aŋ bɩ moribiee koo sʋllɩ-gbansɩŋ koro, a bɩ nɛntɛŋŋɛɛ tʋŋ bʋlɩa bʋlɩa ma koro, ma sɩ mʋ ŋɩɩ, ma chɛ kʋŋ nɛ kaa?” Ba bʋl dɩ ba bɩ kʋŋkala chɛ ka.

³⁶ Ŋɩɩ nɛ Yesu bʋla pɩba, “Ama lɛɛlɛ ma kʋ-la kala sɩ kɛŋ moribiee lʋaga koo sʋllɩ-gbaŋa, ʋ maga dɩ ʋ joŋ. Ma kʋ-la ma kala sɩ bɩ tokobiiŋ kɛnɛ, ʋ maga dɩ ʋ joŋ ʋ gɛrɩ-balɩŋ yallɛ nɛ a yɔɔ dɔŋɔ.

³⁷ Ŋɩɩ nɛ ba ŋmʋnsɛ Wɩa teniŋ tʋɔŋ. Ba bʋla arɩ ba jaŋ kɛnʋ pɛ wʋbɔŋ ŋɩŋaaraa lɛ. Wɩaa deemba ba ŋmʋnsa a tɩgɛ mɩ lɛ nɛ. Ba kala jaŋ ŋaa mɩ lɛ, bɛɛ wɩaa wɩalɩŋ kala ba sɩ ŋmʋnsa a tɩgɛ mɩ lɛ, ba kala jaŋ sɛnɛ ŋaa a dɛrɛ.”

³⁸ Ŋɩɩ nɛ ʋ harɩ-tooroo bʋla pʋ, “La Tɩɩna, bee na, tokobiee balɩa nɛ ŋ-la.” Ŋɩɩ nɛ Yesu bʋla pɩba, “Má leŋ wɩɩ-la magɛ ŋɩɩ.”

Yesu chʋɔlɛ Wɩa peel-la nyuŋ ba sɩɩ yɩrɛ Olif

³⁹ Ŋɩɩ nɛ Yesu lɩɩ Jerusalɛm lɛ a jɩl peel-la ba sɩɩ yɩrɛ Olif nyuŋ, arɩ ʋ sɩ vɛnɛɛ ŋaa ŋɩɩ. Ŋɩɩ nɛ ʋ harɩ-tooroo to ʋ harɩŋ mʋ.

⁴⁰ Ba sɩ yi lee-la, ʋ bʋla pɩba, “Má chʋɔlɛ Wɩa, dɩ Sɩtaanɩ nɛ magɩsɛma dɩ ʋ sɩ́ ma wuo.”

⁴¹ Ʋ sɩ bʋl ŋɩɩ dɛrɛ, ʋ kieli ʋ harɩ-tooro-la a mʋ sɩpaaŋ mʋapɩlɩɩ, a tuu kpirimi a chʋɔlɛ Wɩa bʋl,

⁴² “Mɩ Nyɩmma, dɩ ŋ tʋɔtɔrʋŋ lɛ nɛ, lɩɩsɛ hɛɛ-la sɩɩ kɔ mɩ lɛ. Ama mɩ-na tʋɔtɔrʋŋ lɛ dee, ŋ-na tʋɔtɔrʋŋ lɛ nɛ.” [

⁴³ Ŋɩɩ nɛ Wɩa tɩndaara lɩɩ wɩa-nyuŋ a kʋ tuu ʋ teeŋ a pʋ doluŋ.

⁴⁴ Ʋ tʋɔŋ fa faasa chei nɛ woruŋ. Ŋɩɩ nɛ ʋ chʋɔlɛ Wɩa arɩ sɩɩfɩɛsɩŋ, ʋ suoluŋ paala nagɛ chalɩŋ a tutuu tinteeŋ.]

⁴⁵ Ʋ sɩ chʋɔlɛ Wɩa dɛrɛ, ʋ sii a mɩɩra mʋ ʋ harɩ-tooroo teeŋ, dɩ ba pɩŋ doŋ, bɛɛ wɩaa ba tʋɔŋ cheye nɛ woruŋ.

⁴⁶ Ŋɩɩ nɛ ʋ pɩɛsɛba, “Ma sɛnɛ pɩŋ nɛɛ? Má sii chʋɔlɛ Wɩa, dɩ Sɩtaanɩ nɛ kʋ magɩsɛma, dɩ ʋ sɩ́ ma wuo.”

Ba kɛŋ Yesu

⁴⁷ Yesu fa sɩɩ bʋl wɩaa ŋɩɩ, ʋ niiŋ ha bɩ tinteeŋ tele dɩ nɩ-daŋ kɔ. Yesu harɩ-tooroo fii arɩ balɩa-la dɔŋɔ ba sɩɩ yɩrɛ Judas nɛ kɛmba kɔ. Judas mʋ Yesu teeŋ a guoru.

⁴⁸ Ŋɩɩ nɛ Yesu pɩɛsʋ, “Judas, ŋ sɛnɛ guorimi ŋ-la nɛ dɩ ŋ joŋ mɩ-na Nuhuobiine Bie yallɛɛ?”

⁴⁹ Yesu harɩ-tooro-la fa sɩ hɛ nɩmɛ a na wɩɩ-la sɩɩ ŋaa, ŋɩɩ nɛ ba pɩɛsɛ Yesu, “La Tɩɩna, ŋŋ chɛ dɩ la taba arɩ la tokobie-la nɛɛ?”

⁵⁰ Ŋɩɩ nɛ Yesu harɩ-tooroo dɔŋɔ joŋ tokobiiŋ, a ta nɩalɩŋ dɔŋɔ nadiiŋ dɩgɩlɩŋ keri. Baal-la fa ŋaa Wɩɩsʋllɩ sɩpaalaara kʋhɩaŋ tɩntɩnnʋ nɛ.

⁵¹ Ŋɩɩ nɛ Yesu bʋl dɩ ʋ maga nɛ, dɩ ba leŋ. Ʋ sɩ bʋl ŋɩɩ, ʋ digi baal-la dɩgɩl-la lɛ a ŋaa ʋ fɩɛlɛ.

⁵² Ŋɩɩ nɛ Yesu pɩɛsɛ Wɩɩsʋllɩ sɩpaalaaraa kʋhɩasɩŋ arɩ Wɩa dɩɩ-bal-la kʋhɩasɩŋ arɩ ba taŋ kʋhɩasɩ-la sɩ kɔ dɩ ba kɛnʋ, “Mɩ ŋaa wʋcheeru nɛ ma paa tokobiee arɩ toŋguloo a kʋkɔ dɩ ma kɛmmɛɛ?

⁵³ Mɩ dɩ ma kala nɛ fa hɛ Wɩa dɩɩ-bal-la lɛ tapʋlɩɩ kala, aŋ ka ma bɩ walɩma dɩ ma kɛmmɛ nɩmɛ. Ama bʋa deeŋ lɛ nɛ birimiŋ tɩɩna Sɩtaanɩ pɩma doluŋ ma wuo kɔ dɩ ma kɛmmɛ.”

Pɩɩta sɩ ʋ bɩ Yesu jɩŋ

⁵⁴ Ŋɩɩ nɛ ba kɛŋ Yesu a kaa mʋ Wɩɩsʋllɩ sɩpaalaara kʋhɩaŋ dɩa, ka Pɩɩta daa tuto ba harɩŋ.

⁵⁵ Dɩ ba hɛ nyiniŋ kaala tʋtʋɔbaanɩŋ a hɔnɔ wiwieni. Pɩɩta ma mʋ pɛ ba lɛ.

⁵⁶ Toli-bie kʋbala sɩ ŋaa dɩa-la tɩntɩnnʋ to nyiŋ-la pʋlʋmʋŋ lɛ a na Pɩɩta, a benu jim, aŋ bʋl, “Baala deeŋ ma faa to Yesu harɩŋ nɛ.”

⁵⁷ Ŋɩɩ nɛ Pɩɩta sɩ, “Haal, mɩ paala bɩ ʋ jɩŋ.”

⁵⁸ Mʋapɩlɩɩ dɩ baal kʋbala ma naʋ a bʋl, “Ŋ ma ŋaa ba dɔŋɔ nɛ.” Ŋɩɩ nɛ Pɩɩta bʋl, “Nandɔŋ, mɩ dee.”

⁵⁹ Ʋ bɩ diene bɩra dɩ baal dɔŋ ma nɛ ŋɩɩ a bʋl, “Wʋtɩtɩɩ, baala deeŋ ŋaa Yesu harɩ-tooroo dɔŋɔ nɛ, bɛɛ wɩaa ʋ ma ŋaa Galilii tɩɩna nɛ.”

⁶⁰ Ŋɩɩ nɛ Pɩɩta bɩra bʋl, “Nandɔŋ, mɩ paala bɩ wɩɩ-la ŋ sɩɩ bʋl jɩŋ.” Pɩɩta sɩɩ bʋl ŋɩɩ, ʋ niiŋ ha bɩ tinteeŋ tele, dɩ ji-bele yele.

⁶¹ Ŋɩɩ nɛ La Tɩɩna daasɛ a beŋ Pɩɩta. Ʋ liisi wɩɩ-la Yesu fa sɩ bʋla, “Ka dɩ ji-bele-na yel jɩnɩŋ, ŋ jaŋ bʋl naansɩɩŋ butori arɩ ŋ bɩ mɩ jɩŋ.”

⁶² Ŋɩɩ nɛ Pɩɩta lɩɩ a faasa yel.

Ba sieri Yesu lɛ aŋ ŋmobu

⁶³ Ŋɩɩ nɛ nɩalɩŋ sɩ pɔ Yesu sieri ʋ lɛ aŋ ŋmobu.

⁶⁴ Ba vɔɔ ʋ sɩaa tɔ a ŋmobu aŋ pɩɛsʋ, “Dagɛ nɩɩ-la sɩ ŋmobuŋ.”

⁶⁵ Ba bʋl wɩaa ma yʋgɛ a tʋʋsʋ.

Ba kɛŋ Yesu kɔ nɩalɩŋ sɩ yie hilime vʋvʋʋrɛ wɩaa sɩpaaŋ

⁶⁶ Taŋ sɩ pʋla, Juu tɩŋŋaa kʋhɩasɩŋ arɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba hilimi aŋ leŋ ba kɛŋ Yesu kɔ ba sɩpaaŋ.

⁶⁷ Ŋɩɩ nɛ ba pɩɛsʋ, “Dagɛla, ŋ nɛ ŋaa nɩɩ-la Wɩa sɩ lɩɩsaa?” Ŋɩɩ nɛ Yesu bʋla pɩba, “Dɩ mɩ nɛ bʋla pɩma ma, ma bɩ jaŋ laa dii.

⁶⁸ Dɩ mɩ nɛ saa bɩra pɩɛsɛma wɩɩ ma, ma bɩ jaŋ bʋl wɩɩkala,

⁶⁹ ama a lɩɩ lɛɛlɛ a kaa mʋ mɩ-na Nuhuobiine Bie jaŋ hɔŋ Wɩa doluŋ kala Tɩɩna nadiiŋ, nɩduoŋ dɩhɔnʋŋ.”

⁷⁰ Ŋɩɩ nɛ ba kala pɩɛsʋ, “Ŋ nɛ saa ŋaa Wɩa Bie koo?” Ŋɩɩ nɛ Yesu bʋla pɩba, “Ma bʋl woruŋ nɛ, mɩ nɛ sɛnɛ ŋaa Wɩa Bie.”

⁷¹ Ŋɩɩ nɛ nɩalɩŋ bʋl, “La bɩra bɩ sɩada tɩɩna kala ka chɛ. La tɩtɩa nɩɩ wɩɩ-la ʋ sɩ bʋla nɛ.”