Luuk 2 - WƖA TENIŊ

Ba lʋl Yesu

¹ Baal kʋbala nɛ fa hɛ nɩmɛ, baa yɩrɛ Ɔgasɩtʋs. Ʋ nɛ fa ŋaa Rom tɩŋŋaa kuoru-balɩŋ. Bʋa-la lɛ ʋ bʋl dɩ ba dɩɩsɛ ʋ tinteeŋ nɩaa.

² Ba sɩ bugumo dɩɩsɛ nɩaa ŋɩɩ, baal kʋbala nɛ fa chɩŋ kuoru-balɩŋ nyuŋ Siiria tinteeŋ lɛ, baa yɩrɛ Kiriinias.

³ Ŋɩɩ nɛ nʋʋkala mʋ ʋ jaŋ dɩ ba dɩɩsʋ nɩmɛ.

⁴ Josɛf ma sii Nazarɛt Galilii tinteeŋ lɛ a mʋ Judiya tinteeŋ, a mʋ jʋʋ taŋ kʋbala baa yɩrɛ Bɛtɩlɛhɛm. Lee-la nɛ ba fa lʋl kuoro Devit. Josɛf fa ŋaa kuoro Devit doho nʋʋ nɛ. Ŋɩɩ nɛ tɩɩ ʋ mʋ nɩmɛ.

⁵ Ʋ dɩ Mɛɛrɩ kala nɛ mʋ nɩmɛ. Mɛɛrɩ fa sɛyɛ arɩ ʋ jaŋ jaaʋ, aŋ kɛŋ luoruŋ.

⁶ Ba sɩ yi Bɛtɩlɛhɛm, ba hɔŋ nɩmɛ. Ŋɩɩ nɛ Mɛɛrɩ lʋlʋŋ yi,

⁷ aŋ ka ba bɩ leriŋ na nʋhʋɔraa dɩa lɛ dɩ ba jʋʋ. Ŋɩɩ nɛ tɩɩ ba mʋ jʋʋ ja-dɩa. Nɩmɛ nɛ Mɛɛrɩ lʋl ʋ bii-bumbuŋ, hambolibie, a kɛŋ gɛrɩŋ bɛʋ a joŋu bil yaŋ nyuŋ.

Pie-daaraa nɩɩ bile lʋlʋŋ wɩaa

⁸ Bʋa-la lɛ pie-daaraa nɛ fa hɛ tintee-la sɛmɛ dɔŋɔ a hɛ yaŋ tʋɔŋ a chʋa nɩmɛ tɩtaŋɩŋ aa beŋ ba piesee.

⁹ Ŋɩɩ nɛ Wɩa tɩndaarʋ kʋbala kɔ ba teeŋ. Ʋ sɩ kɔ ŋɩɩ, Wɩa pʋlʋmʋŋ chaana hɛ ba lɛ. Fawʋllʋŋ kɛmba.

¹⁰ Ŋɩɩ nɛ Wɩa tɩndaarʋ-la bʋla pɩba, “Má sɩ́ leŋe dɩ fawʋllʋŋ kɛmma. Mɩ kɛŋ wʋzɔŋŋɔɔ nɛ kɔ dɩ mɩ bʋla pɩma. Nɩɩ-la kala sɩ nɩɩ wʋzɔmɔ-la, ʋ tʋɔŋ jaŋ tɔrɛ.

¹¹ Tɩtaŋɩŋ deeŋ ba lʋl ma Laataara nɛ Devit jaŋ lɛ. Baa yɩrʋ La Tɩɩna Kirisito, Nɩɩ-la Wɩa sɩ lɩɩsa.

¹² Ŋ-la nɛ ma jaŋ wuo to jɩmʋ. Dɩ ma nɛ mʋ nɩmɛ, ma jaŋ na bile dɩ ba kɛŋ gɛnnɩŋ bɛʋ a joŋu bil yaŋ nyuŋ.”

¹³ Ŋɩɩ nɛ Wɩa tɩndaaraa yʋgɛ a guu lɩɩ a pɛ Wɩa tɩndaarʋ-la lɛ, ba yɩɩ yɩɩlaa a dɛnnɛ Wɩa a bʋl,

¹⁴ “Má leŋ dɩ la dɛnnɛ Wɩa sɩ hɛ Wɩa-jaŋ lɛ. Nɩalɩŋ nyuŋ Wɩa tʋɔŋ sɩ tɔrɔ tinteeŋ lɛ jaŋ na fɩɛlɩŋ.”

¹⁵ Ŋɩɩ nɛ Wɩa tɩndaara-la mɩɩra mʋ Wɩa-jaŋ. Ka pie-daara-la bʋla pɩ dɔŋɔ, “Má leŋ dɩ la mʋ Bɛtɩlɛhɛm a na wɩɩ-la La Tɩɩna sɩ to ʋ tɩndaaraa lɛ a bʋla pɩla.”

¹⁶ Ba sii fá lɩma lɩma a mʋ na Mɛɛrɩ arɩ Josɛf. Ba naba aŋ na bile ma dɩ ʋ pɩŋ yaŋ nyuŋ.

¹⁷ Ŋɩɩ nɛ piedaara-la bʋl wɩɩ-la Wɩa tɩndaara-la sɩ bʋla pɩba a tɩgɛ bile lɛ a pɩ bile naaŋ arɩ ʋ nyɩmma arɩ nɩaa dɔnsʋŋ.

¹⁸ Nɩalɩŋ kala sɩ nɩɩ wɩalɩŋ, ʋ ŋaaba wʋkpuŋkpere.

¹⁹ Mɛɛrɩ laa wɩaa deemba kala hɛ ʋ nyuŋ lɛ a kaa bɩbɩɩnɛ.

²⁰ Ŋɩɩ nɛ pie-daara-la mɩɩra mʋmʋ, aŋ yɩɩ yɩɩlaa a dɩdɛnne Wɩa a tɩŋ ba sɩ na wɩalɩŋ kala Wɩa tɩndaarʋ-la sɩ bʋla pɩba.

Ba hɛ Yesu yɩrɩŋ

²¹ Bile sɩ yi tapʋlaa chori, ba keri ʋ peniŋ aŋ hɛ ʋ yɩrɩŋ. Ba hɛ Yesu pʋ, yɩrɩ-la Wɩa tɩndaarʋ-la fa sɩ daga bʋa-la lɛ Mɛɛrɩ fa ha sɩ bɩ luoruŋ kɛnɛ.

Ba kɛŋ Yesu jʋʋ Wɩa dɩa

^22-23 Wɩalɩŋ Mosis fa sɩ ŋmʋnsa bil dɩ nɩaa tuto dɔŋɔ nɛ ŋ-la: “Dɩ baal arɩ ʋ haal nɛ lʋl ba bii-bumbuŋ, dɩ ʋ nɛ ŋaa baal, ʋ maga dɩ ba mʋ pɩɩsɛ ba disiniŋ ta nɛ.” Mosis fa bɩra ŋmʋnsa bil Wɩa teniŋ tʋɔŋ dɩ nʋʋ na-kala nɛ lʋl ʋ bii-bumbuŋ, dɩ bile nɛ ŋaa baal, dɩ ʋ joŋo pɩ Wɩa. Ŋɩɩ nɛ Josɛf arɩ Mɛɛrɩ ŋaa ŋɩɩ. Ba sii joŋ bile a kaa mʋ Jerusalɛm dɩ ba joŋu pɩ Wɩa.

²⁴ Ba bɩra ŋmʋnsa dɩ ba kpʋ kokosuŋ balɩa maa a pɩ Wɩa. Ŋɩɩ nɛ Josɛf arɩ Mɛɛrɩ sii mʋ Wɩa dɩa dɩ ba ŋaa ŋɩɩ.

²⁵ Bʋa-la lɛ baal kʋbala nɛ fa hɛ Jerusalɛm lɛ, baa yɩrɛ Simioŋ. Ʋ fa ŋaa nɩzɔŋ nɛ a fɩfá Wɩa a fa gbɩgbɛrɛ dɩ Wɩa laa Iziral tɩŋŋaa ta. Wɩa Dɩŋ-zɔmʋŋ ma hɛ ʋ lɛ woruŋ.

²⁶ Wɩa Dɩŋ-zɔmʋŋ fa bʋla pʋ arɩ ʋ bɩ jaŋ sʋʋ see dɩ ʋ na Kirisito, Nɩɩ-la Wɩa sɩ jaŋ lɩɩsɛ dɩ ʋ kɔ.

²⁷ Ŋɩɩ nɛ Yesu nyɩmma arɩ ʋ naaŋ jʋʋ Wɩa dɩɩ-balɩŋ a joŋu pɩ Wɩa aŋ pɛ ŋaa ŋɩɩ Wɩa niiŋ wɩaa sɩ daga. Dɩ Wɩa Dɩŋ-zɔmʋŋ kɛŋ Simioŋ ma kʋ jʋʋ Wɩa dɩa.

²⁸ Simioŋ na bile a laaʋ hɛ ʋ nɩsaa lɛ aŋ dɛnnɛ Wɩa a bʋl,

²⁹ “Mɩ Tɩɩna Wɩɩjarɩbakɔ, leŋ dɩ wɩalɩŋ ŋ sɩ bʋla pɩmɛ sɛnɛ kʋ ŋaa. Leŋ dɩ mɩ-na ŋ tɩntɩnna na wombiiŋ a sʋʋ arɩ yarɩfɩɛlaa.

³⁰ Mɩ sɛnɛ na nɩɩ-la sɩ kɔ dɩ ʋ laa dʋnɩa nɩaa ta nɛ.

³¹ Ŋ tɩmʋ dɩ ʋ kɔ nʋʋkala teeŋ nɛ, dɩ nʋʋkala naʋ.

³² Bie deeŋ jaŋ nagɛ pʋlʋmʋŋ a dagɛ nɩalɩŋ sɩ bɩ Juu tɩŋŋaa ŋaa wombiiŋ, ka dɩ ŋ nɩaa Iziral tɩŋŋaa ma na.”

³³ Simioŋ sɩ bʋl ŋɩɩ dɛrɛ, wɩalɩŋ ʋ fa sɩ bʋla a tɩgɛ bile lɛ ŋaa bile nyɩmma arɩ ʋ naaŋ wʋkpuŋkpere.

³⁴ Ŋɩɩ nɛ Simioŋ chʋɔlɛ Wɩa pɩba dɩ ʋ pɛ ba lɛ aŋ bʋla pɩ ʋ naaŋ Mɛɛrɩ, “Wɩa lɩɩsɛ ŋ bie deeŋ dɩ ʋ kʋ dɔgɩsɛ nɩalɩŋ sɩ bɩ ʋ wɩaa laa dii nɛ, aŋ laa nɩalɩŋ sɩ laa ʋ wɩaa dii ta Iziral tɩŋŋaa tʋɔŋ. Wɩa ta bie deeŋ dɩ ʋ ŋaa magɩl nɛ. Nɩaa yʋga sɩ jaŋ joŋ ba harɩŋ yɩaʋ,

³⁵ ama ba tʋɔbɩɩnaa jaŋ lɩɩ dɩ-jalɩŋ.” Ŋɩɩ nɛ ʋ bɩra bʋla pɩ Mɛɛrɩ, “Ŋ tɩtɩa tʋɔŋ jaŋ chei woruŋ ŋ bile wɩaa a nagɛ ba sɩ joŋ sɩa tɔbʋŋ.”

³⁶ Haal kʋbala ma nɛ fa hɛ nɩmɛ, ʋ yɩrɩŋ nɛ Ana. Ʋ fa ŋaa Wɩa wʋlaabʋllʋ nɛ. Ʋ nyɩmma ma yɩrɩŋ nɛ fa Fanʋɛl a lɩɩ Asa doho nɩaa tʋɔŋ. Ʋ fa ŋaa hanɩhɩaŋ nɛ. Ʋ fa jaa bala jɩsɩŋ balɩpɛ nɛ ka ʋ sʋʋ,

³⁷ ka ʋ ŋaa yo-haal a kaa mʋ yi ʋ jɩsɩŋ mahɩŋ banɛsɛ arɩ banɛsɛ lɛ. Ʋ fa yie hɛ Wɩa dɩɩ-balɩŋ lɛ nɛ wɩɩhɛyɛ arɩ tɩtaŋɩŋ kala, ʋ bɩ lɩɩ. Ʋ yie vɔɔ niiŋ nɩmɛ aŋ pɛ chʋchʋɔlɛ Wɩa.

³⁸ Simioŋ fa sɩ bʋl wɩaa pɩpɩ Mɛɛrɩ ŋɩɩ, dɩ Ana ma kʋ jʋʋ. Ʋ na bile a dɛnnɛ Wɩa aŋ bʋl wɩaa a tɩgɛ bile lɛ a pɩ nɩalɩŋ kala fa sɩ gbɛrɛ dɩ Wɩa laa Jerusalɛm nɩaa ta.

Ba mɩɩra mʋ Nazarɛt

³⁹ Mɛɛrɩ arɩ Josɛf sɩ ŋaa wɩalɩŋ kala Wɩa sɩ sɩ dɩ ba ŋaa Jerusalɛm lɛ a dɛrɛ, ba mɩɩra mʋ Galilii tinteeŋ a mʋ ba jaŋ Nazarɛt.

⁴⁰ Bile waa a kɛŋ doluŋ a kala ŋaa wʋjɩmɩɩ. Wɩa pɛ ʋ lɛ.

Yesu hɔŋ Wɩa dɩɩ-balɩŋ lɛ

⁴¹ Jɩna-kala Yesu nyɩmma arɩ ʋ naaŋ yie mʋ Jerusalɛm dɩ ba gbieli dɩɩsɩŋ kiele bal gbiele.

⁴² Yesu sɩ ŋaa jɩsɩŋ fii arɩ balɩa, ʋ dɩ ʋ nyɩmma arɩ ʋ naaŋ mʋ dɩɩsɩŋ kiele bal gbiele-la Jerusalɛm lɛ, arɩ ba sɩ vɛnɛɛ ŋaa ŋɩɩ.

⁴³ Gbiele-la sɩ dɛrɛ, ba mɩɩraa mʋ dɩa, ka Yesu ha hɛ Jerusalɛm lɛ. Ama ʋ naaŋ arɩ ʋ nyɩmma bɩ jɩŋ.

⁴⁴ Ba fa bɩɩna arɩ ʋ hɛ ba nɩalɩŋ sɩ mɩɩra mʋ ba jaŋ tʋɔŋ nɛ. Ba suomo chɩchɛʋ ba naambiiriŋ arɩ ba nandɔnsʋŋ tʋɔŋ. Ba vɛŋ deeŋ deeŋ wɩa tuu jʋʋ a chɛʋ ka.

⁴⁵ Ba sɩ chɛʋ ka, ba mɩɩra mʋ Jerusalɛm a bee chɩchɛʋ nɩmɛ.

⁴⁶ Ʋ tapʋlaa batori chɛɛŋ nɛ ba naʋ Wɩa-dɩɩ-balɩŋ lɛ, dɩ ʋ dɩ Wɩa teniŋ kerichiba hɔnɔ. Ʋʋ jegili wɩalɩŋ ba sɩɩ bʋl aŋ pɛ pɩpɩɛsɛba wɩaa ma.

⁴⁷ Nɩalɩŋ kala sɩ hɛ nɩmɛ a nɩɩ ʋ sɩɩ chaarɛ wɩaa sɩaa arɩ wʋjɩmɩŋ ŋɩɩ, ʋ ŋaaba wʋkpuŋkpere.

⁴⁸ Ʋ nyɩmma arɩ ʋ naaŋ sɩ naʋ, ʋ ŋaaba ma wʋkpuŋkpere. Ŋɩɩ nɛ ʋ naaŋ pɩɛsʋ, “Mɩ bii, bɛɛ nɛ tɩɩ ŋ ŋaala ŋ-la? Mɩ dɩ ŋ nyɩmma gɔllɔ chɛŋ ka nɛ.”

⁴⁹ Ŋɩɩ nɛ ʋ pɩɛsɛba, “Bɛɛ nɛ tɩɩ ma gɔllɔɔ chɛmɛ? Ma bɩ jɩŋ arɩ mɩ jaŋ hɛ mɩ Nyɩmma dɩa lɛɛ?”

⁵⁰ Ama ba fa bɩ wɩɩ-la ʋ sɩ bʋla pɩba bʋbʋɔŋ jɩŋ.

⁵¹ Ŋɩɩ nɛ Yesu arɩ ʋ nyɩmma arɩ ʋ naaŋ mɩɩra mʋ Nazarɛt a hɔŋ nɩmɛ. Ba sɩ hɛ nɩmɛ, ʋ to ba niiŋ woruŋ. Ʋ naaŋ laa wɩalɩŋ kala sɩ ŋaa a hɛ ʋ tʋɔŋ lɛ aa bɩɩnɛ.

⁵² Ŋɩɩ nɛ Yesu waa, ʋ wʋjɩmɩŋ ma pʋŋa pɛ. Wɩa chou, nɩaa ma zizilu woruŋ.