Luuk 19 - WƖA TENIŊ

Zakɩyas

¹ Yesu mʋ to taŋ kʋbala baa yɩrɛ Jeriko.

² Baal kʋbala nɛ fa hɛ nɩmɛ. Ʋ fa ŋaa lampoo laaraa kʋhɩaŋ nɛ. Ʋ yɩrɩŋ nɛ fa Zakɩyas. Ʋ fa kɛŋ kɩaa nɛ woruŋ.

³ Ʋ faa chɛ dɩ ʋ na Yesu, ama ʋ fa ŋaa nɩ-kuu nɛ. A tɩŋ nɩ-daŋ-la fa sɩ hɛ nɩmɛ ŋɩɩ, ʋ fa bɩ ʋ wuo na.

⁴ Ŋɩɩ nɛ ʋ kieli nɩ-daŋ-la, a fá mʋ jɩl tɩa, dɩ ʋ wuo na Yesu. Ʋ jɩma dɩ ʋ jaŋ kʋ to tɩa-la bʋbʋɔŋ bal.

⁵ Yesu sɩ kʋ to tɩa-la bʋbʋɔŋ bɩbal, ʋ wʋla beŋ tɩa-la nyuŋ a naʋ a bʋla pɩ Zakɩyas, “Zakɩyas, kʋ tuu lɩma. Ʋ maga dɩ mɩ chʋa ŋ dɩa lɛ nɛ jɩnɩŋ.”

⁶ Zakɩyas sɩ nɩɩ ŋɩɩ, ʋ tʋɔŋ tɔrɛ. Ʋ tuu lɩma lɩma a kɛŋ Yesu mʋ ʋ dɩa.

⁷ Nɩalɩŋ kala sɩ hɛ nɩmɛ a na ŋɩɩ, ba suomo gʋgʋrɩmɛ wɩaa a bʋl, “Baala deeŋ mʋa dɩ ʋ chʋa wʋbɔŋ ŋaarʋ-la dɩa lɛ nɛ.”

⁸ Yesu sɩ hɛ Zakɩyas dɩa lɛ ŋɩɩ, Zakɩyas sii chɩŋ a bʋla pɩ La Tɩɩna Yesu, “Mɩ Kʋhɩaŋ, jegile nɩɩ mɩ teeŋ. Mɩ jaŋ joŋ mɩ kɩaa kpaa magɛ dɔŋɔ a pɩ summoo. Dɩ mɩ nɛ gɩrɩmɛ nʋʋ maa, mɩ jaŋ tiŋ ʋ tɩɩna arɩ moribiee naansɩɩŋ bʋnɛsɛ.”

⁹ Ŋɩɩ nɛ Yesu bʋla pʋ, “Wɩa laa ŋ dɩ ŋ dɩa nɩaa kala ta nɛ jɩnɩŋ. Baala deeŋ ma ŋaa Abɩraham doho nʋʋ nɛ,

¹⁰ bɛɛ wɩaa mɩ-na Nuhuobiine Bie kɔ dɩ mɩ chɛ a laa nɩalɩŋ sɩ lɛlɛ nɛ a ta.”

Yesu magɛ namaga a tɩgɛ moribiiŋ lɛ

¹¹ Ŋɩɩ nɛ Yesu magɛ namaga a pɩ nɩalɩŋ sɩ nɩɩ wɩalɩŋ ʋ sɩ bʋla. Bʋa deeŋ lɛ ʋ ka mʋa ka dɩ ʋ yi Jerusalɛm. Ŋɩɩ nɛ tɩɩ nɩalɩŋ bɩɩnɛ arɩ bʋa-la lɛ Wɩa kuorii-la sɩ jaŋ guu kɔ kpaga nɛ.

¹² Ŋɩɩ nɛ ʋ bʋl, “Nɩbal kʋbala nɛ sie a mʋ ta-bolii kʋbala dɩ ba bil u kuoruŋ, ka dɩ ʋ mɩɩra kɔ ʋ jaŋ a ŋaa kuoro.

¹³ Ka dɩ ʋ-na mʋ, ʋ yɩrɛ ʋ dɩa tɩntɩnnaa fii, a joŋ siidi bʋɩ a pɩ kʋŋkala, a bʋl dɩ ba kaa bɩbɩrɩmɛ dɩ ʋ mʋ aŋ kɔ.

¹⁴ Ama ʋ taŋ-la nɩaa bɛrʋ nɛ. Ŋɩɩ nɛ ba tɩŋ tɩndaaraa ba kiri ʋ harɩŋ mʋ a bʋla pɩ taŋ-la dɔŋɔ kuoro arɩ ba bɩ cho dɩ ʋ ŋaa ba taŋ kuoro.

¹⁵ Ka baal-la mʋ dii kuoruŋ aŋ mɩɩra kɔ. Ʋ sɩ mɩɩra kɔ, ʋ yɩrɛ ʋ tɩntɩnna-la ʋ fa sɩ joŋ moribii-la pa dɩ ʋ na ba sɩ na nyʋʋrʋŋ magɛ ŋɩɩ.

¹⁶ Ŋɩɩ nɛ tɩntɩnnɩ-bumbuŋ kɔ ʋ teeŋ a bʋla pɩ ʋ kʋhɩaŋ, ‘Mɩ kʋhɩaŋ, ŋ siidi bʋɩ-la ŋ sɩ joŋo pɩmɛ bɩrɩmɛ siidi bʋɩ fii nɛ.’

¹⁷ Ŋɩɩ nɛ ʋ kʋhɩaŋ-la bʋla pʋ, ‘Ŋ ŋaa woruŋ. Ŋ ŋaa tɩntɩnnɩ-tɩtɩɩ nɛ. Ŋ sɩ ŋaa ŋɩɩ a beŋ kʋbii-bie nyuŋ woruŋ, mɩ jaŋ leŋ dɩ ŋ bibeŋ tasɩŋ fii.’

¹⁸ Ŋɩɩ nɛ tɩntɩnnɩ-lɩamɩŋ ma kɔ ʋ teeŋ a bʋl, ‘Mɩ kʋhɩaŋ, ŋ siidi bʋɩ-la ŋ sɩ joŋo pɩmɛ, ʋ bɩrɩmɛ siidi bʋɩ banɔŋ nɛ.’

¹⁹ Ŋɩɩ nɛ ʋ kʋhɩaŋ-la bʋla pʋ dɩ ʋ jaŋ bibeŋ tasɩŋ banɔŋ.

²⁰ Ŋɩɩ nɛ tɩntɩnnɩ dɔŋ-la ma kɔ a bʋla pʋ, ‘Mɩ kʋhɩaŋ, na ŋ siidi bʋɩ-la ŋ sɩ joŋo pɩmɛ, mɩ joŋo gul gɛrɩ-kɔsʋŋ lɛ nɛ a joŋo faa.

²¹ Mɩɩ fáŋ nɛ, bɛɛ wɩaa ŋ ŋaa nɩtɛrɛ nɛ. Ŋ yie kɛŋ nɩaa kɩaa lɩlaa nɛ aŋ kʋkʋŋ kɩalɩŋ ŋ sɩ bɩ duo.’

²² Ŋɩɩ nɛ ʋ kʋhɩaŋ-la bʋla pʋ, ‘Ŋ ŋaa tɩntɩnnɩ-bɔŋ nɛ. Wɩalɩŋ tɩtɩa ŋ sɩ bʋla nɛ jaŋ dii ŋ sarɩya a joŋ cheeriŋ pɩŋ. Ŋ jɩma arɩ mɩ ŋaa nɩtɛrɛ nɛ a kɛŋ nɩaa kɩaa lɩlaa aŋ pɛ kʋkʋŋ kɩalɩŋ mɩ sɩ bɩ duo.

²³ Bɛɛ nɛ saa tɩɩ ŋ bɩ mɩ moribiiŋ joŋo bil lee-la ba sɩɩ bil moribiee? Mɩ fa sɩ mɩɩra kɔ ŋ-la, mɩ fa jaŋ laa moribie-la arɩ mɩ nyʋʋrʋŋ kala.’

²⁴ Ŋɩɩ nɛ ʋ bʋla pɩ ʋ tɩntɩnnɩ dɔnsʋ-la fa sɩ chɩŋ nɩmɛ, ‘Má laa siidi bʋɩ-la ʋ teeŋ a joŋo pɩ nɩɩ-la sɩ kɛŋ siidi bʋɩ fii-la.’

²⁵ Ŋɩɩ nɛ ba bʋla pʋ, ‘La Tɩɩna, bee na, ʋ paala kɛŋ siidi bʋɩ fii nɛ, aŋ ka ŋŋ chɛ dɩ ŋ joŋ siidi bʋɩ-la a pɛ pʋ ŋɩɩ.’

²⁶ Ŋɩɩ nɛ ʋ bʋla pɩba, ‘Nɩɩ-la sɩ paala kɛŋ kɩaa yʋgɛ, Wɩa jaŋ wasa chɛ pɛ a pʋ, ama nɩɩ-la sɩ bɩ faasa kɛŋ kɩaa yʋgɛ, mʋapɩlɩɩ-la ma ʋ sɩ kɛnɛ, Wɩa jaŋ kaa laa ʋ teeŋ.

²⁷ Mɩ dʋndɔŋŋɔɔ deemba saa sɩ bɩ cho dɩ mɩ ŋaa ba kuoro, má kɛmba kaa kɔ daha dɩ mɩ ŋaa ba kpʋba mɩ sɩpaaŋ.’ ”

Yesu jʋʋ Jerusalɛm

²⁸ Yesu sɩ bʋl wɩaa deemba dɛrɛ, ʋ joŋ ʋ wombiiŋ a laa ʋ harɩ-tooroo sɩpaaŋ ba mʋmʋ Jerusalɛm.

²⁹ Ba kʋ yi Bɛtɩfagɩ arɩ Bɛtanɩ dɩɩrɩŋ a kʋ yi peel kʋbala baa yɩrɛ Olif. Ŋɩɩ nɛ Yesu lɩɩsɛ ʋ harɩ-tooroo balɩa a tɩmba a bʋla pɩba,

³⁰ “Má mʋ taŋ-la sɩ hɛ sɩpaaŋ. Dɩ ma nɛ mʋa, ma jaŋ na kaku-bie dɩ ba vɔbɔ a kɩɩ. Nʋʋ ha bɩ ʋ jɩla. Má mʋ puri a kaa kɔ.

³¹ Dɩ ma nɩɩ puru, dɩ ba pɩɛsɛma a bʋl dɩ bɛɛ nɛ tɩɩ maa puri, má bʋl dɩ La Tɩɩna Yesu nɩɩ chɛ, dɩ ʋ nɛ sɩ dɩ ma puro kaa kɔ.”

³² Ŋɩɩ nɛ ba mʋ a na wɩalɩŋ kala Yesu fa sɩ bʋla pɩba.

³³ Ba sɩɩ puri kaku-bie-la, ʋ tɩɩna pɩɛsɛba, “Bɛɛ nɛ tɩɩ maa puri kaku-bie-la?”

³⁴ Ŋɩɩ nɛ ba bʋla pʋ, “La Tɩɩna nɩɩ chɛ.”

³⁵ Ŋɩɩ nɛ ba kɛŋ kaku-bie-la a kaa mʋ pɩ Yesu, a wuri ba gɛnnɩŋ a daŋ kaku-bie-la nyuŋ, aŋ kɛŋ Yesu ʋ jɩla hɔŋ.

³⁶ Ʋ sɩ jɩl kaku-bie-la aa vɛŋ ŋɩɩ, ba joŋ ba gɛnnɩŋ jɛrɛ wombiiŋ lɛ.

³⁷ Ʋ sɩ mʋ kpagɛ Jerusalɛm, lee-la wombiiŋ sɩ lɩɩ Olif peel-la nyuŋ tuu, nɩ-daŋ-la fa sɩ to Yesu harɩŋ suomo jʋjʋɔsɛ a faasa dɩdɛnnɛ Wɩa a tɩŋ ʋ wʋmagɩla-la kala ba sɩ na.

³⁸ Ba bʋla, “Wɩa jaŋ pɛ kuoru-la sɩɩ kɔ La Tɩɩna Wɩa doluŋ lɛ. Ba jaŋ hɔŋ arɩ yarɩfɩɛlaa Wɩa-jaŋ lɛ. Wɩa yɩrɩŋ ma jaŋ yɩrɛ.”

³⁹ Ŋɩɩ nɛ Farisii tɩŋŋaa dɔnsʋŋ fa sɩ hɛ nɩ-daŋ-la tʋɔŋ bʋla pɩ Yesu, “La kʋhɩaŋ, ŋaa dɩ ŋ harɩ-tooro-la kɛŋ goŋ.”

⁴⁰ Ŋɩɩ nɛ Yesu bʋla pɩba, “Mɩ jaŋ bʋla pɩma, dɩ ba nɛ fa bɩ goŋ maa ŋaa, tabɩaa ma tɩtɩa jaŋ ŋaa goŋ.”

Yesu yel Jerusalɛm wɩaa

⁴¹ Yesu sɩɩ mʋ ŋɩɩ, ʋ kʋ kpagɛ Jerusalɛm a na taŋ-la. Ʋ yel a tɩŋ taŋ-la nɩaa wɩaa aŋ bʋl,

⁴² “Mɩ fa cho dɩ ma taŋ deeŋ nɩaa jɩŋ ŋɩɩ ma sɩ jaŋ ŋaa a hɔŋ arɩ yarɩfɩɛlaa nɛ jɩnɩŋ, ama ma bɩ wuo na.

⁴³ Tapʋlɩɩ jaŋ yi dɩ ma dʋndɔŋŋɔɔ saa kɛrɛ gollima, dɩ ma sɩ́ wuo lɩɩ.

⁴⁴ Ba jaŋ kpʋ ma nɩalɩŋ kala sɩ hɛ taŋ-la tʋɔŋ, ma dɩ ma biiriŋ kala. Tabɩɩ-bie ma bɩra bɩ jaŋ daŋ ʋ dɔŋɔ lɛ lee-la. Ma bɩ sɛyɛ bʋa-la lɛ Wɩa sɩ kɔ dɩ ʋ laama ta. Ŋɩɩ nɛ tɩɩ ba jaŋ ŋaa ŋɩɩ.”

Yesu jʋʋ Wɩa dɩa

⁴⁵ Yesu sɩ mʋ jʋʋ Wɩa dɩa, ʋ suomo kikiri nɩalɩŋ sɩɩ yallɛ kɩaa nɩmɛ

⁴⁶ aŋ bʋla pɩba, “Ba ŋmʋnsɛ Wɩa teniŋ tʋɔŋ a bʋl arɩ Wɩa sɩ, ʋ dɩa jaŋ ŋaa lee-la nɩaa sɩ jaŋ chʋchʋɔlɛ Wɩa, aŋ ka ma mɩɩra kaa bɩrɩmɛ gaarɩ-dɩa.”

⁴⁷ Tapʋlɩɩ-na kala Yesu yie dɩdagɛ nɩaa Wɩa dɩɩ-bal-la tʋɔŋ. Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba arɩ Juu tɩŋŋaa sɩpaalaaraa chɩchɛ dɩ ba kpʋʋ.

⁴⁸ Ama ba bɩ jɩŋ wombii-la ba sɩ jaŋ to, bɛɛ wɩaa nɩalɩŋ kala fa sɩ hɛ nɩmɛ jegile nɩnɩɩ wɩalɩŋ ʋ sɩɩ bʋl nɛ arɩ sɩɩfɩɛsɩŋ.