Luuk 18 - WƖA TENIŊYo-haala mʋ na sarɩya diire 1 Ŋɩɩ nɛ Yesu bɩra magɛ namaga pɩba a dagɛba dɩ ba chʋchʋɔlɛ Wɩa bʋa na-kala lɛ a sɩ́ leŋ. 2 Ʋ sɩ, dɩ sarɩya diiru nɛ fa hɛ nɩmɛ taŋ kʋbala lɛ. Ʋ fa bɩ Wɩa ka fá. Ʋ bɩ nuhuobiinee ma kaa tɩtɩŋ. 3 Yo-haal kʋbala ma nɛ fa hɛ taŋ-la lɛ. Ʋ yie vɛnɛɛ mʋ sarɩya diiru-la teeŋ a sʋsʋlʋ dɩ ʋ pɛ ʋ lɛ dɩ ʋ wuo dii sarɩya a lo ʋ dʋndɔmɔ. 4 Bumbuŋ kala baal-la vɩa dɩ ʋ pɛ ʋ lɛ. Ama ʋ sɩ yie vɛnɛɛ kɔ ʋ teeŋ ŋɩɩ, ŋɩɩ nɛ baal-la bʋla pɩ ʋ tɩtɩa, “Mɩ paala bɩ Wɩa ka fá, mɩ bɩ nuhuobiinee ma kaa tɩtɩŋ. 5 Ama yo-haala deeŋ sɩ vɛnɛɛ walɩmɛmɛ ŋɩɩ, mɩ jaŋ pɛ ʋ lɛ dɩ ʋ dii ʋ sarɩya. Ŋɩɩ dee ʋ ha jaŋ vɛnɛ wʋwalɩmɛmɛ dɩ mɩ lɔl.” 6 Ŋɩɩ nɛ La Tɩɩna Yesu bɩra bʋla pɩ nɩaa, “Má jegile nɩɩ wɩalɩŋ sarɩya diiru-la sɩ bɩ wʋtɩtɩɩ kɛnɛ sɩ bʋla. 7 Ma saa bɩɩna Wɩa bɩ jaŋ pɛ nɩalɩŋ ʋ sɩ lɩɩsa lɛ dɩ ba laa kʋsɩŋŋaa, dɩ ba nɩɩ yel ʋ teeŋ wɩɩhɛyɛ arɩ tɩtaŋɩŋ kala? Ma bɩɩna ʋ jaŋ kɛmba kaa didieni aŋ vɩa dɩ ʋ pɛ ba lɛɛ. 8 Mɩ jaŋ bʋla pɩma, ʋ jaŋ pɛ ba lɛ dɩ ba laa kʋsɩŋŋaa. Ʋ jaŋ ŋaa ŋɩɩ lɩma lɩma. Ama bʋa-la lɛ mɩ-na Nuhuobiine Bie sɩ jaŋ mɩɩra kɔ, mɩ jaŋ na nɩaa sɩ laamɛ dii dʋnɩa deeŋ lɛɛ?” 9 Yesu bɩra magɛ namaga a pɩ nɩalɩŋ sɩ bɩɩna ba tʋɔŋ lɛ dɩ ba kɛŋ tʋɔpʋla aŋ lileeni ba dɔnsʋŋ tɩŋŋaa. Ʋ bʋla pɩba, 10 “Baalaa balɩa nɛ sii mʋ Wɩa dɩa dɩ ba chʋɔlɛ Wɩa. Dɔŋɔ lɩɩ nɩalɩŋ ba sɩɩ yɩrɛ Farisii tɩŋŋaa tʋɔŋ nɛ. Dɔŋɔ-la ma ŋaa lampoo laarʋ. 11 Farisii tɩɩna-la sii chɩŋ a bigisi ʋ tɩtɩa lɛ a chʋɔlɛ Wɩa a bʋl, ‘La Tɩɩna Wɩa, mɩɩ lɔllʋŋ arɩ mɩ sɩ bɩ nɩaa dɔnsʋŋ naga, nɩalɩŋ sɩ gɔllɔ kɛŋ nɩaa kɩaa lɩlaa, koo nɩalɩŋ sɩ bɩ wʋtɩtɩɩ kɛnɛ, koo nɩalɩŋ sɩ gɔllɔ chɩchɛ nɩaa haalaa. Mɩ bɩ lampoo laara deeŋ ma sɩ hɛ daha naga. 12 Mɩ yie vɔɔ niiŋ bʋlɩa nɛ yɔbɔ-na kala lɛ. Kʋ-la kala mɩ sɩ na, mɩ yie kaa kpaa leree fii nɛ a joŋ dɔŋɔ pɩŋ.’ 13 Ama lampoo laarʋ-la chɩŋ dɩ-bolii. Ʋ paala bɩ ʋ sɩaa ma kaa wʋl wɩa-nyuŋ aŋ paa ʋ nɩsaa chʋŋ ʋ nyuŋ lɛ aŋ bʋl, ‘Wɩa, fá mɩ nisusuŋ. Mɩ ŋaa wʋbɔŋ ŋaarʋ nɛ.’ ” 14 Ŋɩɩ nɛ Yesu bɩra bʋl, “Mɩ jaŋ bʋla pɩma arɩ Wɩa joŋ lampoo laarʋ-la wʋbɔŋŋɔɔ chɛʋ nɛ, ʋ mʋ dɩa. Ama ʋ bɩ ŋɩɩ ŋaa Farisii tɩɩna-la lɛ. Nɩɩ-la kala sɩɩ bigisi ʋ tɩtɩa lɛ, Wɩa jaŋ kɛnʋ muuri. Ama nɩɩ-la sɩ kɛŋ ʋ tɩtɩa muuri, Wɩa jaŋ ŋaa dɩ ʋ yʋgɛ.” Yesu sʋl Wɩa pɩ hambiisiŋ Mat. 19.13-15 ; Maak 10.13-16 15 Nɩaa dɔnsʋŋ kɛŋ ba hambiisiŋ ma kɔ Yesu teeŋ dɩ ʋ joŋ ʋ nɩsɩŋ daŋ ba lɛ dɩ Wɩa pɛ ba lɛ. Yesu harɩ-tooroo naba a kpɩa ba lɛ. 16 Ba sɩ kɔ ŋɩɩ, ʋ bʋla pɩ ʋ harɩ-tooro-la, “Má leŋ dɩ hambiisi-la kɔ mɩ teeŋ, má sɩ́ ba kiru. Nɩalɩŋ sɩ jaŋ jʋʋ Wɩa kuorii-la tʋɔŋ nagɛ hambiisiŋ deemba nɛ.” 17 Ʋ bɩra bʋla pɩ nɩaa a bʋl, “Wʋtɩtɩɩ nɛ mɩ bʋlaa pɩma, nɩɩ-la kala sɩ bɩ Wɩa to a nagɛ hambie sɩ yie to ʋ nyɩmma arɩ ʋ naaŋ ŋɩɩ, ʋ bɩ jaŋ wuo jʋʋ Wɩa kuorii-la tʋɔŋ.” Kɩaa tɩɩna kɔ Yesu teeŋ Mat. 19.16-30 ; Maak 10.17-31 18 Ŋɩɩ nɛ Juu tɩŋŋaa kʋhɩaŋ kʋbala kɔ Yesu teeŋ a pɩɛsʋ, “Mɩ kʋhɩa-zɔmʋŋ, ɛɛ nɛ mɩ jaŋ ŋaa a kɛŋ mɩɩsɩ-la sɩ bɩ dɛrɛ?” 19 Ŋɩɩ nɛ Yesu pɩɛsʋ, “Bɛɛ nɛ tɩɩ ŋ yɩrɛmɛ kʋhɩa-zɔmʋŋ? Nʋʋkala bɩ zɔŋ see Wɩa. 20 Ŋ jɩŋ wɩalɩŋ ba sɩ ŋmʋnsa bil dɩ ma tuto nɛɛ? Ba nɛ ŋ-la: Sɩ́ ŋ dɔŋɔ tɩɩna haala chɛ. Sɩ́ nɩaa kpʋ. Sɩ́ gaa. Dɩ ŋ nɛ ŋaa pɛ-naarʋ wɩɩ lɛ, sɩ́ wɩaa nyɩɛ, zizil ŋ nyɩmma arɩ ŋ naaŋ.” 21 Ŋɩɩ nɛ baal-la bʋl, “Mɩ to wɩaa deemba kala mɩ hambiiriŋ lɛ nɛ.” 22 Yesu sɩ nɩɩ wɩalɩŋ ʋ sɩ bʋla, ʋ bʋla pʋ, “Wʋbala nɛ ka ŋ ha jaŋ ŋaa. Joŋ ŋ kɩaa kala a yallɛ, a joŋ moribie-la a pɩ summoo, aŋ kʋ tomi. Ŋ nɛ ŋaa ŋɩɩ, ŋ jaŋ kɛŋ kɩaa Wɩa-jaŋ lɛ.” 23 Baal-la sɩ nɩɩ wɩɩŋ deeŋ, ʋ tʋɔŋ kala chei, bɛɛ wɩaa ʋ fa kɛŋ kɩaa nɛ woruŋ. 24 Yesu sɩ na dɩ ʋ tʋɔŋ cheye, ʋ bʋl, “Ʋ ŋaa wʋduo nɛ arɩ nɩalɩŋ sɩ kɛŋ kɩaa sɩ jaŋ wuo jʋʋ Wɩa kuorii-la tʋɔŋ. 25 Ʋ bɩ hɛɩ arɩ bʋntaŋŋa sɩ jaŋ wuo to gɛrɩ-hɛmɩŋ bʋa lɩɩ arɩ ʋ sɩ hɛyɛ ŋɩɩ nɩɩ-la sɩ kɛŋ kɩaa sɩ jaŋ wuo jʋʋ Wɩa kuorii-la tʋɔŋ.” 26 Nɩalɩŋ sɩ nɩɩ Yesu sɩ bʋl ŋɩɩ, ba pɩɛsʋ, “Kʋbɛɛ nɛ saa Wɩa jaŋ laa ta?” 27 Ŋɩɩ nɛ Yesu bʋla pɩba, “Wɩɩ-la sɩ jaŋ kperi nuhuobiine, ʋ bɩ Wɩa wuo kperi.” 28 Ŋɩɩ nɛ Pɩɩta bʋla pʋ, “Bee na, la leŋ la dɩɩsɩŋ nɛ aŋ tuto ŋ harɩŋ.” 29 Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, nɩɩ-la kala sɩ jaŋ wuo leŋ ʋ dɩa arɩ ʋ haala koo ʋ naambiiriŋ koo ʋ nyɩmma arɩ ʋ naaŋ koo ʋ biiriŋ a tɩŋ Wɩa kuorii-la wɩaa, 30 ʋ jaŋ bɩra na kɩaa yʋgɛ a kɩɩ kɩalɩŋ ʋ sɩ leŋe ta. Dɩ ʋ nɛ kʋ sʋʋ, ʋ jaŋ na mɩɩsɩ-la sɩ bɩ dɛrɛ.” Yesu bɩra bʋl ʋ sʋʋŋ wɩaa pɩ ʋ harɩ-tooroo Mat. 20.17-19 ; Maak 10.32-34 31 Ŋɩɩ nɛ Yesu kɛŋ ʋ harɩ-tooroo fii arɩ balɩa-la a kaa sʋʋsa lɩɩ a bʋla pɩba, “Má bee na, laa mʋ Jerusalɛm nɛ. Nɩmɛ wɩalɩŋ kala Wɩa wʋlaabʋllaa sɩ ŋmʋnsa a mʋ tɩgɛ mɩ-na Nuhuobiine Bie lɛ jaŋ ŋaa. 32 Ba jaŋ jommi hɛ nɩalɩŋ sɩ bɩ Juu tɩŋŋaa ŋaa nɩsɩŋ lɛ. Ba jaŋ mɔmmɛ, a tʋʋsɛmɛ, aŋ tʋ nantʋɔrʋŋ hɛ mɩ lɛ. 33 Ba jaŋ vɩɩrɛmɛ aŋ kpʋmɛ, ka dɩ mɩ sii sʋʋŋ lɛ tapʋlaa batori chɛɛŋ.” 34 Ama Yesu harɩ-tooro-la bɩ wɩɩ-la ʋ sɩ bʋla bʋbʋɔŋ jɩŋ. (Wɩɩ-la ʋ fa sɩ bʋla bʋbʋɔŋ fa faa nɛ.) Yesu vaarɛ sʋllɩ-la sɩ nyʋlɩma Mat. 20.29-34 ; Maak 10.46-52 35 Ŋɩɩ nɛ Yesu arɩ ʋ harɩ-tooroo sii dɩ ba mʋ Jerusalɛm. Ba mʋ kpagɛ taŋ kʋbala baa yɩrɛ Jeriko, dɩ nyʋlʋŋ kʋbala fa hɔŋ wombiiŋ niiŋ a sʋsʋl kɩaa. [ 36 Ʋ sɩ nɩɩ nɩ-daŋ-la sɩɩ bal dɔmɔ, ʋ pɩɛsɛ, “Bɛɛ kʋŋ nɛ?”] 37 Ŋɩɩ nɛ ba bʋla pʋ arɩ Yesu sɩ lɩɩ Nazarɛt nɩɩ bal. 38 Ŋɩɩ nɛ ʋ yɩrɛ Yesu a bʋl, “Yesu, Devit nihi-lɩɛrɛ, fá mɩ nenige.” 39 Nɩalɩŋ sɩ laa ʋ sɩpaaŋ kpɩaʋ lɛ dɩ ʋ kɛŋ goŋ. Ama ʋ faasa yɩrɛ a kɩɩ ŋɩɩ a bʋl, “Yesu, Devit nihi-lɩɛrɛ, fá mɩ nenige.” 40 Ŋɩɩ nɛ Yesu chɩŋ aŋ bʋl dɩ ba kɛŋ nyʋlʋŋ-la kaa kɔ ʋ teeŋ. Nyʋlʋŋ-la kɔ. 41 Ŋɩɩ nɛ Yesu pɩɛsʋ, “Bɛɛ kʋŋ nɛ ŋŋ chɛ dɩ mɩ ŋaa pɩŋ?” Ʋ bʋla pʋ, “Mɩ Kʋhɩaŋ, leŋ dɩ mɩ sɩaa suri dɩ mɩ nɩna.” 42 Ŋɩɩ nɛ Yesu bʋla pʋ, “Ŋ sɩaa jaŋ suri, ŋ sɩ laa Wɩa dii nɛ ŋaa ŋ duori.” 43 Ʋ sɩaa guu suri. Ŋɩɩ nɛ ʋ to Yesu harɩŋ a dɩdɛnnɛ Wɩa. Nɩ-daŋ-la ma kala sɩ na ŋɩɩ, ba ma kala dɛnnɛ Wɩa. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.